| Library / Tipiṭaka / д̇ибидага • Tipiṭaka / саарад̇т̇ад̣̇ийбаний-дийгаа • Sāratthadīpanī-ṭīkā |
батамаж̇жхаанагат̇аа
Paṭhamajjhānakathā
ид̣̇аани ‘‘вивижжзва гаамзхий’’д̇иаад̣̇инаяаббавад̇д̇ааяа баал̣ияаа жхаанавибхан̇г̇з (вибха. 508) вуд̇д̇амби ад̇т̇ам̣ адтагат̇аанаязнзва сам̣ван̣н̣зд̇угаамо вибхан̇г̇абаал̣ияам̣ вуд̇д̇анаязна аважанз гааран̣ам̣ д̣̇ассзд̇ум̣ ‘‘гин̃жааби д̇ад̇т̇а гад̇амз гаамаа’’д̇иаад̣̇имааха . д̇ад̇т̇а бад̇т̇анаагаарзна бавад̇д̇о д̣̇уб̣б̣ало лобхо чанд̣̇анадтзна чанд̣̇о, д̇ад̇о б̣алаваа ран̃ж̇анадтзна рааг̇о, д̇ад̇оби б̣алавад̇аро б̣ахаларааг̇о чанд̣̇арааг̇о. нимид̇д̇аануб̣яан̃ж̇анаани сан̇габбзд̇и зд̇знаад̇и сан̇габбо, д̇ат̇аабавад̇д̇о лобхо. д̇ад̇т̇а нимид̇д̇асан̇габбанаа наама аваяавз самод̇хаанзд̇ваа ‘‘ид̇т̇ий бурисо’’д̇иаад̣̇инаа згаж̇жхам̣ гад̇ваа убаруубари гилзсуббад̇д̇ияаа нимид̇д̇асса габбанаа. ануб̣яан̃ж̇анасан̇габбанаа бана ‘‘хад̇т̇аа собханаа, баад̣̇аа собханаа’’д̇и звам̣ ануб̣яан̃ж̇анавасзна вибхаж̇ид̇ваа габбанаад̇и. гилзсаанан̃хи ану ану б̣яан̃ж̇анад̇о бариб̣яан̃ж̇анад̇о бариб̣яад̇д̇ивасзна уббад̇д̇ияаа бажжаяабхаавад̇о ануб̣яан̃ж̇анам̣ хад̇т̇абаад̣̇аад̣̇иаваяаваа вужжанд̇и. д̇ад̇о б̣алаваа ран̃ж̇анадтзна рааг̇о, сан̇габбавасзнзва бавад̇д̇о д̇ад̇оби б̣алавад̇аро сан̇габбарааг̇о. свааяам̣ бабхзд̣̇о згассзва лобхасса бавад̇д̇иаагааравасзна авад̇т̇аабхзд̣̇авасзна жа взд̣̇ид̇аб̣б̣о яат̇аа ‘‘важчо д̣̇аммо б̣алийб̣ад̣̇д̣̇о’’д̇и. гаамаад̇и гилзсагаамаа, гаамзнд̇ийд̇и гаамаа, гаамзнд̇и зд̇зхийд̇и ваа.
Idāni ‘‘vivicceva kāmehī’’tiādinayappavattāya pāḷiyā jhānavibhaṅge (vibha. 508) vuttampi atthaṃ aṭṭhakathānayeneva saṃvaṇṇetukāmo vibhaṅgapāḷiyaṃ vuttanayena avacane kāraṇaṃ dassetuṃ ‘‘kiñcāpi tattha katame kāmā’’tiādimāha . Tattha patthanākārena pavatto dubbalo lobho chandanaṭṭhena chando, tato balavā rañjanaṭṭhena rāgo, tatopi balavataro bahalarāgo chandarāgo. Nimittānubyañjanāni saṅkappeti etenāti saṅkappo, tathāpavatto lobho. Tattha nimittasaṅkappanā nāma avayave samodhānetvā ‘‘itthī puriso’’tiādinā ekajjhaṃ katvā uparūpari kilesuppattiyā nimittassa kappanā. Anubyañjanasaṅkappanā pana ‘‘hatthā sobhanā, pādā sobhanā’’ti evaṃ anubyañjanavasena vibhajitvā kappanāti. Kilesānañhi anu anu byañjanato paribyañjanato paribyattivasena uppattiyā paccayabhāvato anubyañjanaṃ hatthapādādiavayavā vuccanti. Tato balavā rañjanaṭṭhena rāgo, saṅkappavaseneva pavatto tatopi balavataro saṅkapparāgo. Svāyaṃ pabhedo ekasseva lobhassa pavattiākāravasena avatthābhedavasena ca veditabbo yathā ‘‘vaccho dammo balībaddo’’ti. Kāmāti kilesakāmā, kāmentīti kāmā, kāmenti etehīti vā.
сзяяат̇ид̣̇анд̇и имасса д̇ам̣ гад̇амам̣, д̇ам̣ гат̇анд̇и ваа ад̇т̇о. вивижжид̇ваад̇и висум̣ худ̇ваа. д̇знааха ‘‘винаа худ̇ваа абасаггид̇ваа’’д̇и, баж̇аханавасзна абаггамид̇ваад̇и ад̇т̇о. вивижжзва гаамзхийд̇и зд̇т̇а вивижжаад̇и иминаа вивзжанам̣ жхаанагкан̣з гаамаанам̣ абхаавамад̇д̇ам̣ вуд̇д̇ам̣. вивижжзваад̇и бана иминаа згам̣сад̇о гаамаанам̣ вивзжзд̇аб̣б̣ад̇аад̣̇ийбанзна д̇аббадибагкад̇аа жхаанасса гаамавивзгаббахаанасса жа жхаанаад̇хиг̇амуубааяад̇аа д̣̇ассид̇аа ход̇ийд̇и имамад̇т̇ам̣ д̣̇ассзд̇ум̣ ‘‘батамаж̇жхаана’’нд̇иаад̣̇им̣ вад̇ваа д̇амзвад̇т̇ам̣ баагадад̇арам̣ гаад̇ум̣ ‘‘гат̇а’’нд̇иаад̣̇и вуд̇д̇ам̣. анд̇хагаарз сад̇и бад̣̇ийбо вияаад̇и зд̇зна яат̇аа бад̣̇ийбаабхаавзна рад̇д̇ияам̣ анд̇хагаараабхибхаво, звам̣ жхаанаабхаавзна жид̇д̇асанд̇ад̇ияам̣ гаамаабхибхавод̇и д̣̇ассзд̇и.
Seyyathidanti imassa taṃ katamaṃ, taṃ kathanti vā attho. Viviccitvāti visuṃ hutvā. Tenāha ‘‘vinā hutvā apasakkitvā’’ti, pajahanavasena apakkamitvāti attho. Vivicceva kāmehīti ettha viviccāti iminā vivecanaṃ jhānakkhaṇe kāmānaṃ abhāvamattaṃ vuttaṃ. Viviccevāti pana iminā ekaṃsato kāmānaṃ vivecetabbatādīpanena tappaṭipakkhatā jhānassa kāmavivekappahānassa ca jhānādhigamūpāyatā dassitā hotīti imamatthaṃ dassetuṃ ‘‘paṭhamajjhāna’’ntiādiṃ vatvā tamevatthaṃ pākaṭataraṃ kātuṃ ‘‘katha’’ntiādi vuttaṃ. Andhakāre sati padīpo viyāti etena yathā padīpābhāvena rattiyaṃ andhakārābhibhavo, evaṃ jhānābhāvena cittasantatiyaṃ kāmābhibhavoti dasseti.
зд̇анд̇и буб̣б̣абад̣̇зязва авад̇хааран̣аважанам̣, на ко бана звам̣ д̣̇адтаб̣б̣ам̣ ‘‘гаамзхи зваа’’д̇и авад̇хааран̣асса агад̇ад̇д̇аа. д̇анниссаран̣ад̇од̇и ниссаранд̇и ниг̇г̇ажчанд̇и зд̇зна, зд̇т̇а ваад̇и ниссаран̣ам̣. гз ниг̇г̇ажчанд̇и? гаамаа. д̇зсам̣ гаамаанам̣ ниссаран̣ам̣ бахаанам̣ д̇анниссаран̣ам̣, д̇ад̇о гааманиссаран̣ад̇од̇и ад̇т̇о. гат̇ам̣ бана самаанз вигкамбханз гаамаанамзвзд̇ам̣ ниссаран̣ам̣, на б̣яаабаад̣̇аад̣̇ийнанд̇и жод̣̇анам̣ яуд̇д̇ид̇о ааг̇амад̇о жа саад̇хзд̇ум̣ ‘‘гаамад̇хаад̇уу’’д̇иаад̣̇и вуд̇д̇ам̣. д̇ад̇т̇а гаамад̇хаад̇усамад̇иггаманад̇од̇и сагалассаби гаамабхавасса самад̇иггамабадибад̣̇аабхаавад̇о. д̇зна имасса жхаанасса гаамабарин̃н̃аабхаавамааха . гаамарааг̇абадибагкад̇од̇и ‘‘чанд̣̇о гаамо’’д̇иаад̣̇инаа (махаани. 1) вуд̇д̇авибхааг̇асса гилзсагаамасса бажжад̇т̇игабхаавад̇о. д̇зна яат̇аа мзд̇д̇аа б̣яаабаад̣̇асса, гарун̣аа вихим̣сааяа, звамид̣̇ам̣ жхаанам̣ гаамарааг̇асса уж̇увибажжанийгабхууд̇анд̇и д̣̇ассзд̇и. вибаагзна жзд̇т̇а гаамад̇хаад̇усамад̇иггамо ад̇д̇ано бавад̇д̇игкан̣з гаамарааг̇абадибагкад̇аа жа взд̣̇ид̇аб̣б̣аа. звамад̇д̇ано бавад̇д̇ияаа вибаагаббавад̇д̇ияаа жа гаамарааг̇ад̇о гаамад̇хаад̇уд̇о жа винивад̇д̇асабхаавад̇д̇аа ид̣̇ам̣ жхаанам̣ висзсад̇о гаамаанамзва ниссаран̣ам̣, свааяамад̇т̇о баатааг̇ад̇о зваад̇и ааха ‘‘яат̇аахаа’’д̇иаад̣̇и. нзгкамманд̇и батамаж̇жхаанам̣.
