| Library / Tipiṭaka / திபிடக • Tipiṭaka / மஹாவிப⁴ங்க³ • Mahāvibhaṅga |
4. நிஸ்ஸக்³கி³யகண்ட³ங்
4. Nissaggiyakaṇḍaṃ
1. சீவரவக்³கோ³
1. Cīvaravaggo
1. பட²மகதி²னஸிக்கா²பத³ங்
1. Paṭhamakathinasikkhāpadaṃ
இமே கோ² பனாயஸ்மந்தோ திங்ஸ நிஸ்ஸக்³கி³யா பாசித்தியா
Ime kho panāyasmanto tiṃsa nissaggiyā pācittiyā
த⁴ம்மா உத்³தே³ஸங் ஆக³ச்ச²ந்தி.
Dhammā uddesaṃ āgacchanti.
459. தேனே ஸமயேன பு³த்³தோ⁴ ப⁴க³வா வேஸாலியங் விஹரதி கோ³தமகே சேதியே. தேன கோ² பன ஸமயேன ப⁴க³வதா பி⁴க்கூ²னங் திசீவரங் அனுஞ்ஞாதங் ஹோதி. ச²ப்³ப³க்³கி³யா பி⁴க்கூ² – ‘‘ப⁴க³வதா திசீவரங் அனுஞ்ஞாத’’ந்தி அஞ்ஞேனேவ திசீவரேன கா³மங் பவிஸந்தி, அஞ்ஞேன திசீவரேன ஆராமே அச்ச²ந்தி, அஞ்ஞேன திசீவரேன நஹானங் ஓதரந்தி. யே தே பி⁴க்கூ² அப்பிச்சா²…பே॰… தே உஜ்ஜா²யந்தி கி²ய்யந்தி விபாசெந்தி – ‘‘கத²ஞ்ஹி நாம ச²ப்³ப³க்³கி³யா பி⁴க்கூ² அதிரேகசீவரங் தா⁴ரெஸ்ஸந்தீ’’தி! அத² கோ² தே பி⁴க்கூ² ச²ப்³ப³க்³கி³யே பி⁴க்கூ² அனேகபரியாயேன விக³ரஹித்வா ப⁴க³வதோ ஏதமத்த²ங் ஆரோசேஸுங்…பே॰… ‘‘ஸச்சங் கிர தும்ஹே, பி⁴க்க²வே, அதிரேகசீவரங் தா⁴ரேதா²’’தி ? ‘‘ஸச்சங் ப⁴க³வா’’தி. விக³ரஹி பு³த்³தோ⁴ ப⁴க³வா…பே॰… கத²ஞ்ஹி நாம தும்ஹே, மோக⁴புரிஸா, அதிரேகசீவரங் தா⁴ரெஸ்ஸத²! நேதங், மோக⁴புரிஸா, அப்பஸன்னானங் வா பஸாதா³ய…பே॰… ஏவஞ்ச பன, பி⁴க்க²வே, இமங் ஸிக்கா²பத³ங் உத்³தி³ஸெய்யாத² –
459. Tene samayena buddho bhagavā vesāliyaṃ viharati gotamake cetiye. Tena kho pana samayena bhagavatā bhikkhūnaṃ ticīvaraṃ anuññātaṃ hoti. Chabbaggiyā bhikkhū – ‘‘bhagavatā ticīvaraṃ anuññāta’’nti aññeneva ticīvarena gāmaṃ pavisanti, aññena ticīvarena ārāme acchanti, aññena ticīvarena nahānaṃ otaranti. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma chabbaggiyā bhikkhū atirekacīvaraṃ dhāressantī’’ti! Atha kho te bhikkhū chabbaggiye bhikkhū anekapariyāyena vigarahitvā bhagavato etamatthaṃ ārocesuṃ…pe… ‘‘saccaṃ kira tumhe, bhikkhave, atirekacīvaraṃ dhārethā’’ti ? ‘‘Saccaṃ bhagavā’’ti. Vigarahi buddho bhagavā…pe… kathañhi nāma tumhe, moghapurisā, atirekacīvaraṃ dhāressatha! Netaṃ, moghapurisā, appasannānaṃ vā pasādāya…pe… evañca pana, bhikkhave, imaṃ sikkhāpadaṃ uddiseyyātha –
460. ‘‘யோ பன பி⁴க்கு² அதிரேகசீவரங் தா⁴ரெய்ய, நிஸ்ஸக்³கி³யங் பாசித்திய’’ந்தி.
