| Library / Tipiṭaka / திபிடக • Tipiṭaka / த⁴ம்மஸங்க³ணீ-மூலடீகா • Dhammasaṅgaṇī-mūlaṭīkā |
ரூபாவசரகுஸலங்
Rūpāvacarakusalaṃ
சதுக்கனயோ
Catukkanayo
பட²மஜ்ஜா²னகதா²வண்ணனா
Paṭhamajjhānakathāvaṇṇanā
160. உத்தரபத³லோபங் கத்வா ரூபப⁴வோ ரூபந்தி வுத்தோ. ஜா²னஸ்ஸ அமக்³க³பா⁴வேபி ஸதி மக்³க³வசனங் அஞ்ஞமக்³க³பா⁴வனிவாரணத்த²ந்தி இமஸ்மிங் அத்தே² மக்³க³க்³க³ஹணஸ்ஸ பயோஜனங் வுத்தங், ந ஸப்³ப³ஸ்ஸ குஸலஜ்ஜா²னஸ்ஸ மக்³க³பா⁴வோதி. தத்த² மக்³க³ஸ்ஸ பா⁴வனாய ஸமயவவத்தா²னஸ்ஸ கதத்தா அமக்³க³பா⁴வனாஸமயே பவத்தானங் ப²ஸ்ஸாதீ³னங் குஸலபா⁴வோ ந த³ஸ்ஸிதோ ஸியா, தஸ்மா ஸப்³ப³ஸ்ஸ மக்³க³பா⁴வோ த³ஸ்ஸேதப்³போ³தி. இதோ அஞ்ஞோ மக்³கோ³ நத்தீ²தி ஏவங் அஞ்ஞபூ⁴மிகவிது⁴ரோ ஸதி பச்சயந்தரே ரூபூபபத்திஜனகஸபா⁴வோ விபாகத⁴ம்மஸபா⁴வோ விய விபாகத⁴ம்மவஸேன ஸப்³ப³ஸமானோ மக்³க³ஸத்³தே³ன வுத்தோதி த³ஸ்ஸேதீதி வேதி³தப்³ப³ங். குஸலங் தா³னந்தி அலோபோ⁴ த³ட்ட²ப்³போ³. அத² வா சேதனா தா³னங், தங் வஜ்ஜெத்வா இதரே த்³வே சேதனாஸம்பயுத்தகாதி வுத்தா. வட்டந்தீதி மக்³க³பா⁴வதோ ஜா²னவசனேன ஸங்க³ஹெத்வா மக்³கோ³தி வத்துங் வட்டந்தீதி அத்தோ². ஓகப்பனாதி ஸத்³த³ஹனா. அஞ்ஞத்த² தி³ட்ட²ங் அத்த²ங் பரிச்சஜித்வா ‘‘ஜனேதி வட்³டே⁴தீ’’தி அயமத்தோ² கஸ்மா வுத்தோதி நிருபஸக்³க³ஸ்ஸ அஞ்ஞத்த² ஏவமத்த²ஸ்ஸேவ தி³ட்ட²த்தாதி இமமத்த²ங் விபா⁴வேதுங் ‘‘புன சபரங் உதா³யீ’’தி (ம॰ நி॰ 2.246 ஆத³யோ) ஸுத்தமாஹடங். கேஸஞ்சி அரியானங் அரியமக்³கே³ன ஸித்³தா⁴னி அஞ்ஞானி ச ஜா²னானி பா⁴வனாஸபா⁴வானேவாதி தேஸுபி பா⁴வெந்தேன ஸமயவவத்தா²னங் இஜ்ஜ²தீதி.
