| Library / Tipiṭaka / তিপিটক • Tipiṭaka / ধম্মসঙ্গণী-অনুটীকা • Dhammasaṅgaṇī-anuṭīkā |
রূপাৰচরকুসলং
Rūpāvacarakusalaṃ
চতুক্কনযো
Catukkanayo
পঠমজ্ঝানকথাৰণ্ণনা
Paṭhamajjhānakathāvaṇṇanā
১৬০. উত্তরপদলোপং কত্ৰা ‘‘রূপভৰো রূপ’’ন্তি ৰুত্তো, ‘‘রূপী রূপানি পস্সতি (ম॰ নি॰ ২.২৪৮; ৩.৩১২; ধ॰ স॰ ২৪৮; পটি॰ ম॰ ১.২০৯), রূপরাগো’’তিআদীসু (ধ॰ স॰ ৩৬৩) ৰিযাতি দট্ঠব্বং। পযোগসম্পাদিতস্স রূপজ্ঝানস্স রূপভৰাতিক্কমস্সপি উপাযভাৰতো যথা রূপূপপত্তিযা এৰ মগ্গোতি অযং নিযমো ন যুজ্জতি, এৰং পচ্চযন্তরৰিকলতাদীহি রূপূপপত্তিযা অনভিনিপ্ফাদকস্সপি অত্থিভাৰতো রূপূপপত্তিযা মগ্গো এৰাতি অযম্পি নিযমো ন যুজ্জতি। এৰঞ্চ সতি যদেৰ রূপূপপত্তিযা নিপ্ফাদকং, তস্সেৰ সম্পযুত্তস্স রূপাৰচরকুসলভাৰো, ন অনভিনিপ্ফাদকস্সাতি অযমত্থো আপন্নোতি চোদনং সমুট্ঠাপেতি ন সব্বস্স কুসলজ্ঝানস্সাতিআদিনা। তত্থ সামঞ্ঞসদ্দোপি অধিকারৰসেন ৰিসেসনিদ্দিট্ঠো হোতীতি ‘‘কুসলজ্ঝানস্স মগ্গভাৰো’’তি ৰুত্তং।
160. Uttarapadalopaṃkatvā ‘‘rūpabhavo rūpa’’nti vutto, ‘‘rūpī rūpāni passati (ma. ni. 2.248; 3.312; dha. sa. 248; paṭi. ma. 1.209), rūparāgo’’tiādīsu (dha. sa. 363) viyāti daṭṭhabbaṃ. Payogasampāditassa rūpajjhānassa rūpabhavātikkamassapi upāyabhāvato yathā rūpūpapattiyā eva maggoti ayaṃ niyamo na yujjati, evaṃ paccayantaravikalatādīhi rūpūpapattiyā anabhinipphādakassapi atthibhāvato rūpūpapattiyā maggo evāti ayampi niyamo na yujjati. Evañca sati yadeva rūpūpapattiyā nipphādakaṃ, tasseva sampayuttassa rūpāvacarakusalabhāvo, na anabhinipphādakassāti ayamattho āpannoti codanaṃ samuṭṭhāpeti na sabbassa kusalajjhānassātiādinā. Tattha sāmaññasaddopi adhikāravasena visesaniddiṭṭho hotīti ‘‘kusalajjhānassa maggabhāvo’’ti vuttaṃ.
