| Library / Tipiṭaka / തിപിടക • Tipiṭaka / സംയുത്തനികായ • Saṃyuttanikāya |
൭. പഠമഏജാസുത്തം
7. Paṭhamaejāsuttaṃ
൯൦. ‘‘ഏജാ , ഭിക്ഖവേ, രോഗോ, ഏജാ ഗണ്ഡോ, ഏജാ സല്ലം. തസ്മാതിഹ, ഭിക്ഖവേ, തഥാഗതോ അനേജോ വിഹരതി വീതസല്ലോ. തസ്മാതിഹ , ഭിക്ഖവേ, ഭിക്ഖു ചേപി ആകങ്ഖേയ്യ ‘അനേജോ വിഹരേയ്യം 1 വീതസല്ലോ’തി, ചക്ഖും ന മഞ്ഞേയ്യ, ചക്ഖുസ്മിം ന മഞ്ഞേയ്യ, ചക്ഖുതോ ന മഞ്ഞേയ്യ, ചക്ഖു മേതി ന മഞ്ഞേയ്യ; രൂപേ ന മഞ്ഞേയ്യ, രൂപേസു ന മഞ്ഞേയ്യ, രൂപതോ ന മഞ്ഞേയ്യ, രൂപാ മേതി ന മഞ്ഞേയ്യ; ചക്ഖുവിഞ്ഞാണം ന മഞ്ഞേയ്യ, ചക്ഖുവിഞ്ഞാണസ്മിം ന മഞ്ഞേയ്യ, ചക്ഖുവിഞ്ഞാണതോ ന മഞ്ഞേയ്യ, ചക്ഖുവിഞ്ഞാണം മേതി ന മഞ്ഞേയ്യ; ചക്ഖുസമ്ഫസ്സം ന മഞ്ഞേയ്യ, ചക്ഖുസമ്ഫസ്സസ്മിം ന മഞ്ഞേയ്യ, ചക്ഖുസമ്ഫസ്സതോ ന മഞ്ഞേയ്യ, ചക്ഖുസമ്ഫസ്സോ മേതി ന മഞ്ഞേയ്യ. യമ്പിദം ചക്ഖുസമ്ഫസ്സപച്ചയാ ഉപ്പജ്ജതി വേദയിതം സുഖം വാ ദുക്ഖം വാ അദുക്ഖമസുഖം വാ തമ്പി ന മഞ്ഞേയ്യ, തസ്മിമ്പി ന മഞ്ഞേയ്യ, തതോപി ന മഞ്ഞേയ്യ, തം മേതി ന മഞ്ഞേയ്യ.
90. ‘‘Ejā , bhikkhave, rogo, ejā gaṇḍo, ejā sallaṃ. Tasmātiha, bhikkhave, tathāgato anejo viharati vītasallo. Tasmātiha , bhikkhave, bhikkhu cepi ākaṅkheyya ‘anejo vihareyyaṃ 2 vītasallo’ti, cakkhuṃ na maññeyya, cakkhusmiṃ na maññeyya, cakkhuto na maññeyya, cakkhu meti na maññeyya; rūpe na maññeyya, rūpesu na maññeyya, rūpato na maññeyya, rūpā meti na maññeyya; cakkhuviññāṇaṃ na maññeyya, cakkhuviññāṇasmiṃ na maññeyya, cakkhuviññāṇato na maññeyya, cakkhuviññāṇaṃ meti na maññeyya; cakkhusamphassaṃ na maññeyya, cakkhusamphassasmiṃ na maññeyya, cakkhusamphassato na maññeyya, cakkhusamphasso meti na maññeyya. Yampidaṃ cakkhusamphassapaccayā uppajjati vedayitaṃ sukhaṃ vā dukkhaṃ vā adukkhamasukhaṃ vā tampi na maññeyya, tasmimpi na maññeyya, tatopi na maññeyya, taṃ meti na maññeyya.
‘‘സോതം ന മഞ്ഞേയ്യ…പേ॰… ഘാനം ന മഞ്ഞേയ്യ…പേ॰… ജിവ്ഹം ന മഞ്ഞേയ്യ, ജിവ്ഹായ ന മഞ്ഞേയ്യ, ജിവ്ഹാതോ ന മഞ്ഞേയ്യ, ജിവ്ഹാ മേതി ന മഞ്ഞേയ്യ; രസേ ന മഞ്ഞേയ്യ…പേ॰… ജിവ്ഹാവിഞ്ഞാണം ന മഞ്ഞേയ്യ…പേ॰… ജിവ്ഹാസമ്ഫസ്സം ന മഞ്ഞേയ്യ…പേ॰… യമ്പിദം ജിവ്ഹാസമ്ഫസ്സപച്ചയാ ഉപ്പജ്ജതി വേദയിതം സുഖം വാ ദുക്ഖം വാ അദുക്ഖമസുഖം വാ തമ്പി ന മഞ്ഞേയ്യ, തസ്മിമ്പി ന മഞ്ഞേയ്യ, തതോപി ന മഞ്ഞേയ്യ, തം മേതി ന മഞ്ഞേയ്യ.
