| Library / Tipiṭaka / তিপিটক • Tipiṭaka / মহাৰিভঙ্গ-অট্ঠকথা • Mahāvibhaṅga-aṭṭhakathā |
পঠমজ্ঝানকথা
Paṭhamajjhānakathā
ইদানি ইমায পটিপদায অধিগতং পঠমজ্ঝানং আদিং কত্ৰা ৰিজ্জত্তযপরিযোসানং ৰিসেসং দস্সেন্তো ‘‘সো খো অহ’’ন্তি আদিমাহ। তত্থ ৰিৰিচ্চেৰ কামেহি ৰিৰিচ্চ অকুসলেহি ধম্মেহীতিআদীনং কিঞ্চাপি ‘‘তত্থ কতমে কামা? ছন্দো কামো, রাগো কামো, ছন্দরাগো কামো; সঙ্কপ্পো কামো, রাগো কামো, সঙ্কপ্পরাগো কামো – ইমে ৰুচ্চন্তি কামা। তত্থ কতমে অকুসলা ধম্মা? কামচ্ছন্দো…পে॰… ৰিচিকিচ্ছা – ইমে ৰুচ্চন্তি অকুসলা ধম্মা। ইতি ইমেহি চ কামেহি ইমেহি চ অকুসলেহি ধম্মেহি ৰিৰিত্তো হোতি পৰিৰিত্তো, তেন ৰুচ্চতি – ‘ৰিৰিচ্চেৰ কামেহি ৰিৰিচ্চ অকুসলেহি ধম্মেহী’’’তিআদিনা (ৰিভ॰ ৫৬৪) নযেন ৰিভঙ্গেযেৰ অত্থো ৰুত্তো। তথাপি অট্ঠকথানযং ৰিনা ন সুট্ঠু পাকটোতি অট্ঠকথানযেনেৰ নং পকাসযিস্সাম।
Idāni imāya paṭipadāya adhigataṃ paṭhamajjhānaṃ ādiṃ katvā vijjattayapariyosānaṃ visesaṃ dassento ‘‘so kho aha’’nti ādimāha. Tattha vivicceva kāmehi vivicca akusalehi dhammehītiādīnaṃ kiñcāpi ‘‘tattha katame kāmā? Chando kāmo, rāgo kāmo, chandarāgo kāmo; saṅkappo kāmo, rāgo kāmo, saṅkapparāgo kāmo – ime vuccanti kāmā. Tattha katame akusalā dhammā? Kāmacchando…pe… vicikicchā – ime vuccanti akusalā dhammā. Iti imehi ca kāmehi imehi ca akusalehi dhammehi vivitto hoti pavivitto, tena vuccati – ‘vivicceva kāmehi vivicca akusalehi dhammehī’’’tiādinā (vibha. 564) nayena vibhaṅgeyeva attho vutto. Tathāpi aṭṭhakathānayaṃ vinā na suṭṭhu pākaṭoti aṭṭhakathānayeneva naṃ pakāsayissāma.
সেয্যথিদং – ৰিৰিচ্চেৰ কামেহীতি কামেহি ৰিৰিচ্চিত্ৰা ৰিনা হুত্ৰা অপসক্কেত্ৰা। যো পনাযমেত্থ এৰকারো, সো নিযমত্থোতি ৰেদিতব্বো। যস্মা চ নিযমত্থো, তস্মা তস্মিং পঠমজ্ঝানং উপসম্পজ্জ ৰিহরণসমযে অৰিজ্জমানানম্পি কামানং তস্স পঠমজ্ঝানস্স পটিপক্খভাৰং কামপরিচ্চাগেনেৰ চস্স অধিগমং দীপেতি। কথং? ‘‘ৰিৰিচ্চেৰ কামেহী’’তি এৰঞ্হি নিযমে করিযমানে ইদং পঞ্ঞাযতি। নূনিমস্স ঝানস্স কামা পটিপক্খভূতা, যেসু সতি ইদং ন পৰত্ততি, অন্ধকারে সতি পদীপো ৰিয, তেসং পরিচ্চাগেনেৰ চস্স অধিগমো হোতি, ওরিমতীরপরিচ্চাগেন পারিমতীরস্সেৰ, তস্মা নিযমং করোতীতি।
Seyyathidaṃ – vivicceva kāmehīti kāmehi viviccitvā vinā hutvā apasakketvā. Yo panāyamettha evakāro, so niyamatthoti veditabbo. Yasmā ca niyamattho, tasmā tasmiṃ paṭhamajjhānaṃ upasampajja viharaṇasamaye avijjamānānampi kāmānaṃ tassa paṭhamajjhānassa paṭipakkhabhāvaṃ kāmapariccāgeneva cassa adhigamaṃ dīpeti. Kathaṃ? ‘‘Vivicceva kāmehī’’ti evañhi niyame kariyamāne idaṃ paññāyati. Nūnimassa jhānassa kāmā paṭipakkhabhūtā, yesu sati idaṃ na pavattati, andhakāre sati padīpo viya, tesaṃ pariccāgeneva cassa adhigamo hoti, orimatīrapariccāgena pārimatīrasseva, tasmā niyamaṃ karotīti.
