| Library / Tipiṭaka / တိပိဋက • Tipiṭaka / သံယုတ္တနိကာယ (ဋီကာ) • Saṃyuttanikāya (ṭīkā) |
၇. ပဌမဂေလညသုတ္တဝဏ္ဏနာ
7. Paṭhamagelaññasuttavaṇṇanā
၂၅၅. သဒ္ဒဟိတ္ဝာ ဂိလာနေ ဥပဋ္ဌာတဗ္ဗေ မညိသ္သန္တီတိ ယောဇနာ။ တတ္ထာတိ တသ္မိံ ဌာနေ။ ကမ္မဋ္ဌာနာနုယောဂော သပ္ပာယော ယေသံ တေ ကမ္မဋ္ဌာနသပ္ပာယာ, သတိပဋ္ဌာနရတာတိ အတ္ထော။ အနိစ္စတံ အနုပသ္သန္တောတိ ကာယံ ပဋိစ္စ ဥပ္ပန္နာယ ဝေဒနာယ စ အနိစ္စတံ အနုပသ္သန္တော။ ဝယံ အနုပသ္သန္တောတိအာဒီသုပိ ဧသေဝ နယော။ ဝယန္တိ ပန တာယ ဧဝ ခယသင္ခာတံ။ ဝိရာဂန္တိ ဝိရဇ္ဇနံ။ ပဋိနိသ္သဂ္ဂန္တိ ပရိစ္စာဂပဋိနိသ္သဂ္ဂံ, ပက္ခန္ဒနပဋိနိသ္သဂ္ဂမ္ပိ ဝာ။
255. Saddahitvā gilāne upaṭṭhātabbe maññissantīti yojanā. Tatthāti tasmiṃ ṭhāne. Kammaṭṭhānānuyogo sappāyo yesaṃ te kammaṭṭhānasappāyā, satipaṭṭhānaratāti attho. Aniccataṃ anupassantoti kāyaṃ paṭicca uppannāya vedanāya ca aniccataṃ anupassanto. Vayaṃ anupassantotiādīsupi eseva nayo. Vayanti pana tāya eva khayasaṅkhātaṃ. Virāganti virajjanaṃ. Paṭinissagganti pariccāgapaṭinissaggaṃ, pakkhandanapaṭinissaggampi vā.
အာဂမနီယပဋိပဒာတိ အရိယမဂ္ဂသ္သ အာဂမနဋ္ဌာနိယာ ပုဗ္ဗဘာဂပဋိပဒာ။ ပုဗ္ဗဘာဂာယေဝ န လောကုတ္တရာ။ သမ္ပဇညံ ပုဗ္ဗဘာဂိယမေဝ။ တိသ္သော အနုပသ္သနာ ပုဗ္ဗဘာဂာယေဝ ဝိပသ္သနာပရိယာပန္နတ္တာ ။ မိသ္သကာတိ လောကိယလောကုတ္တရမိသ္သကာ။ ဘာဝနာကာလော ဒသ္သိတော ‘‘နိရောဓာနုပသ္သိနော ဝိဟရတော, ပဋိနိသ္သဂ္ဂာနုပသ္သိနော ဝိဟရတော ရာဂာနုသယော ပဟီယတီ’’တိ ဝုတ္တတ္တာ။
Āgamanīyapaṭipadāti ariyamaggassa āgamanaṭṭhāniyā pubbabhāgapaṭipadā. Pubbabhāgāyeva na lokuttarā. Sampajaññaṃ pubbabhāgiyameva. Tisso anupassanā pubbabhāgāyeva vipassanāpariyāpannattā . Missakāti lokiyalokuttaramissakā. Bhāvanākālo dassito ‘‘nirodhānupassino viharato, paṭinissaggānupassino viharato rāgānusayo pahīyatī’’ti vuttattā.
ပဌမဂေလညသုတ္တဝဏ္ဏနာ နိဋ္ဌိတာ။
Paṭhamagelaññasuttavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၇. ပဌမဂေလညသုတ္တံ • 7. Paṭhamagelaññasuttaṃ
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၇. ပဌမဂေလညသုတ္တဝဏ္ဏနာ • 7. Paṭhamagelaññasuttavaṇṇanā