460.‘‘Yo pana bhikkhu atirekacīvaraṃ dhāreyya, nissaggiyaṃ pācittiya’’nti.
ஏவஞ்சித³ங் ப⁴க³வதா பி⁴க்கூ²னங் ஸிக்கா²பத³ங் பஞ்ஞத்தங் ஹோதி.
Evañcidaṃ bhagavatā bhikkhūnaṃ sikkhāpadaṃ paññattaṃ hoti.
461. 1 தேன கோ² பன ஸமயேன ஆயஸ்மதோ ஆனந்த³ஸ்ஸ அதிரேகசீவரங் உப்பன்னங் ஹோதி. ஆயஸ்மா ச ஆனந்தோ³ தங் சீவரங் ஆயஸ்மதோ ஸாரிபுத்தஸ்ஸ தா³துகாமோ ஹோதி. ஆயஸ்மா ச ஸாரிபுத்தோ ஸாகேதே விஹரதி. அத² கோ² ஆயஸ்மதோ ஆனந்த³ஸ்ஸ ஏதத³ஹோஸி – ‘‘ப⁴க³வதா ஸிக்கா²பத³ங் பஞ்ஞத்தங் – ‘ந அதிரேகசீவரங் தா⁴ரேதப்³ப³’ந்தி. இத³ஞ்ச மே அதிரேகசீவரங் உப்பன்னங். அஹஞ்சிமங் சீவரங் ஆயஸ்மதோ ஸாரிபுத்தஸ்ஸ தா³துகாமோ. ஆயஸ்மா ச ஸாரிபுத்தோ ஸாகேதே விஹரதி. கத²ங் நு கோ² மயா படிபஜ்ஜிதப்³ப³’’ந்தி? அத² கோ² ஆயஸ்மா ஆனந்தோ³ ப⁴க³வதோ ஏதமத்த²ங் ஆரோசேஸி. ‘‘கீவசிரங் பனானந்த³, ஸாரிபுத்தோ ஆக³ச்சி²ஸ்ஸதீ’’தி? ‘‘நவமங் வா, ப⁴க³வா, தி³வஸங் த³ஸமங் வா’’தி. அத² கோ² ப⁴க³வா ஏதஸ்மிங் நிதா³னே ஏதஸ்மிங் பகரணே த⁴ம்மிங் கத²ங் கத்வா பி⁴க்கூ² ஆமந்தேஸி – ‘‘அனுஜானாமி, பி⁴க்க²வே, த³ஸாஹபரமங் அதிரேகசீவரங் தா⁴ரேதுங். ஏவஞ்ச பன, பி⁴க்க²வே, இமங் ஸிக்கா²பத³ங் உத்³தி³ஸெய்யாத² –
461.2 Tena kho pana samayena āyasmato ānandassa atirekacīvaraṃ uppannaṃ hoti. Āyasmā ca ānando taṃ cīvaraṃ āyasmato sāriputtassa dātukāmo hoti. Āyasmā ca sāriputto sākete viharati. Atha kho āyasmato ānandassa etadahosi – ‘‘bhagavatā sikkhāpadaṃ paññattaṃ – ‘na atirekacīvaraṃ dhāretabba’nti. Idañca me atirekacīvaraṃ uppannaṃ. Ahañcimaṃ cīvaraṃ āyasmato sāriputtassa dātukāmo. Āyasmā ca sāriputto sākete viharati. Kathaṃ nu kho mayā paṭipajjitabba’’nti? Atha kho āyasmā ānando bhagavato etamatthaṃ ārocesi. ‘‘Kīvaciraṃ panānanda, sāriputto āgacchissatī’’ti? ‘‘Navamaṃ vā, bhagavā, divasaṃ dasamaṃ vā’’ti. Atha kho bhagavā etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi – ‘‘anujānāmi, bhikkhave, dasāhaparamaṃ atirekacīvaraṃ dhāretuṃ. Evañca pana, bhikkhave, imaṃ sikkhāpadaṃ uddiseyyātha –
462. ‘‘நிட்டி²தசீவரஸ்மிங் பி⁴க்கு²னா உப்³ப⁴தஸ்மிங் கதி²னே த³ஸாஹபரமங் அதிரேகசீவரங் தா⁴ரேதப்³ப³ங். தங் அதிக்காமயதோ நிஸ்ஸக்³கி³யங் பாசித்திய’’ந்தி.