তত্থ সিযা – ‘‘কস্মা পনেস পুব্বপদেযেৰ ৰুত্তো ন উত্তরপদে, কিং অকুসলেহি ধম্মেহি অৰিৰিচ্চাপি ঝানং উপসম্পজ্জ ৰিহরেয্যা’’তি? ন খো পনেতং এৰং দট্ঠব্বং। তন্নিস্সরণতো হি পুব্বপদেএৰ এস ৰুত্তো। কামধাতুসমতিক্কমনতো হি কামরাগপটিপক্খতো চ ইদং ঝানং কামানমেৰ নিস্সরণং। যথাহ – ‘‘কামানমেতং নিস্সরণং, যদিদং নেক্খম্ম’’ন্তি (ইতিৰু॰ ৭২)। উত্তরপদেপি পন যথা ‘‘ইধেৰ, ভিক্খৰে, পঠমো সমণো, ইধ দুতিযো সমণো’’তি (ম॰ নি॰ ১.১৩৯) এত্থ এৰকারো আনেত্ৰা ৰুচ্চতি, এৰং ৰত্তব্বো। ন হি সক্কা ইতো অঞ্ঞেহিপি নীৰরণসঙ্খাতেহি অকুসলেহি ধম্মেহি অৰিৰিচ্চ ঝানং উপসম্পজ্জ ৰিহরিতুং । তস্মা ‘‘ৰিৰিচ্চেৰ কামেহি ৰিৰিচ্চেৰ অকুসলেহি ধম্মেহী’’তি এৰং পদদ্ৰযেপি এস দট্ঠব্বো। পদদ্ৰযেপি চ কিঞ্চাপি ‘‘ৰিৰিচ্চা’’তি ইমিনা সাধারণৰচনেন তদঙ্গৰিৰেকাদযো কাযৰিৰেকাদযো চ সব্বেপি ৰিৰেকা সঙ্গহং গচ্ছন্তি। তথাপি কাযৰিৰেকো, চিত্তৰিৰেকো, ৰিক্খম্ভনৰিৰেকোতি তযো এৰ ইধ দট্ঠব্বা। ‘‘কামেহী’’তি ইমিনা পন পদেন যে চ নিদ্দেসে ‘‘কতমে ৰত্থুকামা মনাপিযা রূপা’’তিআদিনা (মহানি॰ ১; ৰিভ॰ ৯৬৪) নযেন ৰত্থুকামা ৰুত্তা, যে চ তত্থেৰ ৰিভঙ্গে চ ‘‘ছন্দো কামো’’তিআদিনা (মহানি॰ ১) নযেন কিলেসকামা ৰুত্তা, তে সব্বেপি সঙ্গহিতা ইচ্চেৰ দট্ঠব্বা। এৰঞ্হি সতি ‘‘ৰিৰিচ্চেৰ কামেহী’’তি ৰত্থুকামেহিপি ৰিৰিচ্চেৰাতি অত্থো যুজ্জতি। তেন কাযৰিৰেকো ৰুত্তো হোতি।
Tattha siyā – ‘‘kasmā panesa pubbapadeyeva vutto na uttarapade, kiṃ akusalehi dhammehi aviviccāpi jhānaṃ upasampajja vihareyyā’’ti? Na kho panetaṃ evaṃ daṭṭhabbaṃ. Tannissaraṇato hi pubbapadeeva esa vutto. Kāmadhātusamatikkamanato hi kāmarāgapaṭipakkhato ca idaṃ jhānaṃ kāmānameva nissaraṇaṃ. Yathāha – ‘‘kāmānametaṃ nissaraṇaṃ, yadidaṃ nekkhamma’’nti (itivu. 72). Uttarapadepi pana yathā ‘‘idheva, bhikkhave, paṭhamo samaṇo, idha dutiyo samaṇo’’ti (ma. ni. 1.139) ettha evakāro ānetvā vuccati, evaṃ vattabbo. Na hi sakkā ito aññehipi nīvaraṇasaṅkhātehi akusalehi dhammehi avivicca jhānaṃ upasampajja viharituṃ . Tasmā ‘‘vivicceva kāmehi vivicceva akusalehi dhammehī’’ti evaṃ padadvayepi esa daṭṭhabbo. Padadvayepi ca kiñcāpi ‘‘viviccā’’ti iminā sādhāraṇavacanena tadaṅgavivekādayo kāyavivekādayo ca sabbepi vivekā saṅgahaṃ gacchanti. Tathāpi kāyaviveko, cittaviveko, vikkhambhanavivekoti tayo eva idha daṭṭhabbā. ‘‘Kāmehī’’ti iminā pana padena ye ca niddese ‘‘katame vatthukāmā manāpiyā rūpā’’tiādinā (mahāni. 1; vibha. 964) nayena vatthukāmā vuttā, ye ca tattheva vibhaṅge ca ‘‘chando kāmo’’tiādinā (mahāni. 1) nayena kilesakāmā vuttā, te sabbepi saṅgahitā icceva daṭṭhabbā. Evañhi sati ‘‘vivicceva kāmehī’’ti vatthukāmehipi viviccevāti attho yujjati. Tena kāyaviveko vutto hoti.