Etanti pubbapadeyeva avadhāraṇavacanaṃ, na kho pana evaṃ daṭṭhabbaṃ ‘‘kāmehi evā’’ti avadhāraṇassa akatattā. Tannissaraṇatoti nissaranti niggacchanti etena, ettha vāti nissaraṇaṃ. Ke niggacchanti? Kāmā. Tesaṃ kāmānaṃ nissaraṇaṃ pahānaṃ tannissaraṇaṃ, tato kāmanissaraṇatoti attho. Kathaṃ pana samāne vikkhambhane kāmānamevetaṃ nissaraṇaṃ, na byāpādādīnanti codanaṃ yuttito āgamato ca sādhetuṃ ‘‘kāmadhātū’’tiādi vuttaṃ. Tattha kāmadhātusamatikkamanatoti sakalassapi kāmabhavassa samatikkamapaṭipadābhāvato. Tena imassa jhānassa kāmapariññābhāvamāha . Kāmarāgapaṭipakkhatoti ‘‘chando kāmo’’tiādinā (mahāni. 1) vuttavibhāgassa kilesakāmassa paccatthikabhāvato. Tena yathā mettā byāpādassa, karuṇā vihiṃsāya, evamidaṃ jhānaṃ kāmarāgassa ujuvipaccanīkabhūtanti dasseti. Vipākena cettha kāmadhātusamatikkamo attano pavattikkhaṇe kāmarāgapaṭipakkhatā ca veditabbā. Evamattano pavattiyā vipākappavattiyā ca kāmarāgato kāmadhātuto ca vinivattasabhāvattā idaṃ jhānaṃ visesato kāmānameva nissaraṇaṃ, svāyamattho pāṭhāgato evāti āha ‘‘yathāhā’’tiādi. Nekkhammanti paṭhamajjhānaṃ.
гааман̃жзд̇т̇а д̇амад̇т̇ам̣ д̣̇ийбзд̇ум̣ буримабад̣̇зязва авад̇хааран̣ам̣ г̇ахид̇ам̣, уд̇д̇арабад̣̇зби бана д̇ам̣ г̇ахзд̇аб̣б̣амзва д̇ат̇аа ад̇т̇асамбхавад̇од̇и д̣̇ассзд̇ум̣ ‘‘уд̇д̇арабад̣̇збий’’д̇иаад̣̇и вуд̇д̇ам̣. ид̇од̇и гаамажчанд̣̇ад̇о. зса д̣̇адтаб̣б̣од̇и зса нияамо д̣̇адтаб̣б̣о. саад̇хааран̣аважанзнаад̇и саб̣б̣авивзгасаад̇хааран̣аважанзна. д̇ад̣̇ан̇г̇авигкамбханасамужчзд̣̇абадиббассад̣̇д̇хиниссаран̣авивзгаа д̇ад̣̇ан̇г̇авивзгаад̣̇аяо. гааяажид̇д̇аубад̇хививзгаа гааяавивзгаад̣̇аяо. д̇аяо зва ид̇ха д̣̇адтаб̣б̣аад̇и д̇аяо зва ид̇ха жхаанагат̇ааяам̣ д̣̇адтаб̣б̣аа самужчзд̣̇авивзгаад̣̇ийнам̣ асамбхавад̇о. нид̣̇д̣̇зсзд̇и махаанид̣̇д̣̇зсз (махаани. 1). д̇ад̇т̇а хи ‘‘уд̣̇д̣̇аанад̇о д̣̇вз гаамаа вад̇т̇угаамаа гилзсагаамаа жаа’’д̇и уд̣̇д̣̇исид̇ваа д̇ад̇т̇а ‘‘гад̇амз вад̇т̇угаамаа манаабияаа руубаа…бз… манаабияаа подтаб̣б̣аа’’д̇иаад̣̇инаа вад̇т̇угаамаа нид̣̇д̣̇идтаа. д̇з бана гаамийяанд̇ийд̇и гаамаад̇и взд̣̇ид̇аб̣б̣аа. д̇ад̇т̇зваад̇и нид̣̇д̣̇зсзязва. вибхан̇г̇зд̇и жхаанавибхан̇г̇з. зван̃хи сад̇ийд̇и звам̣ убхаязсамби гаамаанам̣ сан̇г̇ахз сад̇и. вад̇т̇угаамзхибийд̇и вад̇т̇угаамзхи вивижжзваад̇иби ад̇т̇о яуж̇ж̇ад̇ийд̇и звам̣ яуж̇ж̇амаанад̇т̇анд̇арасамужжаяад̇т̇о би-сад̣̇д̣̇о, на гилзсагаамасамужжаяад̇т̇о. гасмаа? имасмим̣ ад̇т̇з гилзсагаамзхи вивзгасса д̣̇уд̇ияабад̣̇зна вуд̇д̇ад̇д̇аа. д̇знаад̇и вад̇т̇угаамавивзгзна. гааяавивзго вуд̇д̇о ход̇ийд̇и буд̇д̇ад̣̇аараад̣̇ибариг̇г̇ахавивзгад̣̇ийбанад̇о гааяавивзго вуд̇д̇о ход̇и.
Kāmañcettha tamatthaṃ dīpetuṃ purimapadeyeva avadhāraṇaṃ gahitaṃ, uttarapadepi pana taṃ gahetabbameva tathā atthasambhavatoti dassetuṃ ‘‘uttarapadepī’’tiādi vuttaṃ. Itoti kāmacchandato. Esa daṭṭhabboti esa niyamo daṭṭhabbo. Sādhāraṇavacanenāti sabbavivekasādhāraṇavacanena. Tadaṅgavikkhambhanasamucchedapaṭippassaddhinissaraṇavivekā tadaṅgavivekādayo. Kāyacittaupadhivivekā kāyavivekādayo. Tayo eva idha daṭṭhabbāti tayo eva idha jhānakathāyaṃ daṭṭhabbā samucchedavivekādīnaṃ asambhavato. Niddeseti mahāniddese (mahāni. 1). Tattha hi ‘‘uddānato dve kāmā vatthukāmā kilesakāmā cā’’ti uddisitvā tattha ‘‘katame vatthukāmā manāpiyā rūpā…pe… manāpiyā phoṭṭhabbā’’tiādinā vatthukāmā niddiṭṭhā. Te pana kāmīyantīti kāmāti veditabbā. Tatthevāti niddeseyeva. Vibhaṅgeti jhānavibhaṅge. Evañhi satīti evaṃ ubhayesampi kāmānaṃ saṅgahe sati. Vatthukāmehipīti vatthukāmehi viviccevātipi attho yujjatīti evaṃ yujjamānatthantarasamuccayattho pi-saddo, na kilesakāmasamuccayattho. Kasmā? Imasmiṃ atthe kilesakāmehi vivekassa dutiyapadena vuttattā. Tenāti vatthukāmavivekena. Kāyaviveko vutto hotīti puttadārādipariggahavivekadīpanato kāyaviveko vutto hoti.
буримзнаад̇и гааяавивзгзна. зд̇т̇аад̇и ‘‘вивижжзва гаамзхи вивижжа агусалзхи д̇хаммзхий’’д̇и зд̇асмим̣ бад̣̇ад̣̇ваяз. ид̇о ваа нид̣̇д̇хаарид̇з вивзгад̣̇ваяз, агусаласад̣̇д̣̇зна яад̣̇и гилзсагаамаа, саб̣б̣аагусалааби ваа г̇ахид̇аа, саб̣б̣ат̇аа гилзсагаамзхи вивзго вуд̇д̇од̇и ааха ‘‘д̣̇уд̇иязна гилзсагаамзхи вивзгаважанад̇о’’д̇и. д̣̇уд̇иязнаад̇и жа жид̇д̇авивзгзнаад̇и ад̇т̇о. зд̇зсанд̇и яат̇аавуд̇д̇аанам̣ д̣̇виннам̣ бад̣̇аанам̣. нид̣̇д̇хааран̣з жзд̇ам̣ саамиважанам̣. д̇ан̣хаад̣̇исам̣гилзсаанам̣ вад̇т̇уно бахаанам̣ сам̣гилзсавад̇т̇уббахаанам̣. лолабхааво наама д̇ад̇т̇а д̇ад̇т̇а руубаад̣̇ийсу д̇ан̣хуббаад̣̇о, д̇асса хзд̇уу вад̇т̇угаамаа зва взд̣̇ид̇аб̣б̣аа. б̣аалабхаавасса хзд̇убарижжааг̇од̇и самб̣анд̇хо. б̣аалабхааво наама авиж̇ж̇аа, д̣̇ужинд̇ид̇ажинд̇ид̇аад̣̇и ваа, д̇асса аяонисоманасигааро, саб̣б̣зби ваа агусалаа д̇хаммаа хзд̇уу. гаамаг̇ун̣аад̇хиг̇амахзд̇у баан̣аад̇ибаад̇аад̣̇иасуд̣̇д̇хаббаяог̇о ход̇ийд̇и д̇аб̣б̣ивзгзна баяог̇асуд̣̇д̇хи вибхаавид̇аа. д̇ан̣хаасам̣гилзсасод̇ханзна виваддуубаниссаяасам̣вад̣дханзна жа аж̇жхаасаяависод̇ханам̣ аасаяабосанам̣. аасаяабосананд̇и жа жхаанабхааванааяа бажжаяабхууд̇аа буб̣б̣аяог̇аад̣̇ивасзна сид̣̇д̇хаа аж̇жхаасаяасамбад̣̇аа , саа бана д̇ан̣хубад̇аабавиг̇амзна ход̇и. д̇зна вуд̇д̇ам̣ ‘‘д̇ан̣хаасам̣гилзсависод̇ханзнаа’’д̇и. гаамзсууд̇и нид̣̇д̇хааран̣з бхуммам̣.
