| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
7. පඨමඑජාසුත්‌තං
7. Paṭhamaejāsuttaṃ
90. ‘‘එජා , භික්‌ඛවෙ, රොගො, එජා ගණ්‌ඩො, එජා සල්‌ලං. තස්‌මාතිහ, භික්‌ඛවෙ, තථාගතො අනෙජො විහරති වීතසල්‌ලො. තස්‌මාතිහ , භික්‌ඛවෙ, භික්‌ඛු චෙපි ආකඞ්‌ඛෙය්‍ය ‘අනෙජො විහරෙය්‍යං 1 වීතසල්‌ලො’ති, චක්‌ඛුං න මඤ්‌ඤෙය්‍ය, චක්‌ඛුස්‌මිං න මඤ්‌ඤෙය්‍ය, චක්‌ඛුතො න මඤ්‌ඤෙය්‍ය, චක්‌ඛු මෙති න මඤ්‌ඤෙය්‍ය; රූපෙ න මඤ්‌ඤෙය්‍ය, රූපෙසු න මඤ්‌ඤෙය්‍ය, රූපතො න මඤ්‌ඤෙය්‍ය, රූපා මෙති න මඤ්‌ඤෙය්‍ය; චක්‌ඛුවිඤ්‌ඤාණං න මඤ්‌ඤෙය්‍ය, චක්‌ඛුවිඤ්‌ඤාණස්‌මිං න මඤ්‌ඤෙය්‍ය, චක්‌ඛුවිඤ්‌ඤාණතො න මඤ්‌ඤෙය්‍ය, චක්‌ඛුවිඤ්‌ඤාණං මෙති න මඤ්‌ඤෙය්‍ය; චක්‌ඛුසම්‌ඵස්‌සං න මඤ්‌ඤෙය්‍ය, චක්‌ඛුසම්‌ඵස්‌සස්‌මිං න මඤ්‌ඤෙය්‍ය, චක්‌ඛුසම්‌ඵස්‌සතො න මඤ්‌ඤෙය්‍ය, චක්‌ඛුසම්‌ඵස්‌සො මෙති න මඤ්‌ඤෙය්‍ය. යම්‌පිදං චක්‌ඛුසම්‌ඵස්‌සපච්‌චයා උප්‌පජ්‌ජති වෙදයිතං සුඛං වා දුක්‌ඛං වා අදුක්‌ඛමසුඛං වා තම්‌පි න මඤ්‌ඤෙය්‍ය, තස්‌මිම්‌පි න මඤ්‌ඤෙය්‍ය, තතොපි න මඤ්‌ඤෙය්‍ය, තං මෙති න මඤ්‌ඤෙය්‍ය.
90. ‘‘Ejā , bhikkhave, rogo, ejā gaṇḍo, ejā sallaṃ. Tasmātiha, bhikkhave, tathāgato anejo viharati vītasallo. Tasmātiha , bhikkhave, bhikkhu cepi ākaṅkheyya ‘anejo vihareyyaṃ 2 vītasallo’ti, cakkhuṃ na maññeyya, cakkhusmiṃ na maññeyya, cakkhuto na maññeyya, cakkhu meti na maññeyya; rūpe na maññeyya, rūpesu na maññeyya, rūpato na maññeyya, rūpā meti na maññeyya; cakkhuviññāṇaṃ na maññeyya, cakkhuviññāṇasmiṃ na maññeyya, cakkhuviññāṇato na maññeyya, cakkhuviññāṇaṃ meti na maññeyya; cakkhusamphassaṃ na maññeyya, cakkhusamphassasmiṃ na maññeyya, cakkhusamphassato na maññeyya, cakkhusamphasso meti na maññeyya. Yampidaṃ cakkhusamphassapaccayā uppajjati vedayitaṃ sukhaṃ vā dukkhaṃ vā adukkhamasukhaṃ vā tampi na maññeyya, tasmimpi na maññeyya, tatopi na maññeyya, taṃ meti na maññeyya.
