| Library / Tipiṭaka / д̇ибидага • Tipiṭaka / вимад̇ивинод̣̇аний-дийгаа • Vimativinodanī-ṭīkā |
4. ниссаг̇г̇ияаган̣д̣о
4. Nissaggiyakaṇḍo
1. жийвараваг̇г̇о
1. Cīvaravaggo
1. батамагат̇инасигкаабад̣̇аван̣н̣анаа
1. Paṭhamakathinasikkhāpadavaṇṇanā
459. самид̇аавинаад̇и самид̇абаабзна. г̇од̇амагажзд̇ияам̣ наама г̇од̇амаяагкасса жзд̇ияадтаанз гад̇авихааро вужжад̇и.
459.Samitāvināti samitapāpena. Gotamakacetiyaṃ nāma gotamayakkhassa cetiyaṭṭhāne katavihāro vuccati.
461. навамам̣ ваа д̣̇асамам̣ ваад̇и бхуммад̇т̇з убаяог̇аважанам̣. сажз бхавзяяаад̇и сажз гассажи ган̇каа бхавзяяа. вуд̇д̇асад̣̇исанд̇и д̣̇асамам̣ ваад̇и вуд̇д̇асад̣̇исам̣ барижчзд̣̇асад̣̇исам̣, ‘‘вуд̇д̇асад̣̇исамзваа’’д̇иби ликанд̇и. д̇хаарзд̇унд̇и зд̇т̇а аахаад̇и баатасзсо д̣̇адтаб̣б̣о.
461.Navamaṃ vā dasamaṃ vāti bhummatthe upayogavacanaṃ. Sace bhaveyyāti sace kassaci kaṅkhā bhaveyya. Vuttasadisanti dasamaṃ vāti vuttasadisaṃ paricchedasadisaṃ, ‘‘vuttasadisamevā’’tipi likhanti. Dhāretunti ettha āhāti pāṭhaseso daṭṭhabbo.
463. суужияаа бадисаамананд̇и суужигхарз сам̣г̇обанам̣, ид̣̇ан̃жа суужигаммасса саб̣б̣асса баринидтид̇абхаавад̣̇ассанад̇т̇ам̣ вуд̇д̇ам̣. зд̇анд̇и надтажийварам̣. зд̇зсамбийд̇и надтажийвараад̣̇ийни бараамасад̇и, д̇зна жийварабалиб̣од̇хаабхаавам̣ д̣̇ассзд̇и. д̣̇уд̇ияасса балиб̣од̇хассаад̇и ааваасабалиб̣од̇хасса. зд̇т̇а жа нидтид̇ажийварасмим̣, уб̣бхад̇асмим̣ гат̇инзд̇и д̣̇вийхи бад̣̇зхи д̣̇виннам̣ балиб̣од̇хаанам̣ абхаавад̣̇ассанзна ад̇т̇ад̇агат̇инасса бан̃жамаасаб̣бханд̇арз яаава жийварабалиб̣од̇хаааваасабалиб̣од̇хзсу ан̃н̃ад̇арам̣ на убажчиж̇ж̇ад̇и, д̇аава ад̇ирзгажийварам̣ д̇хаарзд̇ум̣ ваддад̇ийд̇и д̣̇ийбзд̇и. баггаманам̣ анд̇о ассаад̇и баггамананд̇игаа, звам̣ сзсааби взд̣̇ид̇аб̣б̣аа. вид̇т̇ааро банзд̇т̇а ааг̇ад̇адтаанз аави бхависсад̇и.
463.Sūciyā paṭisāmananti sūcighare saṃgopanaṃ, idañca sūcikammassa sabbassa pariniṭṭhitabhāvadassanatthaṃ vuttaṃ. Etanti naṭṭhacīvaraṃ. Etesampīti naṭṭhacīvarādīni parāmasati, tena cīvarapalibodhābhāvaṃ dasseti. Dutiyassa palibodhassāti āvāsapalibodhassa. Ettha ca niṭṭhitacīvarasmiṃ, ubbhatasmiṃ kathineti dvīhi padehi dvinnaṃ palibodhānaṃ abhāvadassanena atthatakathinassa pañcamāsabbhantare yāva cīvarapalibodhaāvāsapalibodhesu aññataraṃ na upacchijjati, tāva atirekacīvaraṃ dhāretuṃ vaṭṭatīti dīpeti. Pakkamanaṃ anto assāti pakkamanantikā, evaṃ sesāpi veditabbā. Vitthāro panettha āgataṭṭhāne āvi bhavissati.
д̣̇асаахабарамам̣ гааланд̇и ажжанд̇асам̣яог̇аважанам̣. ид̣̇ан̃хи вуд̇д̇ам̣ ход̇и…бз… д̣̇асаахабарамабхаавод̇и ид̣̇ам̣ д̣̇асаахабарамад̇аабад̣̇асса ад̇т̇амад̇д̇ад̣̇ассанам̣, д̣̇асаахабарамабхаавод̇и ид̣̇ан̃хи вуд̇д̇ам̣ ход̇ийд̇и звамзд̇т̇а яож̇анаа взд̣̇ид̇аб̣б̣аа. аяамад̇т̇од̇иаад̣̇и д̣̇асаахабарамабад̣̇ассзва ад̇хиббзд̇ад̇т̇ад̣̇ассанавасзна вуд̇д̇ам̣. д̇ад̇т̇а зд̇д̇аго гаалод̇и ‘‘д̣̇асаахабарамад̇аа’’д̇и вуд̇д̇о яо гаало, со зд̇д̇аго гаалод̇и ад̇т̇о.
Dasāhaparamaṃ kālanti accantasaṃyogavacanaṃ. Idañhi vuttaṃ hoti…pe… dasāhaparamabhāvoti idaṃ dasāhaparamatāpadassa atthamattadassanaṃ, dasāhaparamabhāvoti idañhi vuttaṃ hotīti evamettha yojanā veditabbā. Ayamatthotiādi dasāhaparamapadasseva adhippetatthadassanavasena vuttaṃ. Tattha ettako kāloti ‘‘dasāhaparamatā’’ti vutto yo kālo, so ettako kāloti attho.
команд̇и комасуд̇д̇зхи вааяид̇ам̣ комабадажийварам̣, д̇ам̣ ваагамаяанд̇и вад̣̇анд̇и. габбаасасуд̇д̇зхи вааяид̇ам̣ габбаасигам̣, звам̣ сзсааниби. гамб̣аланд̇и зл̣агаад̣̇ийнам̣ ломамаяасуд̇д̇зна вааяид̇абадам̣. бхан̇г̇анд̇и комасуд̇д̇аад̣̇ийни саб̣б̣аани, згажжаани ваа миссзд̇ваа вааяид̇ам̣ жийварам̣. бхан̇г̇амби ваагамаяамзваад̇и гзжи. д̣̇угуулам̣ бад̇д̇ун̣н̣ам̣ сомаарабадам̣ жийнабадам̣ ид̣̇д̇хиж̇ам̣ д̣̇звад̣̇иннанд̇и имаани бана ча жийвараани зд̇зсан̃н̃зва ануломаанийд̇и висум̣ на вуд̇д̇аани. д̣̇угуулан̃хи саан̣асса ануломам̣ ваагамаяад̇д̇аа. ‘‘бад̇д̇ун̣н̣ам̣ госзяяависзсо’’д̇и абхид̇хаанагосз вуд̇д̇ам̣. сомаарад̣̇зсз, жийнад̣̇зсз жа ж̇аад̇авад̇т̇аани сомааражийнабадаани. бад̇д̇ун̣н̣аад̣̇ийни д̇ийн̣и госзяяасса ануломаани баан̣агзхи гад̇асуд̇д̇амаяад̇д̇аа. ид̣̇д̇хиж̇анд̇и зхибхигкуунам̣ бун̃н̃ид̣̇д̇хияаа ниб̣б̣ад̇д̇ажийварам̣. габбаругкз ниб̣б̣ад̇д̇ам̣, д̣̇звад̣̇иннан̃жа комаад̣̇ийнам̣ ан̃н̃ад̇арам̣ ход̇ийд̇и д̇зсам̣ саб̣б̣зсам̣ ануломаани. мануссаанам̣ багад̇ивид̣̇ад̇т̇им̣ санд̇хааяа ‘‘д̣̇вз вид̣̇ад̇т̇ияо’’д̇иаад̣̇и вуд̇д̇ам̣. иминаа д̣̇ийгхад̇о вад̣дхагийхад̇т̇аббамаан̣ам̣ вид̇т̇аарад̇о д̇ад̇о убад̣дхаббамаан̣ам̣ вигаббанубаг̇анд̇и д̣̇ассзд̇и. д̇ат̇аа хи ‘‘суг̇ад̇авид̣̇ад̇т̇и наама ид̣̇аани маж̇жхимасса бурисасса д̇иссо вид̣̇ад̇т̇ияо, вад̣дхагийхад̇т̇зна д̣̇ияад̣дхо хад̇т̇о ход̇ий’’д̇и (баараа. адта. 2.348-349) гудигаарасигкаабад̣̇адтагат̇ааяам̣ вуд̇д̇ам̣, д̇асмаа суг̇ад̇ан̇г̇улзна д̣̇ваад̣̇асан̇г̇улаа суг̇ад̇авид̣̇ад̇т̇и вад̣дхагийхад̇т̇зна д̣̇ияад̣дхо хад̇т̇од̇и сид̣̇д̇хам̣. зван̃жа гад̇ваа ‘‘суг̇ад̇ан̇г̇улзна адтан̇г̇улам̣ вад̣дхагийхад̇т̇аббамаан̣а’’нд̇и ааг̇ад̇адтаанзхи жа самзд̇и.