462.‘‘Niṭṭhitacīvarasmiṃ bhikkhunā ubbhatasmiṃ kathine dasāhaparamaṃ atirekacīvaraṃ dhāretabbaṃ. Taṃ atikkāmayato nissaggiyaṃ pācittiya’’nti.
463. நிட்டி²தசீவரஸ்மிந்தி பி⁴க்கு²னோ சீவரங் கதங் வா ஹோதி நட்ட²ங் வா வினட்ட²ங் வா த³ட்³ட⁴ங் வா சீவராஸா வா உபச்சி²ன்னா.
463.Niṭṭhitacīvarasminti bhikkhuno cīvaraṃ kataṃ vā hoti naṭṭhaṃ vā vinaṭṭhaṃ vā daḍḍhaṃ vā cīvarāsā vā upacchinnā.
உப்³ப⁴தஸ்மிங் கதி²னேதி அட்ட²ன்னங் மாதிகானங் அஞ்ஞதராய மாதிகாய உப்³ப⁴தங் ஹோதி, ஸங்கே⁴ன வா அந்தரா உப்³ப⁴தங் ஹோதி.
Ubbhatasmiṃ kathineti aṭṭhannaṃ mātikānaṃ aññatarāya mātikāya ubbhataṃ hoti, saṅghena vā antarā ubbhataṃ hoti.
த³ஸாஹபரமந்தி த³ஸாஹபரமதா தா⁴ரேதப்³ப³ங்.
Dasāhaparamanti dasāhaparamatā dhāretabbaṃ.
அதிரேகசீவரங் நாம அனதி⁴ட்டி²தங் அவிகப்பிதங்.
Atirekacīvaraṃ nāma anadhiṭṭhitaṃ avikappitaṃ.
சீவரங் நாம ச²ன்னங் சீவரானங் அஞ்ஞதரங் சீவரங், விகப்பனுபக³ங் பச்சி²மங்.
Cīvaraṃ nāma channaṃ cīvarānaṃ aññataraṃ cīvaraṃ, vikappanupagaṃ pacchimaṃ.
தங் அதிக்காமயதோ நிஸ்ஸக்³கி³யங் ஹோதீ 3 தி ஏகாத³ஸே அருணுக்³க³மனே நிஸ்ஸக்³கி³யங் ஹோதி. நிஸ்ஸஜ்ஜிதப்³ப³ங் ஸங்க⁴ஸ்ஸ வா க³ணஸ்ஸ வா புக்³க³லஸ்ஸ வா. ஏவஞ்ச பன, பி⁴க்க²வே, நிஸ்ஸஜ்ஜிதப்³ப³ங். தேன பி⁴க்கு²னா ஸங்க⁴ங் உபஸங்கமித்வா ஏகங்ஸங் உத்தராஸங்க³ங் கரித்வா வுட்³டா⁴னங் பி⁴க்கூ²னங் பாதே³ வந்தி³த்வா உக்குடிகங் நிஸீதி³த்வா அஞ்ஜலிங் பக்³க³ஹெத்வா ஏவமஸ்ஸ வசனீயோ – ‘‘இத³ங் மே, ப⁴ந்தே, சீவரங் த³ஸாஹாதிக்கந்தங் நிஸ்ஸக்³கி³யங், இமாஹங் ஸங்க⁴ஸ்ஸ நிஸ்ஸஜ்ஜாமீ’’தி. நிஸ்ஸஜ்ஜித்வா ஆபத்தி தே³ஸேதப்³பா³. ப்³யத்தேன பி⁴க்கு²னா படிப³லேன ஆபத்தி படிக்³க³ஹேதப்³பா³. நிஸ்ஸட்ட²சீவரங் தா³தப்³ப³ங்.
