| Library / Tipiṭaka / តិបិដក • Tipiṭaka / សំយុត្តនិកាយ • Saṃyuttanikāya |
៧. បឋមឯជាសុត្តំ
7. Paṭhamaejāsuttaṃ
៩០. ‘‘ឯជា , ភិក្ខវេ, រោគោ, ឯជា គណ្ឌោ, ឯជា សល្លំ។ តស្មាតិហ, ភិក្ខវេ, តថាគតោ អនេជោ វិហរតិ វីតសល្លោ។ តស្មាតិហ , ភិក្ខវេ, ភិក្ខុ ចេបិ អាកង្ខេយ្យ ‘អនេជោ វិហរេយ្យំ 1 វីតសល្លោ’តិ, ចក្ខុំ ន មញ្ញេយ្យ, ចក្ខុស្មិំ ន មញ្ញេយ្យ, ចក្ខុតោ ន មញ្ញេយ្យ, ចក្ខុ មេតិ ន មញ្ញេយ្យ; រូបេ ន មញ្ញេយ្យ, រូបេសុ ន មញ្ញេយ្យ, រូបតោ ន មញ្ញេយ្យ, រូបា មេតិ ន មញ្ញេយ្យ; ចក្ខុវិញ្ញាណំ ន មញ្ញេយ្យ, ចក្ខុវិញ្ញាណស្មិំ ន មញ្ញេយ្យ, ចក្ខុវិញ្ញាណតោ ន មញ្ញេយ្យ, ចក្ខុវិញ្ញាណំ មេតិ ន មញ្ញេយ្យ; ចក្ខុសម្ផស្សំ ន មញ្ញេយ្យ, ចក្ខុសម្ផស្សស្មិំ ន មញ្ញេយ្យ, ចក្ខុសម្ផស្សតោ ន មញ្ញេយ្យ, ចក្ខុសម្ផស្សោ មេតិ ន មញ្ញេយ្យ។ យម្បិទំ ចក្ខុសម្ផស្សបច្ចយា ឧប្បជ្ជតិ វេទយិតំ សុខំ វា ទុក្ខំ វា អទុក្ខមសុខំ វា តម្បិ ន មញ្ញេយ្យ, តស្មិម្បិ ន មញ្ញេយ្យ, តតោបិ ន មញ្ញេយ្យ, តំ មេតិ ន មញ្ញេយ្យ។
90. ‘‘Ejā , bhikkhave, rogo, ejā gaṇḍo, ejā sallaṃ. Tasmātiha, bhikkhave, tathāgato anejo viharati vītasallo. Tasmātiha , bhikkhave, bhikkhu cepi ākaṅkheyya ‘anejo vihareyyaṃ 2 vītasallo’ti, cakkhuṃ na maññeyya, cakkhusmiṃ na maññeyya, cakkhuto na maññeyya, cakkhu meti na maññeyya; rūpe na maññeyya, rūpesu na maññeyya, rūpato na maññeyya, rūpā meti na maññeyya; cakkhuviññāṇaṃ na maññeyya, cakkhuviññāṇasmiṃ na maññeyya, cakkhuviññāṇato na maññeyya, cakkhuviññāṇaṃ meti na maññeyya; cakkhusamphassaṃ na maññeyya, cakkhusamphassasmiṃ na maññeyya, cakkhusamphassato na maññeyya, cakkhusamphasso meti na maññeyya. Yampidaṃ cakkhusamphassapaccayā uppajjati vedayitaṃ sukhaṃ vā dukkhaṃ vā adukkhamasukhaṃ vā tampi na maññeyya, tasmimpi na maññeyya, tatopi na maññeyya, taṃ meti na maññeyya.
