| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
৫. পঠমকামভূসুত্তং
5. Paṭhamakāmabhūsuttaṃ
৩৪৭. একং সমযং আযস্মা কামভূ মচ্ছিকাসণ্ডে ৰিহরতি অম্বাটকৰনে। অথ খো চিত্তো গহপতি যেনাযস্মা কামভূ তেনুপসঙ্কমি; উপসঙ্কমিত্ৰা আযস্মন্তং কামভুং অভিৰাদেত্ৰা একমন্তং নিসীদি । একমন্তং নিসিন্নং খো চিত্তং গহপতিং আযস্মা কামভূ এতদৰোচ –
347. Ekaṃ samayaṃ āyasmā kāmabhū macchikāsaṇḍe viharati ambāṭakavane. Atha kho citto gahapati yenāyasmā kāmabhū tenupasaṅkami; upasaṅkamitvā āyasmantaṃ kāmabhuṃ abhivādetvā ekamantaṃ nisīdi . Ekamantaṃ nisinnaṃ kho cittaṃ gahapatiṃ āyasmā kāmabhū etadavoca –
‘‘ৰুত্তমিদং , গহপতি –
‘‘Vuttamidaṃ , gahapati –
‘‘নেলঙ্গো সেতপচ্ছাদো, একারো ৰত্ততী রথো।
‘‘Nelaṅgo setapacchādo, ekāro vattatī ratho;
‘‘ইমস্স নু খো, গহপতি, সংখিত্তেন ভাসিতস্স কথং ৰিত্থারেন অত্থো দট্ঠব্বো’’তি? ‘‘কিং নু খো এতং, ভন্তে, ভগৰতা ভাসিত’’ন্তি? ‘‘এৰং, গহপতী’’তি। ‘‘তেন হি, ভন্তে, মুহুত্তং আগমেহি যাৰস্স অত্থং পেক্খামী’’তি। অথ খো চিত্তো গহপতি মুহুত্তং তুণ্হী হুত্ৰা আযস্মন্তং কামভুং এতদৰোচ –
‘‘Imassa nu kho, gahapati, saṃkhittena bhāsitassa kathaṃ vitthārena attho daṭṭhabbo’’ti? ‘‘Kiṃ nu kho etaṃ, bhante, bhagavatā bhāsita’’nti? ‘‘Evaṃ, gahapatī’’ti. ‘‘Tena hi, bhante, muhuttaṃ āgamehi yāvassa atthaṃ pekkhāmī’’ti. Atha kho citto gahapati muhuttaṃ tuṇhī hutvā āyasmantaṃ kāmabhuṃ etadavoca –
‘‘‘নেলঙ্গ’ন্তি খো, ভন্তে, সীলানমেতং অধিৰচনং। ‘সেতপচ্ছাদো’তি খো, ভন্তে, ৰিমুত্তিযা এতং অধিৰচনং। ‘একারো’তি খো, ভন্তে, সতিযা এতং অধিৰচনং। ‘ৰত্ততী’তি খো, ভন্তে, অভিক্কমপটিক্কমস্সেতং অধিৰচনং। ‘রথো’তি খো, ভন্তে, ইমস্সেতং চাতুমহাভূতিকস্স কাযস্স অধিৰচনং মাতাপেত্তিকসম্ভৰস্স ওদনকুম্মাসূপচযস্স অনিচ্চুচ্ছাদনপরিমদ্দনভেদনৰিদ্ধংসনধম্মস্স। রাগো খো, ভন্তে, নীঘো, দোসো নীঘো, মোহো নীঘো। তে খীণাসৰস্স ভিক্খুনো পহীনা উচ্ছিন্নমূলা তালাৰত্থুকতা অনভাৰঙ্কতা আযতিং অনুপ্পাদধম্মা। তস্মা খীণাসৰো ভিক্খু ‘অনীঘো’তি ৰুচ্চতি। ‘আযন্ত’ন্তি খো, ভন্তে, অরহতো এতং অধিৰচনং। ‘সোতো’তি খো, ভন্তে, তণ্হাযেতং অধিৰচনং। সা খীণাসৰস্স ভিক্খুনো পহীনা উচ্ছিন্নমূলা তালাৰত্থুকতা অনভাৰঙ্কতা আযতিং অনুপ্পাদধম্মা। তস্মা খীণাসৰো ভিক্খু ‘ছিন্নসোতো’তি ৰুচ্চতি। রাগো খো, ভন্তে, বন্ধনং, দোসো বন্ধনং, মোহো বন্ধনং। তে খীণাসৰস্স ভিক্খুনো পহীনা উচ্ছিন্নমূলা তালাৰত্থুকতা অনভাৰঙ্কতা আযতিং অনুপ্পাদধম্মা। তস্মা খীণাসৰো ভিক্খু ‘অবন্ধনো’তি ৰুচ্চতি। ইতি খো, ভন্তে, যং তং ভগৰতা ৰুত্তং –