Purimenāti kāyavivekena. Etthāti ‘‘vivicceva kāmehi vivicca akusalehi dhammehī’’ti etasmiṃ padadvaye. Ito vā niddhārite vivekadvaye, akusalasaddena yadi kilesakāmā, sabbākusalāpi vā gahitā, sabbathā kilesakāmehi viveko vuttoti āha ‘‘dutiyena kilesakāmehi vivekavacanato’’ti. Dutiyenāti ca cittavivekenāti attho. Etesanti yathāvuttānaṃ dvinnaṃ padānaṃ. Niddhāraṇe cetaṃ sāmivacanaṃ. Taṇhādisaṃkilesānaṃ vatthuno pahānaṃ saṃkilesavatthuppahānaṃ. Lolabhāvo nāma tattha tattha rūpādīsu taṇhuppādo, tassa hetū vatthukāmā eva veditabbā. Bālabhāvassa hetupariccāgoti sambandho. Bālabhāvo nāma avijjā, ducintitacintitādi vā, tassa ayonisomanasikāro, sabbepi vā akusalā dhammā hetū. Kāmaguṇādhigamahetu pāṇātipātādiasuddhappayogo hotīti tabbivekena payogasuddhi vibhāvitā. Taṇhāsaṃkilesasodhanena vivaṭṭūpanissayasaṃvaḍḍhanena ca ajjhāsayavisodhanaṃ āsayaposanaṃ. Āsayaposananti ca jhānabhāvanāya paccayabhūtā pubbayogādivasena siddhā ajjhāsayasampadā , sā pana taṇhupatāpavigamena hoti. Tena vuttaṃ ‘‘taṇhāsaṃkilesavisodhanenā’’ti. Kāmesūti niddhāraṇe bhummaṃ.
анзгабхзд̣̇од̇и гаамаасавагаамарааг̇асам̣яож̇анаад̣̇ивасзна руубад̇ан̣хаад̣̇ивасзна жа анзгаббабхзд̣̇о. гаамажчанд̣̇оязваад̇и гаамасабхаавоязва чанд̣̇о, на гад̇д̇угамяад̇аачанд̣̇о наби гусалажчанд̣̇од̇и ад̇хиббааяо. агусалабарияаабаннобийд̇и ‘‘вивижжа агусалзхий’’д̇и зд̇т̇а вуд̇д̇аагусалзсу анд̇ог̇ад̇хоби. жхаанабадибагкад̇од̇и жхаанасса бадибагкабхаавад̇о д̇ам̣хзд̇у д̇ам̣нимид̇д̇ам̣ висум̣ вуд̇д̇о, агусалабхаавасааман̃н̃зна аг̇г̇ахзд̇ваа висум̣ саруубзна г̇ахид̇о. яад̣̇и гилзсагаамова буримабад̣̇з вуд̇д̇о, д̇ам̣ гат̇ам̣ б̣ахуважананд̇и ааха ‘‘анзгабхзд̣̇ад̇о’’д̇иаад̣̇и. ан̃н̃зсамбийд̇и д̣̇идтимаанаахиригаанод̇д̇аббаад̣̇ийнам̣ д̇ам̣сахид̇апассаад̣̇ийнан̃жа. убарижхаанан̇г̇абажжанийгабадибагкабхаавад̣̇ассанад̇од̇и ‘‘савид̇аггам̣ савижаара’’нд̇иаад̣̇инаа убари вужжамаанаани жхаанан̇г̇аани убарижхаанан̇г̇аани, д̇зсам̣ ад̇д̇ано бажжанийгаанам̣ бадибагкабхаавад̣̇ассанад̇о д̇аббажжанийганийваран̣аважанам̣. ‘‘убарижхаанан̇г̇аанам̣ бажжанийгабадибагкабхаавад̣̇ассанад̇о’’д̇иби баато. д̇ад̇т̇а бажжанийгабадибагкабхаавад̣̇ассанад̇од̇и убари вужжамаанажхаанан̇г̇аанам̣ уж̇увибажжанийгавасзна бадибагкабхаавад̣̇ассанад̇од̇и ад̇т̇ам̣ вад̣̇анд̇и. жхаанан̇г̇абажжанийгаанийд̇и жхаанан̇г̇аанам̣ бавад̇д̇инивааран̣ад̇о жхаанан̇г̇абажжанийгаани. вид̣̇д̇хам̣сагаанийд̇и вигхаад̇агаани. самаад̇хи гаамажчанд̣̇асса бадибагкод̇и рааг̇абан̣ид̇хияаа уж̇увибажжанийгабхаавад̇о наанаарамман̣зхи балобхид̇асса бариб̣бхаманд̇асса жид̇д̇асса самаад̇хаанад̇о гаамажчанд̣̇асса самаад̇хи бадибагко. бийд̇и б̣яаабаад̣̇ассаад̇и баамож̇ж̇зна самаанаяог̇агкзмад̇д̇аа б̣яаабаад̣̇асса бийд̇и бадибагкаа. вид̇агго т̇инамид̣̇д̇хассаад̇и яонисо сан̇габбанавасзна савибпаараббавад̇д̇ид̇о вид̇агго т̇инамид̣̇д̇хасса бадибагко. сукам̣ уд̣̇д̇хажжагуггужжассаад̇и сукам̣ вуубасанд̇асийд̇аласабхаавад̇д̇аа авуубасамаануд̇аабасабхаавасса уд̣̇д̇хажжагуггужжасса бадибагкам̣. вижааро вижигижчааяаад̇и вижааро аарамман̣з анумаж̇ж̇анавасзна бан̃н̃аабад̇ируубасабхаавад̇д̇аа вижигижчааяа бадибагко. махаагажжаанад̇т̇зрзна д̣̇зсид̇аа бидагаанам̣ сам̣ван̣н̣анаа бздагам̣, д̇асмим̣ бздагз.
Anekabhedoti kāmāsavakāmarāgasaṃyojanādivasena rūpataṇhādivasena ca anekappabhedo. Kāmacchandoyevāti kāmasabhāvoyeva chando, na kattukamyatāchando napi kusalacchandoti adhippāyo. Akusalapariyāpannopīti ‘‘vivicca akusalehī’’ti ettha vuttaakusalesu antogadhopi. Jhānapaṭipakkhatoti jhānassa paṭipakkhabhāvato taṃhetu taṃnimittaṃ visuṃ vutto, akusalabhāvasāmaññena aggahetvā visuṃ sarūpena gahito. Yadi kilesakāmova purimapade vutto, taṃ kathaṃ bahuvacananti āha ‘‘anekabhedato’’tiādi. Aññesampīti diṭṭhimānaahirikānottappādīnaṃ taṃsahitaphassādīnañca. Uparijhānaṅgapaccanīkapaṭipakkhabhāvadassanatoti ‘‘savitakkaṃ savicāra’’ntiādinā upari vuccamānāni jhānaṅgāni uparijhānaṅgāni, tesaṃ attano paccanīkānaṃ paṭipakkhabhāvadassanato tappaccanīkanīvaraṇavacanaṃ. ‘‘Uparijhānaṅgānaṃ paccanīkapaṭipakkhabhāvadassanato’’tipi pāṭho. Tattha paccanīkapaṭipakkhabhāvadassanatoti upari vuccamānajhānaṅgānaṃ ujuvipaccanīkavasena paṭipakkhabhāvadassanatoti atthaṃ vadanti. Jhānaṅgapaccanīkānīti jhānaṅgānaṃ pavattinivāraṇato jhānaṅgapaccanīkāni. Viddhaṃsakānīti vighātakāni. Samādhi kāmacchandassapaṭipakkhoti rāgapaṇidhiyā ujuvipaccanīkabhāvato nānārammaṇehi palobhitassa paribbhamantassa cittassa samādhānato kāmacchandassa samādhi paṭipakkho. Pīti byāpādassāti pāmojjena samānayogakkhemattā byāpādassa pīti paṭipakkhā. Vitakko thinamiddhassāti yoniso saṅkappanavasena savipphārappavattito vitakko thinamiddhassa paṭipakkho. Sukhaṃ uddhaccakukkuccassāti sukhaṃ vūpasantasītalasabhāvattā avūpasamānutāpasabhāvassa uddhaccakukkuccassa paṭipakkhaṃ. Vicāro vicikicchāyāti vicāro ārammaṇe anumajjanavasena paññāpatirūpasabhāvattā vicikicchāya paṭipakkho. Mahākaccānattherena desitā piṭakānaṃ saṃvaṇṇanā peṭakaṃ, tasmiṃ peṭake.
бан̃жагаамаг̇ун̣абхзд̣̇ависаяассаад̇и руубаад̣̇ибан̃жагаамаг̇ун̣ависзсависаяасса. аагхаад̇авад̇т̇убхзд̣̇аад̣̇ивисаяаананд̇и б̣яаабаад̣̇авивзгаважанзна ‘‘анад̇т̇ам̣ мз ажарий’’д̇иаад̣̇иаагхаад̇авад̇т̇убхзд̣̇ависаяасса д̣̇осасса, мохаад̇хигзхи т̇инамид̣̇д̇хаад̣̇ийхи вивзгаважанзна бадижчаад̣̇анавасзна д̣̇угкаад̣̇ибуб̣б̣анд̇аад̣̇ибхзд̣̇ависаяасса мохасса вигкамбханавивзго вуд̇д̇о. гаамарааг̇аб̣яаабаад̣̇ад̇ад̣̇згадтат̇инамид̣̇д̇хаад̣̇ивигкамбхаган̃жзд̇ам̣ саб̣б̣аагусалабадибагкасабхаавад̇д̇аа саб̣б̣агусалаанам̣, д̇зна сабхаавзна саб̣б̣аагусалаббахааяагам̣ хонд̇амби гаамарааг̇аад̣̇ивигкамбханасабхаавамзва ход̇и д̇ам̣сабхаавад̇д̇аад̇и ависзсзд̇ваа нийваран̣аагусаламуулаад̣̇ийнам̣ вигкамбханавивзго вуд̇д̇о ход̇ийд̇и ааха.
