| Library / Tipiṭaka / ติปิฎก • Tipiṭaka / สํยุตฺตนิกาย • Saṃyuttanikāya |
๗. ปฐมเอชาสุตฺตํ
7. Paṭhamaejāsuttaṃ
๙๐. ‘‘เอชา , ภิกฺขเว, โรโค, เอชา คโณฺฑ, เอชา สลฺลํฯ ตสฺมาติห, ภิกฺขเว, ตถาคโต อเนโช วิหรติ วีตสโลฺลฯ ตสฺมาติห , ภิกฺขเว, ภิกฺขุ เจปิ อากเงฺขยฺย ‘อเนโช วิหเรยฺยํ 1 วีตสโลฺล’ติ, จกฺขุํ น มเญฺญยฺย, จกฺขุสฺมิํ น มเญฺญยฺย, จกฺขุโต น มเญฺญยฺย, จกฺขุ เมติ น มเญฺญยฺย; รูเป น มเญฺญยฺย, รูเปสุ น มเญฺญยฺย, รูปโต น มเญฺญยฺย, รูปา เมติ น มเญฺญยฺย; จกฺขุวิญฺญาณํ น มเญฺญยฺย, จกฺขุวิญฺญาณสฺมิํ น มเญฺญยฺย, จกฺขุวิญฺญาณโต น มเญฺญยฺย, จกฺขุวิญฺญาณํ เมติ น มเญฺญยฺย; จกฺขุสมฺผสฺสํ น มเญฺญยฺย, จกฺขุสมฺผสฺสสฺมิํ น มเญฺญยฺย, จกฺขุสมฺผสฺสโต น มเญฺญยฺย, จกฺขุสมฺผโสฺส เมติ น มเญฺญยฺยฯ ยมฺปิทํ จกฺขุสมฺผสฺสปจฺจยา อุปฺปชฺชติ เวทยิตํ สุขํ วา ทุกฺขํ วา อทุกฺขมสุขํ วา ตมฺปิ น มเญฺญยฺย, ตสฺมิมฺปิ น มเญฺญยฺย, ตโตปิ น มเญฺญยฺย, ตํ เมติ น มเญฺญยฺยฯ
90. ‘‘Ejā , bhikkhave, rogo, ejā gaṇḍo, ejā sallaṃ. Tasmātiha, bhikkhave, tathāgato anejo viharati vītasallo. Tasmātiha , bhikkhave, bhikkhu cepi ākaṅkheyya ‘anejo vihareyyaṃ 2 vītasallo’ti, cakkhuṃ na maññeyya, cakkhusmiṃ na maññeyya, cakkhuto na maññeyya, cakkhu meti na maññeyya; rūpe na maññeyya, rūpesu na maññeyya, rūpato na maññeyya, rūpā meti na maññeyya; cakkhuviññāṇaṃ na maññeyya, cakkhuviññāṇasmiṃ na maññeyya, cakkhuviññāṇato na maññeyya, cakkhuviññāṇaṃ meti na maññeyya; cakkhusamphassaṃ na maññeyya, cakkhusamphassasmiṃ na maññeyya, cakkhusamphassato na maññeyya, cakkhusamphasso meti na maññeyya. Yampidaṃ cakkhusamphassapaccayā uppajjati vedayitaṃ sukhaṃ vā dukkhaṃ vā adukkhamasukhaṃ vā tampi na maññeyya, tasmimpi na maññeyya, tatopi na maññeyya, taṃ meti na maññeyya.
