| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
8-9. பட²மகி³ஞ்ஜகாவஸத²ஸுத்தாதி³வண்ணனா
8-9. Paṭhamagiñjakāvasathasuttādivaṇṇanā
1004-5. அட்ட²மே ஞாதிகேதி ஏகங் தளாகங் நிஸ்ஸாய த்³வின்னங் சூளபிதிமஹாபிதிபுத்தானங் த்³வே கா³மா, தேஸு ஏகஸ்மிங் கா³மகே. கி³ஞ்ஜகாவஸதே²தி இட்ட²காமயே ஆவஸதே². ஓரம்பா⁴கி³யானந்தி ஹெட்டா²பா⁴கி³யானங், காமப⁴வேயேவ படிஸந்தி⁴க்³கா³ஹாபகானந்தி அத்தோ². ஓரந்தி லத்³த⁴னாமேஹி வா தீஹி மக்³கே³ஹி பஹாதப்³பா³னீதிபி ஓரம்பா⁴கி³யானி. தத்த² காமச்ச²ந்தோ³ ப்³யாபாதோ³தி இமானி த்³வே ஸமாபத்தியா வா அவிக்க²ம்பி⁴தானி மக்³கே³ன வா அஸமுச்சி²ன்னானி நிப்³ப³த்திவஸேன உத்³த⁴ங் பா⁴க³ங் ரூபப⁴வங் அரூபப⁴வங் வா க³ந்துங் ந தெ³ந்தி. ஸக்காயதி³ட்டி²ஆதீ³னி தீணி தத்த² நிப்³ப³த்தம்பி ஆனெத்வா புன இதே⁴வ நிப்³ப³த்தாபெந்தீதி ஸப்³பா³னிபி ஓரம்பா⁴கி³யானேவ. அனாவத்தித⁴ம்மோதி படிஸந்தி⁴வஸேன அனாக³மனஸபா⁴வோ.
1004-5. Aṭṭhame ñātiketi ekaṃ taḷākaṃ nissāya dvinnaṃ cūḷapitimahāpitiputtānaṃ dve gāmā, tesu ekasmiṃ gāmake. Giñjakāvasatheti iṭṭhakāmaye āvasathe. Orambhāgiyānanti heṭṭhābhāgiyānaṃ, kāmabhaveyeva paṭisandhiggāhāpakānanti attho. Oranti laddhanāmehi vā tīhi maggehi pahātabbānītipi orambhāgiyāni. Tattha kāmacchando byāpādoti imāni dve samāpattiyā vā avikkhambhitāni maggena vā asamucchinnāni nibbattivasena uddhaṃ bhāgaṃ rūpabhavaṃ arūpabhavaṃ vā gantuṃ na denti. Sakkāyadiṭṭhiādīni tīṇi tattha nibbattampi ānetvā puna idheva nibbattāpentīti sabbānipi orambhāgiyāneva. Anāvattidhammoti paṭisandhivasena anāgamanasabhāvo.
ராக³தோ³ஸமோஹானங் தனுத்தாதி எத்த² கதா³சி உப்பத்தியா ச பரியுட்டா²னமந்த³தாய சாதி த்³வேதா⁴பி தனுபா⁴வோ வேதி³தப்³போ³. ஸகதா³கா³மிஸ்ஸ ஹி புது²ஜ்ஜனானங் விய அபி⁴ண்ஹங் ராகா³த³யோ ந உப்பஜ்ஜந்தி, கதா³சி கரஹசி உப்பஜ்ஜந்தி. உப்பஜ்ஜமானா ச ந புது²ஜ்ஜனானங் விய ப³ஹலப³ஹலா உப்பஜ்ஜந்தி, மக்கி²பத்தங் விய தனுகா உப்பஜ்ஜந்தி. தீ³க⁴பா⁴ணகதிபிடகமஹாஸீவத்தே²ரோ பனாஹ – ‘‘யஸ்மா ஸகதா³கா³மிஸ்ஸ புத்ததீ⁴தரோ ஹொந்தி, ஓரோதா⁴ ச ஹொந்தி, தஸ்மா ப³ஹலா கிலேஸா. இத³ங் பன ப⁴வதனுகவஸேன கதி²த’’ந்தி. தங் அட்ட²கதா²யங் ‘‘ஸோதாபன்னஸ்ஸ ஸத்த ப⁴வே ட²பெத்வா அட்ட²மே ப⁴வே ப⁴வதனுகங் நத்தி², ஸகதா³கா³மிஸ்ஸ த்³வே ப⁴வே ட²பெத்வா பஞ்சஸு ப⁴வேஸு ப⁴வதனுகங் நத்தி², அனாகா³மிஸ்ஸ ரூபாரூபப⁴வங் ட²பெத்வா காமப⁴வே ப⁴வதனுகங் நத்தி², கீ²ணாஸவஸ்ஸ கிஸ்மிஞ்சி ப⁴வே ப⁴வதனுகங் நத்தீ²’’தி வுத்தத்தா படிக்கி²த்தங் ஹோதி.
Rāgadosamohānaṃtanuttāti ettha kadāci uppattiyā ca pariyuṭṭhānamandatāya cāti dvedhāpi tanubhāvo veditabbo. Sakadāgāmissa hi puthujjanānaṃ viya abhiṇhaṃ rāgādayo na uppajjanti, kadāci karahaci uppajjanti. Uppajjamānā ca na puthujjanānaṃ viya bahalabahalā uppajjanti, makkhipattaṃ viya tanukā uppajjanti. Dīghabhāṇakatipiṭakamahāsīvatthero panāha – ‘‘yasmā sakadāgāmissa puttadhītaro honti, orodhā ca honti, tasmā bahalā kilesā. Idaṃ pana bhavatanukavasena kathita’’nti. Taṃ aṭṭhakathāyaṃ ‘‘sotāpannassa satta bhave ṭhapetvā aṭṭhame bhave bhavatanukaṃ natthi, sakadāgāmissa dve bhave ṭhapetvā pañcasu bhavesu bhavatanukaṃ natthi, anāgāmissa rūpārūpabhavaṃ ṭhapetvā kāmabhave bhavatanukaṃ natthi, khīṇāsavassa kismiñci bhave bhavatanukaṃ natthī’’ti vuttattā paṭikkhittaṃ hoti.