Khomanti khomasuttehi vāyitaṃ khomapaṭacīvaraṃ, taṃ vākamayanti vadanti. Kappāsasuttehi vāyitaṃ kappāsikaṃ, evaṃ sesānipi. Kambalanti eḷakādīnaṃ lomamayasuttena vāyitapaṭaṃ. Bhaṅganti khomasuttādīni sabbāni, ekaccāni vā missetvā vāyitaṃ cīvaraṃ. Bhaṅgampi vākamayamevāti keci. Dukūlaṃ pattuṇṇaṃ somārapaṭaṃ cīnapaṭaṃ iddhijaṃ devadinnanti imāni pana cha cīvarāni etesaññeva anulomānīti visuṃ na vuttāni. Dukūlañhi sāṇassa anulomaṃ vākamayattā. ‘‘Pattuṇṇaṃ koseyyaviseso’’ti abhidhānakose vuttaṃ. Somāradese, cīnadese ca jātavatthāni somāracīnapaṭāni. Pattuṇṇādīni tīṇi koseyyassa anulomāni pāṇakehi katasuttamayattā. Iddhijanti ehibhikkhūnaṃ puññiddhiyā nibbattacīvaraṃ. Kapparukkhe nibbattaṃ, devadinnañca khomādīnaṃ aññataraṃ hotīti tesaṃ sabbesaṃ anulomāni. Manussānaṃ pakatividatthiṃ sandhāya ‘‘dve vidatthiyo’’tiādi vuttaṃ. Iminā dīghato vaḍḍhakīhatthappamāṇaṃ vitthārato tato upaḍḍhappamāṇaṃ vikappanupaganti dasseti. Tathā hi ‘‘sugatavidatthi nāma idāni majjhimassa purisassa tisso vidatthiyo, vaḍḍhakīhatthena diyaḍḍho hattho hotī’’ti (pārā. aṭṭha. 2.348-349) kuṭikārasikkhāpadaṭṭhakathāyaṃ vuttaṃ, tasmā sugataṅgulena dvādasaṅgulā sugatavidatthi vaḍḍhakīhatthena diyaḍḍho hatthoti siddhaṃ. Evañca katvā ‘‘sugataṅgulena aṭṭhaṅgulaṃ vaḍḍhakīhatthappamāṇa’’nti āgataṭṭhānehi ca sameti.
д̇ам̣ ад̇иггаамаяад̇од̇и зд̇т̇а д̇анд̇и жийварам̣, гаалам̣ ваа бараамасад̇и. д̇асса яо арун̣од̇и жийваруббаад̣̇ад̣̇ивасасса яо ад̇игганд̇о арун̣о. жийваруббаад̣̇ад̣̇ивасзна сад̣̇д̇хинд̇и жийваруббаад̣̇ад̣̇ивасасса аад̣̇ибхууд̇зна ад̇игганд̇аарун̣зна сад̣̇д̇хинд̇и ад̇т̇о, ид̣̇ан̃жа бхаг̇авад̇аа ‘‘д̣̇асаахабарама’’нд̇и вад̇ваа буна ‘‘згаад̣̇асз арун̣уг̇г̇аманз’’д̇и вуд̇д̇ад̇д̇аа буб̣б̣аабарасам̣санд̣̇анад̇т̇ам̣ сад̣̇д̣̇ад̇о г̇аммамаанамби ‘‘жийваруббаад̣̇ад̣̇ивасзна сад̣̇д̇хи’’нд̇и звам̣ вуд̇д̇ам̣. ‘‘д̣̇асамз арун̣з’’д̇и вуд̇д̇з зва хи д̣̇асаахабарамзна сад̣̇д̇хим̣ самзд̇и. д̣̇ивасабарияосаанасса авад̇хибхууд̇аанааг̇ад̇аарун̣авасзна хи д̣̇ивасам̣ ад̇игганд̇ам̣ наама ход̇и, на бана д̣̇ивасасса аад̣̇ибхууд̇аарун̣авасзна бариваасаад̣̇ийсу д̇ат̇аа аг̇г̇ахан̣ад̇о, ид̇ха бана бхаг̇авад̇аа д̣̇ивасасса аад̣̇ианд̇абарижчзд̣̇ад̣̇ассанавасзна ‘‘згаад̣̇асз арун̣уг̇г̇аманз’’д̇и вуд̇д̇ам̣, д̇асмаа адтагат̇ааяам̣ д̣̇ивасасса аад̣̇ибхууд̇ам̣ д̇ам̣д̣̇ивасаниссид̇амби арун̣ам̣ г̇ахзд̇ваа ‘‘згаад̣̇асз арун̣уг̇г̇аманз ниссаг̇г̇ияам̣ ход̇ий’’д̇и вуд̇д̇ам̣. арун̣од̇и жзд̇т̇а суурияуг̇г̇аманасса бурзжаро вад̣дханагханарад̇д̇о бабхаависзсод̇и д̣̇адтаб̣б̣о.
Taṃ atikkāmayatoti ettha tanti cīvaraṃ, kālaṃ vā parāmasati. Tassa yo aruṇoti cīvaruppādadivasassa yo atikkanto aruṇo. Cīvaruppādadivasena saddhinti cīvaruppādadivasassa ādibhūtena atikkantaaruṇena saddhinti attho, idañca bhagavatā ‘‘dasāhaparama’’nti vatvā puna ‘‘ekādase aruṇuggamane’’ti vuttattā pubbāparasaṃsandanatthaṃ saddato gammamānampi ‘‘cīvaruppādadivasena saddhi’’nti evaṃ vuttaṃ. ‘‘Dasame aruṇe’’ti vutte eva hi dasāhaparamena saddhiṃ sameti. Divasapariyosānassa avadhibhūtaanāgatāruṇavasena hi divasaṃ atikkantaṃ nāma hoti, na pana divasassa ādibhūtāruṇavasena parivāsādīsu tathā aggahaṇato, idha pana bhagavatā divasassa ādiantaparicchedadassanavasena ‘‘ekādase aruṇuggamane’’ti vuttaṃ, tasmā aṭṭhakathāyaṃ divasassa ādibhūtaṃ taṃdivasanissitampi aruṇaṃ gahetvā ‘‘ekādase aruṇuggamane nissaggiyaṃ hotī’’ti vuttaṃ. Aruṇoti cettha sūriyuggamanassa purecaro vaḍḍhanaghanaratto pabhāvisesoti daṭṭhabbo.
важанийяод̇и сан̇гхаабзгко. важанабхзд̣̇од̇и ‘‘н̃ад̇д̇ияам̣ д̣̇вз аабад̇д̇ияо сарад̇ий’’д̇иаад̣̇инаа вад̇д̇аб̣б̣анд̇и ад̇хиббааяо.
Vacanīyoti saṅghāpekkho. Vacanabhedoti ‘‘ñattiyaṃ dve āpattiyo saratī’’tiādinā vattabbanti adhippāyo.
468. ‘‘на ид̇ха сан̃н̃аа рагкад̇ий’’д̇и ид̣̇ам̣ взмад̇иган̃жа анад̇игганд̇асан̃н̃ан̃жа санд̇хааяа вуд̇д̇ам̣. яоби звам̣сан̃н̃ий д̇ассабийд̇и яо анад̇игганд̇асан̃н̃ий, взмад̇иго ваа, д̇ассабийд̇и ад̇т̇о. анадтад̇о авилуд̇д̇асса висзсамааха ‘‘басаяхаавахааравасзнаа’’д̇и. т̇зяяаавахааравасзна г̇ахид̇амби ид̇ха надтам̣.
468.‘‘Naidha saññā rakkhatī’’ti idaṃ vematikañca anatikkantasaññañca sandhāya vuttaṃ. Yopi evaṃsaññī tassapīti yo anatikkantasaññī, vematiko vā, tassapīti attho. Anaṭṭhato aviluttassa visesamāha ‘‘pasayhāvahāravasenā’’ti. Theyyāvahāravasena gahitampi idha naṭṭhaṃ.
