| Library / Tipiṭaka / ತಿಪಿಟಕ • Tipiṭaka / ಸಂಯುತ್ತನಿಕಾಯ (ಅಟ್ಠಕಥಾ) • Saṃyuttanikāya (aṭṭhakathā) |
೭. ಪಠಮಗೇಲಞ್ಞಸುತ್ತವಣ್ಣನಾ
7. Paṭhamagelaññasuttavaṇṇanā
೨೫೫. ಸತ್ತಮೇ ಯೇನ ಗಿಲಾನಸಾಲಾ ತೇನುಪಸಙ್ಕಮೀತಿ ‘‘ಸದೇವಕೇ ಲೋಕೇ ಅಗ್ಗಪುಗ್ಗಲೋ ತಥಾಗತೋಪಿ ಗಿಲಾನುಪಟ್ಠಾನಂ ಗಚ್ಛತಿ, ಉಪಟ್ಠಾತಬ್ಬಯುತ್ತಕಾ ನಾಮ ಗಿಲಾನಾತಿ ಭಿಕ್ಖೂ ಸದ್ದಹಿತ್ವಾ ಓಕಪ್ಪೇತ್ವಾ ಗಿಲಾನೇ ಉಪಟ್ಠಾತಬ್ಬೇ ಮಞ್ಞಿಸ್ಸನ್ತೀ’’ತಿ ಚ ‘‘ಯೇ ತತ್ಥ ಕಮ್ಮಟ್ಠಾನಸಪ್ಪಾಯಾ, ತೇಸಂ ಕಮ್ಮಟ್ಠಾನಂ ಕಥೇಸ್ಸಾಮೀ’’ತಿ ಚ ಚಿನ್ತೇತ್ವಾ ಉಪಸಙ್ಕಮಿ। ಕಾಯೇ ಕಾಯಾನುಪಸ್ಸೀತಿಆದೀಸು ಯಂ ವತ್ತಬ್ಬಂ, ತಂ ಪರತೋ ವಕ್ಖಾಮ। ಅನಿಚ್ಚಾನುಪಸ್ಸೀತಿ ಅನಿಚ್ಚತಂ ಅನುಪಸ್ಸನ್ತೋ। ವಯಾನುಪಸ್ಸೀತಿ ವಯಂ ಅನುಪಸ್ಸನ್ತೋ। ವಿರಾಗಾನುಪಸ್ಸೀತಿ ವಿರಾಗಂ ಅನುಪಸ್ಸನ್ತೋ। ನಿರೋಧಾನುಪಸ್ಸೀತಿ ನಿರೋಧಂ ಅನುಪಸ್ಸನ್ತೋ। ಪಟಿನಿಸ್ಸಗ್ಗಾನುಪಸ್ಸೀತಿ ಪಟಿನಿಸ್ಸಗ್ಗಂ ಅನುಪಸ್ಸನ್ತೋ।
255. Sattame yena gilānasālā tenupasaṅkamīti ‘‘sadevake loke aggapuggalo tathāgatopi gilānupaṭṭhānaṃ gacchati, upaṭṭhātabbayuttakā nāma gilānāti bhikkhū saddahitvā okappetvā gilāne upaṭṭhātabbe maññissantī’’ti ca ‘‘ye tattha kammaṭṭhānasappāyā, tesaṃ kammaṭṭhānaṃ kathessāmī’’ti ca cintetvā upasaṅkami. Kāye kāyānupassītiādīsu yaṃ vattabbaṃ, taṃ parato vakkhāma. Aniccānupassīti aniccataṃ anupassanto. Vayānupassīti vayaṃ anupassanto. Virāgānupassīti virāgaṃ anupassanto. Nirodhānupassīti nirodhaṃ anupassanto. Paṭinissaggānupassīti paṭinissaggaṃ anupassanto.
ಏತ್ತಾವತಾ ಕಿಂ ದಸ್ಸಿತಂ ಹೋತಿ? ಇಮಸ್ಸ ಭಿಕ್ಖುನೋ ಆಗಮನೀಯಪಟಿಪದಾ, ಸತಿಪಟ್ಠಾನಾಪಿ ಹಿ ಪುಬ್ಬಭಾಗಾಯೇವ, ಸಮ್ಪಜಞ್ಞೇಪಿ ಅನಿಚ್ಚಾನುಪಸ್ಸನಾ ವಯಾನುಪಸ್ಸನಾ ವಿರಾಗಾನುಪಸ್ಸನಾತಿ ಚ ಇಮಾಪಿ ತಿಸ್ಸೋ ಅನುಪಸ್ಸನಾ ಪುಬ್ಬಭಾಗಾಯೇವ, ನಿರೋಧಾನುಪಸ್ಸನಾಪಿ ಪಟಿನಿಸ್ಸಗ್ಗಾನುಪಸ್ಸನಾಪಿ ಇಮಾ ದ್ವೇ ಮಿಸ್ಸಕಾ। ಏತ್ತಾವತಾ ಇಮಸ್ಸ ಭಿಕ್ಖುನೋ ಭಾವನಾಕಾಲೋ ದಸ್ಸಿತೋತಿ। ಸೇಸಂ ವುತ್ತನಯಮೇವ।
Ettāvatā kiṃ dassitaṃ hoti? Imassa bhikkhuno āgamanīyapaṭipadā, satipaṭṭhānāpi hi pubbabhāgāyeva, sampajaññepi aniccānupassanā vayānupassanā virāgānupassanāti ca imāpi tisso anupassanā pubbabhāgāyeva, nirodhānupassanāpi paṭinissaggānupassanāpi imā dve missakā. Ettāvatā imassa bhikkhuno bhāvanākālo dassitoti. Sesaṃ vuttanayameva.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಸಂಯುತ್ತನಿಕಾಯ • Saṃyuttanikāya / ೭. ಪಠಮಗೇಲಞ್ಞಸುತ್ತಂ • 7. Paṭhamagelaññasuttaṃ
ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ಸಂಯುತ್ತನಿಕಾಯ (ಟೀಕಾ) • Saṃyuttanikāya (ṭīkā) / ೭. ಪಠಮಗೇಲಞ್ಞಸುತ್ತವಣ್ಣನಾ • 7. Paṭhamagelaññasuttavaṇṇanā