இமங் லோகந்தி இமங் காமாவசரலோகங் ஸந்தா⁴ய வுத்தங். அயஞ்ஹெத்த² அதி⁴ப்பாயோ – ஸசே ஹி மனுஸ்ஸேஸு ஸகதா³கா³மிப²லங் பத்தோ தே³வேஸு நிப்³ப³த்தித்வா அரஹத்தங் ஸச்சி²கரோதி, இச்சேதங் குஸலங். அஸக்கொந்தோ பன அவஸ்ஸங் மனுஸ்ஸலோகங் ஆக³ந்த்வா ஸச்சி²கரோதி. தே³வேஸு ஸகதா³கா³மிப²லங் பத்தோபி ஸசே மனுஸ்ஸேஸு நிப்³ப³த்தித்வா அரஹத்தங் ஸச்சி²கரோதி, இச்சேதங் குஸலங். அஸக்கொந்தோ பன அவஸ்ஸங் தே³வலோகங் க³ந்த்வா ஸச்சி²கரோதீதி.
Imaṃlokanti imaṃ kāmāvacaralokaṃ sandhāya vuttaṃ. Ayañhettha adhippāyo – sace hi manussesu sakadāgāmiphalaṃ patto devesu nibbattitvā arahattaṃ sacchikaroti, iccetaṃ kusalaṃ. Asakkonto pana avassaṃ manussalokaṃ āgantvā sacchikaroti. Devesu sakadāgāmiphalaṃ pattopi sace manussesu nibbattitvā arahattaṃ sacchikaroti, iccetaṃ kusalaṃ. Asakkonto pana avassaṃ devalokaṃ gantvā sacchikarotīti.
வினிபதனங் வினிபாதோ, நாஸ்ஸ வினிபாதோ த⁴ம்மோதி அவினிபாதத⁴ம்மோ, சதூஸு அபாயேஸு அவினிபாதனஸபா⁴வோதி அத்தோ². நியதோதி த⁴ம்மனியாமேன நியதோ. ஸம்போ³தி⁴பராயணோதி உபரிமக்³க³த்தயஸங்கா²தா ஸம்போ³தி⁴ பரங் அயனங் அஸ்ஸ க³தி படிஸரணங் அவஸ்ஸங் பத்தப்³பா³தி ஸம்போ³தி⁴பராயணோ. விஹேஸாவேஸாதி தேஸங் தேஸங் ஞாணக³திங் ஞாணூபபத்திங் ஞாணாபி⁴ஸம்பராயங் ஓலோகெந்தஸ்ஸ காயகிலமதோ²வ ஏஸ, ஆனந்த³, ததா²க³தஸ்ஸாதி தீ³பேதி. சித்தவிஹேஸா பன பு³த்³தா⁴னங் நத்தி².
Vinipatanaṃ vinipāto, nāssa vinipāto dhammoti avinipātadhammo, catūsu apāyesu avinipātanasabhāvoti attho. Niyatoti dhammaniyāmena niyato. Sambodhiparāyaṇoti uparimaggattayasaṅkhātā sambodhi paraṃ ayanaṃ assa gati paṭisaraṇaṃ avassaṃ pattabbāti sambodhiparāyaṇo. Vihesāvesāti tesaṃ tesaṃ ñāṇagatiṃ ñāṇūpapattiṃ ñāṇābhisamparāyaṃ olokentassa kāyakilamathova esa, ānanda, tathāgatassāti dīpeti. Cittavihesā pana buddhānaṃ natthi.
த⁴ம்மாதா³ஸந்தி த⁴ம்மமயங் ஆதா³ஸங். யேனாதி யேன த⁴ம்மாதா³ஸேன ஸமன்னாக³தோ. கீ²ணாபாயது³க்³க³திவினிபாதோதி இத³ங் நிரயாதீ³னங்யேவ வேவசனவஸேனேவ வுத்தங். நிரயாத³யோ ஹி வட்³டி⁴ஸங்கா²ததோ அயதோ அபேதத்தா அபாயோ, து³க்க²ஸ்ஸ க³தி படிஸரணந்தி. து³க்³க³தி, து³க்கடகாரினோ எத்த² விவஸா நிபதந்தீதி வினிபாதோ. நவமங் உத்தானமேவ.
Dhammādāsanti dhammamayaṃ ādāsaṃ. Yenāti yena dhammādāsena samannāgato. Khīṇāpāyaduggativinipātoti idaṃ nirayādīnaṃyeva vevacanavaseneva vuttaṃ. Nirayādayo hi vaḍḍhisaṅkhātato ayato apetattā apāyo, dukkhassa gati paṭisaraṇanti. Duggati, dukkaṭakārino ettha vivasā nipatantīti vinipāto. Navamaṃ uttānameva.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya
8. பட²மகி³ஞ்ஜகாவஸத²ஸுத்தங் • 8. Paṭhamagiñjakāvasathasuttaṃ
9. து³தியகி³ஞ்ஜகாவஸத²ஸுத்தங் • 9. Dutiyagiñjakāvasathasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 8-9. பட²மகி³ஞ்ஜகாவஸத²ஸுத்தாதி³வண்ணனா • 8-9. Paṭhamagiñjakāvasathasuttādivaṇṇanā