‘‘‘Nelaṅga’nti kho, bhante, sīlānametaṃ adhivacanaṃ. ‘Setapacchādo’ti kho, bhante, vimuttiyā etaṃ adhivacanaṃ. ‘Ekāro’ti kho, bhante, satiyā etaṃ adhivacanaṃ. ‘Vattatī’ti kho, bhante, abhikkamapaṭikkamassetaṃ adhivacanaṃ. ‘Ratho’ti kho, bhante, imassetaṃ cātumahābhūtikassa kāyassa adhivacanaṃ mātāpettikasambhavassa odanakummāsūpacayassa aniccucchādanaparimaddanabhedanaviddhaṃsanadhammassa. Rāgo kho, bhante, nīgho, doso nīgho, moho nīgho. Te khīṇāsavassa bhikkhuno pahīnā ucchinnamūlā tālāvatthukatā anabhāvaṅkatā āyatiṃ anuppādadhammā. Tasmā khīṇāsavo bhikkhu ‘anīgho’ti vuccati. ‘Āyanta’nti kho, bhante, arahato etaṃ adhivacanaṃ. ‘Soto’ti kho, bhante, taṇhāyetaṃ adhivacanaṃ. Sā khīṇāsavassa bhikkhuno pahīnā ucchinnamūlā tālāvatthukatā anabhāvaṅkatā āyatiṃ anuppādadhammā. Tasmā khīṇāsavo bhikkhu ‘chinnasoto’ti vuccati. Rāgo kho, bhante, bandhanaṃ, doso bandhanaṃ, moho bandhanaṃ. Te khīṇāsavassa bhikkhuno pahīnā ucchinnamūlā tālāvatthukatā anabhāvaṅkatā āyatiṃ anuppādadhammā. Tasmā khīṇāsavo bhikkhu ‘abandhano’ti vuccati. Iti kho, bhante, yaṃ taṃ bhagavatā vuttaṃ –
‘‘নেলঙ্গো সেতপচ্ছাদো, একারো ৰত্ততী রথো।
‘‘Nelaṅgo setapacchādo, ekāro vattatī ratho;
অনীঘং পস্স আযন্তং, ছিন্নসোতং অবন্ধন’’ন্তি॥
Anīghaṃ passa āyantaṃ, chinnasotaṃ abandhana’’nti.
‘‘ইমস্স খো, ভন্তে, ভগৰতা সংখিত্তেন ভাসিতস্স এৰং ৰিত্থারেন অত্থং আজানামী’’তি । ‘‘লাভা তে, গহপতি, সুলদ্ধং তে, গহপতি! যস্স তে গম্ভীরে বুদ্ধৰচনে পঞ্ঞাচক্খু কমতী’’তি। পঞ্চমং।
‘‘Imassa kho, bhante, bhagavatā saṃkhittena bhāsitassa evaṃ vitthārena atthaṃ ājānāmī’’ti . ‘‘Lābhā te, gahapati, suladdhaṃ te, gahapati! Yassa te gambhīre buddhavacane paññācakkhu kamatī’’ti. Pañcamaṃ.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৫. পঠমকামভূসুত্তৰণ্ণনা • 5. Paṭhamakāmabhūsuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ৫. পঠমকামভূসুত্তৰণ্ণনা • 5. Paṭhamakāmabhūsuttavaṇṇanā
