| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
4. පඨමගිලානසුත්‌තං
4. Paṭhamagilānasuttaṃ
195. එකං සමයං භගවා රාජගහෙ විහරති වෙළුවනෙ කලන්‌දකනිවාපෙ. තෙන ඛො පන සමයෙන ආයස්‌මා මහාකස්‌සපො පිප්‌පලිගුහායං 1 විහරති ආබාධිකො දුක්‌ඛිතො බාළ්‌හගිලානො. අථ ඛො භගවා සායන්‌හසමයං පටිසල්‌ලානා වුට්‌ඨිතො යෙනායස්‌මා මහාකස්‌සපො තෙනුපසඞ්‌කමි; උපසඞ්‌කමිත්‌වා පඤ්‌ඤත්‌තෙ ආසනෙ නිසීදි. නිසජ්‌ජ ඛො භගවා ආයස්‌මන්‌තං මහාකස්‌සපං එතදවොච –
195. Ekaṃ samayaṃ bhagavā rājagahe viharati veḷuvane kalandakanivāpe. Tena kho pana samayena āyasmā mahākassapo pippaliguhāyaṃ 2 viharati ābādhiko dukkhito bāḷhagilāno. Atha kho bhagavā sāyanhasamayaṃ paṭisallānā vuṭṭhito yenāyasmā mahākassapo tenupasaṅkami; upasaṅkamitvā paññatte āsane nisīdi. Nisajja kho bhagavā āyasmantaṃ mahākassapaṃ etadavoca –
‘‘කච්‌චි තෙ, කස්‌සප, ඛමනීයං කච්‌චි යාපනීයං? කච්‌චි දුක්‌ඛා වෙදනා පටික්‌කමන්‌ති, නො අභික්‌කමන්‌ති; පටික්‌කමොසානං පඤ්‌ඤායති, නො අභික්‌කමො’’ති? ‘‘න මෙ, භන්‌තෙ, ඛමනීයං, න යාපනීයං. බාළ්‌හා මෙ දුක්‌ඛා වෙදනා අභික්‌කමන්‌ති, නො පටික්‌කමන්‌ති; අභික්‌කමොසානං පඤ්‌ඤායති, නො පටික්‌කමො’’ති.
‘‘Kacci te, kassapa, khamanīyaṃ kacci yāpanīyaṃ? Kacci dukkhā vedanā paṭikkamanti, no abhikkamanti; paṭikkamosānaṃ paññāyati, no abhikkamo’’ti? ‘‘Na me, bhante, khamanīyaṃ, na yāpanīyaṃ. Bāḷhā me dukkhā vedanā abhikkamanti, no paṭikkamanti; abhikkamosānaṃ paññāyati, no paṭikkamo’’ti.
‘‘සත්‌තිමෙ, කස්‌සප, බොජ්‌ඣඞ්‌ගා මයා සම්‌මදක්‌ඛාතා භාවිතා බහුලීකතා අභිඤ්‌ඤාය සම්‌බොධාය නිබ්‌බානාය සංවත්‌තන්‌ති. කතමෙ සත්‌ත? සතිසම්‌බොජ්‌ඣඞ්‌ගො ඛො, කස්‌සප, මයා සම්‌මදක්‌ඛාතො භාවිතො බහුලීකතො අභිඤ්‌ඤාය සම්‌බොධාය නිබ්‌බානාය සංවත්‌තති…පෙ.… උපෙක්‌ඛාසම්‌බොජ්‌ඣඞ්‌ගො ඛො, කස්‌සප, මයා සම්‌මදක්‌ඛාතො භාවිතො බහුලීකතො අභිඤ්‌ඤාය සම්‌බොධාය නිබ්‌බානාය සංවත්‌තති. ඉමෙ ඛො, කස්‌සප, සත්‌ත බොජ්‌ඣඞ්‌ගා මයා සම්‌මදක්‌ඛාතා භාවිතා බහුලීකතා අභිඤ්‌ඤාය සම්‌බොධාය නිබ්‌බානාය සංවත්‌තන්‌තී’’ති. ‘‘තග්‌ඝ, භගවා, බොජ්‌ඣඞ්‌ගා; තග්‌ඝ, සුගත, බොජ්‌ඣඞ්‌ගා’’ති.
‘‘Sattime, kassapa, bojjhaṅgā mayā sammadakkhātā bhāvitā bahulīkatā abhiññāya sambodhāya nibbānāya saṃvattanti. Katame satta? Satisambojjhaṅgo kho, kassapa, mayā sammadakkhāto bhāvito bahulīkato abhiññāya sambodhāya nibbānāya saṃvattati…pe… upekkhāsambojjhaṅgo kho, kassapa, mayā sammadakkhāto bhāvito bahulīkato abhiññāya sambodhāya nibbānāya saṃvattati. Ime kho, kassapa, satta bojjhaṅgā mayā sammadakkhātā bhāvitā bahulīkatā abhiññāya sambodhāya nibbānāya saṃvattantī’’ti. ‘‘Taggha, bhagavā, bojjhaṅgā; taggha, sugata, bojjhaṅgā’’ti.
ඉදමවොච භගවා. අත්‌තමනො ආයස්‌මා මහාකස්‌සපො භගවතො භාසිතං අභිනන්‌දි. වුට්‌ඨහි චායස්‌මා මහාකස්‌සපො තම්‌හා ආබාධා. තථාපහීනො චායස්‌මතො මහාකස්‌සපස්‌ස සො ආබාධො අහොසීති. චතුත්‌ථං.
Idamavoca bhagavā. Attamano āyasmā mahākassapo bhagavato bhāsitaṃ abhinandi. Vuṭṭhahi cāyasmā mahākassapo tamhā ābādhā. Tathāpahīno cāyasmato mahākassapassa so ābādho ahosīti. Catutthaṃ.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 4-10. පඨමගිලානසුත්‌තාදිවණ්‌ණනා • 4-10. Paṭhamagilānasuttādivaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 4-10. පඨමගිලානසුත්‌තාදිවණ්‌ණනා • 4-10. Paṭhamagilānasuttādivaṇṇanā