160. Uttarapadalopaṃ katvā rūpabhavo rūpanti vutto. Jhānassa amaggabhāvepi sati maggavacanaṃ aññamaggabhāvanivāraṇatthanti imasmiṃ atthe maggaggahaṇassa payojanaṃ vuttaṃ, na sabbassa kusalajjhānassa maggabhāvoti. Tattha maggassa bhāvanāya samayavavatthānassa katattā amaggabhāvanāsamaye pavattānaṃ phassādīnaṃ kusalabhāvo na dassito siyā, tasmā sabbassa maggabhāvo dassetabboti. Ito añño maggo natthīti evaṃ aññabhūmikavidhuro sati paccayantare rūpūpapattijanakasabhāvo vipākadhammasabhāvo viya vipākadhammavasena sabbasamāno maggasaddena vuttoti dassetīti veditabbaṃ. Kusalaṃ dānanti alobho daṭṭhabbo. Atha vā cetanā dānaṃ, taṃ vajjetvā itare dve cetanāsampayuttakāti vuttā. Vaṭṭantīti maggabhāvato jhānavacanena saṅgahetvā maggoti vattuṃ vaṭṭantīti attho. Okappanāti saddahanā. Aññattha diṭṭhaṃ atthaṃ pariccajitvā ‘‘janeti vaḍḍhetī’’ti ayamattho kasmā vuttoti nirupasaggassa aññattha evamatthasseva diṭṭhattāti imamatthaṃ vibhāvetuṃ ‘‘puna caparaṃ udāyī’’ti (ma. ni. 2.246 ādayo) suttamāhaṭaṃ. Kesañci ariyānaṃ ariyamaggena siddhāni aññāni ca jhānāni bhāvanāsabhāvānevāti tesupi bhāventena samayavavatthānaṃ ijjhatīti.
நிஸ்ஸரந்தி நிக்³க³ச்ச²ந்தி ஏதேன, எத்த² வாதி நிஸ்ஸரணங். கே நிக்³க³ச்ச²ந்தி? காமா. தேஸங் காமானங் நிஸ்ஸரணங் பஹானந்தி அத்தோ². ஏவஞ்ஹி ‘‘காமான’’ந்தி கத்தரி ஸாமிவசனங் யுஜ்ஜதி. வத்து²காமேஹிபீதி வத்து²காமேஹி விவிச்சேவாதிபி அத்தோ² யுஜ்ஜதீதி ஏவங் யுஜ்ஜமானத்த²ந்தரஸமுச்சயத்தோ² பி-ஸத்³தோ³, ந கிலேஸகாமஸமுச்சயத்தோ². கஸ்மா? இமஸ்மிங் அத்தே² கிலேஸகாமானங் து³தியபதே³ன விவேகஸ்ஸ வுத்தத்தா. அகுஸலஸத்³தே³ன யதி³பி கிலேஸகாமா, அதா²பி ஸப்³பா³குஸலா க³ஹிதா, ஸப்³ப³தா² பன கிலேஸகாமேஹி விவேகோ வுத்தோதி ஆஹ ‘‘து³தியேன கிலேஸகாமேஹி விவேகவசனதோ’’தி. காமகு³ணாதி⁴க³மஹேதுபி பாணாதிபாதாதி³அஸுத்³த⁴ப்பயோகோ³ ஹோதீதி தப்³பி³வேகேன பயோக³ஸுத்³தி⁴ விபா⁴விதா. தண்ஹாஸங்கிலேஸஸோத⁴னேன ஆஸயபோஸனங்.
Nissaranti niggacchanti etena, ettha vāti nissaraṇaṃ. Ke niggacchanti? Kāmā. Tesaṃ kāmānaṃ nissaraṇaṃ pahānanti attho. Evañhi ‘‘kāmāna’’nti kattari sāmivacanaṃ yujjati. Vatthukāmehipīti vatthukāmehi viviccevātipi attho yujjatīti evaṃ yujjamānatthantarasamuccayattho pi-saddo, na kilesakāmasamuccayattho. Kasmā? Imasmiṃ atthe kilesakāmānaṃ dutiyapadena vivekassa vuttattā. Akusalasaddena yadipi kilesakāmā, athāpi sabbākusalā gahitā, sabbathā pana kilesakāmehi viveko vuttoti āha ‘‘dutiyena kilesakāmehi vivekavacanato’’ti. Kāmaguṇādhigamahetupi pāṇātipātādiasuddhappayogo hotīti tabbivekena payogasuddhi vibhāvitā. Taṇhāsaṃkilesasodhanena āsayaposanaṃ.
