| Library / Tipiṭaka / තිපිටක • Tipiṭaka / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) |
5. පඨමකාමභූසුත්‌තවණ්‌ණනා
5. Paṭhamakāmabhūsuttavaṇṇanā
347. පඤ්‌චමෙ නෙලඞ්‌ගොති නිද්‌දොසො. සෙතපච්‌ඡාදොති සෙතපටිච්‌ඡාදනො. අනීඝන්‌ති නිද්‌දුක්‌ඛං. මුහුත්‌තං තුණ්‌හී හුත්‌වාති තස්‌ස අත්‌ථපෙක්‌ඛනත්‌ථං තීණි පිටකානි කණ්‌ණෙ කුණ්‌ඩලං විය සඤ්‌චාලෙන්‌තො ‘‘අයං ඉමස්‌ස අත්‌ථො, අයං ඉමස්‌ස අත්‌ථො’’ති උපපරික්‌ඛණත්‌ථං මුහුත්‌තං තුණ්‌හී හුත්‌වා. විමුත්‌තියාති අරහත්‌තඵලවිමුත්‌තියා. ඉමං පන පඤ්‌හං කථෙන්‌තො උපාසකො දුක්‌කරං අකාසි. සම්‌මාසම්‌බුද්‌ධො හි ‘‘පස්‌සථ නො තුම්‌හෙ, භික්‌ඛවෙ, එතං භික්‌ඛුං ආගච්‌ඡන්‌තං ඔදාතකං තනුකං තුඞ්‌ගනාසික’’න්‌ති (සං. නි. 2.245) අත්‌තනො දිට්‌ඨෙන කථෙසි. අයං පන නයග්‌ගාහෙන ‘‘අරහතො එතං අධිවචන’’න්‌ති ආහ.
347. Pañcame nelaṅgoti niddoso. Setapacchādoti setapaṭicchādano. Anīghanti niddukkhaṃ. Muhuttaṃ tuṇhī hutvāti tassa atthapekkhanatthaṃ tīṇi piṭakāni kaṇṇe kuṇḍalaṃ viya sañcālento ‘‘ayaṃ imassa attho, ayaṃ imassa attho’’ti upaparikkhaṇatthaṃ muhuttaṃ tuṇhī hutvā. Vimuttiyāti arahattaphalavimuttiyā. Imaṃ pana pañhaṃ kathento upāsako dukkaraṃ akāsi. Sammāsambuddho hi ‘‘passatha no tumhe, bhikkhave, etaṃ bhikkhuṃ āgacchantaṃ odātakaṃ tanukaṃ tuṅganāsika’’nti (saṃ. ni. 2.245) attano diṭṭhena kathesi. Ayaṃ pana nayaggāhena ‘‘arahato etaṃ adhivacana’’nti āha.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / සංයුත්‌තනිකාය • Saṃyuttanikāya / 5. පඨමකාමභූසුත්‌තං • 5. Paṭhamakāmabhūsuttaṃ
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 5. පඨමකාමභූසුත්‌තවණ්‌ණනා • 5. Paṭhamakāmabhūsuttavaṇṇanā
