| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
2. பட²மஇஸித³த்தஸுத்தங்
2. Paṭhamaisidattasuttaṃ
344. ஏகங் ஸமயங் ஸம்ப³ஹுலா தே²ரா பி⁴க்கூ² மச்சி²காஸண்டே³ விஹரந்தி அம்பா³டகவனே. அத² கோ² சித்தோ க³ஹபதி யேன தே²ரா பி⁴க்கூ² தேனுபஸங்கமி; உபஸங்கமித்வா தே²ரே பி⁴க்கூ² அபி⁴வாதெ³த்வா ஏகமந்தங் நிஸீதி³. ஏகமந்தங் நிஸின்னோ கோ² சித்தோ க³ஹபதி தே²ரே பி⁴க்கூ² ஏதத³வோச – ‘‘அதி⁴வாஸெந்து மே, ப⁴ந்தே, தே²ரா ஸ்வாதனாய ப⁴த்த’’ந்தி. அதி⁴வாஸேஸுங் கோ² தே²ரா பி⁴க்கூ² துண்ஹீபா⁴வேன . அத² கோ² சித்தோ க³ஹபதி தே²ரானங் பி⁴க்கூ²னங் அதி⁴வாஸனங் விதி³த்வா உட்டா²யாஸனா தே²ரே பி⁴க்கூ² அபி⁴வாதெ³த்வா பத³க்கி²ணங் கத்வா பக்காமி. அத² கோ² தே²ரா பி⁴க்கூ² தஸ்ஸா ரத்தியா அச்சயேன புப்³ப³ண்ஹஸமயங் நிவாஸெத்வா பத்தசீவரமாதா³ய யேன சித்தஸ்ஸ க³ஹபதிஸ்ஸ நிவேஸனங் தேனுபஸங்கமிங்ஸு; உபஸங்கமித்வா பஞ்ஞத்தே ஆஸனே நிஸீதி³ங்ஸு.
344. Ekaṃ samayaṃ sambahulā therā bhikkhū macchikāsaṇḍe viharanti ambāṭakavane. Atha kho citto gahapati yena therā bhikkhū tenupasaṅkami; upasaṅkamitvā there bhikkhū abhivādetvā ekamantaṃ nisīdi. Ekamantaṃ nisinno kho citto gahapati there bhikkhū etadavoca – ‘‘adhivāsentu me, bhante, therā svātanāya bhatta’’nti. Adhivāsesuṃ kho therā bhikkhū tuṇhībhāvena . Atha kho citto gahapati therānaṃ bhikkhūnaṃ adhivāsanaṃ viditvā uṭṭhāyāsanā there bhikkhū abhivādetvā padakkhiṇaṃ katvā pakkāmi. Atha kho therā bhikkhū tassā rattiyā accayena pubbaṇhasamayaṃ nivāsetvā pattacīvaramādāya yena cittassa gahapatissa nivesanaṃ tenupasaṅkamiṃsu; upasaṅkamitvā paññatte āsane nisīdiṃsu.
அத² கோ² சித்தோ க³ஹபதி யேன தே²ரா பி⁴க்கூ² தேனுபஸங்கமி; உபஸங்கமித்வா தே²ரே பி⁴க்கூ² அபி⁴வாதெ³த்வா ஏகமந்தங் நிஸீதி³. ஏகமந்தங் நிஸின்னோ கோ² சித்தோ க³ஹபதி ஆயஸ்மந்தங் தே²ரங் ஏதத³வோச – ‘‘‘தா⁴துனானத்தங், தா⁴துனானத்த’ந்தி, ப⁴ந்தே தே²ர, வுச்சதி. கித்தாவதா நு கோ², ப⁴ந்தே, தா⁴துனானத்தங் வுத்தங் ப⁴க³வதா’’தி? ஏவங் வுத்தே ஆயஸ்மா தே²ரோ துண்ஹீ அஹோஸி. து³தியம்பி கோ² சித்தோ க³ஹபதி ஆயஸ்மந்தங் தே²ரங் ஏதத³வோச – ‘‘‘தா⁴துனானத்தங், தா⁴துனானத்த’ந்தி, ப⁴ந்தே தே²ர, வுச்சதி. கித்தாவதா நு கோ², ப⁴ந்தே, தா⁴துனானத்தங் வுத்தங் ப⁴க³வதா’’தி? து³தியம்பி கோ² ஆயஸ்மா தே²ரோ துண்ஹீ அஹோஸி. ததியம்பி கோ² சித்தோ க³ஹபதி ஆயஸ்மந்தங் தே²ரங் ஏதத³வோச – ‘‘‘தா⁴துனானத்தங், தா⁴துனானத்த’ந்தி, ப⁴ந்தே தே²ர, வுச்சதி. கித்தாவதா நு கோ², ப⁴ந்தே, தா⁴துனானத்தங் வுத்தங் ப⁴க³வதா’’தி? ததியம்பி கோ² ஆயஸ்மா தே²ரோ துண்ஹீ அஹோஸி.
Atha kho citto gahapati yena therā bhikkhū tenupasaṅkami; upasaṅkamitvā there bhikkhū abhivādetvā ekamantaṃ nisīdi. Ekamantaṃ nisinno kho citto gahapati āyasmantaṃ theraṃ etadavoca – ‘‘‘dhātunānattaṃ, dhātunānatta’nti, bhante thera, vuccati. Kittāvatā nu kho, bhante, dhātunānattaṃ vuttaṃ bhagavatā’’ti? Evaṃ vutte āyasmā thero tuṇhī ahosi. Dutiyampi kho citto gahapati āyasmantaṃ theraṃ etadavoca – ‘‘‘dhātunānattaṃ, dhātunānatta’nti, bhante thera, vuccati. Kittāvatā nu kho, bhante, dhātunānattaṃ vuttaṃ bhagavatā’’ti? Dutiyampi kho āyasmā thero tuṇhī ahosi. Tatiyampi kho citto gahapati āyasmantaṃ theraṃ etadavoca – ‘‘‘dhātunānattaṃ, dhātunānatta’nti, bhante thera, vuccati. Kittāvatā nu kho, bhante, dhātunānattaṃ vuttaṃ bhagavatā’’ti? Tatiyampi kho āyasmā thero tuṇhī ahosi.