ৰিৰিচ্চ অকুসলেহি ধম্মেহীতি কিলেসকামেহি সব্বাকুসলেহি ধম্মেহি ৰা ৰিৰিচ্চাতি অত্থো যুজ্জতি। তেন চিত্তৰিৰেকো ৰুত্তো হোতি। পুরিমেন চেত্থ ৰত্থুকামেহি ৰিৰেকৰচনতোযেৰ কামসুখপরিচ্চাগো, দুতিযেন কিলেসকামেহি ৰিৰেকৰচনতো নেক্খম্মসুখপরিগ্গহো ৰিভাৰিতো হোতি। এৰং ৰত্থুকামকিলেসকামৰিৰেকৰচনতোযেৰ চ এতেসং পঠমেন সংকিলেসৰত্থুপ্পহানং, দুতিযেন সংকিলেসপ্পহানং; পঠমেন লোলভাৰস্স হেতুপরিচ্চাগো, দুতিযেন বালভাৰস্স; পঠমেন চ পযোগসুদ্ধি, দুতিযেন আসযপোসনং ৰিভাৰিতং হোতীতি ৰিঞ্ঞাতব্বং। এস তাৰ নযো ‘‘কামেহী’’তি এত্থ ৰুত্তকামেসু ৰত্থুকামপক্খে।
Vivicca akusalehi dhammehīti kilesakāmehi sabbākusalehi dhammehi vā viviccāti attho yujjati. Tena cittaviveko vutto hoti. Purimena cettha vatthukāmehi vivekavacanatoyeva kāmasukhapariccāgo, dutiyena kilesakāmehi vivekavacanato nekkhammasukhapariggaho vibhāvito hoti. Evaṃ vatthukāmakilesakāmavivekavacanatoyeva ca etesaṃ paṭhamena saṃkilesavatthuppahānaṃ, dutiyena saṃkilesappahānaṃ; paṭhamena lolabhāvassa hetupariccāgo, dutiyena bālabhāvassa; paṭhamena ca payogasuddhi, dutiyena āsayaposanaṃ vibhāvitaṃ hotīti viññātabbaṃ. Esa tāva nayo ‘‘kāmehī’’ti ettha vuttakāmesu vatthukāmapakkhe.
কিলেসকামপক্খে পন ছন্দোতি চ রাগোতি চ এৰমাদীহি অনেকভেদো কামচ্ছন্দোযেৰ কামোতি অধিপ্পেতো। সো চ অকুসলপরিযাপন্নোপি সমানো, ‘‘তত্থ কতমো কামছন্দো কামো’’তিআদিনা নযেন ৰিভঙ্গে ঝানপটিপক্খতো ৰিসুং ৰুত্তো। কিলেসকামত্তা ৰা পুরিমপদে ৰুত্তো, অকুসলপরিযাপন্নত্তা দুতিযপদে। অনেকভেদতো চস্স কামতোতি অৰত্ৰা কামেহীতি ৰুত্তং। অঞ্ঞেসম্পি চ ধম্মানং অকুসলভাৰে ৰিজ্জমানে ‘‘তত্থ কতমে অকুসলা ধম্মা কামচ্ছন্দো’’তিআদিনা নযেন ৰিভঙ্গে (ৰিভ॰ ৫৬৪) উপরিঝানঙ্গপচ্চনীকপটিপক্খভাৰদস্সনতো নীৰরণানেৰ ৰুত্তানি। নীৰরণানি হি ঝানঙ্গপচ্চনীকানি, তেসং ঝানঙ্গানেৰ পটিপক্খানি, ৰিদ্ধংসকানীতি ৰুত্তং হোতি। তথা হি ‘‘সমাধি কামচ্ছন্দস্স পটিপক্খো, পীতি ব্যাপাদস্স, ৰিতক্কো থিনমিদ্ধস্স, সুখং উদ্ধচ্চকুক্কুচ্চস্স, ৰিচারো ৰিচিকিচ্ছাযা’’তি পেটকে ৰুত্তং।
Kilesakāmapakkhe pana chandoti ca rāgoti ca evamādīhi anekabhedo kāmacchandoyeva kāmoti adhippeto. So ca akusalapariyāpannopi samāno, ‘‘tattha katamo kāmachando kāmo’’tiādinā nayena vibhaṅge jhānapaṭipakkhato visuṃ vutto. Kilesakāmattā vā purimapade vutto, akusalapariyāpannattā dutiyapade. Anekabhedato cassa kāmatoti avatvā kāmehīti vuttaṃ. Aññesampi ca dhammānaṃ akusalabhāve vijjamāne ‘‘tattha katame akusalā dhammā kāmacchando’’tiādinā nayena vibhaṅge (vibha. 564) uparijhānaṅgapaccanīkapaṭipakkhabhāvadassanato nīvaraṇāneva vuttāni. Nīvaraṇāni hi jhānaṅgapaccanīkāni, tesaṃ jhānaṅgāneva paṭipakkhāni, viddhaṃsakānīti vuttaṃ hoti. Tathā hi ‘‘samādhi kāmacchandassa paṭipakkho, pīti byāpādassa, vitakko thinamiddhassa, sukhaṃ uddhaccakukkuccassa, vicāro vicikicchāyā’’ti peṭake vuttaṃ.