Taṃ atikkāmayato nissaggiyaṃ hotī4 ti ekādase aruṇuggamane nissaggiyaṃ hoti. Nissajjitabbaṃ saṅghassa vā gaṇassa vā puggalassa vā. Evañca pana, bhikkhave, nissajjitabbaṃ. Tena bhikkhunā saṅghaṃ upasaṅkamitvā ekaṃsaṃ uttarāsaṅgaṃ karitvā vuḍḍhānaṃ bhikkhūnaṃ pāde vanditvā ukkuṭikaṃ nisīditvā añjaliṃ paggahetvā evamassa vacanīyo – ‘‘idaṃ me, bhante, cīvaraṃ dasāhātikkantaṃ nissaggiyaṃ, imāhaṃ saṅghassa nissajjāmī’’ti. Nissajjitvā āpatti desetabbā. Byattena bhikkhunā paṭibalena āpatti paṭiggahetabbā. Nissaṭṭhacīvaraṃ dātabbaṃ.
464. ‘‘ஸுணாது மே, ப⁴ந்தே, ஸங்கோ⁴. இத³ங் சீவரங் இத்த²ன்னாமஸ்ஸ பி⁴க்கு²னோ நிஸ்ஸக்³கி³யங் ஸங்க⁴ஸ்ஸ நிஸ்ஸட்ட²ங். யதி³ ஸங்க⁴ஸ்ஸ பத்தகல்லங், ஸங்கோ⁴ இமங் சீவரங் இத்த²ன்னாமஸ்ஸ பி⁴க்கு²னோ த³தெ³ய்யா’’தி.
464. ‘‘Suṇātu me, bhante, saṅgho. Idaṃ cīvaraṃ itthannāmassa bhikkhuno nissaggiyaṃ saṅghassa nissaṭṭhaṃ. Yadi saṅghassa pattakallaṃ, saṅgho imaṃ cīvaraṃ itthannāmassa bhikkhuno dadeyyā’’ti.
465. தேன பி⁴க்கு²னா ஸம்ப³ஹுலே பி⁴க்கூ² உபஸங்கமித்வா ஏகங்ஸங் உத்தராஸங்க³ங் கரித்வா வுட்³டா⁴னங் பி⁴க்கூ²னங் பாதே³ வந்தி³த்வா உக்குடிகங் நிஸீதி³த்வா அஞ்ஜலிங் பக்³க³ஹெத்வா ஏவமஸ்ஸு வசனீயா – ‘‘இத³ங் மே, ப⁴ந்தே, சீவரங் த³ஸாஹாதிக்கந்தங் நிஸ்ஸக்³கி³யங். இமாஹங் ஆயஸ்மந்தானங் நிஸ்ஸஜ்ஜாமீ’’தி. நிஸ்ஸஜ்ஜித்வா ஆபத்தி தே³ஸேதப்³பா³. ப்³யத்தேன பி⁴க்கு²னா படிப³லேன ஆபத்தி படிக்³க³ஹேதப்³பா³. நிஸ்ஸட்ட²சீவரங் தா³தப்³ப³ங்.
465. Tena bhikkhunā sambahule bhikkhū upasaṅkamitvā ekaṃsaṃ uttarāsaṅgaṃ karitvā vuḍḍhānaṃ bhikkhūnaṃ pāde vanditvā ukkuṭikaṃ nisīditvā añjaliṃ paggahetvā evamassu vacanīyā – ‘‘idaṃ me, bhante, cīvaraṃ dasāhātikkantaṃ nissaggiyaṃ. Imāhaṃ āyasmantānaṃ nissajjāmī’’ti. Nissajjitvā āpatti desetabbā. Byattena bhikkhunā paṭibalena āpatti paṭiggahetabbā. Nissaṭṭhacīvaraṃ dātabbaṃ.