Pañcakāmaguṇabhedavisayassāti rūpādipañcakāmaguṇavisesavisayassa. Āghātavatthubhedādivisayānanti byāpādavivekavacanena ‘‘anatthaṃ me acarī’’tiādiāghātavatthubhedavisayassa dosassa, mohādhikehi thinamiddhādīhi vivekavacanena paṭicchādanavasena dukkhādipubbantādibhedavisayassa mohassa vikkhambhanaviveko vutto. Kāmarāgabyāpādatadekaṭṭhathinamiddhādivikkhambhakañcetaṃ sabbākusalapaṭipakkhasabhāvattā sabbakusalānaṃ, tena sabhāvena sabbākusalappahāyakaṃ hontampi kāmarāgādivikkhambhanasabhāvameva hoti taṃsabhāvattāti avisesetvā nīvaraṇākusalamūlādīnaṃ vikkhambhanaviveko vutto hotīti āha.
яат̇аабажжаяам̣ бавад̇д̇амаанаанам̣ сабхаавад̇хаммаанам̣ над̇т̇и гаажи васавад̇д̇ид̇аад̇и васавад̇д̇ибхааванивааран̣ад̇т̇ам̣ ‘‘вид̇агганам̣ вид̇агго’’д̇и вуд̇д̇ам̣. вид̇аггананд̇и хи вид̇агганагирияаа, саа жа вид̇аггасса ад̇д̇ано бажжаязхи бавад̇д̇имад̇д̇амзваад̇и бхааванид̣̇д̣̇зсо васавад̇д̇ибхааванивааран̣ааяа ход̇и. д̇аяид̣̇ам̣ вид̇агганам̣ ‘‘ийд̣̇исамид̣̇а’’нд̇и аарамман̣абаригаббананд̇и ааха ‘‘уухананд̇и вуд̇д̇ам̣ ход̇ий’’д̇и. яасмаа жид̇д̇ам̣ вид̇аггаб̣алзна аарамман̣ам̣ абхинирул̣хам̣ вияа ход̇и, д̇асмаа со аарамман̣аабхиниробаналагкан̣о вуд̇д̇о. яат̇аа хи гожи рааж̇аваллабхам̣ н̃аад̇им̣ ваа мид̇д̇ам̣ ваа ниссааяа рааж̇аг̇зхам̣ аарохад̇и анубависад̇и, звам̣ вид̇аггам̣ ниссааяа жид̇д̇ам̣ аарамман̣ам̣ аарохад̇и. яад̣̇и звам̣ гат̇ам̣ авид̇аггам̣ жид̇д̇ам̣ аарамман̣ам̣ аарохад̇ийд̇и? вид̇аггаб̣алзнзва. яат̇аа хи со бурисо барижаязна д̇зна винааби нираасан̇го рааж̇аг̇зхам̣ бависад̇и, звам̣ барижаязна вид̇аггзна винааби авид̇аггам̣ жид̇д̇ам̣ аарамман̣ам̣ аарохад̇и. барижаязнаад̇и жа санд̇аанз бавад̇д̇авид̇аггабхааванаасан̇каад̇зна барижаязна. вид̇аггасса хи санд̇аанз абхин̣хам̣ бавад̇д̇асса васзна жид̇д̇асса аарамман̣аабхируханам̣ жирабарижид̇ам̣, д̇зна д̇ам̣ гад̣̇аажи вид̇аггзна винааби д̇ад̇т̇а бавад̇д̇ад̇зва. яат̇аа д̇ам̣ н̃аан̣асахид̇ам̣ худ̇ваа саммасанавасзна жирабарижид̇ам̣ гад̣̇аажи н̃аан̣арахид̇амби саммасанавасзна бавад̇д̇ад̇и, яат̇аа ваа гилзсасахид̇ам̣ худ̇ваа бавад̇д̇ам̣ саб̣б̣асо гилзсарахид̇амби барижаязна гилзсаваасанаавасзна бавад̇д̇ад̇и, звам̣самбад̣̇амид̣̇ам̣ д̣̇адтаб̣б̣ам̣.
Yathāpaccayaṃ pavattamānānaṃ sabhāvadhammānaṃ natthi kāci vasavattitāti vasavattibhāvanivāraṇatthaṃ ‘‘vitakkanaṃ vitakko’’ti vuttaṃ. Vitakkananti hi vitakkanakiriyā, sā ca vitakkassa attano paccayehi pavattimattamevāti bhāvaniddeso vasavattibhāvanivāraṇāya hoti. Tayidaṃ vitakkanaṃ ‘‘īdisamida’’nti ārammaṇaparikappananti āha ‘‘ūhananti vuttaṃ hotī’’ti. Yasmā cittaṃ vitakkabalena ārammaṇaṃ abhiniruḷhaṃ viya hoti, tasmā so ārammaṇābhiniropanalakkhaṇo vutto. Yathā hi koci rājavallabhaṃ ñātiṃ vā mittaṃ vā nissāya rājagehaṃ ārohati anupavisati, evaṃ vitakkaṃ nissāya cittaṃ ārammaṇaṃ ārohati. Yadi evaṃ kathaṃ avitakkaṃ cittaṃ ārammaṇaṃ ārohatīti? Vitakkabaleneva. Yathā hi so puriso paricayena tena vināpi nirāsaṅko rājagehaṃ pavisati, evaṃ paricayena vitakkena vināpi avitakkaṃ cittaṃ ārammaṇaṃ ārohati. Paricayenāti ca santāne pavattavitakkabhāvanāsaṅkhātena paricayena. Vitakkassa hi santāne abhiṇhaṃ pavattassa vasena cittassa ārammaṇābhiruhanaṃ ciraparicitaṃ, tena taṃ kadāci vitakkena vināpi tattha pavattateva. Yathā taṃ ñāṇasahitaṃ hutvā sammasanavasena ciraparicitaṃ kadāci ñāṇarahitampi sammasanavasena pavattati, yathā vā kilesasahitaṃ hutvā pavattaṃ sabbaso kilesarahitampi paricayena kilesavāsanāvasena pavattati, evaṃsampadamidaṃ daṭṭhabbaṃ.
аахананабарияаахананарасод̇и аад̣̇ид̇о, абхимукам̣ ваа хананам̣ аахананам̣. барид̇о, баривад̇д̇ид̇ваа ваа аахананам̣ барияаахананам̣. ‘‘руубам̣ руубам̣, бат̇авий бат̇авий’’д̇и аагодзнд̇асса вияа бавад̇д̇и аахананам̣ барияааханананд̇и жа взд̣̇ид̇аб̣б̣ам̣. яасмин̃хи аарамман̣з жид̇д̇ам̣ абхиниробзд̇и, д̇ам̣ д̇асса г̇ахан̣аяог̇яам̣ гаронд̇о вид̇агго аагодзнд̇о вияа ход̇и. яад̣̇и звам̣ нааг̇асзнад̇т̇зрзна ‘‘аагоданалагкан̣о вид̇агго. яат̇аа, махаарааж̇а, бхзрий аагодид̇аа ат̇а бажчаа ануравад̇и анусад̣̇д̣̇ааяад̇и, звамзва ко, махаарааж̇а, яат̇аа аагоданаа, звам̣ вид̇агго д̣̇адтаб̣б̣о. ат̇а бажчаа анураванаа анусад̣̇д̣̇анаа, звам̣ вижааро д̣̇адтаб̣б̣о’’д̇и аагоданалагкан̣ад̇аа вид̇аггасса гасмаа вуд̇д̇аа? нааяам̣ вирод̇хо. т̇зрзна хи гижжасанниссид̇ам̣ гад̇ваа лагкан̣ам̣ вуд̇д̇ам̣. д̇хаммаанан̃хи сабхаававинимуд̇д̇аа гаажи гирияаа наама над̇т̇и д̇ат̇аа г̇ахзд̇аб̣б̣аагааро жа. б̣од̇ханзяяаж̇анаанурод̇хзна бана барамад̇т̇ад̇о згийбхаавоби сабхаавад̇хаммо барияааяаважанзхи вияа самааробид̇аруубзхи б̣ахуухи багаарзхи багаасийяад̇и. зван̃хи со судту багаасид̇о ход̇и. аанаяанабажжубадтаанод̇и зд̇т̇а аанаяанам̣ жид̇д̇з аарамман̣асса убанаяанам̣, аагад̣дханам̣ ваа.
Āhananapariyāhananarasoti ādito, abhimukhaṃ vā hananaṃ āhananaṃ. Parito, parivattitvā vā āhananaṃ pariyāhananaṃ. ‘‘Rūpaṃ rūpaṃ, pathavī pathavī’’ti ākoṭentassa viya pavatti āhananaṃ pariyāhanananti ca veditabbaṃ. Yasmiñhi ārammaṇe cittaṃ abhiniropeti, taṃ tassa gahaṇayogyaṃ karonto vitakko ākoṭento viya hoti. Yadi evaṃ nāgasenattherena ‘‘ākoṭanalakkhaṇo vitakko. Yathā, mahārāja, bherī ākoṭitā atha pacchā anuravati anusaddāyati, evameva kho, mahārāja, yathā ākoṭanā, evaṃ vitakko daṭṭhabbo. Atha pacchā anuravanā anusaddanā, evaṃ vicāro daṭṭhabbo’’ti ākoṭanalakkhaṇatā vitakkassa kasmā vuttā? Nāyaṃ virodho. Therena hi kiccasannissitaṃ katvā lakkhaṇaṃ vuttaṃ. Dhammānañhi sabhāvavinimuttā kāci kiriyā nāma natthi tathā gahetabbākāro ca. Bodhaneyyajanānurodhena pana paramatthato ekībhāvopi sabhāvadhammo pariyāyavacanehi viya samāropitarūpehi bahūhi pakārehi pakāsīyati. Evañhi so suṭṭhu pakāsito hoti. Ānayanapaccupaṭṭhānoti ettha ānayanaṃ citte ārammaṇassa upanayanaṃ, ākaḍḍhanaṃ vā.