анаабад̇д̇и ан̃н̃зна гад̇ам̣ бадилабхид̇ваад̇иаад̣̇и нисийд̣̇анасант̇ад̇ам̣ санд̇хааяа вуд̇д̇ам̣. язна хи бураан̣асант̇ад̇асса сааманд̇аа суг̇ад̇авид̣̇ад̇т̇им̣ анаад̣̇ияид̇ваа навам̣ нисийд̣̇анасант̇ад̇ам̣ гад̇ам̣, д̇асса д̇ам̣ ниссаг̇г̇ияамби д̇ад̇о ан̃н̃асса бадилабхид̇ваа барибхун̃ж̇анд̇асса анаабад̇д̇игаранд̇и сиж̇жханад̇о аяамад̇т̇о саб̣б̣аниссаг̇г̇иязсуби сиж̇жхад̇и.
Anāpatti aññena kataṃ paṭilabhitvātiādi nisīdanasanthataṃ sandhāya vuttaṃ. Yena hi purāṇasanthatassa sāmantā sugatavidatthiṃ anādiyitvā navaṃ nisīdanasanthataṃ kataṃ, tassa taṃ nissaggiyampi tato aññassa paṭilabhitvā paribhuñjantassa anāpattikaranti sijjhanato ayamattho sabbanissaggiyesupi sijjhati.
469. д̇ижийварам̣ ад̇хидтаад̇унд̇и сан̇гхаадиаад̣̇инаамзна ад̇хидтаад̇ум̣. ‘‘на вигаббзд̇у’’нд̇и иминаа наамзна на вигаббзд̇ум̣, зд̇зна вигаббид̇ад̇ижийваро д̇зжийвариго на ход̇и. д̇асса д̇асмим̣ ад̇хидтид̇ад̇ижийварз вияа авиббаваасаад̣̇инаа гад̇д̇аб̣б̣авид̇хи на гаад̇аб̣б̣од̇и д̣̇ассзд̇и, на бана вигаббанз д̣̇осод̇и. д̇ад̇о баранд̇и жад̇умаасад̇о барам̣ вигаббзд̇ваа барибхун̃ж̇ид̇ум̣ анун̃н̃аад̇анд̇и гзжи вад̣̇анд̇и, ан̃н̃з бана ‘‘вигаббзд̇ваа яаава ааг̇аамивассаанам̣, д̇аава табзд̇умзва ваддад̇ий’’д̇и вад̣̇анд̇и, абарз бана ‘‘вигаббанз на д̣̇осо, д̇ат̇аа вигаббид̇ам̣ баригкаараад̣̇инаамзна ад̇хидтахид̇ваа барибхун̃ж̇ид̇аб̣б̣а’’нд̇и вад̣̇анд̇и.
469.Ticīvaraṃ adhiṭṭhātunti saṅghāṭiādināmena adhiṭṭhātuṃ. ‘‘Na vikappetu’’nti iminā nāmena na vikappetuṃ, etena vikappitaticīvaro tecīvariko na hoti. Tassa tasmiṃ adhiṭṭhitaticīvare viya avippavāsādinā kattabbavidhi na kātabboti dasseti, na pana vikappane dosoti. Tato paranti catumāsato paraṃ vikappetvā paribhuñjituṃ anuññātanti keci vadanti, aññe pana ‘‘vikappetvā yāva āgāmivassānaṃ, tāva ṭhapetumeva vaṭṭatī’’ti vadanti, apare pana ‘‘vikappane na doso, tathā vikappitaṃ parikkhārādināmena adhiṭṭhahitvā paribhuñjitabba’’nti vadanti.
мудтибан̃жаганд̇и мудтияаа убалагкид̇ам̣ бан̃жагам̣, жад̇ухад̇т̇з минид̇ваа бан̃жамам̣ хад̇т̇ам̣ мудтим̣ гад̇ваа минид̇аб̣б̣анд̇и ад̇хиббааяо. гзжи бана ‘‘мудтихад̇т̇аанам̣ бан̃жагам̣ мудтибан̃жагам̣, д̇асмаа бан̃жаби хад̇т̇з мудтим̣ гад̇ваава минид̇аб̣б̣аа’’д̇и вад̣̇анд̇и. мудтид̇д̇иганд̇и зд̇т̇ааби зсзва наяо. д̣̇вихад̇т̇зна анд̇араваасагзна д̇иман̣д̣алам̣ бадижчаад̣̇зд̇ум̣ саггаад̇и ааха ‘‘баарубанзнаа’’д̇иаад̣̇и. ад̇ирзганд̇и суг̇ад̇ажийвараббамаан̣ад̇о ад̇хигам̣. уунаганд̇и мудтибан̃жагаад̣̇ид̇о уунагам̣, д̇зна жа д̇зсу д̇ижийвараад̇хидтаанам̣ на рухад̇ийд̇и д̣̇ассзд̇и.
Muṭṭhipañcakanti muṭṭhiyā upalakkhitaṃ pañcakaṃ, catuhatthe minitvā pañcamaṃ hatthaṃ muṭṭhiṃ katvā minitabbanti adhippāyo. Keci pana ‘‘muṭṭhihatthānaṃ pañcakaṃ muṭṭhipañcakaṃ, tasmā pañcapi hatthe muṭṭhiṃ katvāva minitabbā’’ti vadanti. Muṭṭhittikanti etthāpi eseva nayo. Dvihatthena antaravāsakena timaṇḍalaṃ paṭicchādetuṃ sakkāti āha ‘‘pārupanenā’’tiādi. Atirekanti sugatacīvarappamāṇato adhikaṃ. Ūnakanti muṭṭhipañcakādito ūnakaṃ, tena ca tesu ticīvarādhiṭṭhānaṃ na ruhatīti dasseti.
имам̣ сан̇гхаадим̣ бажжуд̣̇д̇хараамийд̇и имам̣ сан̇гхаадиад̇хидтаанам̣ угкибаами барижжаж̇аамийд̇и ад̇т̇о. гааяавигаарам̣ гаронд̇знаад̇и хад̇т̇зна жийварам̣ бараамасанд̇зна, жаалзнд̇зна ваа. ваажааяа ад̇хидтаад̇аб̣б̣аад̇и зд̇т̇а гааязнаби жаалзд̇ваа ваажамби бхинд̣̇ид̇ваа гааяаваажаахи ад̇хидтаанамби сан̇г̇ахид̇анд̇и взд̣̇ид̇аб̣б̣ам̣ ‘‘гааязна апусид̇ваа’’д̇и вуд̇д̇ад̇д̇аа. д̣̇увид̇ханд̇и ахад̇т̇абаасахад̇т̇абаасавасзна д̣̇увид̇хам̣. д̇ад̇т̇а хад̇т̇абаасо наама ад̣дхад̇зяяахад̇т̇о вужжад̇и. д̣̇ваад̣̇асахад̇т̇анд̇и гзжи вад̣̇анд̇и , д̇ам̣ ид̇ха на самзд̇и. ‘‘сааманд̇авихаарз’’д̇и ид̣̇ам̣ табид̇адтаанасаллагкан̣аяог̇г̇з тид̇ам̣ санд̇хааяа вуд̇д̇ам̣. д̇ад̇о д̣̇уурз тид̇амби табид̇адтаанам̣ саллагкзнд̇зна ад̇хидтаад̇аб̣б̣амзва. д̇ад̇т̇аби жийварасса табид̇абхаавасаллагкан̣амзва бамаан̣ам̣. на хи саггаа саб̣б̣ат̇аа таанам̣ саллагкзд̇ум̣. згасмим̣ вихаарз табзд̇ваа д̇ад̇о ан̃н̃асмим̣ табид̇анд̇и ад̇хидтаад̇ум̣ на ваддад̇и. гзжи бана ‘‘д̇ат̇ааби ад̇хидтид̇з на д̣̇осо’’д̇и вад̣̇анд̇и, д̇ам̣ адтагат̇ааяа на самзд̇и, виймам̣сид̇аб̣б̣ам̣. ад̇хидтахид̇ваа табид̇авад̇т̇зхийд̇и баригкааражол̣анаамзна ад̇хидтахид̇ваа табид̇авад̇т̇зхи, д̇знзва ‘‘имам̣ бажжуд̣̇д̇хараамий’’д̇и баригкааражол̣асса бажжуд̣̇д̇хаарам̣ д̣̇ассзд̇и. зд̇зна жа д̇зжийварад̇худ̇ан̇г̇ам̣ барихаранд̇зна бам̣сугуулаад̣̇ивасзна лад̣̇д̇хам̣ вад̇т̇ам̣ д̣̇асаахаб̣бханд̇арз гад̇ваа раж̇ид̇ваа баарубид̇ум̣ асаггонд̇зна баригкааражол̣авасзна ад̇хидтахид̇ваава д̣̇асаахам̣ ад̇иггамзд̇аб̣б̣ам̣, ид̇арат̇аа ниссаг̇г̇ияам̣ ход̇ийд̇и д̣̇ассзд̇и. д̇знзва ‘‘раж̇ид̇агаалад̇о бана бадтааяа нигкибид̇ум̣ на ваддад̇и, д̇худ̇ан̇г̇ажоро наама ход̇ий’’д̇и (висуд̣̇д̇хи. 1.25) висуд̣̇д̇химаг̇г̇з вуд̇д̇ам̣. ‘‘буна ад̇хидтаад̇аб̣б̣ааний’’д̇и ид̣̇ан̃жа сан̇гхаадиаад̣̇ид̇ижийваранаамзна ад̇хидтахид̇ваа барибхун̃ж̇ид̇угаамасса васзна вуд̇д̇ам̣, ид̇арасса бана буримаад̇хидтаанамзва аланд̇и взд̣̇ид̇аб̣б̣ам̣. ‘‘буна ад̇хидтаад̇аб̣б̣а’’нд̇и иминаа габбаб̣инд̣̇уби д̣̇аад̇аб̣б̣анд̇и д̣̇ассзд̇и.