தேன கோ² பன ஸமயேன ஆயஸ்மா இஸித³த்தோ தஸ்மிங் பி⁴க்கு²ஸங்கே⁴ ஸப்³ப³னவகோ ஹோதி. அத² கோ² ஆயஸ்மா இஸித³த்தோ ஆயஸ்மந்தங் தே²ரங் ஏதத³வோச – ‘‘ப்³யாகரோமஹங், ப⁴ந்தே தே²ர, சித்தஸ்ஸ க³ஹபதினோ ஏதங் பஞ்ஹ’’ந்தி? ‘‘ப்³யாகரோஹி த்வங், ஆவுஸோ இஸித³த்த, சித்தஸ்ஸ க³ஹபதினோ ஏதங் பஞ்ஹ’’ந்தி. ‘‘ஏவஞ்ஹி த்வங், க³ஹபதி, புச்ச²ஸி – ‘தா⁴துனானத்தங், தா⁴துனானத்தந்தி, ப⁴ந்தே தே²ர, வுச்சதி. கித்தாவதா நு கோ², ப⁴ந்தே, தா⁴துனானத்தங், வுத்தங் ப⁴க³வதா’’’தி? ‘‘ஏவங் , ப⁴ந்தே’’. ‘‘இத³ங் கோ², க³ஹபதி, தா⁴துனானத்தங் வுத்தங் ப⁴க³வதா – சக்கு²தா⁴து, ரூபதா⁴து, சக்கு²விஞ்ஞாணதா⁴து…பே॰… மனோதா⁴து, த⁴ம்மதா⁴து, மனோவிஞ்ஞாணதா⁴து. எத்தாவதா கோ², க³ஹபதி, தா⁴துனானத்தங் வுத்தங் ப⁴க³வதா’’தி.
Tena kho pana samayena āyasmā isidatto tasmiṃ bhikkhusaṅghe sabbanavako hoti. Atha kho āyasmā isidatto āyasmantaṃ theraṃ etadavoca – ‘‘byākaromahaṃ, bhante thera, cittassa gahapatino etaṃ pañha’’nti? ‘‘Byākarohi tvaṃ, āvuso isidatta, cittassa gahapatino etaṃ pañha’’nti. ‘‘Evañhi tvaṃ, gahapati, pucchasi – ‘dhātunānattaṃ, dhātunānattanti, bhante thera, vuccati. Kittāvatā nu kho, bhante, dhātunānattaṃ, vuttaṃ bhagavatā’’’ti? ‘‘Evaṃ , bhante’’. ‘‘Idaṃ kho, gahapati, dhātunānattaṃ vuttaṃ bhagavatā – cakkhudhātu, rūpadhātu, cakkhuviññāṇadhātu…pe… manodhātu, dhammadhātu, manoviññāṇadhātu. Ettāvatā kho, gahapati, dhātunānattaṃ vuttaṃ bhagavatā’’ti.
அத² கோ² சித்தோ க³ஹபதி ஆயஸ்மதோ இஸித³த்தஸ்ஸ பா⁴ஸிதங் அபி⁴னந்தி³த்வா அனுமோதி³த்வா தே²ரே பி⁴க்கூ² பணீதேன கா²த³னீயேன போ⁴ஜனீயேன ஸஹத்தா² ஸந்தப்பேஸி ஸம்பவாரேஸி. அத² கோ² தே²ரா பி⁴க்கூ² பு⁴த்தாவினோ ஓனீதபத்தபாணினோ உட்டா²யாஸனா பக்கமிங்ஸு. அத² கோ² ஆயஸ்மா தே²ரோ ஆயஸ்மந்தங் இஸித³த்தங் ஏதத³வோச – ‘‘ஸாது⁴ கோ² தங், ஆவுஸோ இஸித³த்த , ஏஸோ பஞ்ஹோ படிபா⁴ஸி, நேஸோ பஞ்ஹோ மங் படிபா⁴ஸி. தேனஹாவுஸோ இஸித³த்த, யதா³ அஞ்ஞதா²பி 1 ஏவரூபோ பஞ்ஹோ ஆக³ச்செ²ய்ய, தஞ்ஞேவெத்த² படிபா⁴ஸெய்யா’’தி. து³தியங்.
Atha kho citto gahapati āyasmato isidattassa bhāsitaṃ abhinanditvā anumoditvā there bhikkhū paṇītena khādanīyena bhojanīyena sahatthā santappesi sampavāresi. Atha kho therā bhikkhū bhuttāvino onītapattapāṇino uṭṭhāyāsanā pakkamiṃsu. Atha kho āyasmā thero āyasmantaṃ isidattaṃ etadavoca – ‘‘sādhu kho taṃ, āvuso isidatta , eso pañho paṭibhāsi, neso pañho maṃ paṭibhāsi. Tenahāvuso isidatta, yadā aññathāpi 2 evarūpo pañho āgaccheyya, taññevettha paṭibhāseyyā’’ti. Dutiyaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 2. பட²மஇஸித³த்தஸுத்தவண்ணனா • 2. Paṭhamaisidattasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 2. பட²மஇஸித³த்தஸுத்தவண்ணனா • 2. Paṭhamaisidattasuttavaṇṇanā