анусан̃жаран̣ам̣ анубариб̣бхаманам̣. свааяам̣ висзсо санд̇аанамхи лаб̣бхамаано зва санд̇аанз баагадо ход̇ийд̇и д̣̇адтаб̣б̣о. сзсзсуби зсзва наяо. анумаж̇ж̇ананд̇и аарамман̣з жид̇д̇асса анумасанам̣, баримаж̇ж̇ананд̇и ад̇т̇о. д̇ат̇аа хи ‘‘вижааро баримаж̇ж̇анахад̇т̇о вияа сан̃жаран̣ахад̇т̇о вияаа’’д̇и жа вуд̇д̇о. д̇ад̇т̇аад̇и аарамман̣з. сахаж̇аад̇аанам̣ ануяож̇анам̣ аарамман̣з анувижаран̣асан̇каад̇аанумаж̇ж̇анавасзнзва взд̣̇ид̇аб̣б̣ам̣. ануббаб̣анд̇ханам̣ аарамман̣з жид̇д̇асса авижчиннасса вияа бавад̇д̇и. д̇ат̇аа хи со ‘‘ануббаб̣анд̇ханад̇аа’’д̇и нид̣̇д̣̇идто. д̇знзва жа ‘‘гхан̣даанураво вияа, бариб̣бхаманам̣ вияаа’’д̇и жа вуд̇д̇о. гад̇т̇ажийд̇и батамаж̇жхаанз барид̇д̇ажид̇д̇уббаад̣̇зсу жа. ол̣ааригадтзнаад̇и вижаарад̇о ол̣ааригадтзна. яат̇аа гхан̣даабхигхаад̇асад̣̇д̣̇о батамаабхинибаад̇о ход̇и, звам̣ аарамман̣аабхимуканиробанадтзна вид̇агго жзд̇асо батамаабхинибаад̇о вияа ход̇ийд̇и ааха ‘‘гхан̣даабхигхаад̇асад̣̇д̣̇о вияаа’’д̇иаад̣̇и. вибпаараваад̇и зд̇т̇а вибпааро наама вид̇аггасса т̇инамид̣̇д̇хабадибагко аарамман̣з анолийнад̇аа асан̇гожо, со бана абхиниробанабхаавзна жаланам̣ вияа ход̇ийд̇и ад̇хиббааязнааха ‘‘барибпанд̣̇анабхааво жид̇д̇ассаа’’д̇и. бариб̣бхаманам̣ вияаад̇и зд̇т̇а бариссаяаабхаававиймам̣санад̇т̇ам̣ бариб̣бхамананд̇и взд̣̇ид̇аб̣б̣ам̣. д̣̇уганибаад̇адтагат̇ааяам̣ бана –
Anusañcaraṇaṃ anuparibbhamanaṃ. Svāyaṃ viseso santānamhi labbhamāno eva santāne pākaṭo hotīti daṭṭhabbo. Sesesupi eseva nayo. Anumajjananti ārammaṇe cittassa anumasanaṃ, parimajjananti attho. Tathā hi ‘‘vicāro parimajjanahattho viya sañcaraṇahattho viyā’’ti ca vutto. Tatthāti ārammaṇe. Sahajātānaṃ anuyojanaṃ ārammaṇe anuvicaraṇasaṅkhātaanumajjanavaseneva veditabbaṃ. Anuppabandhanaṃ ārammaṇe cittassa avicchinnassa viya pavatti. Tathā hi so ‘‘anuppabandhanatā’’ti niddiṭṭho. Teneva ca ‘‘ghaṇṭānuravo viya, paribbhamanaṃ viyā’’ti ca vutto. Katthacīti paṭhamajjhāne parittacittuppādesu ca. Oḷārikaṭṭhenāti vicārato oḷārikaṭṭhena. Yathā ghaṇṭābhighātasaddo paṭhamābhinipāto hoti, evaṃ ārammaṇābhimukhaniropanaṭṭhena vitakko cetaso paṭhamābhinipāto viya hotīti āha ‘‘ghaṇṭābhighātasaddo viyā’’tiādi. Vipphāravāti ettha vipphāro nāma vitakkassa thinamiddhapaṭipakkho ārammaṇe anolīnatā asaṅkoco, so pana abhiniropanabhāvena calanaṃ viya hotīti adhippāyenāha ‘‘paripphandanabhāvo cittassā’’ti. Paribbhamanaṃ viyāti ettha parissayābhāvavīmaṃsanatthaṃ paribbhamananti veditabbaṃ. Dukanipātaṭṭhakathāyaṃ pana –
‘‘аагаасз г̇ажчад̇о махаасагун̣асса убхохи багкзхи ваад̇ам̣ г̇ахзд̇ваа багкз саннисийд̣̇аабзд̇ваа г̇аманам̣ вияа аарамман̣з жзд̇асо абхиниробанабхаавзна бавад̇д̇о вид̇агго, ваад̇аг̇г̇ахан̣ад̇т̇ам̣ багкз панд̣̇аабаяамаанасса г̇аманам̣ вияа анумаж̇ж̇анабхаавзна бавад̇д̇о вижааро’’д̇и –
‘‘Ākāse gacchato mahāsakuṇassa ubhohi pakkhehi vātaṃ gahetvā pakkhe sannisīdāpetvā gamanaṃ viya ārammaṇe cetaso abhiniropanabhāvena pavatto vitakko, vātaggahaṇatthaṃ pakkhe phandāpayamānassa gamanaṃ viya anumajjanabhāvena pavatto vicāro’’ti –
вуд̇д̇ам̣, д̇ам̣ ануббаб̣анд̇ханзна бавад̇д̇ияам̣ яуж̇ж̇ад̇и. д̇ат̇аа хи убажаарз ваа аббанааяам̣ ваа санд̇аанзна бавад̇д̇ияам̣ вид̇агго нижжало худ̇ваа аарамман̣ам̣ анубависид̇ваа вияа бавад̇д̇ад̇и, на батамаабхинибаад̇з баагадо ход̇и. яат̇аа хи абуб̣б̣аарамман̣з батамаабхинибаад̇абхууд̇о вид̇агго вибпаараваа ход̇и, на д̇ат̇аа згасмим̣язва аарамман̣з ниранд̇арам̣ ануббаб̣анд̇хавасзна бавад̇д̇ияам̣, наад̇ивибпаараваа бана д̇ад̇т̇а ход̇и саннисиннабхаавад̇о. батамад̣̇уд̇ияаж̇жхаанзсу баагадо ход̇ийд̇и вид̇аггасса висзсо абхиниробанаагааро ол̣ааригад̇д̇аа батамаж̇жхаанз баагадо ход̇и, д̇ад̣̇абхаавад̇о бан̃жаганаяз д̣̇уд̇ияаж̇жхаанз вижаарасса висзсо анумаж̇ж̇анаагааро баагадо ход̇и.
Vuttaṃ, taṃ anuppabandhanena pavattiyaṃ yujjati. Tathā hi upacāre vā appanāyaṃ vā santānena pavattiyaṃ vitakko niccalo hutvā ārammaṇaṃ anupavisitvā viya pavattati, na paṭhamābhinipāte pākaṭo hoti. Yathā hi apubbārammaṇe paṭhamābhinipātabhūto vitakko vipphāravā hoti, na tathā ekasmiṃyeva ārammaṇe nirantaraṃ anuppabandhavasena pavattiyaṃ, nātivipphāravā pana tattha hoti sannisinnabhāvato. Paṭhamadutiyajjhānesu pākaṭo hotīti vitakkassa viseso abhiniropanākāro oḷārikattā paṭhamajjhāne pākaṭo hoti, tadabhāvato pañcakanaye dutiyajjhāne vicārassa viseso anumajjanākāro pākaṭo hoti.
аяам̣ банзд̇т̇а абаро наяо – малаг̇г̇ахид̇ам̣ гам̣сабхааж̇анам̣ згзна хад̇т̇зна д̣̇ал̣хам̣ г̇ахзд̇ваа ид̇арзна хад̇т̇зна жун̣н̣ад̇злазл̣агаломаад̣̇игад̇ажумб̣адагзна баримаж̇ж̇анд̇асса д̣̇ал̣хам̣ г̇ахан̣ахад̇т̇о вияа вид̇агго, баримаж̇ж̇анахад̇т̇о вияа вижааро. д̇ат̇аа гумбхагаарасса д̣̇ан̣д̣аббахаарзна жаггам̣ бхамаяид̇ваа бхааж̇анам̣ гаронд̇асса бин̣д̣асса уббийл̣анахад̇т̇о вияа вид̇агго, д̇ассзва ид̇о жид̇о жа сан̃жаран̣ахад̇т̇о вияа вижааро. д̇ат̇аа гам̣сабхааж̇анаад̣̇ийсу гин̃жи ман̣д̣алам̣ ваддалзкам̣ гаронд̇асса маж̇жхз саннирумбхид̇ваа тид̇аган̣даго вияа абхиниробано вид̇агго, б̣ахи бариб̣бхаманаган̣даго вияа анумаж̇ж̇ано вижаарод̇и взд̣̇ид̇аб̣б̣ам̣.
Ayaṃ panettha aparo nayo – malaggahitaṃ kaṃsabhājanaṃ ekena hatthena daḷhaṃ gahetvā itarena hatthena cuṇṇatelaeḷakalomādikatacumbaṭakena parimajjantassa daḷhaṃ gahaṇahattho viya vitakko, parimajjanahattho viya vicāro. Tathā kumbhakārassa daṇḍappahārena cakkaṃ bhamayitvā bhājanaṃ karontassa piṇḍassa uppīḷanahattho viya vitakko, tasseva ito cito ca sañcaraṇahattho viya vicāro. Tathā kaṃsabhājanādīsu kiñci maṇḍalaṃ vaṭṭalekhaṃ karontassa majjhe sannirumbhitvā ṭhitakaṇṭako viya abhiniropano vitakko, bahi paribbhamanakaṇṭako viya anumajjano vicāroti veditabbaṃ.
