| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
7. பட²மஏஜாஸுத்தங்
7. Paṭhamaejāsuttaṃ
90. ‘‘ஏஜா , பி⁴க்க²வே, ரோகோ³, ஏஜா க³ண்டோ³, ஏஜா ஸல்லங். தஸ்மாதிஹ, பி⁴க்க²வே, ததா²க³தோ அனேஜோ விஹரதி வீதஸல்லோ. தஸ்மாதிஹ , பி⁴க்க²வே, பி⁴க்கு² சேபி ஆகங்கெ²ய்ய ‘அனேஜோ விஹரெய்யங் 1 வீதஸல்லோ’தி, சக்கு²ங் ந மஞ்ஞெய்ய, சக்கு²ஸ்மிங் ந மஞ்ஞெய்ய, சக்கு²தோ ந மஞ்ஞெய்ய, சக்கு² மேதி ந மஞ்ஞெய்ய; ரூபே ந மஞ்ஞெய்ய, ரூபேஸு ந மஞ்ஞெய்ய, ரூபதோ ந மஞ்ஞெய்ய, ரூபா மேதி ந மஞ்ஞெய்ய; சக்கு²விஞ்ஞாணங் ந மஞ்ஞெய்ய, சக்கு²விஞ்ஞாணஸ்மிங் ந மஞ்ஞெய்ய, சக்கு²விஞ்ஞாணதோ ந மஞ்ஞெய்ய, சக்கு²விஞ்ஞாணங் மேதி ந மஞ்ஞெய்ய; சக்கு²ஸம்ப²ஸ்ஸங் ந மஞ்ஞெய்ய, சக்கு²ஸம்ப²ஸ்ஸஸ்மிங் ந மஞ்ஞெய்ய, சக்கு²ஸம்ப²ஸ்ஸதோ ந மஞ்ஞெய்ய, சக்கு²ஸம்ப²ஸ்ஸோ மேதி ந மஞ்ஞெய்ய. யம்பித³ங் சக்கு²ஸம்ப²ஸ்ஸபச்சயா உப்பஜ்ஜதி வேத³யிதங் ஸுக²ங் வா து³க்க²ங் வா அது³க்க²மஸுக²ங் வா தம்பி ந மஞ்ஞெய்ய, தஸ்மிம்பி ந மஞ்ஞெய்ய, ததோபி ந மஞ்ஞெய்ய, தங் மேதி ந மஞ்ஞெய்ய.
90. ‘‘Ejā , bhikkhave, rogo, ejā gaṇḍo, ejā sallaṃ. Tasmātiha, bhikkhave, tathāgato anejo viharati vītasallo. Tasmātiha , bhikkhave, bhikkhu cepi ākaṅkheyya ‘anejo vihareyyaṃ 2 vītasallo’ti, cakkhuṃ na maññeyya, cakkhusmiṃ na maññeyya, cakkhuto na maññeyya, cakkhu meti na maññeyya; rūpe na maññeyya, rūpesu na maññeyya, rūpato na maññeyya, rūpā meti na maññeyya; cakkhuviññāṇaṃ na maññeyya, cakkhuviññāṇasmiṃ na maññeyya, cakkhuviññāṇato na maññeyya, cakkhuviññāṇaṃ meti na maññeyya; cakkhusamphassaṃ na maññeyya, cakkhusamphassasmiṃ na maññeyya, cakkhusamphassato na maññeyya, cakkhusamphasso meti na maññeyya. Yampidaṃ cakkhusamphassapaccayā uppajjati vedayitaṃ sukhaṃ vā dukkhaṃ vā adukkhamasukhaṃ vā tampi na maññeyya, tasmimpi na maññeyya, tatopi na maññeyya, taṃ meti na maññeyya.
‘‘ஸோதங் ந மஞ்ஞெய்ய…பே॰… கா⁴னங் ந மஞ்ஞெய்ய…பே॰… ஜிவ்ஹங் ந மஞ்ஞெய்ய, ஜிவ்ஹாய ந மஞ்ஞெய்ய, ஜிவ்ஹாதோ ந மஞ்ஞெய்ய, ஜிவ்ஹா மேதி ந மஞ்ஞெய்ய; ரஸே ந மஞ்ஞெய்ய…பே॰… ஜிவ்ஹாவிஞ்ஞாணங் ந மஞ்ஞெய்ய…பே॰… ஜிவ்ஹாஸம்ப²ஸ்ஸங் ந மஞ்ஞெய்ய…பே॰… யம்பித³ங் ஜிவ்ஹாஸம்ப²ஸ்ஸபச்சயா உப்பஜ்ஜதி வேத³யிதங் ஸுக²ங் வா து³க்க²ங் வா அது³க்க²மஸுக²ங் வா தம்பி ந மஞ்ஞெய்ய, தஸ்மிம்பி ந மஞ்ஞெய்ய, ததோபி ந மஞ்ஞெய்ய, தங் மேதி ந மஞ்ஞெய்ய.
