| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
5. பட²மகாமபூ⁴ஸுத்தங்
5. Paṭhamakāmabhūsuttaṃ
347. ஏகங் ஸமயங் ஆயஸ்மா காமபூ⁴ மச்சி²காஸண்டே³ விஹரதி அம்பா³டகவனே. அத² கோ² சித்தோ க³ஹபதி யேனாயஸ்மா காமபூ⁴ தேனுபஸங்கமி; உபஸங்கமித்வா ஆயஸ்மந்தங் காமபு⁴ங் அபி⁴வாதெ³த்வா ஏகமந்தங் நிஸீதி³ . ஏகமந்தங் நிஸின்னங் கோ² சித்தங் க³ஹபதிங் ஆயஸ்மா காமபூ⁴ ஏதத³வோச –
347. Ekaṃ samayaṃ āyasmā kāmabhū macchikāsaṇḍe viharati ambāṭakavane. Atha kho citto gahapati yenāyasmā kāmabhū tenupasaṅkami; upasaṅkamitvā āyasmantaṃ kāmabhuṃ abhivādetvā ekamantaṃ nisīdi . Ekamantaṃ nisinnaṃ kho cittaṃ gahapatiṃ āyasmā kāmabhū etadavoca –
‘‘வுத்தமித³ங் , க³ஹபதி –
‘‘Vuttamidaṃ , gahapati –
‘‘நேலங்கோ³ ஸேதபச்சா²தோ³, ஏகாரோ வத்ததீ ரதோ²;
‘‘Nelaṅgo setapacchādo, ekāro vattatī ratho;
அனீக⁴ங் பஸ்ஸ ஆயந்தங் 1, சி²ன்னஸோதங் அப³ந்த⁴ன’’ந்தி.
Anīghaṃ passa āyantaṃ 2, chinnasotaṃ abandhana’’nti.
‘‘இமஸ்ஸ நு கோ², க³ஹபதி, ஸங்கி²த்தேன பா⁴ஸிதஸ்ஸ கத²ங் வித்தா²ரேன அத்தோ² த³ட்ட²ப்³போ³’’தி? ‘‘கிங் நு கோ² ஏதங், ப⁴ந்தே, ப⁴க³வதா பா⁴ஸித’’ந்தி? ‘‘ஏவங், க³ஹபதீ’’தி. ‘‘தேன ஹி, ப⁴ந்தே, முஹுத்தங் ஆக³மேஹி யாவஸ்ஸ அத்த²ங் பெக்கா²மீ’’தி. அத² கோ² சித்தோ க³ஹபதி முஹுத்தங் துண்ஹீ ஹுத்வா ஆயஸ்மந்தங் காமபு⁴ங் ஏதத³வோச –
‘‘Imassa nu kho, gahapati, saṃkhittena bhāsitassa kathaṃ vitthārena attho daṭṭhabbo’’ti? ‘‘Kiṃ nu kho etaṃ, bhante, bhagavatā bhāsita’’nti? ‘‘Evaṃ, gahapatī’’ti. ‘‘Tena hi, bhante, muhuttaṃ āgamehi yāvassa atthaṃ pekkhāmī’’ti. Atha kho citto gahapati muhuttaṃ tuṇhī hutvā āyasmantaṃ kāmabhuṃ etadavoca –
‘‘‘நேலங்க³’ந்தி கோ², ப⁴ந்தே, ஸீலானமேதங் அதி⁴வசனங். ‘ஸேதபச்சா²தோ³’தி கோ², ப⁴ந்தே, விமுத்தியா ஏதங் அதி⁴வசனங். ‘ஏகாரோ’தி கோ², ப⁴ந்தே, ஸதியா ஏதங் அதி⁴வசனங். ‘வத்ததீ’தி கோ², ப⁴ந்தே, அபி⁴க்கமபடிக்கமஸ்ஸேதங் அதி⁴வசனங். ‘ரதோ²’தி கோ², ப⁴ந்தே, இமஸ்ஸேதங் சாதுமஹாபூ⁴திகஸ்ஸ காயஸ்ஸ அதி⁴வசனங் மாதாபெத்திகஸம்ப⁴வஸ்ஸ ஓத³னகும்மாஸூபசயஸ்ஸ அனிச்சுச்சா²த³னபரிமத்³த³னபே⁴த³னவித்³த⁴ங்ஸனத⁴ம்மஸ்ஸ. ராகோ³ கோ², ப⁴ந்தே, நீகோ⁴, தோ³ஸோ நீகோ⁴, மோஹோ நீகோ⁴. தே கீ²ணாஸவஸ்ஸ பி⁴க்கு²னோ பஹீனா உச்சி²ன்னமூலா தாலாவத்து²கதா அனபா⁴வங்கதா ஆயதிங் அனுப்பாத³த⁴ம்மா. தஸ்மா கீ²ணாஸவோ பி⁴க்கு² ‘அனீகோ⁴’தி வுச்சதி. ‘ஆயந்த’ந்தி கோ², ப⁴ந்தே, அரஹதோ ஏதங் அதி⁴வசனங். ‘ஸோதோ’தி கோ², ப⁴ந்தே, தண்ஹாயேதங் அதி⁴வசனங். ஸா கீ²ணாஸவஸ்ஸ பி⁴க்கு²னோ பஹீனா உச்சி²ன்னமூலா தாலாவத்து²கதா அனபா⁴வங்கதா ஆயதிங் அனுப்பாத³த⁴ம்மா. தஸ்மா கீ²ணாஸவோ பி⁴க்கு² ‘சி²ன்னஸோதோ’தி வுச்சதி. ராகோ³ கோ², ப⁴ந்தே, ப³ந்த⁴னங், தோ³ஸோ ப³ந்த⁴னங், மோஹோ ப³ந்த⁴னங். தே கீ²ணாஸவஸ்ஸ பி⁴க்கு²னோ பஹீனா உச்சி²ன்னமூலா தாலாவத்து²கதா அனபா⁴வங்கதா ஆயதிங் அனுப்பாத³த⁴ம்மா. தஸ்மா கீ²ணாஸவோ பி⁴க்கு² ‘அப³ந்த⁴னோ’தி வுச்சதி. இதி கோ², ப⁴ந்தே, யங் தங் ப⁴க³வதா வுத்தங் –