466. ‘‘ஸுணந்து மே ஆயஸ்மந்தா. இத³ங் சீவரங் இத்த²ன்னாமஸ்ஸ பி⁴க்கு²னோ நிஸ்ஸக்³கி³யங் ஆயஸ்மந்தானங் நிஸ்ஸட்ட²ங். யதா³யஸ்மந்தானங் பத்தகல்லங், ஆயஸ்மந்தா இமங் சீவரங் இத்த²ன்னாமஸ்ஸ பி⁴க்கு²னோ த³தெ³ய்யு’’ந்தி.
466. ‘‘Suṇantu me āyasmantā. Idaṃ cīvaraṃ itthannāmassa bhikkhuno nissaggiyaṃ āyasmantānaṃ nissaṭṭhaṃ. Yadāyasmantānaṃ pattakallaṃ, āyasmantā imaṃ cīvaraṃ itthannāmassa bhikkhuno dadeyyu’’nti.
467. தேன பி⁴க்கு²னா ஏகங் பி⁴க்கு²ங் உபஸங்கமித்வா ஏகங்ஸங் உத்தராஸங்க³ங் கரித்வா உக்குடிகங் நிஸீதி³த்வா அஞ்ஜலிங் பக்³க³ஹெத்வா ஏவமஸ்ஸ வசனீயோ – ‘‘இத³ங் மே, ஆவுஸோ, சீவரங் த³ஸாஹாதிக்கந்தங் நிஸ்ஸக்³கி³யங். இமாஹங் ஆயஸ்மதோ நிஸ்ஸஜ்ஜாமீ’’தி. நிஸ்ஸஜ்ஜித்வா ஆபத்தி தே³ஸேதப்³பா³. தேன பி⁴க்கு²னா ஆபத்தி படிக்³க³ஹேதப்³பா³. நிஸ்ஸட்ட²சீவரங் தா³தப்³ப³ங் – ‘‘இமங் சீவரங் ஆயஸ்மதோ த³ம்மீ’’தி.
467. Tena bhikkhunā ekaṃ bhikkhuṃ upasaṅkamitvā ekaṃsaṃ uttarāsaṅgaṃ karitvā ukkuṭikaṃ nisīditvā añjaliṃ paggahetvā evamassa vacanīyo – ‘‘idaṃ me, āvuso, cīvaraṃ dasāhātikkantaṃ nissaggiyaṃ. Imāhaṃ āyasmato nissajjāmī’’ti. Nissajjitvā āpatti desetabbā. Tena bhikkhunā āpatti paṭiggahetabbā. Nissaṭṭhacīvaraṃ dātabbaṃ – ‘‘imaṃ cīvaraṃ āyasmato dammī’’ti.
468. த³ஸாஹாதிக்கந்தே அதிக்கந்தஸஞ்ஞீ, நிஸ்ஸக்³கி³யங் பாசித்தியங். த³ஸாஹாதிக்கந்தே வேமதிகோ, நிஸ்ஸக்³கி³யங் பாசித்தியங். த³ஸாஹாதிக்கந்தே அனதிக்கந்தஸஞ்ஞீ, நிஸ்ஸக்³கி³யங் பாசித்தியங் . அனதி⁴ட்டி²தே அதி⁴ட்டி²தஸஞ்ஞீ, நிஸ்ஸக்³கி³யங் பாசித்தியங். அவிகப்பிதே விகப்பிதஸஞ்ஞீ, நிஸ்ஸக்³கி³யங் பாசித்தியங். அவிஸ்ஸஜ்ஜிதே விஸ்ஸஜ்ஜிதஸஞ்ஞீ, நிஸ்ஸக்³கி³யங் பாசித்தியங். அனட்டே² நட்ட²ஸஞ்ஞீ, நிஸ்ஸக்³கி³யங் பாசித்தியங். அவினட்டே² வினட்ட²ஸஞ்ஞீ, நிஸ்ஸக்³கி³யங் பாசித்தியங். அத³ட்³டே⁴ த³ட்³ட⁴ஸஞ்ஞீ, நிஸ்ஸக்³கி³யங் பாசித்தியங். அவிலுத்தே விலுத்தஸஞ்ஞீ, நிஸ்ஸக்³கி³யங் பாசித்தியங்.