এৰমেত্থ ‘‘ৰিৰিচ্চেৰ কামেহী’’তি ইমিনা কামচ্ছন্দস্স ৰিক্খম্ভনৰিৰেকো ৰুত্তো হোতি। ‘‘ৰিৰিচ্চ অকুসলেহি ধম্মেহী’’তি ইমিনা পঞ্চন্নম্পি নীৰরণানং। অগ্গহিতগ্গহণেন পন পঠমেন কামচ্ছন্দস্স, দুতিযেন সেসনীৰরণানং। তথা পঠমেন তীসু অকুসলমূলেসু পঞ্চকামগুণভেদৰিসযস্স লোভস্স, দুতিযেন আঘাতৰত্থুভেদাদিৰিসযানং দোসমোহানং। ওঘাদীসু ৰা ধম্মেসু পঠমেন কামোঘ-কামযোগ-কামাসৰ-কামুপাদান-অভিজ্ঝাকাযগন্থ-কামরাগ-সংযোজনানং, দুতিযেন অৰসেসওঘ-যোগাসৰ-উপাদান-গন্থ-সংযোজনানং। পঠমেন চ তণ্হায তংসম্পযুত্তকানঞ্চ, দুতিযেন অৰিজ্জায তংসম্পযুত্তকানঞ্চ। অপিচ পঠমেন লোভসম্পযুত্তঅট্ঠচিত্তুপ্পাদানং, দুতিযেন সেসানং চতুন্নং অকুসলচিত্তুপ্পাদানং ৰিক্খম্ভনৰিৰেকো ৰুত্তো হোতীতি ৰেদিতব্বো। অযং তাৰ ‘‘ৰিৰিচ্চেৰ কামেহি ৰিৰিচ্চ অকুসলেহি ধম্মেহী’’তি এত্থ অত্থপ্পকাসনা।
Evamettha ‘‘vivicceva kāmehī’’ti iminā kāmacchandassa vikkhambhanaviveko vutto hoti. ‘‘Vivicca akusalehi dhammehī’’ti iminā pañcannampi nīvaraṇānaṃ. Aggahitaggahaṇena pana paṭhamena kāmacchandassa, dutiyena sesanīvaraṇānaṃ. Tathā paṭhamena tīsu akusalamūlesu pañcakāmaguṇabhedavisayassa lobhassa, dutiyena āghātavatthubhedādivisayānaṃ dosamohānaṃ. Oghādīsu vā dhammesu paṭhamena kāmogha-kāmayoga-kāmāsava-kāmupādāna-abhijjhākāyagantha-kāmarāga-saṃyojanānaṃ, dutiyena avasesaogha-yogāsava-upādāna-gantha-saṃyojanānaṃ. Paṭhamena ca taṇhāya taṃsampayuttakānañca, dutiyena avijjāya taṃsampayuttakānañca. Apica paṭhamena lobhasampayuttaaṭṭhacittuppādānaṃ, dutiyena sesānaṃ catunnaṃ akusalacittuppādānaṃ vikkhambhanaviveko vutto hotīti veditabbo. Ayaṃ tāva ‘‘vivicceva kāmehi vivicca akusalehi dhammehī’’ti ettha atthappakāsanā.
