| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
9-10. பட²மகதா²வத்து²ஸுத்தாதி³வண்ணனா
9-10. Paṭhamakathāvatthusuttādivaṇṇanā
69-70. நவமே (தீ³॰ நி॰ டீ॰ 1.17; தீ³॰ நி॰ அபி⁴॰ டீ॰ 1.17; ஸங்॰ நி॰ டீ॰ 2.5.1080) து³க்³க³திதோ ஸங்ஸாரதோ ச நிய்யாதி ஏதேனாதி நிய்யானங், ஸக்³க³மக்³கோ³, மொக்க²மக்³கோ³ ச. தங் நிய்யானங் அரஹதி, நிய்யானே வா நியுத்தா, நிய்யானங் வா ப²லபூ⁴தங் ஏதிஸ்ஸா அத்தீ²தி நிய்யானிகா. வசீது³ச்சரிதஸங்கிலேஸதோ நிய்யாதீதி வா ஈகாரஸ்ஸ ரஸ்ஸத்தங், யகாரஸ்ஸ ச ககாரங் கத்வா நிய்யானிகா, சேதனாய ஸத்³தி⁴ங் ஸம்ப²ப்பலாபா வேரமணி. தப்படிபக்க²தோ அனிய்யானிகா, தஸ்ஸா பா⁴வோ அனிய்யானிகத்தங், தஸ்மா அனிய்யானிகத்தா. திரச்சா²னபூ⁴தந்தி திரோகரணபூ⁴தங். கே³ஹஸ்ஸிதகதா²தி கே³ஹப்படிஸங்யுத்தா. கம்மட்டா²னபா⁴வேதி அனிச்சதாபடிஸங்யுத்தசதுஸச்சகம்மட்டா²னபா⁴வே.
69-70. Navame (dī. ni. ṭī. 1.17; dī. ni. abhi. ṭī. 1.17; saṃ. ni. ṭī. 2.5.1080) duggatito saṃsārato ca niyyāti etenāti niyyānaṃ, saggamaggo, mokkhamaggo ca. Taṃ niyyānaṃ arahati, niyyāne vā niyuttā, niyyānaṃ vā phalabhūtaṃ etissā atthīti niyyānikā. Vacīduccaritasaṃkilesato niyyātīti vā īkārassa rassattaṃ, yakārassa ca kakāraṃ katvā niyyānikā, cetanāya saddhiṃ samphappalāpā veramaṇi. Tappaṭipakkhato aniyyānikā, tassā bhāvo aniyyānikattaṃ, tasmā aniyyānikattā. Tiracchānabhūtanti tirokaraṇabhūtaṃ. Gehassitakathāti gehappaṭisaṃyuttā. Kammaṭṭhānabhāveti aniccatāpaṭisaṃyuttacatusaccakammaṭṭhānabhāve.
ஸஹ அத்தே²னாதி ஸாத்த²கங், ஹிதப்படிஸங்யுத்தந்தி அத்தோ². ‘‘ஸுராகதா²’’திபி பாடோ²தி ஆஹ ‘‘ஸுராகத²ந்தி பாளியங் பனா’’தி. ஸா பனேஸா கதா² ‘‘ஏவரூபா நவஸுரா பீதா ரதிஜனநீ ஹோதீ’’தி அஸ்ஸாத³வஸேன ந வட்டதி, ஆதீ³னவவஸேன பன ‘‘உம்மத்தகஸங்வத்தனிகா’’திஆதி³னா நயேன வட்டதி. தேனாஹ ‘‘அனேகவித⁴ங்…பே॰… ஆதீ³னவவஸேன வட்டதீ’’தி. விஸிகா²தி க⁴ரஸன்னிவேஸோ. விஸிகா²க³ஹணேன ச தன்னிவாஸினோ க³ஹிதா ‘‘கா³மோ ஆக³தோ’’திஆதீ³ஸு விய. தேனேவாஹ ‘‘ஸூரா ஸமத்தா²’’தி ச ‘‘ஸத்³தா⁴ பஸன்னா’’தி ச. கும்ப⁴ட்டா²னப்பதே³ஸேன கும்ப⁴தா³ஸியோ வுத்தாதி ஆஹ ‘‘கும்ப⁴தா³ஸிகதா² வா’’தி.
Saha atthenāti sātthakaṃ, hitappaṭisaṃyuttanti attho. ‘‘Surākathā’’tipi pāṭhoti āha ‘‘surākathanti pāḷiyaṃ panā’’ti. Sā panesā kathā ‘‘evarūpā navasurā pītā ratijananī hotī’’ti assādavasena na vaṭṭati, ādīnavavasena pana ‘‘ummattakasaṃvattanikā’’tiādinā nayena vaṭṭati. Tenāha ‘‘anekavidhaṃ…pe… ādīnavavasena vaṭṭatī’’ti. Visikhāti gharasanniveso. Visikhāgahaṇena ca tannivāsino gahitā ‘‘gāmo āgato’’tiādīsu viya. Tenevāha ‘‘sūrā samatthā’’ti ca ‘‘saddhā pasannā’’ti ca. Kumbhaṭṭhānappadesena kumbhadāsiyo vuttāti āha ‘‘kumbhadāsikathā vā’’ti.