468. Dasāhātikkante atikkantasaññī, nissaggiyaṃ pācittiyaṃ. Dasāhātikkante vematiko, nissaggiyaṃ pācittiyaṃ. Dasāhātikkante anatikkantasaññī, nissaggiyaṃ pācittiyaṃ . Anadhiṭṭhite adhiṭṭhitasaññī, nissaggiyaṃ pācittiyaṃ. Avikappite vikappitasaññī, nissaggiyaṃ pācittiyaṃ. Avissajjite vissajjitasaññī, nissaggiyaṃ pācittiyaṃ. Anaṭṭhe naṭṭhasaññī, nissaggiyaṃ pācittiyaṃ. Avinaṭṭhe vinaṭṭhasaññī, nissaggiyaṃ pācittiyaṃ. Adaḍḍhe daḍḍhasaññī, nissaggiyaṃ pācittiyaṃ. Avilutte viluttasaññī, nissaggiyaṃ pācittiyaṃ.
நிஸ்ஸக்³கி³யங் சீவரங் அனிஸ்ஸஜ்ஜித்வா பரிபு⁴ஞ்ஜதி, ஆபத்தி து³க்கடஸ்ஸ. த³ஸாஹானதிக்கந்தே அதிக்கந்தஸஞ்ஞீ, ஆபத்தி து³க்கடஸ்ஸ. த³ஸாஹானதிக்கந்தே வேமதிகோ, ஆபத்தி து³க்கடஸ்ஸ. த³ஸாஹானதிக்கந்தே அனதிக்கந்தஸஞ்ஞீ, அனாபத்தி.
Nissaggiyaṃ cīvaraṃ anissajjitvā paribhuñjati, āpatti dukkaṭassa. Dasāhānatikkante atikkantasaññī, āpatti dukkaṭassa. Dasāhānatikkante vematiko, āpatti dukkaṭassa. Dasāhānatikkante anatikkantasaññī, anāpatti.
469. அனாபத்தி அந்தோத³ஸாஹங் அதி⁴ட்டே²தி, விகப்பேதி, விஸ்ஸஜ்ஜேதி, நஸ்ஸதி, வினஸ்ஸதி, ட³ய்ஹதி, அச்சி²ந்தி³த்வா க³ண்ஹந்தி, விஸ்ஸாஸங் க³ண்ஹந்தி, உம்மத்தகஸ்ஸ, ஆதி³கம்மிகஸ்ஸாதி.
469. Anāpatti antodasāhaṃ adhiṭṭheti, vikappeti, vissajjeti, nassati, vinassati, ḍayhati, acchinditvā gaṇhanti, vissāsaṃ gaṇhanti, ummattakassa, ādikammikassāti.
470. தேன கோ² பன ஸமயேன ச²ப்³ப³க்³கி³யா பி⁴க்கூ² நிஸ்ஸட்ட²சீவரங் ந தெ³ந்தி. ப⁴க³வதோ ஏதமத்த²ங் ஆரோசேஸுங். ‘‘ந , பி⁴க்க²வே, நிஸ்ஸட்ட²சீவரங் ந தா³தப்³ப³ங். யோ ந த³தெ³ய்ய, ஆபத்தி து³க்கடஸ்ஸா’’தி.
470. Tena kho pana samayena chabbaggiyā bhikkhū nissaṭṭhacīvaraṃ na denti. Bhagavato etamatthaṃ ārocesuṃ. ‘‘Na , bhikkhave, nissaṭṭhacīvaraṃ na dātabbaṃ. Yo na dadeyya, āpatti dukkaṭassā’’ti.
கதி²னஸிக்கா²பத³ங் நிட்டி²தங் பட²மங்.
Kathinasikkhāpadaṃ niṭṭhitaṃ paṭhamaṃ.
Footnotes:
Related texts:
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 1. பட²மகதி²னஸிக்கா²பத³வண்ணனா • 1. Paṭhamakathinasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 1. பட²மகதி²னஸிக்கா²பத³வண்ணனா • 1. Paṭhamakathinasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 1. பட²மகதி²னஸிக்கா²பத³வண்ணனா • 1. Paṭhamakathinasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 1. பட²மகதி²னஸிக்கா²பத³வண்ணனா • 1. Paṭhamakathinasikkhāpadavaṇṇanā