এত্তাৰতা চ পঠমস্স ঝানস্স পহানঙ্গং দস্সেত্ৰা ইদানি সম্পযোগঙ্গং দস্সেন্তো সৰিতক্কং সৰিচারন্তিআদিমাহ। তত্থ ৰিতক্কনং ৰিতক্কো, ঊহনন্তি ৰুত্তং হোতি। স্ৰাযং আরম্মণে চিত্তস্স অভিনিরোপনলক্খণো, আহননপরিযাহননরসো। তথা হি ‘‘তেন যোগাৰচরো আরম্মণং ৰিতক্কাহতং ৰিতক্কপরিযাহতং করোতী’’তি ৰুচ্চতি। আরম্মণে চিত্তস্স আনযনপচ্চুপট্ঠানো। ৰিচরণং ৰিচারো, অনুসঞ্চরণন্তি ৰুত্তং হোতি। স্ৰাযং আরম্মণানুমজ্জনলক্খণো, তত্থ সহজাতানুযোজনরসো, চিত্তস্স অনুপ্পবন্ধনপচ্চুপট্ঠানো। সন্তেপি চ নেসং কত্থচি অৰিপ্পযোগে ওল়ারিকট্ঠেন ঘণ্টাভিঘাতসদ্দো ৰিয চেতসো পঠমাভিনিপাতো ৰিতক্কো, সুখুমট্ঠেন অনুরৰো ৰিয অনুপ্পবন্ধো ৰিচারো। ৰিপ্ফারৰা চেত্থ ৰিতক্কো পরিপ্ফন্দনভাৰো চিত্তস্স, আকাসে উপ্পতিতুকামস্স পক্খিনো পক্খৰিক্খেপো ৰিয পদুমাভিমুখপাতো ৰিয চ গন্ধানুবন্ধচেতসো ভমরস্স। সন্তৰুত্তি ৰিচারো নাতিপরিপ্ফন্দনভাৰো চিত্তস্স, আকাসে উপ্পতিতস্স পক্খিনো পক্খপ্পসারণং ৰিয পরিব্ভমনং ৰিয চ পদুমাভিমুখপতিতস্স ভমরস্স পদুমস্স উপরিভাগে। সো পন নেসং ৰিসেসো পঠম-দুতিযজ্ঝানেসু পাকটো হোতি। ইতি ইমিনা চ ৰিতক্কেন ইমিনা চ ৰিচারেন সহ ৰত্ততি রুক্খো ৰিয পুপ্ফেন চ ফলেন চাতি ইদং ঝানং ‘‘সৰিতক্কং সৰিচার’’ন্তি ৰুচ্চতি। ৰিভঙ্গে পন ‘‘ইমিনা চ ৰিতক্কেন ইমিনা চ ৰিচারেন উপেতো হোতি সমুপেতো’’তিআদিনা (ৰিভ॰ ৫৬৫) নযেন পুগ্গলাধিট্ঠানা দেসনা কতা। অত্থো পন তত্রাপি এৰমেৰ দট্ঠব্বো।
Ettāvatā ca paṭhamassa jhānassa pahānaṅgaṃ dassetvā idāni sampayogaṅgaṃ dassento savitakkaṃ savicārantiādimāha. Tattha vitakkanaṃ vitakko, ūhananti vuttaṃ hoti. Svāyaṃ ārammaṇe cittassa abhiniropanalakkhaṇo, āhananapariyāhananaraso. Tathā hi ‘‘tena yogāvacaro ārammaṇaṃ vitakkāhataṃ vitakkapariyāhataṃ karotī’’ti vuccati. Ārammaṇe cittassa ānayanapaccupaṭṭhāno. Vicaraṇaṃ vicāro, anusañcaraṇanti vuttaṃ hoti. Svāyaṃ ārammaṇānumajjanalakkhaṇo, tattha sahajātānuyojanaraso, cittassa anuppabandhanapaccupaṭṭhāno. Santepi ca nesaṃ katthaci avippayoge oḷārikaṭṭhena ghaṇṭābhighātasaddo viya cetaso paṭhamābhinipāto vitakko, sukhumaṭṭhena anuravo viya anuppabandho vicāro. Vipphāravā cettha vitakko paripphandanabhāvo cittassa, ākāse uppatitukāmassa pakkhino pakkhavikkhepo viya padumābhimukhapāto viya ca gandhānubandhacetaso bhamarassa. Santavutti vicāro nātiparipphandanabhāvo cittassa, ākāse uppatitassa pakkhino pakkhappasāraṇaṃ viya paribbhamanaṃ viya ca padumābhimukhapatitassa bhamarassa padumassa uparibhāge. So pana nesaṃ viseso paṭhama-dutiyajjhānesu pākaṭo hoti. Iti iminā ca vitakkena iminā ca vicārena saha vattati rukkho viya pupphena ca phalena cāti idaṃ jhānaṃ ‘‘savitakkaṃ savicāra’’nti vuccati. Vibhaṅge pana ‘‘iminā ca vitakkena iminā ca vicārena upeto hoti samupeto’’tiādinā (vibha. 565) nayena puggalādhiṭṭhānā desanā katā. Attho pana tatrāpi evameva daṭṭhabbo.