‘‘Sotaṃ na maññeyya…pe… ghānaṃ na maññeyya…pe… jivhaṃ na maññeyya, jivhāya na maññeyya, jivhāto na maññeyya, jivhā meti na maññeyya; rase na maññeyya…pe… jivhāviññāṇaṃ na maññeyya…pe… jivhāsamphassaṃ na maññeyya…pe… yampidaṃ jivhāsamphassapaccayā uppajjati vedayitaṃ sukhaṃ vā dukkhaṃ vā adukkhamasukhaṃ vā tampi na maññeyya, tasmimpi na maññeyya, tatopi na maññeyya, taṃ meti na maññeyya.
‘‘കായം ന മഞ്ഞേയ്യ…പേ॰… മനം ന മഞ്ഞേയ്യ, മനസ്മിം ന മഞ്ഞേയ്യ, മനതോ ന മഞ്ഞേയ്യ, മനോ മേതി ന മഞ്ഞേയ്യ; ധമ്മേ ന മഞ്ഞേയ്യ…പേ॰… മനോ വിഞ്ഞാണം…പേ॰… മനോസമ്ഫസ്സം…പേ॰… യമ്പിദം മനോസമ്ഫസ്സപച്ചയാ ഉപ്പജ്ജതി വേദയിതം സുഖം വാ ദുക്ഖം വാ അദുക്ഖമസുഖം വാ തമ്പി ന മഞ്ഞേയ്യ, തസ്മിമ്പി ന മഞ്ഞേയ്യ, തതോപി ന മഞ്ഞേയ്യ, തം മേതി ന മഞ്ഞേയ്യ; സബ്ബം ന മഞ്ഞേയ്യ, സബ്ബസ്മിം ന മഞ്ഞേയ്യ, സബ്ബതോ ന മഞ്ഞേയ്യ, സബ്ബം മേതി ന മഞ്ഞേയ്യ.
‘‘Kāyaṃ na maññeyya…pe… manaṃ na maññeyya, manasmiṃ na maññeyya, manato na maññeyya, mano meti na maññeyya; dhamme na maññeyya…pe… mano viññāṇaṃ…pe… manosamphassaṃ…pe… yampidaṃ manosamphassapaccayā uppajjati vedayitaṃ sukhaṃ vā dukkhaṃ vā adukkhamasukhaṃ vā tampi na maññeyya, tasmimpi na maññeyya, tatopi na maññeyya, taṃ meti na maññeyya; sabbaṃ na maññeyya, sabbasmiṃ na maññeyya, sabbato na maññeyya, sabbaṃ meti na maññeyya.
‘‘സോ ഏവം അമഞ്ഞമാനോ ന കിഞ്ചിപി ലോകേ ഉപാദിയതി. അനുപാദിയം ന പരിതസ്സതി. അപരിതസ്സം പച്ചത്തഞ്ഞേവ പരിനിബ്ബായതി . ‘ഖീണാ ജാതി, വുസിതം ബ്രഹ്മചരിയം, കതം കരണീയം നാപരം ഇത്ഥത്തായാ’തി പജാനാതീ’’തി. സത്തമം.
‘‘So evaṃ amaññamāno na kiñcipi loke upādiyati. Anupādiyaṃ na paritassati. Aparitassaṃ paccattaññeva parinibbāyati . ‘Khīṇā jāti, vusitaṃ brahmacariyaṃ, kataṃ karaṇīyaṃ nāparaṃ itthattāyā’ti pajānātī’’ti. Sattamaṃ.
Footnotes:
Related texts:
അട്ഠകഥാ • Aṭṭhakathā / സുത്തപിടക (അട്ഠകഥാ) • Suttapiṭaka (aṭṭhakathā) / സംയുത്തനികായ (അട്ഠകഥാ) • Saṃyuttanikāya (aṭṭhakathā) / ൭-൮. പഠമഏജാസുത്താദിവണ്ണനാ • 7-8. Paṭhamaejāsuttādivaṇṇanā
ടീകാ • Tīkā / സുത്തപിടക (ടീകാ) • Suttapiṭaka (ṭīkā) / സംയുത്തനികായ (ടീകാ) • Saṃyuttanikāya (ṭīkā) / ൭-൮. പഠമഏജാസുത്താദിവണ്ണനാ • 7-8. Paṭhamaejāsuttādivaṇṇanā