ராஜகதா²தி³புரிமகதா²ய , லோகக்கா²யிகாதி³பச்சி²மகதா²ய வா வினிமுத்தா புரிமபச்சி²மகதா² விமுத்தா. உப்பத்திடி²திஸங்ஹாராதி³வஸேன லோகங் அக்கா²யதீதி லோகக்கா²யிகா. அஸுகேன நாமாதி பஜாபதினா ப்³ரஹ்முனா, இஸ்ஸரேன வா. விதண்ட³ஸல்லாபகதா²தி ‘‘அட்டீ²னங் ஸேதத்தா ஸேதோதி ந வத்தப்³போ³, பத்தானங் காளத்தா காளோதி பன வத்தப்³போ³’’தி ஏவமாதி³கா. ஆதி³-ஸத்³தே³ன ‘‘ஸேலபுப்ப²லகானி விய ஜீவிதா³விரபாரயத்திவிஸாலா நத்தி², யங் யோ கோசி திரியாமானா கதத்தா’’தி ஏவமாதீ³னங் ஸங்க³ஹோ த³ட்ட²ப்³போ³. ஸாக³ரதே³வேனாதி ஸாக³ரபுத்தராஜூஹி. க²தோதி ஏதங் ஏகவசனங் தேஹி பச்சேகங் க²தத்தா ‘‘ஸாக³ரதே³வேன க²தத்தா’’தி வுத்தங். ஸஹமுத்³தா³ ஸமுத்³தோ³தி வுத்தோ. ப⁴வதி வத்³த⁴தி ஏதேனாதி ப⁴வோ. ப⁴வாப⁴வா ஹொந்தீதி இதிப⁴வாப⁴வகதா². எத்த² ச ப⁴வோதி ஸஸ்ஸதங், அப⁴வோதி உச்சே²த³ங். ப⁴வோதி வுத்³தி⁴, அப⁴வோதி ஹானி. ப⁴வோதி காமஸுக²ங், அப⁴வோதி அத்தகிலமதோ²தி இதி இமாய ச²ப்³பி³தா⁴ய இதிப⁴வாப⁴வகதா²ய ஸத்³தி⁴ங் பா³த்திங்ஸ திரச்சா²னகதா² நாம ஹொந்தி. அத² வா பாளியங் ஸரூபதோ அனாக³தாபி அரஞ்ஞபப்³ப³தனதீ³தீ³பகதா² இதிஸத்³தே³ன ஸங்க³ண்ஹித்வா பா³த்திங்ஸ திரச்சா²னகதா² வுத்தா. த³ஸமே நத்தி² வத்தப்³ப³ங்.
Rājakathādipurimakathāya , lokakkhāyikādipacchimakathāya vā vinimuttā purimapacchimakathā vimuttā. Uppattiṭhitisaṃhārādivasena lokaṃ akkhāyatīti lokakkhāyikā. Asukena nāmāti pajāpatinā brahmunā, issarena vā. Vitaṇḍasallāpakathāti ‘‘aṭṭhīnaṃ setattā setoti na vattabbo, pattānaṃ kāḷattā kāḷoti pana vattabbo’’ti evamādikā. Ādi-saddena ‘‘selapupphalakāni viya jīvidāvirapārayattivisālā natthi, yaṃ yo koci tiriyāmānā katattā’’ti evamādīnaṃ saṅgaho daṭṭhabbo. Sāgaradevenāti sāgaraputtarājūhi. Khatoti etaṃ ekavacanaṃ tehi paccekaṃ khatattā ‘‘sāgaradevena khatattā’’ti vuttaṃ. Sahamuddā samuddoti vutto. Bhavati vaddhati etenāti bhavo. Bhavābhavā hontīti itibhavābhavakathā. Ettha ca bhavoti sassataṃ, abhavoti ucchedaṃ. Bhavoti vuddhi, abhavoti hāni. Bhavoti kāmasukhaṃ, abhavoti attakilamathoti iti imāya chabbidhāya itibhavābhavakathāya saddhiṃ bāttiṃsa tiracchānakathā nāma honti. Atha vā pāḷiyaṃ sarūpato anāgatāpi araññapabbatanadīdīpakathā itisaddena saṅgaṇhitvā bāttiṃsa tiracchānakathā vuttā. Dasame natthi vattabbaṃ.
பட²மகதா²வத்து²ஸுத்தாதி³வண்ணனா நிட்டி²தா.
Paṭhamakathāvatthusuttādivaṇṇanā niṭṭhitā.
யமகவக்³க³வண்ணனா நிட்டி²தா.
Yamakavaggavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya
9. பட²மகதா²வத்து²ஸுத்தங் • 9. Paṭhamakathāvatthusuttaṃ
10. து³தியகதா²வத்து²ஸுத்தங் • 10. Dutiyakathāvatthusuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 9-10. கதா²வத்து²ஸுத்தத்³வயவண்ணனா • 9-10. Kathāvatthusuttadvayavaṇṇanā
