| Library / Tipiṭaka / ติปิฎก • Tipiṭaka / สํยุตฺตนิกาย (ฎีกา) • Saṃyuttanikāya (ṭīkā) |
๗. ปฐมเคลญฺญสุตฺตวณฺณนา
7. Paṭhamagelaññasuttavaṇṇanā
๒๕๕. สทฺทหิตฺวา คิลาเน อุปฎฺฐาตเพฺพ มญฺญิสฺสนฺตีติ โยชนาฯ ตตฺถาติ ตสฺมิํ ฐาเนฯ กมฺมฎฺฐานานุโยโค สปฺปาโย เยสํ เต กมฺมฎฺฐานสปฺปายา, สติปฎฺฐานรตาติ อโตฺถฯ อนิจฺจตํ อนุปสฺสโนฺตติ กายํ ปฎิจฺจ อุปฺปนฺนาย เวทนาย จ อนิจฺจตํ อนุปสฺสโนฺตฯ วยํ อนุปสฺสโนฺตติอาทีสุปิ เอเสว นโยฯ วยนฺติ ปน ตาย เอว ขยสงฺขาตํฯ วิราคนฺติ วิรชฺชนํฯ ปฎินิสฺสคฺคนฺติ ปริจฺจาคปฎินิสฺสคฺคํ, ปกฺขนฺทนปฎินิสฺสคฺคมฺปิ วาฯ
255. Saddahitvā gilāne upaṭṭhātabbe maññissantīti yojanā. Tatthāti tasmiṃ ṭhāne. Kammaṭṭhānānuyogo sappāyo yesaṃ te kammaṭṭhānasappāyā, satipaṭṭhānaratāti attho. Aniccataṃ anupassantoti kāyaṃ paṭicca uppannāya vedanāya ca aniccataṃ anupassanto. Vayaṃ anupassantotiādīsupi eseva nayo. Vayanti pana tāya eva khayasaṅkhātaṃ. Virāganti virajjanaṃ. Paṭinissagganti pariccāgapaṭinissaggaṃ, pakkhandanapaṭinissaggampi vā.
อาคมนียปฎิปทาติ อริยมคฺคสฺส อาคมนฎฺฐานิยา ปุพฺพภาคปฎิปทาฯ ปุพฺพภาคาเยว น โลกุตฺตราฯ สมฺปชญฺญํ ปุพฺพภาคิยเมวฯ ติโสฺส อนุปสฺสนา ปุพฺพภาคาเยว วิปสฺสนาปริยาปนฺนตฺตา ฯ มิสฺสกาติ โลกิยโลกุตฺตรมิสฺสกาฯ ภาวนากาโล ทสฺสิโต ‘‘นิโรธานุปสฺสิโน วิหรโต, ปฎินิสฺสคฺคานุปสฺสิโน วิหรโต ราคานุสโย ปหียตี’’ติ วุตฺตตฺตาฯ
Āgamanīyapaṭipadāti ariyamaggassa āgamanaṭṭhāniyā pubbabhāgapaṭipadā. Pubbabhāgāyeva na lokuttarā. Sampajaññaṃ pubbabhāgiyameva. Tisso anupassanā pubbabhāgāyeva vipassanāpariyāpannattā . Missakāti lokiyalokuttaramissakā. Bhāvanākālo dassito ‘‘nirodhānupassino viharato, paṭinissaggānupassino viharato rāgānusayo pahīyatī’’ti vuttattā.
ปฐมเคลญฺญสุตฺตวณฺณนา นิฎฺฐิตาฯ
Paṭhamagelaññasuttavaṇṇanā niṭṭhitā.
Related texts:
ติปิฎก (มูล) • Tipiṭaka (Mūla) / สุตฺตปิฎก • Suttapiṭaka / สํยุตฺตนิกาย • Saṃyuttanikāya / ๗. ปฐมเคลญฺญสุตฺตํ • 7. Paṭhamagelaññasuttaṃ
อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / สํยุตฺตนิกาย (อฎฺฐกถา) • Saṃyuttanikāya (aṭṭhakathā) / ๗. ปฐมเคลญฺญสุตฺตวณฺณนา • 7. Paṭhamagelaññasuttavaṇṇanā