Imaṃ saṅghāṭiṃ paccuddharāmīti imaṃ saṅghāṭiadhiṭṭhānaṃ ukkhipāmi pariccajāmīti attho. Kāyavikāraṃ karontenāti hatthena cīvaraṃ parāmasantena, cālentena vā. Vācāya adhiṭṭhātabbāti ettha kāyenapi cāletvā vācampi bhinditvā kāyavācāhi adhiṭṭhānampi saṅgahitanti veditabbaṃ ‘‘kāyena aphusitvā’’ti vuttattā. Duvidhanti ahatthapāsahatthapāsavasena duvidhaṃ. Tattha hatthapāso nāma aḍḍhateyyahattho vuccati. Dvādasahatthanti keci vadanti , taṃ idha na sameti. ‘‘Sāmantavihāre’’ti idaṃ ṭhapitaṭṭhānasallakkhaṇayogge ṭhitaṃ sandhāya vuttaṃ. Tato dūre ṭhitampi ṭhapitaṭṭhānaṃ sallakkhentena adhiṭṭhātabbameva. Tatthapi cīvarassa ṭhapitabhāvasallakkhaṇameva pamāṇaṃ. Na hi sakkā sabbathā ṭhānaṃ sallakkhetuṃ. Ekasmiṃ vihāre ṭhapetvā tato aññasmiṃ ṭhapitanti adhiṭṭhātuṃ na vaṭṭati. Keci pana ‘‘tathāpi adhiṭṭhite na doso’’ti vadanti, taṃ aṭṭhakathāya na sameti, vīmaṃsitabbaṃ. Adhiṭṭhahitvā ṭhapitavatthehīti parikkhāracoḷanāmena adhiṭṭhahitvā ṭhapitavatthehi, teneva ‘‘imaṃ paccuddharāmī’’ti parikkhāracoḷassa paccuddhāraṃ dasseti. Etena ca tecīvaradhutaṅgaṃ pariharantena paṃsukūlādivasena laddhaṃ vatthaṃ dasāhabbhantare katvā rajitvā pārupituṃ asakkontena parikkhāracoḷavasena adhiṭṭhahitvāva dasāhaṃ atikkametabbaṃ, itarathā nissaggiyaṃ hotīti dasseti. Teneva ‘‘rajitakālato pana paṭṭhāya nikkhipituṃ na vaṭṭati, dhutaṅgacoro nāma hotī’’ti (visuddhi. 1.25) visuddhimagge vuttaṃ. ‘‘Puna adhiṭṭhātabbānī’’ti idañca saṅghāṭiāditicīvaranāmena adhiṭṭhahitvā paribhuñjitukāmassa vasena vuttaṃ, itarassa pana purimādhiṭṭhānameva alanti veditabbaṃ. ‘‘Puna adhiṭṭhātabba’’nti iminā kappabindupi dātabbanti dasseti.
б̣ад̣̇д̇хасиймааяам̣ авиббаваасасиймаасаммуд̇исамбхавад̇о на д̇ад̇т̇а д̣̇уббарихаарад̇аад̇и ааха ‘‘аб̣ад̣̇д̇хасиймааяам̣ д̣̇уббарихаара’’нд̇и.
Baddhasīmāyaṃ avippavāsasīmāsammutisambhavato na tattha dupparihāratāti āha ‘‘abaddhasīmāyaṃ dupparihāra’’nti.
ад̇ирид̇д̇аббамаан̣ааяа чзд̣̇анагам̣ баажид̇д̇ияанд̇и ааха ‘‘анад̇ирид̇д̇аббамаан̣аа’’д̇и. д̇ад̇о барам̣ бажжуд̣̇д̇харид̇ваа вигаббзд̇аб̣б̣аад̇и вассигамаасад̇о барам̣ ад̇хидтаанам̣ бажжуд̣̇д̇харид̇ваа вигаббзд̇аб̣б̣аа, иминаа жад̇уннам̣ вассигамаасаанам̣ убари ад̇хидтаанам̣ д̇идтад̇ийд̇и вин̃н̃ааяад̇и д̇ад̇о бажжуд̣̇д̇харааяог̇аа. яан̃жа маад̇игаадтагат̇ааяам̣ ‘‘вассигасаадигаа вассаанамаасаад̇иггамзнааби, ган̣д̣убадижчаад̣̇и ааб̣аад̇хавуубасамзнааби ад̇хидтаанам̣ виж̇ахад̇ий’’д̇и (ган̇каа. адта. гат̇инасигкаабад̣̇аван̣н̣анаа) вуд̇д̇ам̣, д̇ам̣ саманд̇абаасаад̣̇игааяам̣ над̇т̇и. бариваарадтагат̇ааяан̃жа ‘‘ад̇т̇аабад̇д̇и хзманд̇з аабаж̇ж̇ад̇и, но г̇имхз’’д̇и зд̇т̇а ид̣̇ам̣ вуд̇д̇ам̣ ‘‘гад̇д̇игабун̣н̣амаасияаа бажчимз баадибад̣̇ад̣̇ивасз вигаббзд̇ваа табид̇ам̣ вассигасаадигам̣ ниваасзнд̇о хзманд̇з аабаж̇ж̇ад̇и, гурунд̣̇ияам̣ бана ‘гад̇д̇игабун̣н̣амад̣̇ивасз абажжуд̣̇д̇харид̇ваа хзманд̇з аабаж̇ж̇ад̇ий’д̇и вуд̇д̇ам̣, д̇амби сувуд̇д̇ам̣, ‘жад̇умаасам̣ ад̇хидтаад̇ум̣ д̇ад̇о барам̣ вигаббзд̇у’нд̇и хи вуд̇д̇а’’нд̇и (бари. адта. 323). д̇ад̇т̇а махааадтагат̇ааяам̣ ниваасанабажжаяаа д̣̇уггадам̣ вуд̇д̇ам̣, гурунд̣̇адтагат̇ааяам̣ бана абажжуд̣̇д̇хаарабажжаяаа, д̇асмаа гурунд̣̇ияам̣ вуд̇д̇анаязнааби вассигасаадигаа вассаанамаасаад̇иггамзби ад̇хидтаанам̣ на виж̇ахад̇ийд̇и бан̃н̃ааяад̇и. ад̇хидтаанавиж̇аханзсу жа вассаанамаасаааб̣аад̇хаанам̣ виг̇амзна виж̇аханам̣ маад̇игаадтагат̇ааяамби на уд̣̇д̇хадам̣, д̇асмаа саманд̇абаасаад̣̇игааяам̣ ааг̇ад̇анаязна яаава бажжуд̣̇д̇хаараа ад̇хидтаанам̣ д̇идтад̇ийд̇и г̇ахзд̇аб̣б̣ам̣. нахаанад̇т̇ааяа анун̃н̃аад̇ад̇д̇аа ‘‘ван̣н̣абхзд̣̇амад̇д̇арад̇д̇ааби жзсаа ваддад̇ий’’д̇и вуд̇д̇ам̣. ‘‘д̣̇вз бана на вадданд̇ий’’д̇и иминаа сан̇гхаадиаад̣̇ийсу вияа д̣̇уд̇ияз ад̇хидтаанам̣ на рухад̇и, ад̇ирзгажийварам̣ ход̇ийд̇и д̣̇ассзд̇и. махаабажжарияам̣ жийваравасзна барибхог̇агижжасса абхаавам̣ санд̇хааяа анаабад̇д̇и вуд̇д̇аа сзнаасанабаригкаарад̇т̇ааяа д̣̇иннабажжад̇т̇аран̣з вияа. яам̣ бана ‘‘бажжад̇т̇аран̣амби ад̇хидтаад̇аб̣б̣а’’нд̇и вуд̇д̇ам̣, д̇ам̣ сзнаасанад̇т̇ааязваад̇и нияамид̇ам̣ на ход̇и навасу жийварзсу г̇ахид̇ад̇д̇аа, д̇асмаа ад̇д̇ано наамзна ад̇хидтахид̇ваа нид̣̇ахид̇ваа баригкааражол̣ам̣ вияа яат̇аа д̇ат̇аа винияуж̇ж̇ид̇аб̣б̣амзваад̇и г̇ахзд̇аб̣б̣ам̣. баавааро гож̇авод̇и имзсамби бажжад̇т̇аран̣аад̣̇ийнам̣ логзби вохаран̣ад̇о сзнаасанабаригкаарад̇т̇ааяа д̣̇иннабажжад̇т̇аран̣ад̇о висум̣ г̇ахан̣ам̣ гад̇ам̣.