அஞ்ஞேஸம்பி சாதி தி³ட்டி²மானாதீ³னங் ப²ஸ்ஸாதீ³னஞ்ச. உபரி வுச்சமானானி ஜா²னங்கா³னி உபரிஜ்ஜா²னங்கா³னி, தேஸங் அத்தனோ விபச்சனீகானங் படிபக்க²பா⁴வத³ஸ்ஸனத்த²ங் தப்பச்சனீகனீவரணவசனங். ப்³யாபாத³விவேகவசனேன ‘‘அனத்த²ங் மே அசரீ’’திஆதி³ஆகா⁴தவத்து²பே⁴த³விஸயஸ்ஸ தோ³ஸஸ்ஸ மோஹாதி⁴கானங் தி²னமித்³தா⁴தீ³னங் விவேகவசனேன படிச்சா²த³னவஸேன து³க்கா²தி³புப்³ப³ந்தாதி³பே⁴த³விஸயஸ்ஸ மோஹஸ்ஸ விக்க²ம்ப⁴னவிவேகோ வுத்தோ. காமராக³ப்³யாபாத³ததே³கட்ட²தி²னமித்³தா⁴தி³விக்க²ம்ப⁴னகஞ்சேத³ங் ஸப்³பா³குஸலபடிபக்க²ஸபா⁴வத்தா ஸப்³ப³குஸலானங் தேன ஸபா⁴வேன ஸப்³பா³குஸலானங் பஹானங் ஹொந்தம்பி காமராகா³தி³விக்க²ம்ப⁴னஸபா⁴வமேவாதி தங்ஸபா⁴வத்தா அவிஸேஸெத்வா நீவரணாகுஸலமூலாதீ³னங் விக்க²ம்ப⁴னவிவேகோ வுத்தோ ஹோதீதி ஆஹ.
Aññesampicāti diṭṭhimānādīnaṃ phassādīnañca. Upari vuccamānāni jhānaṅgāni uparijjhānaṅgāni, tesaṃ attano vipaccanīkānaṃ paṭipakkhabhāvadassanatthaṃ tappaccanīkanīvaraṇavacanaṃ. Byāpādavivekavacanena ‘‘anatthaṃ me acarī’’tiādiāghātavatthubhedavisayassa dosassa mohādhikānaṃ thinamiddhādīnaṃ vivekavacanena paṭicchādanavasena dukkhādipubbantādibhedavisayassa mohassa vikkhambhanaviveko vutto. Kāmarāgabyāpādatadekaṭṭhathinamiddhādivikkhambhanakañcedaṃ sabbākusalapaṭipakkhasabhāvattā sabbakusalānaṃ tena sabhāvena sabbākusalānaṃ pahānaṃ hontampi kāmarāgādivikkhambhanasabhāvamevāti taṃsabhāvattā avisesetvā nīvaraṇākusalamūlādīnaṃ vikkhambhanaviveko vutto hotīti āha.
விதக்கஸ்ஸ கிச்சவிஸேஸேன தி²ரபா⁴வப்பத்தே பட²மஜ்ஜா²னஸமாதி⁴ம்ஹி பச்சனீகதூ³ரீபா⁴வகதேன தி²ரபா⁴வேன தங்ஸதி³ஸேஸு விதக்கரஹிதேஸு து³தியஜ்ஜா²னாதி³ஸமாதீ⁴ஸு ச அப்பனாதி அட்ட²கதா²வோஹாரோதி விதக்கஸ்ஸ அப்பனாயோகோ³ வுத்தோ, அஞ்ஞதா² விதக்கோவ அப்பனாதி தஸ்ஸ தங்ஸம்பயோகோ³ ந ஸியாதி. அத்தோ²…பே॰… த³ட்ட²ப்³போ³ ஜா²னஸமங்கி³னோ விதக்கவிசாரஸமங்கி³தாத³ஸ்ஸனேன ஜா²னஸ்ஸேவ ஸவிதக்கஸவிசாரபா⁴வஸ்ஸ வுத்தத்தா.