ৰিৰেকজন্তি এত্থ ৰিৰিত্তি ৰিৰেকো, নীৰরণৰিগমোতি অত্থো। ৰিৰিত্তোতি ৰা ৰিৰেকো, নীৰরণৰিৰিত্তো ঝানসম্পযুত্তধম্মরাসীতি অত্থো। তস্মা ৰিৰেকা, তস্মিং ৰা ৰিৰেকে জাতন্তি ৰিৰেকজং। পীতিসুখন্তি এত্থ পিনযতীতি পীতি, সা সম্পিযাযনলক্খণা কাযচিত্তপীননরসা , ফরণরসা ৰা, ওদগ্যপচ্চুপট্ঠানা। সুখনং সুখং, সুট্ঠু ৰা খাদতি খনতি চ কাযচিত্তাবাধন্তি সুখং, তং সাতলক্খণং, সম্পযুত্তকানং উপব্রূহনরসং, অনুগ্গহপচ্চুপট্ঠানং। সতিপি চ নেসং কত্থচি অৰিপ্পযোগে ইট্ঠারম্মণপটিলাভতুট্ঠি পীতি, পটিলদ্ধরসানুভৰনং সুখং। যত্থ পীতি তত্থ সুখং, যত্থ সুখং তত্থ ন নিযমতো পীতি। সঙ্খারক্খন্ধসঙ্গহিতা পীতি, ৰেদনাক্খন্ধসঙ্গহিতং সুখং। কন্তারখিন্নস্স ৰনন্তোদকদস্সনসৰনেসু ৰিয পীতি, ৰনচ্ছাযপ্পৰেসনউদকপরিভোগেসু ৰিয সুখং। তস্মিং তস্মিং সমযে পাকটভাৰতো চেতং ৰুত্তন্তি ৰেদিতব্বং। অযঞ্চ পীতি, ইদঞ্চ সুখং, অস্স ঝানস্স, অস্মিং ৰা ঝানে অত্থীতি ইদং ঝানং ‘‘পীতিসুখ’’ন্তি ৰুচ্চতি।
Vivekajanti ettha vivitti viveko, nīvaraṇavigamoti attho. Vivittoti vā viveko, nīvaraṇavivitto jhānasampayuttadhammarāsīti attho. Tasmā vivekā, tasmiṃ vā viveke jātanti vivekajaṃ. Pītisukhanti ettha pinayatīti pīti, sā sampiyāyanalakkhaṇā kāyacittapīnanarasā , pharaṇarasā vā, odagyapaccupaṭṭhānā. Sukhanaṃ sukhaṃ, suṭṭhu vā khādati khanati ca kāyacittābādhanti sukhaṃ, taṃ sātalakkhaṇaṃ, sampayuttakānaṃ upabrūhanarasaṃ, anuggahapaccupaṭṭhānaṃ. Satipi ca nesaṃ katthaci avippayoge iṭṭhārammaṇapaṭilābhatuṭṭhi pīti, paṭiladdharasānubhavanaṃ sukhaṃ. Yattha pīti tattha sukhaṃ, yattha sukhaṃ tattha na niyamato pīti. Saṅkhārakkhandhasaṅgahitā pīti, vedanākkhandhasaṅgahitaṃ sukhaṃ. Kantārakhinnassa vanantodakadassanasavanesu viya pīti, vanacchāyappavesanaudakaparibhogesu viya sukhaṃ. Tasmiṃ tasmiṃ samaye pākaṭabhāvato cetaṃ vuttanti veditabbaṃ. Ayañca pīti, idañca sukhaṃ, assa jhānassa, asmiṃ vā jhāne atthīti idaṃ jhānaṃ ‘‘pītisukha’’nti vuccati.
অথ ৰা পীতি চ সুখঞ্চ পীতিসুখং, ধম্মৰিনযাদযো ৰিয। ৰিৰেকজং পীতিসুখমস্স ঝানস্স, অস্মিং ৰা ঝানে অত্থীতি এৰম্পি ৰিৰেকজংপীতিসুখং। যথেৰ হি ঝানং, এৰং পীতিসুখং পেত্থ ৰিৰেকজমেৰ হোতি, তঞ্চস্স অত্থীতি তস্মা একপদেনেৰ ‘‘ৰিৰেকজং পীতিসুখ’’ন্তিপি ৰত্তুং যুজ্জতি। ৰিভঙ্গে পন ‘‘ইদং সুখং ইমায পীতিযা সহগত’’ন্তিআদিনা (ৰিভ॰ ৫৬৭) নযেনেতং ৰুত্তং। অত্থো পন তত্রাপি এৰমেৰ দট্ঠব্বো।
Atha vā pīti ca sukhañca pītisukhaṃ, dhammavinayādayo viya. Vivekajaṃ pītisukhamassa jhānassa, asmiṃ vā jhāne atthīti evampi vivekajaṃpītisukhaṃ. Yatheva hi jhānaṃ, evaṃ pītisukhaṃ pettha vivekajameva hoti, tañcassa atthīti tasmā ekapadeneva ‘‘vivekajaṃ pītisukha’’ntipi vattuṃ yujjati. Vibhaṅge pana ‘‘idaṃ sukhaṃ imāya pītiyā sahagata’’ntiādinā (vibha. 567) nayenetaṃ vuttaṃ. Attho pana tatrāpi evameva daṭṭhabbo.