Atirittappamāṇāya chedanakaṃ pācittiyanti āha ‘‘anatirittappamāṇā’’ti. Tato paraṃ paccuddharitvā vikappetabbāti vassikamāsato paraṃ adhiṭṭhānaṃ paccuddharitvā vikappetabbā, iminā catunnaṃ vassikamāsānaṃ upari adhiṭṭhānaṃ tiṭṭhatīti viññāyati tato paccuddharāyogā. Yañca mātikāṭṭhakathāyaṃ ‘‘vassikasāṭikā vassānamāsātikkamenāpi, kaṇḍupaṭicchādi ābādhavūpasamenāpi adhiṭṭhānaṃ vijahatī’’ti (kaṅkhā. aṭṭha. kathinasikkhāpadavaṇṇanā) vuttaṃ, taṃ samantapāsādikāyaṃ natthi. Parivāraṭṭhakathāyañca ‘‘atthāpatti hemante āpajjati, no gimhe’’ti ettha idaṃ vuttaṃ ‘‘kattikapuṇṇamāsiyā pacchime pāṭipadadivase vikappetvā ṭhapitaṃ vassikasāṭikaṃ nivāsento hemante āpajjati, kurundiyaṃ pana ‘kattikapuṇṇamadivase apaccuddharitvā hemante āpajjatī’ti vuttaṃ, tampi suvuttaṃ, ‘catumāsaṃ adhiṭṭhātuṃ tato paraṃ vikappetu’nti hi vutta’’nti (pari. aṭṭha. 323). Tattha mahāaṭṭhakathāyaṃ nivāsanapaccayā dukkaṭaṃ vuttaṃ, kurundaṭṭhakathāyaṃ pana apaccuddhārapaccayā, tasmā kurundiyaṃ vuttanayenāpi vassikasāṭikā vassānamāsātikkamepi adhiṭṭhānaṃ na vijahatīti paññāyati. Adhiṭṭhānavijahanesu ca vassānamāsaābādhānaṃ vigamena vijahanaṃ mātikāṭṭhakathāyampi na uddhaṭaṃ, tasmā samantapāsādikāyaṃ āgatanayena yāva paccuddhārā adhiṭṭhānaṃ tiṭṭhatīti gahetabbaṃ. Nahānatthāya anuññātattā ‘‘vaṇṇabhedamattarattāpi cesā vaṭṭatī’’ti vuttaṃ. ‘‘Dve pana na vaṭṭantī’’ti iminā saṅghāṭiādīsu viya dutiye adhiṭṭhānaṃ na ruhati, atirekacīvaraṃ hotīti dasseti. Mahāpaccariyaṃ cīvaravasena paribhogakiccassa abhāvaṃ sandhāya anāpatti vuttā senāsanaparikkhāratthāya dinnapaccattharaṇe viya. Yaṃ pana ‘‘paccattharaṇampi adhiṭṭhātabba’’nti vuttaṃ, taṃ senāsanatthāyevāti niyamitaṃ na hoti navasu cīvaresu gahitattā, tasmā attano nāmena adhiṭṭhahitvā nidahitvā parikkhāracoḷaṃ viya yathā tathā viniyujjitabbamevāti gahetabbaṃ. Pāvāro kojavoti imesampi paccattharaṇādīnaṃ lokepi voharaṇato senāsanaparikkhāratthāya dinnapaccattharaṇato visuṃ gahaṇaṃ kataṃ.
‘‘хийнааяаавад̇д̇анзнаа’’д̇и ид̣̇ам̣ анд̇имавад̇т̇ум̣ аж̇жхаабаж̇ж̇ид̇ваа бхигкубадин̃н̃ааяа тид̇асса жзва д̇ид̇т̇ияабагганд̇асса жа бхигкунияаа жа бхигкунибхаавз нирабзгкад̇ааяа г̇ихилин̇г̇ад̇ид̇т̇ияалин̇г̇аг̇г̇ахан̣ам̣ санд̇хааяа вуд̇д̇ам̣. сигкам̣ абажжагкааяа г̇ихибхаавуубаг̇аманам̣ санд̇хааяа вуд̇д̇анд̇и гзжи вад̣̇анд̇и, д̇ам̣ на яуд̇д̇ам̣ д̇ад̣̇аабисса убасамбаннад̇д̇аа, жийварасса жа д̇асса санд̇агад̇д̇аавиж̇аханад̇о. бамаан̣ажийварассаад̇и бажчимаббамаан̣ам̣ санд̇хааяа вуд̇д̇ам̣. д̣̇вз жийвараани баарубанд̇ассаад̇и г̇аамаббавзсз д̣̇иг̇ун̣ам̣ гад̇ваа сан̇гхаадияо баарубанам̣ санд̇хааяа вуд̇д̇ам̣. ‘‘зса наяо’’д̇и иминаа бамаан̣аяуд̇д̇зсу яад̇т̇а гад̇т̇ажи чид̣̇д̣̇ам̣ ад̇хидтаанам̣ виж̇ахад̇ийд̇иаад̣̇иад̇т̇ам̣ сан̇г̇ан̣хаад̇и.
‘‘Hīnāyāvattanenā’’ti idaṃ antimavatthuṃ ajjhāpajjitvā bhikkhupaṭiññāya ṭhitassa ceva titthiyapakkantassa ca bhikkhuniyā ca bhikkhunibhāve nirapekkhatāya gihiliṅgatitthiyaliṅgaggahaṇaṃ sandhāya vuttaṃ. Sikkhaṃ apaccakkhāya gihibhāvūpagamanaṃ sandhāya vuttanti keci vadanti, taṃ na yuttaṃ tadāpissa upasampannattā, cīvarassa ca tassa santakattāvijahanato. Pamāṇacīvarassāti pacchimappamāṇaṃ sandhāya vuttaṃ. Dve cīvarāni pārupantassāti gāmappavese diguṇaṃ katvā saṅghāṭiyo pārupanaṃ sandhāya vuttaṃ. ‘‘Esa nayo’’ti iminā pamāṇayuttesu yattha katthaci chiddaṃ adhiṭṭhānaṃ vijahatītiādiatthaṃ saṅgaṇhāti.
ан̃н̃ам̣ бажчимаббамаан̣ам̣ наама над̇т̇ийд̇и суд̇д̇з ааг̇ад̇ам̣ над̇т̇ийд̇и ад̇хиббааяо. ид̣̇аани д̇амзва вибхаавзд̇ум̣ ‘‘яан̃хий’’д̇иаад̣̇и вуд̇д̇ам̣, д̇ам̣ на самзд̇и, сан̇гхаадиаад̣̇ийнам̣ мудтибан̃жагаад̣̇ихздтимаббамаан̣асса суд̇д̇з анааг̇ад̇ад̇д̇аад̇и ад̇хиббааяо.
Aññaṃ pacchimappamāṇaṃ nāma natthīti sutte āgataṃ natthīti adhippāyo. Idāni tameva vibhāvetuṃ ‘‘yañhī’’tiādi vuttaṃ, taṃ na sameti, saṅghāṭiādīnaṃ muṭṭhipañcakādiheṭṭhimappamāṇassa sutte anāgatattāti adhippāyo.