‘‘Sotaṃ na maññeyya…pe… ghānaṃ na maññeyya…pe… jivhaṃ na maññeyya, jivhāya na maññeyya, jivhāto na maññeyya, jivhā meti na maññeyya; rase na maññeyya…pe… jivhāviññāṇaṃ na maññeyya…pe… jivhāsamphassaṃ na maññeyya…pe… yampidaṃ jivhāsamphassapaccayā uppajjati vedayitaṃ sukhaṃ vā dukkhaṃ vā adukkhamasukhaṃ vā tampi na maññeyya, tasmimpi na maññeyya, tatopi na maññeyya, taṃ meti na maññeyya.
‘‘காயங் ந மஞ்ஞெய்ய…பே॰… மனங் ந மஞ்ஞெய்ய, மனஸ்மிங் ந மஞ்ஞெய்ய, மனதோ ந மஞ்ஞெய்ய, மனோ மேதி ந மஞ்ஞெய்ய; த⁴ம்மே ந மஞ்ஞெய்ய…பே॰… மனோ விஞ்ஞாணங்…பே॰… மனோஸம்ப²ஸ்ஸங்…பே॰… யம்பித³ங் மனோஸம்ப²ஸ்ஸபச்சயா உப்பஜ்ஜதி வேத³யிதங் ஸுக²ங் வா து³க்க²ங் வா அது³க்க²மஸுக²ங் வா தம்பி ந மஞ்ஞெய்ய, தஸ்மிம்பி ந மஞ்ஞெய்ய, ததோபி ந மஞ்ஞெய்ய, தங் மேதி ந மஞ்ஞெய்ய; ஸப்³ப³ங் ந மஞ்ஞெய்ய, ஸப்³ப³ஸ்மிங் ந மஞ்ஞெய்ய, ஸப்³ப³தோ ந மஞ்ஞெய்ய, ஸப்³ப³ங் மேதி ந மஞ்ஞெய்ய.
‘‘Kāyaṃ na maññeyya…pe… manaṃ na maññeyya, manasmiṃ na maññeyya, manato na maññeyya, mano meti na maññeyya; dhamme na maññeyya…pe… mano viññāṇaṃ…pe… manosamphassaṃ…pe… yampidaṃ manosamphassapaccayā uppajjati vedayitaṃ sukhaṃ vā dukkhaṃ vā adukkhamasukhaṃ vā tampi na maññeyya, tasmimpi na maññeyya, tatopi na maññeyya, taṃ meti na maññeyya; sabbaṃ na maññeyya, sabbasmiṃ na maññeyya, sabbato na maññeyya, sabbaṃ meti na maññeyya.
‘‘ஸோ ஏவங் அமஞ்ஞமானோ ந கிஞ்சிபி லோகே உபாதி³யதி. அனுபாதி³யங் ந பரிதஸ்ஸதி. அபரிதஸ்ஸங் பச்சத்தஞ்ஞேவ பரினிப்³பா³யதி . ‘கீ²ணா ஜாதி, வுஸிதங் ப்³ரஹ்மசரியங், கதங் கரணீயங் நாபரங் இத்த²த்தாயா’தி பஜானாதீ’’தி. ஸத்தமங்.
‘‘So evaṃ amaññamāno na kiñcipi loke upādiyati. Anupādiyaṃ na paritassati. Aparitassaṃ paccattaññeva parinibbāyati . ‘Khīṇā jāti, vusitaṃ brahmacariyaṃ, kataṃ karaṇīyaṃ nāparaṃ itthattāyā’ti pajānātī’’ti. Sattamaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 7-8. பட²மஏஜாஸுத்தாதி³வண்ணனா • 7-8. Paṭhamaejāsuttādivaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 7-8. பட²மஏஜாஸுத்தாதி³வண்ணனா • 7-8. Paṭhamaejāsuttādivaṇṇanā