পঠমন্তি গণনানুপুব্বতা পঠমং, ইদং পঠমং সমাপজ্জতীতিপি পঠমং। পচ্চনীকধম্মে ঝাপেতীতি ঝানং, ইমিনা যোগিনো ঝাযন্তীতিপি ঝানং, পচ্চনীকধম্মে ডহন্তি গোচরং ৰা চিন্তেন্তীতি অত্থো। সযং ৰা তং ঝাযতি উপনিজ্ঝাযতীতি ঝানং, তেনেৰ উপনিজ্ঝাযনলক্খণন্তি ৰুচ্চতি। তদেতং আরম্মণূপনিজ্ঝানং , লক্খণূপনিজ্ঝানন্তি দুৰিধং হোতি। তত্থ আরম্মণূপনিজ্ঝানন্তি সহ উপচারেন অট্ঠ সমাপত্তিযো ৰুচ্চন্তি। কস্মা? কসিণাদিআরম্মণূপনিজ্ঝাযনতো। লক্খণূপনিজ্ঝানন্তি ৰিপস্সনামগ্গফলানি ৰুচ্চন্তি। কস্মা? লক্খণূপনিজ্ঝাযনতো। এত্থ হি ৰিপস্সনা অনিচ্চলক্খণাদীনি উপনিজ্ঝাযতি, ৰিপস্সনায উপনিজ্ঝাযনকিচ্চং পন মগ্গেন সিজ্ঝতীতি মগ্গো লক্খণূপনিজ্ঝানন্তি ৰুচ্চতি। ফলং পন নিরোধস্স তথলক্খণং উপনিজ্ঝাযতীতি লক্খণূপনিজ্ঝানন্তি ৰুচ্চতি। ইমস্মিং পনত্থে আরম্মণূপনিজ্ঝানমেৰ ঝানন্তি অধিপ্পেতং॥
Paṭhamanti gaṇanānupubbatā paṭhamaṃ, idaṃ paṭhamaṃ samāpajjatītipi paṭhamaṃ. Paccanīkadhamme jhāpetīti jhānaṃ, iminā yogino jhāyantītipi jhānaṃ, paccanīkadhamme ḍahanti gocaraṃ vā cintentīti attho. Sayaṃ vā taṃ jhāyati upanijjhāyatīti jhānaṃ, teneva upanijjhāyanalakkhaṇanti vuccati. Tadetaṃ ārammaṇūpanijjhānaṃ , lakkhaṇūpanijjhānanti duvidhaṃ hoti. Tattha ārammaṇūpanijjhānanti saha upacārena aṭṭha samāpattiyo vuccanti. Kasmā? Kasiṇādiārammaṇūpanijjhāyanato. Lakkhaṇūpanijjhānanti vipassanāmaggaphalāni vuccanti. Kasmā? Lakkhaṇūpanijjhāyanato. Ettha hi vipassanā aniccalakkhaṇādīni upanijjhāyati, vipassanāya upanijjhāyanakiccaṃ pana maggena sijjhatīti maggo lakkhaṇūpanijjhānanti vuccati. Phalaṃ pana nirodhassa tathalakkhaṇaṃ upanijjhāyatīti lakkhaṇūpanijjhānanti vuccati. Imasmiṃ panatthe ārammaṇūpanijjhānameva jhānanti adhippetaṃ.
এত্থাহ – ‘‘কতমং পন তং ঝানং নাম, যং সৰিতক্কং সৰিচারং…পে॰… পীতিসুখন্তি এৰং অপদেসং অরহতী’’তি? ৰুচ্চতে – যথা সধনো সপরিজনোতিআদীসু ঠপেত্ৰা ধনঞ্চ পরিজনঞ্চ অঞ্ঞো অপদেসারহো হোতি, এৰং ঠপেত্ৰা ৰিতক্কাদিধম্মে অঞ্ঞং অপদেসারহং নত্থি। যথা পন সরথা সপত্তি সেনাতি ৰুত্তে সেনঙ্গেসুযেৰ সেনাসম্মুতি, এৰমিধ পঞ্চসু অঙ্গেসুযেৰ ঝানসম্মুতি ৰেদিতব্বা। কতমেসু পঞ্চসু? ৰিতক্কো, ৰিচারো, পীতি, সুখং, চিত্তেকগ্গতাতি এতেসু। এতানেৰ হিস্স ‘‘সৰিতক্কং সৰিচার’’ন্তিআদিনা নযেন অঙ্গভাৰেন ৰুত্তানি। অৰুত্তত্তা একগ্গতা অঙ্গং ন হোতীতি চে তঞ্চ ন। কস্মা? ৰুত্তত্তা এৰ। সাপি হি ৰিভঙ্গে ‘‘ঝানন্তি ৰিতক্কো ৰিচারো পীতি সুখং চিত্তস্সেকগ্গতা’’তি এৰং ৰুত্তাযেৰ। তস্মা যথা সৰিতক্কং সৰিচারন্তি, এৰং সচিত্তেকগ্গতন্তি ইধ অৰুত্তেপি ইমিনা ৰিভঙ্গৰচনেন চিত্তেকগ্গতাপি অঙ্গমেৰাতি ৰেদিতব্বা। যেন হি অধিপ্পাযেন ভগৰতা উদ্দেসো কতো, সো এৰ তেন ৰিভঙ্গেপি পকাসিতোতি।
Etthāha – ‘‘katamaṃ pana taṃ jhānaṃ nāma, yaṃ savitakkaṃ savicāraṃ…pe… pītisukhanti evaṃ apadesaṃ arahatī’’ti? Vuccate – yathā sadhano saparijanotiādīsu ṭhapetvā dhanañca parijanañca añño apadesāraho hoti, evaṃ ṭhapetvā vitakkādidhamme aññaṃ apadesārahaṃ natthi. Yathā pana sarathā sapatti senāti vutte senaṅgesuyeva senāsammuti, evamidha pañcasu aṅgesuyeva jhānasammuti veditabbā. Katamesu pañcasu? Vitakko, vicāro, pīti, sukhaṃ, cittekaggatāti etesu. Etāneva hissa ‘‘savitakkaṃ savicāra’’ntiādinā nayena aṅgabhāvena vuttāni. Avuttattā ekaggatā aṅgaṃ na hotīti ce tañca na. Kasmā? Vuttattā eva. Sāpi hi vibhaṅge ‘‘jhānanti vitakko vicāro pīti sukhaṃ cittassekaggatā’’ti evaṃ vuttāyeva. Tasmā yathā savitakkaṃ savicāranti, evaṃ sacittekaggatanti idha avuttepi iminā vibhaṅgavacanena cittekaggatāpi aṅgamevāti veditabbā. Yena hi adhippāyena bhagavatā uddeso kato, so eva tena vibhaṅgepi pakāsitoti.