маханд̇ам̣ ваа куд̣̇д̣̇агам̣ гарод̇ийд̇и зд̇т̇а ад̇имаханд̇ам̣ жийварам̣ мудтибан̃жагаад̣̇ибажчимаббамаан̣аяуд̇д̇ам̣ гад̇ваа саманд̇ад̇о чинд̣̇анзнааби вижчинд̣̇анагаалз чиж̇ж̇амаанадтаанам̣ чид̣̇д̣̇асан̇кяам̣ на г̇ажчад̇и ад̇хидтаанам̣ на виж̇ахад̇и зваад̇и сиж̇жхад̇и, ‘‘гхадзд̇ваа чинд̣̇ад̇и, на бхиж̇ж̇ад̇ий’’д̇и важанзна жа самзд̇и. баригкааражол̣ам̣ бана вигаббанубаг̇абажчимаббамаан̣ад̇о уунам̣ гад̇ваа чиннам̣ ад̇хидтаанам̣ виж̇ахад̇и ад̇хидтаанасса аниссаяад̇д̇аа. д̇аани буна б̣ад̣̇д̇хаани гхадид̇аани ад̇хидтаад̇аб̣б̣амзваад̇и взд̣̇ид̇аб̣б̣ам̣ . гзжи бана ‘‘вассигасаадигажийварз д̣̇вид̇хаа чиннз яад̣̇иби згзгам̣ кан̣д̣ам̣ бажчимабажчимаббамаан̣ам̣ баход̇и, згасмим̣язва кан̣д̣з ад̇хидтаанам̣ д̇идтад̇и, на ид̇арз, ‘‘д̣̇вз бана на вадданд̇ий’’д̇и вуд̇д̇ад̇д̇аа. нисийд̣̇анаган̣д̣уббадижчаад̣̇ийсуби зсзва наяод̇и вад̣̇анд̇и.
Mahantaṃ vā khuddakaṃ karotīti ettha atimahantaṃ cīvaraṃ muṭṭhipañcakādipacchimappamāṇayuttaṃ katvā samantato chindanenāpi vicchindanakāle chijjamānaṭṭhānaṃ chiddasaṅkhyaṃ na gacchati adhiṭṭhānaṃ na vijahati evāti sijjhati, ‘‘ghaṭetvā chindati, na bhijjatī’’ti vacanena ca sameti. Parikkhāracoḷaṃ pana vikappanupagapacchimappamāṇato ūnaṃ katvā chinnaṃ adhiṭṭhānaṃ vijahati adhiṭṭhānassa anissayattā. Tāni puna baddhāni ghaṭitāni adhiṭṭhātabbamevāti veditabbaṃ . Keci pana ‘‘vassikasāṭikacīvare dvidhā chinne yadipi ekekaṃ khaṇḍaṃ pacchimapacchimappamāṇaṃ pahoti, ekasmiṃyeva khaṇḍe adhiṭṭhānaṃ tiṭṭhati, na itare, ‘‘dve pana na vaṭṭantī’’ti vuttattā. Nisīdanakaṇḍuppaṭicchādīsupi eseva nayoti vadanti.
саммукз бавад̇д̇аа саммукаад̇и бажжад̇д̇аважанам̣, д̇ан̃жа вигаббанависзсанам̣, д̇асмаа ‘‘саммукз’’д̇и бхуммад̇т̇з ниссаггаважанам̣ гад̇вааби ад̇т̇ам̣ вад̣̇анд̇и, абхимукзд̇и ад̇т̇о. ат̇а ваа саммукзна ад̇д̇ано ваажааяа зва вигаббанаа саммукаавигаббанаа. бараммукзна вигаббанаа бараммукаавигаббанаад̇и гаран̣ад̇т̇знааби ад̇т̇о д̣̇адтаб̣б̣о, аяамзва баал̣ияаа самзд̇и. саннихид̇аасаннихид̇абхааванд̇и аасаннад̣̇уурабхаавам̣. зд̇д̇аавад̇аа нид̇хзд̇ум̣ ваддад̇ийд̇и зд̇д̇агзнзва вигаббанаагижжасса нидтид̇ад̇д̇аа, ад̇ирзгажийварам̣ на ход̇ийд̇и д̣̇асаахаад̇иггамз на ниссаг̇г̇ияам̣ ж̇анзд̇ийд̇и ад̇хиббааяо. барибхун̃ж̇ид̇ум̣…бз… на ваддад̇ийд̇и саяам̣ абажжуд̣̇д̇харан̣ам̣ барибхун̃ж̇анз баажид̇д̇ияам̣, ад̇хидтаанз барзсам̣ виссаж̇ж̇анз д̣̇уггадан̃жа санд̇хааяа вуд̇д̇ам̣.
Sammukhe pavattā sammukhāti paccattavacanaṃ, tañca vikappanavisesanaṃ, tasmā ‘‘sammukhe’’ti bhummatthe nissakkavacanaṃ katvāpi atthaṃ vadanti, abhimukheti attho. Atha vā sammukhena attano vācāya eva vikappanā sammukhāvikappanā. Parammukhena vikappanā parammukhāvikappanāti karaṇatthenāpi attho daṭṭhabbo, ayameva pāḷiyā sameti. Sannihitāsannihitabhāvanti āsannadūrabhāvaṃ. Ettāvatā nidhetuṃ vaṭṭatīti ettakeneva vikappanākiccassa niṭṭhitattā, atirekacīvaraṃ na hotīti dasāhātikkame na nissaggiyaṃ janetīti adhippāyo. Paribhuñjituṃ…pe… na vaṭṭatīti sayaṃ apaccuddharaṇaṃ paribhuñjane pācittiyaṃ, adhiṭṭhāne paresaṃ vissajjane dukkaṭañca sandhāya vuttaṃ.
барибхог̇аад̣̇аяоби вадданд̇ийд̇и барибхог̇ависсаж̇ж̇анаад̇хидтаанааниби. аби-сад̣̇д̣̇зна нид̇хзд̇умби ваддад̇ийд̇и ад̇т̇о, зд̇зна жа бажжуд̣̇д̇хаарзби гад̇з жийварамби вигаббид̇ажийварамзва ход̇и, на ад̇ирзгажийварам̣. д̇ам̣ бана д̇ижийвараад̣̇инаамзна ад̇хидтаад̇угаамзна ад̇хидтахид̇аб̣б̣ам̣, ид̇арзна вигаббид̇ажийварамзва гад̇ваа барибхун̃ж̇ид̇аб̣б̣анд̇и д̣̇ассзд̇и. гзжи бана ‘‘яам̣ вигаббид̇ажийварам̣, д̇ам̣ яаава абарибхог̇агаалаа абажжуд̣̇д̇хараабзд̇ваава нид̣̇ахид̇аб̣б̣ам̣, барибхог̇агаалз бана самбад̇д̇з бажжуд̣̇д̇хараабзд̇ваа ад̇хидтахид̇ваа барибхун̃ж̇ид̇аб̣б̣ам̣. яад̣̇и хи д̇ад̇о бурзби бажжуд̣̇д̇хараабзяяа, бажжуд̣̇д̇хаарзнзва вигаббанааяа виг̇ад̇ад̇д̇аа ад̇ирзгажийварам̣ наама ход̇и, д̣̇асаахаад̇иггамз жа ниссаг̇г̇ияам̣ баажид̇д̇ияам̣. д̇асмаа яам̣ абарибхун̃ж̇ид̇ваава табзд̇аб̣б̣ам̣, д̇ад̣̇зва вигаббзд̇аб̣б̣ам̣, бажжуд̣̇д̇хаарз жа гад̇з анд̇од̣̇асаахзязва ад̇хидтаад̇аб̣б̣ам̣. яан̃жа адтагат̇ааяам̣ ‘д̇ад̇о бабхуд̇и барибхог̇аад̣̇аяоби вадданд̇ий’д̇иаад̣̇и вуд̇д̇ам̣, д̇ам̣ баал̣ияаа вируж̇жхад̇ий’’д̇и вад̣̇анд̇и, д̇ам̣ д̇зсам̣ мад̇имад̇д̇амзва. баал̣ияан̃хи ‘‘анд̇од̣̇асаахам̣ ад̇хидтзд̇и, вигаббзд̇ий’’д̇и (баараа. 469) жа ‘‘саамам̣ жийварам̣ вигаббзд̇ваа абажжуд̣̇д̇хааран̣ам̣ барибхун̃ж̇зяяа баажид̇д̇ияа’’нд̇и (баажи. 373) жа ‘‘анаабад̇д̇и со ваа д̣̇зд̇и, д̇асса ваа виссаасанд̇о барибхун̃ж̇ад̇ий’’д̇и (баажи. 374) жа сааман̃н̃ад̇о вуд̇д̇ад̇д̇аа, адтагат̇ааяан̃жа ‘‘имам̣ жийварам̣ ваа вигаббанам̣ ваа бажжуд̣̇д̇хараамий’’д̇иаад̣̇инаа бажжуд̣̇д̇хаарам̣ ад̣̇ассзд̇ваа ‘‘маяхам̣ санд̇агам̣ барибхун̃ж̇а ваа виссаж̇ж̇зхи ваа’’д̇и звам̣ ад̇д̇ано санд̇агад̇д̇ам̣ аможзд̇ваава барибхог̇аад̣̇ивасзнзва бажжуд̣̇д̇хаарасса вуд̇д̇ад̇д̇аа, ‘‘д̇ад̇о бабхуд̇и барибхог̇аад̣̇аяоби вадданд̇ий’’д̇и ад̇хидтаанам̣ винааби висум̣ барибхог̇асса, нид̣̇аханасса жа вуд̇д̇ад̇д̇аа вигаббанаананд̇арамзва бажжуд̣̇д̇хараабзд̇ваа анад̇хидтахид̇ваа зва д̇ижийваравирахид̇ам̣ вигаббанаарахам̣ жийварам̣ барибхун̃ж̇ид̇ум̣, нид̣̇ахид̇ун̃жа ид̣̇ам̣ баадзггам̣ винаяагамманд̇и кааяад̇и. абижа б̣ахуунам̣ бад̇д̇аанам̣ вигаббзд̇ум̣, бажжуд̣̇д̇хаарзд̇ун̃жа вуд̇д̇ад̇д̇аа бажжуд̣̇д̇хаарзна д̇зсам̣ ад̇ирзгабад̇д̇ад̇аа д̣̇ассид̇аад̇и сиж̇жхад̇и д̇зсу згассзва ад̇хидтаад̇аб̣б̣ад̇о. д̇асмаа адтагат̇ааяам̣ ааг̇ад̇анаязнзва г̇ахзд̇аб̣б̣ам̣.
