| Library / Tipiṭaka / តិបិដក • Tipiṭaka / សំយុត្តនិកាយ (អដ្ឋកថា) • Saṃyuttanikāya (aṭṭhakathā) |
២. បឋមឥសិទត្តសុត្តវណ្ណនា
2. Paṭhamaisidattasuttavaṇṇanā
៣៤៤. ទុតិយេ អាយស្មន្តំ ថេរន្តិ តេសុ ថេរេសុ ជេដ្ឋកំ មហាថេរំ។ តុណ្ហី អហោសីតិ ជានន្តោបិ អវិសារទត្តា ន កិញ្ចិ ព្យាហរិ។ ព្យាករោមហំ ភន្តេតិ ‘‘អយំ ថេរោ នេវ អត្តនា ព្យាករោតិ, ន អញ្ញេ អជ្ឈេសតិ, ឧបាសកោបិ ភិក្ខុសង្ឃំ វិហេសេតិ, អហមេតំ ព្យាករិត្វា ផាសុវិហារំ កត្វា ទស្សាមី’’តិ ចិន្តេត្វា អាសនតោ វុដ្ឋាយ ថេរស្ស សន្តិកំ គន្ត្វា ឯវំ ឱកាសមកាសិ, កតាវកាសោ បន អត្តនោ អាសនេ និសីទិត្វា ព្យាកាសិ។
344. Dutiye āyasmantaṃ theranti tesu theresu jeṭṭhakaṃ mahātheraṃ. Tuṇhī ahosīti jānantopi avisāradattā na kiñci byāhari. Byākaromahaṃ bhanteti ‘‘ayaṃ thero neva attanā byākaroti, na aññe ajjhesati, upāsakopi bhikkhusaṅghaṃ viheseti, ahametaṃ byākaritvā phāsuvihāraṃ katvā dassāmī’’ti cintetvā āsanato vuṭṭhāya therassa santikaṃ gantvā evaṃ okāsamakāsi, katāvakāso pana attano āsane nisīditvā byākāsi.
សហត្ថាតិ សហត្ថេន។ សន្តប្បេសីតិ យាវទិច្ឆកំ ទេន្តោ សុដ្ឋុ តប្បេសិ។ សម្បវារេសីតិ ‘‘អលំ អល’’ន្តិ ហត្ថសញ្ញាយ ចេវ វាចាយ ច បដិក្ខិបាបេសិ។ ឱនីតបត្តបាណិនោតិ បាណិតោ អបនីតបត្តា ធោវិត្វា ថវិកាយ ឱសាបេត្វា អំសេ លគ្គិតបត្តាតិ អត្ថោ។
Sahatthāti sahatthena. Santappesīti yāvadicchakaṃ dento suṭṭhu tappesi. Sampavāresīti ‘‘alaṃ ala’’nti hatthasaññāya ceva vācāya ca paṭikkhipāpesi. Onītapattapāṇinoti pāṇito apanītapattā dhovitvā thavikāya osāpetvā aṃse laggitapattāti attho.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / សំយុត្តនិកាយ • Saṃyuttanikāya / ២. បឋមឥសិទត្តសុត្តំ • 2. Paṭhamaisidattasuttaṃ
ដីកា • Tīkā / សុត្តបិដក (ដីកា) • Suttapiṭaka (ṭīkā) / សំយុត្តនិកាយ (ដីកា) • Saṃyuttanikāya (ṭīkā) / ២. បឋមឥសិទត្តសុត្តវណ្ណនា • 2. Paṭhamaisidattasuttavaṇṇanā