яат̇аа бубпапаласаакаад̣̇иаваяававинимуд̇д̇о авиж̇ж̇амааноби ругко ‘‘сабубпо сапало’’д̇и вохарийяад̇и, звам̣ вид̇аггаад̣̇иан̇г̇авинимуд̇д̇ам̣ авиж̇ж̇амаанамби жхаанам̣ ‘‘савид̇аггам̣ савижаара’’нд̇и вохарийяад̇ийд̇и д̣̇ассзд̇ум̣ ‘‘ругко вияаа’’д̇иаад̣̇и вуд̇д̇ам̣. вибхан̇г̇з банаад̇иаад̣̇ийсу жхаанабхааванааяа буг̇г̇алавасзна д̣̇зсзд̇аб̣б̣ад̇д̇аа ‘‘ид̇ха бхигку вивижжзва гаамзхий’’д̇иаад̣̇инаа (вибха. 508) буг̇г̇алаад̇хидтаанзна жхаанаани уд̣̇д̣̇идтаанийд̇и. яад̣̇иби вибхан̇г̇з буг̇г̇алаад̇хидтаанаа д̣̇зсанаа гад̇аа, ад̇т̇о бана д̇ад̇рааби вибхан̇г̇зби яат̇аа ид̇ха ‘‘иминаа жа вид̇аггзнаа’’д̇иаад̣̇инаа д̇хаммавасзна вуд̇д̇о, звамзва д̣̇адтаб̣б̣о, барамад̇т̇ад̇о буг̇г̇алассзва абхаавад̇од̇и ад̇хиббааяо. ат̇а ваа жхаанасаман̇г̇ино вид̇аггавижаарасаман̇г̇ид̇аад̣̇ассанзна жхаанассзва савид̇аггасавижаарад̇аа вуд̇д̇аад̇и ааха ‘‘ад̇т̇о бана д̇ад̇рааби звамзва д̣̇адтаб̣б̣о’’д̇и.
Yathā pupphaphalasākhādiavayavavinimutto avijjamānopi rukkho ‘‘sapuppho saphalo’’ti voharīyati, evaṃ vitakkādiaṅgavinimuttaṃ avijjamānampi jhānaṃ ‘‘savitakkaṃ savicāra’’nti voharīyatīti dassetuṃ ‘‘rukkho viyā’’tiādi vuttaṃ. Vibhaṅge panātiādīsu jhānabhāvanāya puggalavasena desetabbattā ‘‘idha bhikkhu vivicceva kāmehī’’tiādinā (vibha. 508) puggalādhiṭṭhānena jhānāni uddiṭṭhānīti. Yadipi vibhaṅge puggalādhiṭṭhānā desanā katā, attho pana tatrāpi vibhaṅgepi yathā idha ‘‘iminā ca vitakkenā’’tiādinā dhammavasena vutto, evameva daṭṭhabbo, paramatthato puggalasseva abhāvatoti adhippāyo. Atha vā jhānasamaṅgino vitakkavicārasamaṅgitādassanena jhānasseva savitakkasavicāratā vuttāti āha ‘‘attho pana tatrāpi evameva daṭṭhabbo’’ti.
вивзгасад̣̇д̣̇асса бхаавасаад̇ханад̇ам̣ санд̇хааяааха ‘‘д̇асмаа вивзгаа’’д̇и. хзд̇уад̇т̇з жзд̇ам̣ ниссаггаважанам̣, д̇асмаа вивзгаа хзд̇убхууд̇аад̇и ад̇т̇о. вивзгасад̣̇д̣̇асса гад̇д̇усаад̇ханад̇ам̣ гаммасаад̇ханад̇ам̣ ваа санд̇хааяааха ‘‘д̇асмим̣ ваа вивзгз’’д̇и. ‘‘вивид̇д̇о’’д̇и хи иминаа нийваран̣зхи винаабхууд̇о д̇зхи вивзжид̇од̇и жа саад̇ханад̣̇ваяамби сан̇г̇ахид̇амзваад̇и. бинаяад̇ийд̇и д̇аббзд̇и вад̣дхзд̇и ваа. самбияааяаналагкан̣аад̇и барид̇уссаналагкан̣аа. бийнанарасаад̇и бариб̣рууханарасаа. паран̣арасаад̇и бан̣ийд̇аруубзхи гааяасса б̣яаабанарасаа. уд̣̇аг̇г̇абхааво од̣̇аг̇яам̣. сукаяад̇ийд̇и сукам̣, ад̇д̇анаа самбаяуд̇д̇ад̇хаммз лад̣̇д̇хассаад̣̇з гарод̇ийд̇и ад̇т̇о. свааяам̣ гад̇д̇унид̣̇д̣̇зсо барияааяалад̣̇д̇хо д̇хаммад̇о ан̃н̃асса гад̇д̇унивад̇д̇анад̇т̇о, ниббарияааязна бана бхаавасаад̇ханамзва лаб̣бхад̇ийд̇и ‘‘суканам̣ сука’’нд̇и вуд̇д̇ам̣. саад̇алагкан̣анд̇и идтасабхаавад̇д̇аа д̇ам̣саман̇г̇ийбуг̇г̇алам̣, самбаяуд̇д̇ад̇хаммз ваа ад̇д̇ани саад̣̇аяад̇ийд̇и саад̇ам̣ д̣̇а-гаарасса д̇а-гаарам̣ гад̇ваа. саад̇ам̣ мад̇хуранд̇и вад̣̇анд̇и, саад̇ам̣ лагкан̣ам̣ зд̇ассаад̇и саад̇алагкан̣ам̣. убаб̣рууханарасанд̇иаад̣̇ийсу убаб̣рууханам̣ самбаяуд̇д̇ад̇хаммаанам̣ сам̣вад̣̇д̇ханам̣, д̣̇угкам̣ вияа ависсаж̇ж̇зд̇ваа ад̣̇угкамасукаа вияа анаж̇жхубзгкид̇ваа ану ану г̇ан̣ханам̣ убагаарид̇аа ваа ануг̇г̇ахо. гад̇т̇ажийд̇и батамаж̇жхаанаад̣̇игз. бадилаабхад̇удтийд̇и бадилаабхавасзна уббаж̇ж̇анагад̇удти. бадилад̣̇д̇харасаанубхавананд̇и бадилад̣̇д̇хасса аарамман̣арасасса анубхаванам̣. зд̇зна бийд̇исукаани сабхаавад̇о вибхаж̇ид̇ваа д̣̇ассид̇аани. яад̇т̇а бийд̇и, д̇ад̇т̇а суканд̇и вид̇аггасса вияа вижаарзна бийд̇ияаа сукзна ажжанд̇асам̣яог̇амааха. яад̇т̇а сукам̣, д̇ад̇т̇а на нияамад̇о бийд̇ийд̇и вижаарасса вияа вид̇аггзна, сукасса бийд̇ияаа анажжанд̇асам̣яог̇ам̣. д̇зна ажжанд̇аанажжанд̇асам̣яог̇ид̇ааяа бийд̇исукаанам̣ висзсам̣ д̣̇ассзд̇и.
Vivekasaddassa bhāvasādhanataṃ sandhāyāha ‘‘tasmā vivekā’’ti. Hetuatthe cetaṃ nissakkavacanaṃ, tasmā vivekā hetubhūtāti attho. Vivekasaddassa kattusādhanataṃ kammasādhanataṃ vā sandhāyāha ‘‘tasmiṃ vā viveke’’ti. ‘‘Vivitto’’ti hi iminā nīvaraṇehi vinābhūto tehi vivecitoti ca sādhanadvayampi saṅgahitamevāti. Pinayatīti tappeti vaḍḍheti vā. Sampiyāyanalakkhaṇāti paritussanalakkhaṇā. Pīnanarasāti paribrūhanarasā. Pharaṇarasāti paṇītarūpehi kāyassa byāpanarasā. Udaggabhāvo odagyaṃ. Sukhayatīti sukhaṃ, attanā sampayuttadhamme laddhassāde karotīti attho. Svāyaṃ kattuniddeso pariyāyaladdho dhammato aññassa kattunivattanattho, nippariyāyena pana bhāvasādhanameva labbhatīti ‘‘sukhanaṃ sukha’’nti vuttaṃ. Sātalakkhaṇanti iṭṭhasabhāvattā taṃsamaṅgīpuggalaṃ, sampayuttadhamme vā attani sādayatīti sātaṃ da-kārassa ta-kāraṃ katvā. Sātaṃ madhuranti vadanti, sātaṃ lakkhaṇaṃ etassāti sātalakkhaṇaṃ. Upabrūhanarasantiādīsu upabrūhanaṃ sampayuttadhammānaṃ saṃvaddhanaṃ, dukkhaṃ viya avissajjetvā adukkhamasukhā viya anajjhupekkhitvā anu anu gaṇhanaṃ upakāritā vā anuggaho. Katthacīti paṭhamajjhānādike. Paṭilābhatuṭṭhīti paṭilābhavasena uppajjanakatuṭṭhi. Paṭiladdharasānubhavananti paṭiladdhassa ārammaṇarasassa anubhavanaṃ. Etena pītisukhāni sabhāvato vibhajitvā dassitāni. Yattha pīti, tattha sukhanti vitakkassa viya vicārena pītiyā sukhena accantasaṃyogamāha. Yattha sukhaṃ, tattha na niyamato pītīti vicārassa viya vitakkena, sukhassa pītiyā anaccantasaṃyogaṃ. Tena accantānaccantasaṃyogitāya pītisukhānaṃ visesaṃ dasseti.