‘‘โสตํ น มเญฺญยฺย…เป.… ฆานํ น มเญฺญยฺย…เป.… ชิวฺหํ น มเญฺญยฺย, ชิวฺหาย น มเญฺญยฺย, ชิวฺหาโต น มเญฺญยฺย, ชิวฺหา เมติ น มเญฺญยฺย; รเส น มเญฺญยฺย…เป.… ชิวฺหาวิญฺญาณํ น มเญฺญยฺย…เป.… ชิวฺหาสมฺผสฺสํ น มเญฺญยฺย…เป.… ยมฺปิทํ ชิวฺหาสมฺผสฺสปจฺจยา อุปฺปชฺชติ เวทยิตํ สุขํ วา ทุกฺขํ วา อทุกฺขมสุขํ วา ตมฺปิ น มเญฺญยฺย, ตสฺมิมฺปิ น มเญฺญยฺย, ตโตปิ น มเญฺญยฺย, ตํ เมติ น มเญฺญยฺยฯ
‘‘Sotaṃ na maññeyya…pe… ghānaṃ na maññeyya…pe… jivhaṃ na maññeyya, jivhāya na maññeyya, jivhāto na maññeyya, jivhā meti na maññeyya; rase na maññeyya…pe… jivhāviññāṇaṃ na maññeyya…pe… jivhāsamphassaṃ na maññeyya…pe… yampidaṃ jivhāsamphassapaccayā uppajjati vedayitaṃ sukhaṃ vā dukkhaṃ vā adukkhamasukhaṃ vā tampi na maññeyya, tasmimpi na maññeyya, tatopi na maññeyya, taṃ meti na maññeyya.
‘‘กายํ น มเญฺญยฺย…เป.… มนํ น มเญฺญยฺย, มนสฺมิํ น มเญฺญยฺย, มนโต น มเญฺญยฺย, มโน เมติ น มเญฺญยฺย; ธเมฺม น มเญฺญยฺย…เป.… มโน วิญฺญาณํ…เป.… มโนสมฺผสฺสํ…เป.… ยมฺปิทํ มโนสมฺผสฺสปจฺจยา อุปฺปชฺชติ เวทยิตํ สุขํ วา ทุกฺขํ วา อทุกฺขมสุขํ วา ตมฺปิ น มเญฺญยฺย, ตสฺมิมฺปิ น มเญฺญยฺย, ตโตปิ น มเญฺญยฺย, ตํ เมติ น มเญฺญยฺย; สพฺพํ น มเญฺญยฺย, สพฺพสฺมิํ น มเญฺญยฺย, สพฺพโต น มเญฺญยฺย, สพฺพํ เมติ น มเญฺญยฺยฯ
‘‘Kāyaṃ na maññeyya…pe… manaṃ na maññeyya, manasmiṃ na maññeyya, manato na maññeyya, mano meti na maññeyya; dhamme na maññeyya…pe… mano viññāṇaṃ…pe… manosamphassaṃ…pe… yampidaṃ manosamphassapaccayā uppajjati vedayitaṃ sukhaṃ vā dukkhaṃ vā adukkhamasukhaṃ vā tampi na maññeyya, tasmimpi na maññeyya, tatopi na maññeyya, taṃ meti na maññeyya; sabbaṃ na maññeyya, sabbasmiṃ na maññeyya, sabbato na maññeyya, sabbaṃ meti na maññeyya.
‘‘โส เอวํ อมญฺญมาโน น กิญฺจิปิ โลเก อุปาทิยติฯ อนุปาทิยํ น ปริตสฺสติฯ อปริตสฺสํ ปจฺจตฺตเญฺญว ปรินิพฺพายติ ฯ ‘ขีณา ชาติ, วุสิตํ พฺรหฺมจริยํ, กตํ กรณียํ นาปรํ อิตฺถตฺตายา’ติ ปชานาตี’’ติฯ สตฺตมํฯ
‘‘So evaṃ amaññamāno na kiñcipi loke upādiyati. Anupādiyaṃ na paritassati. Aparitassaṃ paccattaññeva parinibbāyati . ‘Khīṇā jāti, vusitaṃ brahmacariyaṃ, kataṃ karaṇīyaṃ nāparaṃ itthattāyā’ti pajānātī’’ti. Sattamaṃ.
Footnotes:
Related texts:
อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / สํยุตฺตนิกาย (อฎฺฐกถา) • Saṃyuttanikāya (aṭṭhakathā) / ๗-๘. ปฐมเอชาสุตฺตาทิวณฺณนา • 7-8. Paṭhamaejāsuttādivaṇṇanā
ฎีกา • Tīkā / สุตฺตปิฎก (ฎีกา) • Suttapiṭaka (ṭīkā) / สํยุตฺตนิกาย (ฎีกา) • Saṃyuttanikāya (ṭīkā) / ๗-๘. ปฐมเอชาสุตฺตาทิวณฺณนา • 7-8. Paṭhamaejāsuttādivaṇṇanā