উপসম্পজ্জাতি উপগন্ত্ৰা, পাপুণিত্ৰাতি ৰুত্তং হোতি। উপসম্পাদযিত্ৰা ৰা, নিপ্ফাদেত্ৰাতি ৰুত্তং হোতি। ৰিভঙ্গে পন ‘‘উপসম্পজ্জাতি পঠমস্স ঝানস্স লাভো পটিলাভো পত্তি সম্পত্তি ফুসনা সম্ফুসনা সচ্ছিকিরিযা উপসম্পদা’’তি ৰুত্তং। তস্সাপি এৰমেৰত্থো ৰেদিতব্বো। ৰিহাসিন্তি বোধিমণ্ডে নিসজ্জসঙ্খাতেন ইরিযাপথৰিহারেন ইতিৰুত্তপ্পকারঝানসমঙ্গী হুত্ৰা অত্তভাৰস্স ইরিযং ৰুত্তিং পালনং যপনং যাপনং চারং ৰিহারং অভিনিপ্ফাদেসিন্তি অত্থো। ৰুত্তঞ্হেতং ৰিভঙ্গে – ‘‘ৰিহরতীতি ইরিযতি ৰত্ততি পালেতি যপেতি যাপেতি চরতি ৰিহরতি, তেন ৰুচ্চতি ৰিহরতী’’তি (ৰিভ॰ ৫১২)।
Upasampajjāti upagantvā, pāpuṇitvāti vuttaṃ hoti. Upasampādayitvā vā, nipphādetvāti vuttaṃ hoti. Vibhaṅge pana ‘‘upasampajjāti paṭhamassa jhānassa lābho paṭilābho patti sampatti phusanā samphusanā sacchikiriyā upasampadā’’ti vuttaṃ. Tassāpi evamevattho veditabbo. Vihāsinti bodhimaṇḍe nisajjasaṅkhātena iriyāpathavihārena itivuttappakārajhānasamaṅgī hutvā attabhāvassa iriyaṃ vuttiṃ pālanaṃ yapanaṃ yāpanaṃ cāraṃ vihāraṃ abhinipphādesinti attho. Vuttañhetaṃ vibhaṅge – ‘‘viharatīti iriyati vattati pāleti yapeti yāpeti carati viharati, tena vuccati viharatī’’ti (vibha. 512).
কিং পন কত্ৰা ভগৰা ইমং ঝানং উপসম্পজ্জ ৰিহাসীতি? কম্মট্ঠানং ভাৰেত্ৰা। কতরং? আনাপানস্সতিকম্মট্ঠানং। অঞ্ঞেন তদত্থিকেন কিং কাতব্বন্তি? অঞ্ঞেনপি এতং ৰা কম্মট্ঠানং পথৰীকসিণাদীনং ৰা অঞ্ঞতরং ভাৰেতব্বং। তেসং ভাৰনানযো ৰিসুদ্ধিমগ্গে (ৰিসুদ্ধি॰ ১.৫৫) ৰুত্তনযেনেৰ ৰেদিতব্বো। ইধ পন ৰুচ্চমানে অতিভারিযং ৰিনযনিদানং হোতি, তস্মা পাল়িযা অত্থপ্পকাসনমত্তমেৰ করোমাতি।
Kiṃ pana katvā bhagavā imaṃ jhānaṃ upasampajja vihāsīti? Kammaṭṭhānaṃ bhāvetvā. Kataraṃ? Ānāpānassatikammaṭṭhānaṃ. Aññena tadatthikena kiṃ kātabbanti? Aññenapi etaṃ vā kammaṭṭhānaṃ pathavīkasiṇādīnaṃ vā aññataraṃ bhāvetabbaṃ. Tesaṃ bhāvanānayo visuddhimagge (visuddhi. 1.55) vuttanayeneva veditabbo. Idha pana vuccamāne atibhāriyaṃ vinayanidānaṃ hoti, tasmā pāḷiyā atthappakāsanamattameva karomāti.
পঠমজ্ঝানকথা নিট্ঠিতা।
Paṭhamajjhānakathā niṭṭhitā.