রূপূপপত্তিজনকসভাৰো রূপভৰৰিপচ্চনসভাৰোতি তস্সপি ৰিপাকধম্মভাৰে সতিপি সব্বকুসলাকুসলসাধারণং ৰিপাকধম্মভাৰসামঞ্ঞং ‘‘ৰিপাকধম্মভাৰো ৰিযা’’তি উদাহরণভাৰেন ৰুত্তং। সামঞ্ঞম্পি হি ৰিসেসতো ভিন্নং কত্ৰা ৰোহরীযতীতি। সব্বসমানোতি রূপূপপত্তিযা নিপ্ফাদকস্স পচ্চযন্তরৰিকলতাদীহি অনিপ্ফাদকস্স চ সব্বস্স যথাধিগতস্স ঝানস্স সাধারণো। এতেন উত্তরপদাৰধারণস্স পরিগ্গহিততং দস্সেতি। ‘‘ইতো অঞ্ঞো মগ্গো নাম নত্থী’’তি ইমিনাপি সজাতিযা সাধারণো অঞ্ঞজাতিৰিনিৰত্তিযা অনঞ্ঞসাধারণো ইমস্স ঝানস্স রূপূপপত্তিযা উপাযভাৰো ৰুত্তোতি দট্ঠব্বং। ইতরে দ্ৰে সদ্ধা হিরী চ। যদি পটিপদায সাধেতব্বতো পুগ্গলপুব্বঙ্গমায দেসনায ভাৰেন্তেন সমযৰৰত্থানং কতং। পটিপদারহিতেসু কথন্তি আহ ‘‘কেসঞ্চী’’তিআদি। তত্থ কেসঞ্চীতি সমথভাৰনায কতাধিকারানং। তেসঞ্হি মগ্গাধিগমনতো পুব্বে অনধিগতজ্ঝানানং পটিসম্ভিদাদযো ৰিয মগ্গাধিগমেনেৰ তানি সমিজ্ঝন্তি।
Rūpūpapattijanakasabhāvo rūpabhavavipaccanasabhāvoti tassapi vipākadhammabhāve satipi sabbakusalākusalasādhāraṇaṃ vipākadhammabhāvasāmaññaṃ ‘‘vipākadhammabhāvo viyā’’ti udāharaṇabhāvena vuttaṃ. Sāmaññampi hi visesato bhinnaṃ katvā voharīyatīti. Sabbasamānoti rūpūpapattiyā nipphādakassa paccayantaravikalatādīhi anipphādakassa ca sabbassa yathādhigatassa jhānassa sādhāraṇo. Etena uttarapadāvadhāraṇassa pariggahitataṃ dasseti. ‘‘Ito añño maggo nāma natthī’’ti imināpi sajātiyā sādhāraṇo aññajātivinivattiyā anaññasādhāraṇo imassa jhānassa rūpūpapattiyā upāyabhāvo vuttoti daṭṭhabbaṃ. Itare dve saddhā hirī ca. Yadi paṭipadāya sādhetabbato puggalapubbaṅgamāya desanāya bhāventena samayavavatthānaṃ kataṃ. Paṭipadārahitesu kathanti āha ‘‘kesañcī’’tiādi. Tattha kesañcīti samathabhāvanāya katādhikārānaṃ. Tesañhi maggādhigamanato pubbe anadhigatajjhānānaṃ paṭisambhidādayo viya maggādhigameneva tāni samijjhanti.
অঞ্ঞানীতি অরিযমগ্গসিদ্ধিতো অঞ্ঞানি। তেসুপীতি অরিযমগ্গেন সিদ্ধত্তা পটিপদারহিতেসুপি। ননু চ অরিযমগ্গসিদ্ধস্সপি আগমনৰসেন পটিপদা উপলব্ভতিযেৰ। ইতরথা ‘‘ন কামাৰচরং ৰিয ৰিনা পটিপদায উপ্পজ্জতী’’তি , ‘‘বহুতরং লোকিযজ্ঝানম্পি ন ৰিনা পটিপদায ইজ্ঝতী’’তি চ ৰচনং ৰিরুজ্ঝেয্যাতি? ন, যেভুয্যেন গহণতো পুগ্গলৰিসেসাপেক্খত্তা চ। অরিযমগ্গসমিজ্ঝনকঞ্হি ঝানং কস্সচিদেৰ হোতি, তস্মা ইতরং বহুতরং লোকিযজ্ঝানং পুথুজ্জনস্স অরিযস্স চ অকতাধিকারস্স ন ৰিনা পটিপদায সিজ্ঝতীতি তেসং ৰসেন ৰুত্তং। অরিযমগ্গসিদ্ধস্সপি ঝানস্স ৰিপাকানং ৰিয কুসলেন অরিযমগ্গেন সদিসত্তাভাৰতো অতব্বিপাকত্তা চ ন মগ্গাগমনৰসেন পটিপদা যুজ্জতি, এৰমস্স পটিপদাৰিরহো সিদ্ধো। এৰঞ্চ কত্ৰা সুদ্ধিকনৰকদেসনাপি সুট্ঠু নীতা হোতি। তথা চ ৰক্খতি লোকুত্তরকথাযং ‘‘লোকিযজ্ঝানম্পী’’তিআদি (ধ॰ স॰ মূলটী॰ ২৭৭)।
Aññānīti ariyamaggasiddhito aññāni. Tesupīti ariyamaggena siddhattā paṭipadārahitesupi. Nanu ca ariyamaggasiddhassapi āgamanavasena paṭipadā upalabbhatiyeva. Itarathā ‘‘na kāmāvacaraṃ viya vinā paṭipadāya uppajjatī’’ti , ‘‘bahutaraṃ lokiyajjhānampi na vinā paṭipadāya ijjhatī’’ti ca vacanaṃ virujjheyyāti? Na, yebhuyyena gahaṇato puggalavisesāpekkhattā ca. Ariyamaggasamijjhanakañhi jhānaṃ kassacideva hoti, tasmā itaraṃ bahutaraṃ lokiyajjhānaṃ puthujjanassa ariyassa ca akatādhikārassa na vinā paṭipadāya sijjhatīti tesaṃ vasena vuttaṃ. Ariyamaggasiddhassapi jhānassa vipākānaṃ viya kusalena ariyamaggena sadisattābhāvato atabbipākattā ca na maggāgamanavasena paṭipadā yujjati, evamassa paṭipadāviraho siddho. Evañca katvā suddhikanavakadesanāpi suṭṭhu nītā hoti. Tathā ca vakkhati lokuttarakathāyaṃ ‘‘lokiyajjhānampī’’tiādi (dha. sa. mūlaṭī. 277).