гам̣ уд̣̇агам̣ д̇аарзнд̇и зд̇т̇аад̇и ганд̇аарам̣, нируд̣̇агамарудтаанам̣. ванамзва вананд̇ам̣. ванажчааяаббавзсанауд̣̇агабарибхог̇зсу вияа суканд̇и яат̇аа хи бурисо махааганд̇аарамаг̇г̇ам̣ бадибанно гхаммабарзд̇о д̇асид̇о бибаасид̇о бадибат̇з бурисам̣ д̣̇исваа ‘‘гад̇т̇а баанийяам̣ ад̇т̇ий’’д̇и бужчзяяа, со ‘‘адавим̣ уд̇д̇арид̇ваава ж̇аад̇ассараванасан̣д̣о ад̇т̇и, д̇ад̇т̇а г̇анд̇ваа лабхиссасий’’д̇и вад̣̇зяяа, со д̇асса гат̇ам̣ суд̇ваава хадтабахадто бхавзяяа, д̇ад̇о г̇ажчанд̇о бхуумияам̣ бад̇ид̇аани уббалад̣̇аланаал̣абад̇д̇аад̣̇ийни д̣̇исваа судтуд̇арам̣ хадтабахадто худ̇ваа г̇ажчанд̇о аллавад̇т̇з аллагзсз бурисз бассзяяа, ванагуггудаванамораад̣̇ийнам̣ сад̣̇д̣̇ам̣ сун̣зяяа, ж̇аад̇ассарабарияанд̇з ж̇аад̇аман̣иж̇ааласад̣̇исам̣ нийлаванасан̣д̣ам̣ бассзяяа, сарз ж̇аад̇аани уббалабад̣̇умагумуд̣̇аани бассзяяа, ажчам̣ виббасаннам̣ уд̣̇агамби бассзяяа, со бхияяо бхияяо хадтабахадто худ̇ваа ж̇аад̇ассарам̣ од̇арид̇ваа яат̇ааружи нхад̇ваа жа бивид̇ваа жа бассад̣̇д̇хад̣̇арат̇о бхисамул̣аалабогкараад̣̇ийни каад̣̇ид̇ваа нийлуббалаад̣̇ийни бил̣анд̇хид̇ваа манд̣̇аалавамуулаани канд̇хз кибид̇ваа уд̇д̇арид̇ваа саадагам̣ ниваасзд̇ваа уд̣̇агасаадагам̣ аад̇абз гад̇ваа сийд̇ажчааяааяа манд̣̇аманд̣̇з ваад̇з бахаранд̇з нибаннова ‘‘ахо сукам̣ ахо сука’’нд̇и вад̣̇зяяа, звам̣самбад̣̇амид̣̇ам̣ д̣̇адтаб̣б̣ам̣. д̇асса хи бурисасса ж̇аад̇ассараванасан̣д̣асаванад̇о бадтааяа яаава уд̣̇агад̣̇ассанаа хадтабахадтагаало вияа буб̣б̣абхааг̇аарамман̣з хадтабахадтаагаараа бийд̇и, нхааяид̇ваа жа бивид̇ваа жа сийд̇ажчааяааяа манд̣̇аманд̣̇з ваад̇з бахаранд̇з ‘‘ахо сукам̣ ахо сука’’нд̇и вад̣̇анд̇о нибаннагаало вияа б̣алаббад̇д̇ам̣ аарамман̣арасаанубхаванаагаарасан̣тид̇ам̣ сукам̣.
Kaṃ udakaṃ tārenti etthāti kantāraṃ, nirudakamaruṭṭhānaṃ. Vanameva vanantaṃ. Vanacchāyappavesanaudakaparibhogesu viya sukhanti yathā hi puriso mahākantāramaggaṃ paṭipanno ghammapareto tasito pipāsito paṭipathe purisaṃ disvā ‘‘kattha pānīyaṃ atthī’’ti puccheyya, so ‘‘aṭaviṃ uttaritvāva jātassaravanasaṇḍo atthi, tattha gantvā labhissasī’’ti vadeyya, so tassa kathaṃ sutvāva haṭṭhapahaṭṭho bhaveyya, tato gacchanto bhūmiyaṃ patitāni uppaladalanāḷapattādīni disvā suṭṭhutaraṃ haṭṭhapahaṭṭho hutvā gacchanto allavatthe allakese purise passeyya, vanakukkuṭavanamorādīnaṃ saddaṃ suṇeyya, jātassarapariyante jātamaṇijālasadisaṃ nīlavanasaṇḍaṃ passeyya, sare jātāni uppalapadumakumudāni passeyya, acchaṃ vippasannaṃ udakampi passeyya, so bhiyyo bhiyyo haṭṭhapahaṭṭho hutvā jātassaraṃ otaritvā yathāruci nhatvā ca pivitvā ca passaddhadaratho bhisamuḷālapokkharādīni khāditvā nīluppalādīni piḷandhitvā mandālavamūlāni khandhe khipitvā uttaritvā sāṭakaṃ nivāsetvā udakasāṭakaṃ ātape katvā sītacchāyāya mandamande vāte paharante nipannova ‘‘aho sukhaṃ aho sukha’’nti vadeyya, evaṃsampadamidaṃ daṭṭhabbaṃ. Tassa hi purisassa jātassaravanasaṇḍasavanato paṭṭhāya yāva udakadassanā haṭṭhapahaṭṭhakālo viya pubbabhāgārammaṇe haṭṭhapahaṭṭhākārā pīti, nhāyitvā ca pivitvā ca sītacchāyāya mandamande vāte paharante ‘‘aho sukhaṃ aho sukha’’nti vadanto nipannakālo viya balappattaṃ ārammaṇarasānubhavanākārasaṇṭhitaṃ sukhaṃ.
д̇асмим̣ д̇асмим̣ самаязд̇и идтаарамман̣асса бадилаабхасамаяз бадилад̣̇д̇хасса расаанубхаванасамаяз ванажчааяаад̣̇ийнам̣ саванад̣̇ассанасамаяз барибхог̇асамаяз жа. баагадабхаавад̇од̇и яат̇ааггамам̣ бийд̇исукаанам̣ вибхууд̇абхаавад̇о. вивзгаж̇ам̣ бийд̇исуканд̇и зд̇т̇а буримасмим̣ ад̇т̇з вивзгаж̇анд̇и жхаанам̣ вуд̇д̇ам̣. бийд̇исукасад̣̇д̣̇ад̇о жа ад̇т̇иад̇т̇ависзсавад̇о асса жхаанасса, асмим̣ ваа жхаанзд̇и зд̇т̇а агааро д̣̇адтаб̣б̣о яат̇аа арисасод̇и. д̣̇уд̇ияз бийд̇исукамзва вивзгаж̇ам̣, вивзгаж̇ам̣бийд̇исуканд̇и жа ан̃н̃абад̣̇ад̇т̇асамаасо бажжад̇д̇анид̣̇д̣̇зсасса жа алобо гад̇о, лобз ваа сад̇и ‘‘вивзгаж̇абийд̇исука’’нд̇и баатод̇и аяам̣ висзсо.
Tasmiṃ tasmiṃ samayeti iṭṭhārammaṇassa paṭilābhasamaye paṭiladdhassa rasānubhavanasamaye vanacchāyādīnaṃ savanadassanasamaye paribhogasamaye ca. Pākaṭabhāvatoti yathākkamaṃ pītisukhānaṃ vibhūtabhāvato. Vivekajaṃpītisukhanti ettha purimasmiṃ atthe vivekajanti jhānaṃ vuttaṃ. Pītisukhasaddato ca atthiatthavisesavato assa jhānassa, asmiṃ vā jhāneti ettha akāro daṭṭhabbo yathā arisasoti. Dutiye pītisukhameva vivekajaṃ, vivekajaṃpītisukhanti ca aññapadatthasamāso paccattaniddesassa ca alopo kato, lope vā sati ‘‘vivekajapītisukha’’nti pāṭhoti ayaṃ viseso.
г̇ан̣анаанубуб̣б̣ад̇о батаманд̇и иминаа д̣̇зсанааггамам̣ уллин̇г̇зд̇и. ‘‘г̇ан̣анаанубуб̣б̣ад̇аа батама’’нд̇иби баато, д̇ад̇т̇ааби г̇ан̣анаанубуб̣б̣ад̇ааяаад̇и ад̇т̇о, г̇ан̣анаанубуб̣б̣ад̇аамад̇д̇ам̣ ваа батаманд̇и ид̣̇ам̣ важананд̇и ад̇т̇о. батамам̣ самаабаж̇ж̇ад̇ийд̇и батаманд̇и ид̣̇ам̣ бана на зганд̇алагкан̣ам̣. жин̣н̣авасийбхааво хи адтасамаабад̇д̇илаабхий аад̣̇ид̇о бадтааяа мад̇т̇агам̣ баабзнд̇оби самаабаж̇ж̇ид̇ум̣ саггод̇и, мад̇т̇агад̇о бадтааяа аад̣̇им̣ баабзнд̇оби самаабаж̇ж̇ид̇ум̣ саггод̇и, анд̇аранд̇араа оггаманд̇оби саггод̇и. звам̣ буб̣б̣уббад̇д̇ияадтзна бана батамам̣ уббаннанд̇иби батамам̣. д̇знзва висуд̣̇д̇химаг̇г̇з (висуд̣̇д̇хи. 1.75) ‘‘г̇ан̣анаанубуб̣б̣ад̇аа батамам̣, батамам̣ уббаннанд̇иби батама’’нд̇и зд̇д̇агамзва вуд̇д̇ам̣. бажжанийгад̇хаммз жхаабзд̇ийд̇и нийваран̣аад̣̇ибажжанийгад̇хаммз д̣̇ахад̇и, вигкамбханавасзна баж̇ахад̇ийд̇и ад̇т̇о. г̇ожаранд̇и гасин̣аад̣̇иааламб̣анам̣. д̇анд̇и д̇ам̣ г̇ожарам̣. убаниж̇жхааяад̇ийд̇и бассад̇и. саха убажаарзнаад̇и сад̣̇д̇хим̣ убажаараж̇жхаанзна. гасин̣аарамман̣уубаниж̇жхааяанад̇од̇и бат̇авийгасин̣аад̣̇ино ад̇д̇ано аарамман̣асса руубам̣ вияа жагкунаа убаниж̇жхааяанад̇о. лагкан̣уубаниж̇жхааяанад̇од̇и яат̇аасамбхавам̣ анижжаад̣̇илагкан̣ад̇д̇аяасса ниб̣б̣аанад̇хаад̇уяаа д̇ат̇алагкан̣асса жа убаниж̇жхааяанад̇о. д̇знзвааха ‘‘зд̇т̇а хий’’д̇иаад̣̇и. нижжаад̣̇ивибаллаасаббахаанзна маг̇г̇о асаммохад̇о анижжаад̣̇илагкан̣аани убаниж̇жхааяад̇ийд̇и лагкан̣уубаниж̇жхаананд̇и ааха ‘‘вибассанааяа убаниж̇жхааяанагижжа’’нд̇иаад̣̇и. д̇ат̇алагкан̣анд̇и авинаасад̇хаммасса ниб̣б̣аанасса анан̃н̃ат̇аабхаавад̇о авибарийд̇асабхааво д̇ат̇алагкан̣ам̣, маг̇г̇ассаби ваа ниб̣б̣аанаарамман̣ад̇о д̇ат̇алагкан̣уубаниж̇жхаанад̇аа яож̇зд̇аб̣б̣аа.
