| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
4. பட²மகண்ட³கீஸுத்தங்
4. Paṭhamakaṇḍakīsuttaṃ
902. ஏகங் ஸமயங் ஆயஸ்மா ச அனுருத்³தோ⁴ ஆயஸ்மா ச ஸாரிபுத்தோ ஆயஸ்மா ச மஹாமொக்³க³ல்லானோ ஸாகேதே விஹரந்தி கண்ட³கீவனே . அத² கோ² ஆயஸ்மா ச ஸாரிபுத்தோ ஆயஸ்மா ச மஹாமொக்³க³ல்லானோ ஸாயன்ஹஸமயங் படிஸல்லானா வுட்டி²தா யேனாயஸ்மா அனுருத்³தோ⁴ தேனுபஸங்கமிங்ஸு; உபஸங்கமித்வா ஆயஸ்மதா அனுருத்³தே⁴ன ஸத்³தி⁴ங் ஸம்மோதி³ங்ஸு. ஸம்மோத³னீயங் கத²ங் ஸாரணீயங் வீதிஸாரெத்வா ஏகமந்தங் நிஸீதி³ங்ஸு. ஏகமந்தங் நிஸின்னோ கோ² ஆயஸ்மா ஸாரிபுத்தோ ஆயஸ்மந்தங் அனுருத்³த⁴ங் ஏதத³வோச – ‘‘ஸேகே²னாவுஸோ அனுருத்³த⁴, பி⁴க்கு²னா கதமே த⁴ம்மா உபஸம்பஜ்ஜ விஹாதப்³பா³’’தி?
902. Ekaṃ samayaṃ āyasmā ca anuruddho āyasmā ca sāriputto āyasmā ca mahāmoggallāno sākete viharanti kaṇḍakīvane . Atha kho āyasmā ca sāriputto āyasmā ca mahāmoggallāno sāyanhasamayaṃ paṭisallānā vuṭṭhitā yenāyasmā anuruddho tenupasaṅkamiṃsu; upasaṅkamitvā āyasmatā anuruddhena saddhiṃ sammodiṃsu. Sammodanīyaṃ kathaṃ sāraṇīyaṃ vītisāretvā ekamantaṃ nisīdiṃsu. Ekamantaṃ nisinno kho āyasmā sāriputto āyasmantaṃ anuruddhaṃ etadavoca – ‘‘sekhenāvuso anuruddha, bhikkhunā katame dhammā upasampajja vihātabbā’’ti?
‘‘ஸேகே²னாவுஸோ ஸாரிபுத்த, பி⁴க்கு²னா சத்தாரோ ஸதிபட்டா²னா உபஸம்பஜ்ஜ விஹாதப்³பா³. கதமே சத்தாரோ? இதா⁴வுஸோ, பி⁴க்கு² காயே காயானுபஸ்ஸீ விஹரதி ஆதாபீ ஸம்பஜானோ ஸதிமா, வினெய்ய லோகே அபி⁴ஜ்ஜா²தோ³மனஸ்ஸங்; வேத³னாஸு …பே॰… சித்தே…பே॰… த⁴ம்மேஸு த⁴ம்மானுபஸ்ஸீ விஹரதி ஆதாபீ ஸம்பஜானோ ஸதிமா, வினெய்ய லோகே அபி⁴ஜ்ஜா²தோ³மனஸ்ஸங் – ஸேகே²னாவுஸோ ஸாரிபுத்த, பி⁴க்கு²னா இமே சத்தாரோ ஸதிபட்டா²னா உபஸம்பஜ்ஜ விஹாதப்³பா³’’தி. சதுத்த²ங்.
‘‘Sekhenāvuso sāriputta, bhikkhunā cattāro satipaṭṭhānā upasampajja vihātabbā. Katame cattāro? Idhāvuso, bhikkhu kāye kāyānupassī viharati ātāpī sampajāno satimā, vineyya loke abhijjhādomanassaṃ; vedanāsu …pe… citte…pe… dhammesu dhammānupassī viharati ātāpī sampajāno satimā, vineyya loke abhijjhādomanassaṃ – sekhenāvuso sāriputta, bhikkhunā ime cattāro satipaṭṭhānā upasampajja vihātabbā’’ti. Catutthaṃ.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 4-7. பட²மகண்ட³கீஸுத்தாதி³வண்ணனா • 4-7. Paṭhamakaṇḍakīsuttādivaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 4-7. பட²மகண்ட³கீஸுத்தாதி³வண்ணனா • 4-7. Paṭhamakaṇḍakīsuttādivaṇṇanā