Paribhogādayopi vaṭṭantīti paribhogavissajjanaadhiṭṭhānānipi. Api-saddena nidhetumpi vaṭṭatīti attho, etena ca paccuddhārepi kate cīvarampi vikappitacīvarameva hoti, na atirekacīvaraṃ. Taṃ pana ticīvarādināmena adhiṭṭhātukāmena adhiṭṭhahitabbaṃ, itarena vikappitacīvarameva katvā paribhuñjitabbanti dasseti. Keci pana ‘‘yaṃ vikappitacīvaraṃ, taṃ yāva aparibhogakālā apaccuddharāpetvāva nidahitabbaṃ, paribhogakāle pana sampatte paccuddharāpetvā adhiṭṭhahitvā paribhuñjitabbaṃ. Yadi hi tato purepi paccuddharāpeyya, paccuddhāreneva vikappanāya vigatattā atirekacīvaraṃ nāma hoti, dasāhātikkame ca nissaggiyaṃ pācittiyaṃ. Tasmā yaṃ aparibhuñjitvāva ṭhapetabbaṃ, tadeva vikappetabbaṃ, paccuddhāre ca kate antodasāheyeva adhiṭṭhātabbaṃ. Yañca aṭṭhakathāyaṃ ‘tato pabhuti paribhogādayopi vaṭṭantī’tiādi vuttaṃ, taṃ pāḷiyā virujjhatī’’ti vadanti, taṃ tesaṃ matimattameva. Pāḷiyañhi ‘‘antodasāhaṃ adhiṭṭheti, vikappetī’’ti (pārā. 469) ca ‘‘sāmaṃ cīvaraṃ vikappetvā apaccuddhāraṇaṃ paribhuñjeyya pācittiya’’nti (pāci. 373) ca ‘‘anāpatti so vā deti, tassa vā vissāsanto paribhuñjatī’’ti (pāci. 374) ca sāmaññato vuttattā, aṭṭhakathāyañca ‘‘imaṃ cīvaraṃ vā vikappanaṃ vā paccuddharāmī’’tiādinā paccuddhāraṃ adassetvā ‘‘mayhaṃ santakaṃ paribhuñja vā vissajjehi vā’’ti evaṃ attano santakattaṃ amocetvāva paribhogādivaseneva paccuddhārassa vuttattā, ‘‘tato pabhuti paribhogādayopi vaṭṭantī’’ti adhiṭṭhānaṃ vināpi visuṃ paribhogassa, nidahanassa ca vuttattā vikappanānantarameva paccuddharāpetvā anadhiṭṭhahitvā eva ticīvaravirahitaṃ vikappanārahaṃ cīvaraṃ paribhuñjituṃ, nidahituñca idaṃ pāṭekkaṃ vinayakammanti khāyati. Apica bahūnaṃ pattānaṃ vikappetuṃ, paccuddhāretuñca vuttattā paccuddhārena tesaṃ atirekapattatā dassitāti sijjhati tesu ekasseva adhiṭṭhātabbato. Tasmā aṭṭhakathāyaṃ āgatanayeneva gahetabbaṃ.
бан̃н̃ад̇д̇иговид̣̇о на ход̇ийд̇и звам̣ вигаббид̇з ‘‘ананд̇арамзва звам̣ бажжуд̣̇д̇харид̇аб̣б̣а’’нд̇и винаяагаммам̣ на ж̇аанаад̇и. д̇знааха ‘‘на ж̇аанаад̇и бажжуд̣̇д̇харид̇у’’нд̇и, иминааби жзд̇ам̣ взд̣̇ид̇аб̣б̣ам̣ ‘‘вигаббанаананд̇арамзва бажжуд̣̇д̇хааро гаад̇аб̣б̣о’’д̇и.
Paññattikovido na hotīti evaṃ vikappite ‘‘anantarameva evaṃ paccuddharitabba’’nti vinayakammaṃ na jānāti. Tenāha ‘‘na jānāti paccuddharitu’’nti, imināpi cetaṃ veditabbaṃ ‘‘vikappanānantarameva paccuddhāro kātabbo’’ti.
ависзсзна вуд̇д̇аважананд̇и д̇ижийвараад̣̇ийнам̣ саад̇хааран̣аважанзна вуд̇д̇аважанам̣. яам̣ банзд̇т̇а ‘‘вируд̣̇д̇хам̣ вияа д̣̇иссад̇ий’’д̇и вад̇ваа д̇ам̣ вирод̇хаасан̇гам̣ нивад̇д̇зд̇ум̣ ‘‘д̇ижийварасан̇кзбзна…бз… вигаббанааяа огаасо д̣̇инно ход̇ий’’д̇и вуд̇д̇ам̣, д̇ам̣ ‘‘ад̇хидтзд̇и вигаббзд̇ий’’д̇и сааман̃н̃ад̇о вуд̇д̇зби д̇ижийварамби вигаббзд̇ийд̇и аяамад̇т̇о на сиж̇жхад̇и, ‘‘д̇ижийварам̣ ад̇хидтаад̇ум̣ на вигаббзд̇у’’нд̇и (махаава. 358) висзсзд̇ваа вуд̇д̇ад̇д̇аа. яам̣ бана ад̇хидтаад̇аб̣б̣ам̣, д̇ам̣ ад̇хидтаад̇и. яам̣ д̇ижийваравирахид̇ам̣, д̇ам̣ вигаббзд̇аб̣б̣ам̣, д̇ам̣ вигаббзд̇ийд̇и звамад̇т̇о сиж̇жхад̇ийд̇и. д̇асмаа зд̇т̇а буб̣б̣аабаравирод̇хо на д̣̇иссад̇и сааман̃н̃аважанасса вуд̇д̇аавасзсзязва авад̇идтанад̇о. яам̣ банзд̇т̇а д̇ижийварассааби вигаббанавид̇хим̣ д̣̇ассзд̇ум̣ ‘‘д̇ижийварам̣ д̇ижийварасан̇кзбзнаа’’д̇иаад̣̇и вуд̇д̇ам̣. д̇ад̇т̇а д̇ижийварасан̇кзбзна барихарияамаанзсу згамби бажжуд̣̇д̇харид̇ваа вигаббзд̇ум̣ на ваддад̇и, д̇ижийварад̇о бана згам̣ ваа сагаламзва ваа абанзд̇ваа абарам̣ д̇ижийварам̣ д̇ижийварасан̇кзбзна барихарид̇угаамасса ваа д̇ижийвараад̇хидтаанам̣ мун̃жид̇ваа баригкааражол̣авасзнзва саб̣б̣ажийварам̣ барибхун̃ж̇ид̇угаамасса ваа буримам̣ ад̇хидтид̇ажийварам̣ бажжуд̣̇д̇харид̇ваа вигаббзд̇ум̣ ваддад̇ийд̇и звамад̇хиббааязна ‘‘д̇ижийварз згзна жийварзна виббавасид̇угаамо ход̇ий’’д̇иаад̣̇и вуд̇д̇ам̣ сияаа, ижжзд̇ам̣ баал̣ияаа сад̣̇д̇хим̣ самзд̇и. ат̇а бунаби д̇ад̣̇зва д̇ижийвараад̇хидтаанзна ад̇хидтаад̇угаамо худ̇ваа виббаваасасукад̇т̇ам̣ бажжуд̣̇д̇харид̇ваа вигаббзд̇ийд̇и иминаа ад̇хиббааязна вуд̇д̇ам̣ сияаа, д̇ам̣ ‘‘д̇ижийварам̣ ад̇хидтаад̇ум̣ на вигаббзд̇у’’нд̇и (махаава. 358) иминаа важанзна на самзд̇и. яад̣̇и хи сзсажийвараани вияа д̇ижийварамби бажжуд̣̇д̇харид̇ваа вигаббзд̇аб̣б̣ам̣ сияаа, ‘‘д̇ижийварам̣ ад̇хидтаад̇ум̣ на вигаббзд̇у’’нд̇и ид̣̇ам̣ важанамзва нирад̇т̇агам̣ сияаа сзсажийварзхи д̇ижийварасса висзсаабхааваа. д̇асмаа ‘‘вигаббзд̇ий’’д̇и ид̣̇ам̣ д̇ижийваравирахид̇амзва санд̇хааяа вуд̇д̇ам̣. д̇ижийварам̣ бана вигаббзд̇ум̣ на ваддад̇ийд̇и вин̃н̃ааяад̇и, д̇знзва д̣̇уд̇ияагат̇инасигкаабад̣̇асса анаабад̇д̇иваарз ‘‘вигаббзд̇ий’’д̇и ид̣̇ам̣ на вуд̇д̇ам̣, виймам̣сид̇ваа яат̇аа баал̣ияаа сад̣̇д̇хим̣ на вируж̇жхад̇и, д̇ат̇аа зд̇т̇а ад̇хиббааяо г̇ахзд̇аб̣б̣о.