Gaṇanānupubbato paṭhamanti iminā desanākkamaṃ ulliṅgeti. ‘‘Gaṇanānupubbatā paṭhama’’ntipi pāṭho, tatthāpi gaṇanānupubbatāyāti attho, gaṇanānupubbatāmattaṃ vā paṭhamanti idaṃ vacananti attho. Paṭhamaṃ samāpajjatīti paṭhamanti idaṃ pana na ekantalakkhaṇaṃ. Ciṇṇavasībhāvo hi aṭṭhasamāpattilābhī ādito paṭṭhāya matthakaṃ pāpentopi samāpajjituṃ sakkoti, matthakato paṭṭhāya ādiṃ pāpentopi samāpajjituṃ sakkoti, antarantarā okkamantopi sakkoti. Evaṃ pubbuppattiyaṭṭhena pana paṭhamaṃ uppannantipi paṭhamaṃ. Teneva visuddhimagge (visuddhi. 1.75) ‘‘gaṇanānupubbatā paṭhamaṃ, paṭhamaṃ uppannantipi paṭhama’’nti ettakameva vuttaṃ. Paccanīkadhamme jhāpetīti nīvaraṇādipaccanīkadhamme dahati, vikkhambhanavasena pajahatīti attho. Gocaranti kasiṇādiālambanaṃ. Tanti taṃ gocaraṃ. Upanijjhāyatīti passati. Saha upacārenāti saddhiṃ upacārajjhānena. Kasiṇārammaṇūpanijjhāyanatoti pathavīkasiṇādino attano ārammaṇassa rūpaṃ viya cakkhunā upanijjhāyanato. Lakkhaṇūpanijjhāyanatoti yathāsambhavaṃ aniccādilakkhaṇattayassa nibbānadhātuyā tathalakkhaṇassa ca upanijjhāyanato. Tenevāha ‘‘ettha hī’’tiādi. Niccādivipallāsappahānena maggo asammohato aniccādilakkhaṇāni upanijjhāyatīti lakkhaṇūpanijjhānanti āha ‘‘vipassanāya upanijjhāyanakicca’’ntiādi. Tathalakkhaṇanti avināsadhammassa nibbānassa anaññathābhāvato aviparītasabhāvo tathalakkhaṇaṃ, maggassapi vā nibbānārammaṇato tathalakkhaṇūpanijjhānatā yojetabbā.
висад̣̇исод̣̇аахаран̣ам̣ д̇аава д̣̇ассзнд̇о ааха ‘‘яат̇аа сад̇хано’’д̇иаад̣̇и. ан̃н̃о абад̣̇зсаарахо ход̇ийд̇и д̇ханад̇о бариж̇анад̇о жа ан̃н̃о д̇ханаваа бариж̇анаваа жа бурисо саха д̇ханзна вад̇д̇ад̇и бариж̇анзна жаад̇и сад̇хано сабариж̇анод̇и абад̣̇зсам̣ арахад̇ийд̇и абад̣̇зсаарахо ход̇и , абад̣̇исид̇аб̣б̣о ход̇ийд̇и вуд̇д̇ам̣ ход̇и. сзнан̇г̇зсу зва сзнаасаммуд̇ийд̇и рат̇аад̣̇исзнан̇г̇авинимуд̇д̇ааяа сзнааяа абхаавзби рат̇зхи бад̇д̇ийхи жа саха вад̇д̇анад̇о сарат̇аа сабад̇д̇и сзнаад̇и рат̇аад̣̇исзнан̇г̇зсуязва сзнаавохаарод̇и ад̇т̇о. гасмаа банзд̇т̇а жхаанабаатз аг̇г̇ахид̇аа жид̇д̇згаг̇г̇ад̇аа г̇ахид̇аад̇и ануяог̇ам̣ санд̇хааяааха ‘‘авуд̇д̇ад̇д̇аа’’д̇иаад̣̇и. звам̣ вуд̇д̇ааязваад̇и звам̣ саруубад̇о вибхан̇г̇з вуд̇д̇ааязва. сажид̇д̇згаг̇г̇ад̇анд̇и ид̇ха авуд̇д̇збийд̇и ‘‘сажид̇д̇згаг̇г̇ад̇а’’нд̇и звам̣ саруубад̇о имасмим̣ жхаанабаатз авуд̇д̇збийд̇и ад̇т̇о, сааман̃н̃ад̇о бана жхаанаг̇г̇ахан̣зна г̇ахид̇аа зва. д̇знзвааха ‘‘язна хий’’д̇иаад̣̇и . ид̣̇ам̣ вуд̇д̇ам̣ ход̇и – язна вид̇аггаад̣̇ийхи саха вад̇д̇аб̣б̣ам̣, д̇ам̣ д̇хаммам̣ д̣̇ийбзд̇ум̣ д̇асса багаасанаад̇хиббааязна ‘‘савид̇аггам̣ савижаара’’нд̇иаад̣̇инаа уд̣̇д̣̇зсо гад̇о, со зва ад̇хиббааяо д̇зна бхаг̇авад̇аа вибхан̇г̇з (вибха. 569) ‘‘жид̇д̇ассзгаг̇г̇ад̇аа’’д̇и нид̣̇д̣̇исанд̇зна багаасид̇о, д̇асмаа саа жхаанабаатз аг̇г̇ахид̇аад̇и на жинд̇зд̇аб̣б̣анд̇и.
Visadisodāharaṇaṃ tāva dassento āha ‘‘yathā sadhano’’tiādi. Añño apadesāraho hotīti dhanato parijanato ca añño dhanavā parijanavā ca puriso saha dhanena vattati parijanena cāti sadhano saparijanoti apadesaṃ arahatīti apadesāraho hoti , apadisitabbo hotīti vuttaṃ hoti. Senaṅgesu eva senāsammutīti rathādisenaṅgavinimuttāya senāya abhāvepi rathehi pattīhi ca saha vattanato sarathā sapatti senāti rathādisenaṅgesuyeva senāvohāroti attho. Kasmā panettha jhānapāṭhe aggahitā cittekaggatā gahitāti anuyogaṃ sandhāyāha ‘‘avuttattā’’tiādi. Evaṃ vuttāyevāti evaṃ sarūpato vibhaṅge vuttāyeva. Sacittekaggatanti idha avuttepīti ‘‘sacittekaggata’’nti evaṃ sarūpato imasmiṃ jhānapāṭhe avuttepīti attho, sāmaññato pana jhānaggahaṇena gahitā eva. Tenevāha ‘‘yena hī’’tiādi . Idaṃ vuttaṃ hoti – yena vitakkādīhi saha vattabbaṃ, taṃ dhammaṃ dīpetuṃ tassa pakāsanādhippāyena ‘‘savitakkaṃ savicāra’’ntiādinā uddeso kato, so eva adhippāyo tena bhagavatā vibhaṅge (vibha. 569) ‘‘cittassekaggatā’’ti niddisantena pakāsito, tasmā sā jhānapāṭhe aggahitāti na cintetabbanti.
убасамбаж̇ж̇аад̇и зд̇т̇а уба-сам̣сад̣̇д̣̇аа ‘‘убалаб̣бхад̇ий’’д̇иаад̣̇ийсу вияа нирад̇т̇агаад̇и д̣̇ассзд̇ум̣ ‘‘убаг̇анд̇ваа’’д̇иаад̣̇им̣ вад̇ваа буна д̇зсам̣ саад̇т̇агабхаавам̣ д̣̇ассзд̇ум̣ ‘‘убасамбаад̣̇аяид̇ваа’’д̇иаад̣̇и вуд̇д̇ам̣, д̇асмаа убасамбаж̇ж̇аад̇и зд̇т̇а бад̇ваа саад̇хзд̇ваад̇и ваа ад̇т̇о. ирияанд̇и гирияам̣. вуд̇д̇инд̇иаад̣̇ийни д̇ассзва взважанаани. згам̣ ирияаабат̇аб̣аад̇ханам̣ ирияаабат̇анд̇арзхи рагкан̣ам̣ бааланам̣. саб̣б̣аб̣уд̣̇д̇хаанам̣ аажин̣н̣ад̇д̇аа аанаабаанассад̇игаммадтаанамзва вуд̇д̇ам̣. д̇ан̃хи саб̣б̣аб̣уд̣̇д̇хаанам̣ аажин̣н̣анд̇и вад̣̇анд̇и.
Upasampajjāti ettha upa-saṃsaddā ‘‘upalabbhatī’’tiādīsu viya niratthakāti dassetuṃ ‘‘upagantvā’’tiādiṃ vatvā puna tesaṃ sātthakabhāvaṃ dassetuṃ ‘‘upasampādayitvā’’tiādi vuttaṃ, tasmā upasampajjāti ettha patvā sādhetvāti vā attho. Iriyanti kiriyaṃ. Vuttintiādīni tasseva vevacanāni. Ekaṃ iriyāpathabādhanaṃ iriyāpathantarehi rakkhaṇaṃ pālanaṃ. Sabbabuddhānaṃ āciṇṇattā ānāpānassatikammaṭṭhānameva vuttaṃ. Tañhi sabbabuddhānaṃ āciṇṇanti vadanti.
батамаж̇жхаанагат̇аа нидтид̇аа.
Paṭhamajjhānakathā niṭṭhitā.