ৰট্টাসযস্স ৰিসেসপচ্চযভূতায তণ্হায তনুকরণৰসেন ৰিৰট্টাসযস্স ৰড্ঢনন্তি আহ ‘‘তণ্হাসংকিলেসসোধনেন আসযপোসন’’ন্তি। আসযপোসনন্তি চ ঝানভাৰনায পচ্চযভূতা পুব্বযোগাদিৰসেন সিদ্ধা অজ্ঝাসযসম্পদা। সা পন তণ্হুপতাপৰিগমেন হোতীতি আহ ‘‘তণ্হাসংকিলেসসোধনেনা’’তি।
Vaṭṭāsayassa visesapaccayabhūtāya taṇhāya tanukaraṇavasena vivaṭṭāsayassa vaḍḍhananti āha ‘‘taṇhāsaṃkilesasodhanena āsayaposana’’nti. Āsayaposananti ca jhānabhāvanāya paccayabhūtā pubbayogādivasena siddhā ajjhāsayasampadā. Sā pana taṇhupatāpavigamena hotīti āha ‘‘taṇhāsaṃkilesasodhanenā’’ti.
থিনমিদ্ধাদীনন্তি থিনমিদ্ধউদ্ধচ্চকুক্কুচ্চৰিচিকিচ্ছানং। পহানন্তি পহাযকং।
Thinamiddhādīnanti thinamiddhauddhaccakukkuccavicikicchānaṃ. Pahānanti pahāyakaṃ.
তংসদিসেসূতি মহগ্গতভাৰাদিনা পঠমজ্ঝানসমাধিসদিসেসু।
Taṃsadisesūti mahaggatabhāvādinā paṭhamajjhānasamādhisadisesu.
পীতিসুখৰন্তং ঝানং পীতিসুখন্তি ৰুত্তং যথা অরিসসোতি দস্সেন্তো ‘‘পীতিসুখ…পে॰… অকারো ৰুত্তো’’তি আহ। মগ্গস্সপি ৰা নিব্বানারম্মণতো তথলক্খণূপনিজ্ঝানতা যোজেতব্বা। অসম্মোসধম্মন্তি অৰিনাসভাৰং।
Pītisukhavantaṃ jhānaṃ pītisukhanti vuttaṃ yathā arisasoti dassento ‘‘pītisukha…pe… akāro vutto’’ti āha. Maggassapi vā nibbānārammaṇato tathalakkhaṇūpanijjhānatā yojetabbā. Asammosadhammanti avināsabhāvaṃ.
Related texts:
তিপিটক (মূল) • Tipiṭaka (Mūla) / অভিধম্মপিটক • Abhidhammapiṭaka / ধম্মসঙ্গণীপাল়ি • Dhammasaṅgaṇīpāḷi / রূপাৰচরকুসলং • Rūpāvacarakusalaṃ
অট্ঠকথা • Aṭṭhakathā / অভিধম্মপিটক (অট্ঠকথা) • Abhidhammapiṭaka (aṭṭhakathā) / ধম্মসঙ্গণি-অট্ঠকথা • Dhammasaṅgaṇi-aṭṭhakathā / চতুক্কনযো পঠমজ্ঝানং • Catukkanayo paṭhamajjhānaṃ
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / ধম্মসঙ্গণী-মূলটীকা • Dhammasaṅgaṇī-mūlaṭīkā / পঠমজ্ঝানকথাৰণ্ণনা • Paṭhamajjhānakathāvaṇṇanā