Avisesena vuttavacananti ticīvarādīnaṃ sādhāraṇavacanena vuttavacanaṃ. Yaṃ panettha ‘‘viruddhaṃ viya dissatī’’ti vatvā taṃ virodhāsaṅkaṃ nivattetuṃ ‘‘ticīvarasaṅkhepena…pe… vikappanāya okāso dinno hotī’’ti vuttaṃ, taṃ ‘‘adhiṭṭheti vikappetī’’ti sāmaññato vuttepi ticīvarampi vikappetīti ayamattho na sijjhati, ‘‘ticīvaraṃ adhiṭṭhātuṃ na vikappetu’’nti (mahāva. 358) visesetvā vuttattā. Yaṃ pana adhiṭṭhātabbaṃ, taṃ adhiṭṭhāti. Yaṃ ticīvaravirahitaṃ, taṃ vikappetabbaṃ, taṃ vikappetīti evamattho sijjhatīti. Tasmā ettha pubbāparavirodho na dissati sāmaññavacanassa vuttāvaseseyeva avatiṭṭhanato. Yaṃ panettha ticīvarassāpi vikappanavidhiṃ dassetuṃ ‘‘ticīvaraṃ ticīvarasaṅkhepenā’’tiādi vuttaṃ. Tattha ticīvarasaṅkhepena parihariyamānesu ekampi paccuddharitvā vikappetuṃ na vaṭṭati, ticīvarato pana ekaṃ vā sakalameva vā apanetvā aparaṃ ticīvaraṃ ticīvarasaṅkhepena pariharitukāmassa vā ticīvarādhiṭṭhānaṃ muñcitvā parikkhāracoḷavaseneva sabbacīvaraṃ paribhuñjitukāmassa vā purimaṃ adhiṭṭhitacīvaraṃ paccuddharitvā vikappetuṃ vaṭṭatīti evamadhippāyena ‘‘ticīvare ekena cīvarena vippavasitukāmo hotī’’tiādi vuttaṃ siyā, iccetaṃ pāḷiyā saddhiṃ sameti. Atha punapi tadeva ticīvarādhiṭṭhānena adhiṭṭhātukāmo hutvā vippavāsasukhatthaṃ paccuddharitvā vikappetīti iminā adhippāyena vuttaṃ siyā, taṃ ‘‘ticīvaraṃ adhiṭṭhātuṃ na vikappetu’’nti (mahāva. 358) iminā vacanena na sameti. Yadi hi sesacīvarāni viya ticīvarampi paccuddharitvā vikappetabbaṃ siyā, ‘‘ticīvaraṃ adhiṭṭhātuṃ na vikappetu’’nti idaṃ vacanameva niratthakaṃ siyā sesacīvarehi ticīvarassa visesābhāvā. Tasmā ‘‘vikappetī’’ti idaṃ ticīvaravirahitameva sandhāya vuttaṃ. Ticīvaraṃ pana vikappetuṃ na vaṭṭatīti viññāyati, teneva dutiyakathinasikkhāpadassa anāpattivāre ‘‘vikappetī’’ti idaṃ na vuttaṃ, vīmaṃsitvā yathā pāḷiyā saddhiṃ na virujjhati, tathā ettha adhippāyo gahetabbo.
д̇уяхам̣ д̣̇змийд̇иаад̣̇ийсу барижжад̇д̇ад̇д̇аа манасаа асамбадижчанд̇зби самбад̣̇аанабхууд̇ассзва санд̇агам̣ ход̇и, со ижчид̇агкан̣з г̇ахзд̇ум̣ лабхад̇и. ид̇т̇аннаамассаад̇и бараммукз тид̇ам̣ санд̇хааяа вад̣̇ад̇и. яасса бана ружжад̇ийд̇иаад̣̇и убхохиби барижжад̇д̇ад̇ааяа ассаамигад̇ам̣ санд̇хааяа вуд̇д̇ам̣.
Tuyhaṃdemītiādīsu pariccattattā manasā asampaṭicchantepi sampadānabhūtasseva santakaṃ hoti, so icchitakkhaṇe gahetuṃ labhati. Itthannāmassāti parammukhe ṭhitaṃ sandhāya vadati. Yassa pana ruccatītiādi ubhohipi pariccattatāya assāmikataṃ sandhāya vuttaṃ.
‘‘д̇ам̣ на яуж̇ж̇ад̇ий’’д̇и ид̣̇ам̣ анд̇од̣̇асаахз зва виссаасаг̇г̇ахан̣ам̣ санд̇хааяа анаабад̇д̇иваарасса ааг̇ад̇ад̇д̇аа, ид̇ха ниссаг̇г̇ияажийварасса габбияабхаавагаран̣ад̇т̇ам̣ лзсзна г̇ахид̇ад̇д̇аа жа вуд̇д̇ам̣, гзжи бана ‘‘барзхи сабхааг̇зна ажчиннз, виссаасаг̇г̇ахид̇з жа буна лад̣̇д̇хз д̣̇осо на д̣̇иссад̇ий’’д̇и вад̣̇анд̇и. анад̇хидтаанзнаад̇и гааяаваажаахи гад̇д̇аб̣б̣асса агаран̣знаад̇и ад̇хиббааяо. жийварасса ад̇д̇ано санд̇агад̇аа, ж̇аад̇ибамаан̣аяуд̇д̇ад̇аа, чиннабалиб̣од̇хабхааво, ад̇ирзгажийварад̇аа, д̣̇асаахаад̇иггамод̇и имаанзд̇т̇а бан̃жа ан̇г̇аани.
‘‘Taṃ na yujjatī’’ti idaṃ antodasāhe eva vissāsaggahaṇaṃ sandhāya anāpattivārassa āgatattā, idha nissaggiyacīvarassa kappiyabhāvakaraṇatthaṃ lesena gahitattā ca vuttaṃ, keci pana ‘‘parehi sabhāgena acchinne, vissāsaggahite ca puna laddhe doso na dissatī’’ti vadanti. Anadhiṭṭhānenāti kāyavācāhi kattabbassa akaraṇenāti adhippāyo. Cīvarassa attano santakatā, jātipamāṇayuttatā, chinnapalibodhabhāvo, atirekacīvaratā, dasāhātikkamoti imānettha pañca aṅgāni.
батамагат̇инасигкаабад̣̇аван̣н̣анаа нидтид̇аа.
Paṭhamakathinasikkhāpadavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / винаяабидага • Vinayapiṭaka / махаавибхан̇г̇а • Mahāvibhaṅga / 1. батамагат̇инасигкаабад̣̇ам̣ • 1. Paṭhamakathinasikkhāpadaṃ
адтагат̇аа • Aṭṭhakathā / винаяабидага (адтагат̇аа) • Vinayapiṭaka (aṭṭhakathā) / махаавибхан̇г̇а-адтагат̇аа • Mahāvibhaṅga-aṭṭhakathā / 1. батамагат̇инасигкаабад̣̇аван̣н̣анаа • 1. Paṭhamakathinasikkhāpadavaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / саарад̇т̇ад̣̇ийбаний-дийгаа • Sāratthadīpanī-ṭīkā / 1. батамагат̇инасигкаабад̣̇аван̣н̣анаа • 1. Paṭhamakathinasikkhāpadavaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / важ̇ираб̣уд̣̇д̇хи-дийгаа • Vajirabuddhi-ṭīkā / 1. батамагат̇инасигкаабад̣̇аван̣н̣анаа • 1. Paṭhamakathinasikkhāpadavaṇṇanā