‘‘សោតំ ន មញ្ញេយ្យ…បេ.… ឃានំ ន មញ្ញេយ្យ…បេ.… ជិវ្ហំ ន មញ្ញេយ្យ, ជិវ្ហាយ ន មញ្ញេយ្យ, ជិវ្ហាតោ ន មញ្ញេយ្យ, ជិវ្ហា មេតិ ន មញ្ញេយ្យ; រសេ ន មញ្ញេយ្យ…បេ.… ជិវ្ហាវិញ្ញាណំ ន មញ្ញេយ្យ…បេ.… ជិវ្ហាសម្ផស្សំ ន មញ្ញេយ្យ…បេ.… យម្បិទំ ជិវ្ហាសម្ផស្សបច្ចយា ឧប្បជ្ជតិ វេទយិតំ សុខំ វា ទុក្ខំ វា អទុក្ខមសុខំ វា តម្បិ ន មញ្ញេយ្យ, តស្មិម្បិ ន មញ្ញេយ្យ, តតោបិ ន មញ្ញេយ្យ, តំ មេតិ ន មញ្ញេយ្យ។
‘‘Sotaṃ na maññeyya…pe… ghānaṃ na maññeyya…pe… jivhaṃ na maññeyya, jivhāya na maññeyya, jivhāto na maññeyya, jivhā meti na maññeyya; rase na maññeyya…pe… jivhāviññāṇaṃ na maññeyya…pe… jivhāsamphassaṃ na maññeyya…pe… yampidaṃ jivhāsamphassapaccayā uppajjati vedayitaṃ sukhaṃ vā dukkhaṃ vā adukkhamasukhaṃ vā tampi na maññeyya, tasmimpi na maññeyya, tatopi na maññeyya, taṃ meti na maññeyya.
‘‘កាយំ ន មញ្ញេយ្យ…បេ.… មនំ ន មញ្ញេយ្យ, មនស្មិំ ន មញ្ញេយ្យ, មនតោ ន មញ្ញេយ្យ, មនោ មេតិ ន មញ្ញេយ្យ; ធម្មេ ន មញ្ញេយ្យ…បេ.… មនោ វិញ្ញាណំ…បេ.… មនោសម្ផស្សំ…បេ.… យម្បិទំ មនោសម្ផស្សបច្ចយា ឧប្បជ្ជតិ វេទយិតំ សុខំ វា ទុក្ខំ វា អទុក្ខមសុខំ វា តម្បិ ន មញ្ញេយ្យ, តស្មិម្បិ ន មញ្ញេយ្យ, តតោបិ ន មញ្ញេយ្យ, តំ មេតិ ន មញ្ញេយ្យ; សព្ពំ ន មញ្ញេយ្យ, សព្ពស្មិំ ន មញ្ញេយ្យ, សព្ពតោ ន មញ្ញេយ្យ, សព្ពំ មេតិ ន មញ្ញេយ្យ។
‘‘Kāyaṃ na maññeyya…pe… manaṃ na maññeyya, manasmiṃ na maññeyya, manato na maññeyya, mano meti na maññeyya; dhamme na maññeyya…pe… mano viññāṇaṃ…pe… manosamphassaṃ…pe… yampidaṃ manosamphassapaccayā uppajjati vedayitaṃ sukhaṃ vā dukkhaṃ vā adukkhamasukhaṃ vā tampi na maññeyya, tasmimpi na maññeyya, tatopi na maññeyya, taṃ meti na maññeyya; sabbaṃ na maññeyya, sabbasmiṃ na maññeyya, sabbato na maññeyya, sabbaṃ meti na maññeyya.
‘‘សោ ឯវំ អមញ្ញមានោ ន កិញ្ចិបិ លោកេ ឧបាទិយតិ។ អនុបាទិយំ ន បរិតស្សតិ។ អបរិតស្សំ បច្ចត្តញ្ញេវ បរិនិព្ពាយតិ ។ ‘ខីណា ជាតិ, វុសិតំ ព្រហ្មចរិយំ, កតំ ករណីយំ នាបរំ ឥត្ថត្តាយា’តិ បជានាតី’’តិ។ សត្តមំ។
‘‘So evaṃ amaññamāno na kiñcipi loke upādiyati. Anupādiyaṃ na paritassati. Aparitassaṃ paccattaññeva parinibbāyati . ‘Khīṇā jāti, vusitaṃ brahmacariyaṃ, kataṃ karaṇīyaṃ nāparaṃ itthattāyā’ti pajānātī’’ti. Sattamaṃ.
Footnotes:
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / សំយុត្តនិកាយ (អដ្ឋកថា) • Saṃyuttanikāya (aṭṭhakathā) / ៧-៨. បឋមឯជាសុត្តាទិវណ្ណនា • 7-8. Paṭhamaejāsuttādivaṇṇanā
ដីកា • Tīkā / សុត្តបិដក (ដីកា) • Suttapiṭaka (ṭīkā) / សំយុត្តនិកាយ (ដីកា) • Saṃyuttanikāya (ṭīkā) / ៧-៨. បឋមឯជាសុត្តាទិវណ្ណនា • 7-8. Paṭhamaejāsuttādivaṇṇanā