Vitakkassa kiccavisesena thirabhāvappatte paṭhamajjhānasamādhimhi paccanīkadūrībhāvakatena thirabhāvena taṃsadisesu vitakkarahitesu dutiyajjhānādisamādhīsu ca appanāti aṭṭhakathāvohāroti vitakkassa appanāyogo vutto, aññathā vitakkova appanāti tassa taṃsampayogo na siyāti. Attho…pe… daṭṭhabbo jhānasamaṅgino vitakkavicārasamaṅgitādassanena jhānasseva savitakkasavicārabhāvassa vuttattā.
விவேகஜங் பீதிஸுக²ந்தி எத்த² புரிமஸ்மிங் அத்தே² விவேகஜந்தி ஜா²னங். பீதிஸுக²ஸத்³த³தோ ச அத்தி²அத்த²விஸேஸவதோ அஸ்ஸ, அஸ்மிங் வாதி எத்த² அ-காரோ வுத்தோ. து³தியே பீதிஸுக²மேவ விவேகஜங். விவேகஜங்பீதிஸுக²ந்தி ச அஞ்ஞபத³த்தே² ஸமாஸோ பச்சத்தனித்³தே³ஸஸ்ஸ ச அலோபோ கதோ, லோபே வா ஸதி ‘‘விவேகஜபீதிஸுக²’’ந்தி பாடோ²தி அயங் விஸேஸோ. க³ணனானுபுப்³ப³தாதி க³ணனானுபுப்³ப³தாய, க³ணனானுபுப்³ப³தாமத்தங் வா பட²மந்தி வசனந்தி அத்தோ². நிச்சாதி³விபல்லாஸப்பஹானேன மக்³கோ³ அஸம்மோஹதோ அனிச்சாதி³லக்க²ணானி படிவிஜ்ஜ²தீதி லக்க²ணூபனிஜ்ஜா²னங். அஸம்மோஸத⁴ம்மங் நிப்³பா³னங் அவிபரீதலக்க²ணத்தா அனஞ்ஞதா²பா⁴வதோ தத²லக்க²ணங்.
Vivekajaṃ pītisukhanti ettha purimasmiṃ atthe vivekajanti jhānaṃ. Pītisukhasaddato ca atthiatthavisesavato assa, asmiṃ vāti ettha a-kāro vutto. Dutiye pītisukhameva vivekajaṃ. Vivekajaṃpītisukhanti ca aññapadatthe samāso paccattaniddesassa ca alopo kato, lope vā sati ‘‘vivekajapītisukha’’nti pāṭhoti ayaṃ viseso. Gaṇanānupubbatāti gaṇanānupubbatāya, gaṇanānupubbatāmattaṃ vā paṭhamanti vacananti attho. Niccādivipallāsappahānena maggo asammohato aniccādilakkhaṇāni paṭivijjhatīti lakkhaṇūpanijjhānaṃ. Asammosadhammaṃ nibbānaṃ aviparītalakkhaṇattā anaññathābhāvato tathalakkhaṇaṃ.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / த⁴ம்மஸங்க³ணீபாளி • Dhammasaṅgaṇīpāḷi / ரூபாவசரகுஸலங் • Rūpāvacarakusalaṃ
அட்ட²கதா² • Aṭṭhakathā / அபி⁴த⁴ம்மபிடக (அட்ட²கதா²) • Abhidhammapiṭaka (aṭṭhakathā) / த⁴ம்மஸங்க³ணி-அட்ட²கதா² • Dhammasaṅgaṇi-aṭṭhakathā / சதுக்கனயோ பட²மஜ்ஜா²னங் • Catukkanayo paṭhamajjhānaṃ
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / த⁴ம்மஸங்க³ணீ-அனுடீகா • Dhammasaṅgaṇī-anuṭīkā / பட²மஜ்ஜா²னகதா²வண்ணனா • Paṭhamajjhānakathāvaṇṇanā