‘‘සොතං න මඤ්‌ඤෙය්‍ය…පෙ.… ඝානං න මඤ්‌ඤෙය්‍ය…පෙ.… ජිව්‌හං න මඤ්‌ඤෙය්‍ය, ජිව්‌හාය න මඤ්‌ඤෙය්‍ය, ජිව්‌හාතො න මඤ්‌ඤෙය්‍ය, ජිව්‌හා මෙති න මඤ්‌ඤෙය්‍ය; රසෙ න මඤ්‌ඤෙය්‍ය…පෙ.… ජිව්‌හාවිඤ්‌ඤාණං න මඤ්‌ඤෙය්‍ය…පෙ.… ජිව්‌හාසම්‌ඵස්‌සං න මඤ්‌ඤෙය්‍ය…පෙ.… යම්‌පිදං ජිව්‌හාසම්‌ඵස්‌සපච්‌චයා උප්‌පජ්‌ජති වෙදයිතං සුඛං වා දුක්‌ඛං වා අදුක්‌ඛමසුඛං වා තම්‌පි න මඤ්‌ඤෙය්‍ය, තස්‌මිම්‌පි න මඤ්‌ඤෙය්‍ය, තතොපි න මඤ්‌ඤෙය්‍ය, තං මෙති න මඤ්‌ඤෙය්‍ය.
‘‘Sotaṃ na maññeyya…pe… ghānaṃ na maññeyya…pe… jivhaṃ na maññeyya, jivhāya na maññeyya, jivhāto na maññeyya, jivhā meti na maññeyya; rase na maññeyya…pe… jivhāviññāṇaṃ na maññeyya…pe… jivhāsamphassaṃ na maññeyya…pe… yampidaṃ jivhāsamphassapaccayā uppajjati vedayitaṃ sukhaṃ vā dukkhaṃ vā adukkhamasukhaṃ vā tampi na maññeyya, tasmimpi na maññeyya, tatopi na maññeyya, taṃ meti na maññeyya.
‘‘කායං න මඤ්‌ඤෙය්‍ය…පෙ.… මනං න මඤ්‌ඤෙය්‍ය, මනස්‌මිං න මඤ්‌ඤෙය්‍ය, මනතො න මඤ්‌ඤෙය්‍ය, මනො මෙති න මඤ්‌ඤෙය්‍ය; ධම්‌මෙ න මඤ්‌ඤෙය්‍ය…පෙ.… මනො විඤ්‌ඤාණං…පෙ.… මනොසම්‌ඵස්‌සං…පෙ.… යම්‌පිදං මනොසම්‌ඵස්‌සපච්‌චයා උප්‌පජ්‌ජති වෙදයිතං සුඛං වා දුක්‌ඛං වා අදුක්‌ඛමසුඛං වා තම්‌පි න මඤ්‌ඤෙය්‍ය, තස්‌මිම්‌පි න මඤ්‌ඤෙය්‍ය, තතොපි න මඤ්‌ඤෙය්‍ය, තං මෙති න මඤ්‌ඤෙය්‍ය; සබ්‌බං න මඤ්‌ඤෙය්‍ය, සබ්‌බස්‌මිං න මඤ්‌ඤෙය්‍ය, සබ්‌බතො න මඤ්‌ඤෙය්‍ය, සබ්‌බං මෙති න මඤ්‌ඤෙය්‍ය.
‘‘Kāyaṃ na maññeyya…pe… manaṃ na maññeyya, manasmiṃ na maññeyya, manato na maññeyya, mano meti na maññeyya; dhamme na maññeyya…pe… mano viññāṇaṃ…pe… manosamphassaṃ…pe… yampidaṃ manosamphassapaccayā uppajjati vedayitaṃ sukhaṃ vā dukkhaṃ vā adukkhamasukhaṃ vā tampi na maññeyya, tasmimpi na maññeyya, tatopi na maññeyya, taṃ meti na maññeyya; sabbaṃ na maññeyya, sabbasmiṃ na maññeyya, sabbato na maññeyya, sabbaṃ meti na maññeyya.
‘‘සො එවං අමඤ්‌ඤමානො න කිඤ්‌චිපි ලොකෙ උපාදියති. අනුපාදියං න පරිතස්‌සති. අපරිතස්‌සං පච්‌චත්‌තඤ්‌ඤෙව පරිනිබ්‌බායති . ‘ඛීණා ජාති, වුසිතං බ්‍රහ්‌මචරියං, කතං කරණීයං නාපරං ඉත්‌ථත්‌තායා’ති පජානාතී’’ති. සත්‌තමං.
‘‘So evaṃ amaññamāno na kiñcipi loke upādiyati. Anupādiyaṃ na paritassati. Aparitassaṃ paccattaññeva parinibbāyati . ‘Khīṇā jāti, vusitaṃ brahmacariyaṃ, kataṃ karaṇīyaṃ nāparaṃ itthattāyā’ti pajānātī’’ti. Sattamaṃ.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 7-8. පඨමඑජාසුත්‌තාදිවණ්‌ණනා • 7-8. Paṭhamaejāsuttādivaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 7-8. පඨමඑජාසුත්‌තාදිවණ්‌ණනා • 7-8. Paṭhamaejāsuttādivaṇṇanā