‘‘‘Nelaṅga’nti kho, bhante, sīlānametaṃ adhivacanaṃ. ‘Setapacchādo’ti kho, bhante, vimuttiyā etaṃ adhivacanaṃ. ‘Ekāro’ti kho, bhante, satiyā etaṃ adhivacanaṃ. ‘Vattatī’ti kho, bhante, abhikkamapaṭikkamassetaṃ adhivacanaṃ. ‘Ratho’ti kho, bhante, imassetaṃ cātumahābhūtikassa kāyassa adhivacanaṃ mātāpettikasambhavassa odanakummāsūpacayassa aniccucchādanaparimaddanabhedanaviddhaṃsanadhammassa. Rāgo kho, bhante, nīgho, doso nīgho, moho nīgho. Te khīṇāsavassa bhikkhuno pahīnā ucchinnamūlā tālāvatthukatā anabhāvaṅkatā āyatiṃ anuppādadhammā. Tasmā khīṇāsavo bhikkhu ‘anīgho’ti vuccati. ‘Āyanta’nti kho, bhante, arahato etaṃ adhivacanaṃ. ‘Soto’ti kho, bhante, taṇhāyetaṃ adhivacanaṃ. Sā khīṇāsavassa bhikkhuno pahīnā ucchinnamūlā tālāvatthukatā anabhāvaṅkatā āyatiṃ anuppādadhammā. Tasmā khīṇāsavo bhikkhu ‘chinnasoto’ti vuccati. Rāgo kho, bhante, bandhanaṃ, doso bandhanaṃ, moho bandhanaṃ. Te khīṇāsavassa bhikkhuno pahīnā ucchinnamūlā tālāvatthukatā anabhāvaṅkatā āyatiṃ anuppādadhammā. Tasmā khīṇāsavo bhikkhu ‘abandhano’ti vuccati. Iti kho, bhante, yaṃ taṃ bhagavatā vuttaṃ –
‘‘நேலங்கோ³ ஸேதபச்சா²தோ³, ஏகாரோ வத்ததீ ரதோ²;
‘‘Nelaṅgo setapacchādo, ekāro vattatī ratho;
அனீக⁴ங் பஸ்ஸ ஆயந்தங், சி²ன்னஸோதங் அப³ந்த⁴ன’’ந்தி.
Anīghaṃ passa āyantaṃ, chinnasotaṃ abandhana’’nti.
‘‘இமஸ்ஸ கோ², ப⁴ந்தே, ப⁴க³வதா ஸங்கி²த்தேன பா⁴ஸிதஸ்ஸ ஏவங் வித்தா²ரேன அத்த²ங் ஆஜானாமீ’’தி . ‘‘லாபா⁴ தே, க³ஹபதி, ஸுலத்³த⁴ங் தே, க³ஹபதி! யஸ்ஸ தே க³ம்பீ⁴ரே பு³த்³த⁴வசனே பஞ்ஞாசக்கு² கமதீ’’தி. பஞ்சமங்.
‘‘Imassa kho, bhante, bhagavatā saṃkhittena bhāsitassa evaṃ vitthārena atthaṃ ājānāmī’’ti . ‘‘Lābhā te, gahapati, suladdhaṃ te, gahapati! Yassa te gambhīre buddhavacane paññācakkhu kamatī’’ti. Pañcamaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 5. பட²மகாமபூ⁴ஸுத்தவண்ணனா • 5. Paṭhamakāmabhūsuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 5. பட²மகாமபூ⁴ஸுத்தவண்ணனா • 5. Paṭhamakāmabhūsuttavaṇṇanā
