| Library / Tipiṭaka / তিপিটক • Tipiṭaka / অঙ্গুত্তরনিকায (টীকা) • Aṅguttaranikāya (ṭīkā) |
৩-৪. পঠমখতসুত্তাদিৰণ্ণনা
3-4. Paṭhamakhatasuttādivaṇṇanā
৩-৪. ততিযে কলিন্তি অপরাধং। ৰিচিনাতীতি আচিনোতি পসৰতি। তেন চ কলিনা সুখং ন পটিলভতীতি তেন অপরাধেন সুখং ন ৰিন্দতি। নিন্দিযপ্পসংসায হি পসংসিযনিন্দায চ সমকোৰ ৰিপাকো। পসংসিযনিন্দাতি চ সম্পন্নগুণপরিধংসনৰসেন পৰত্তিযা মহাসাৰজ্জতায কটুকতরৰিপাকা। নিন্দিযপ্পসংসা পন কথং তায সমৰিপাকাতি চে? তস্মিং অৰিজ্জমানগুণসমারোপনেন অত্তনো পরেসঞ্চ মিচ্ছাপটিপত্তিহেতুভাৰতো পসংসিযেন তস্স সব্ভাৰকরণতো চ। লোকেপি হি অসূরং সূরেন সমং করোন্তো গারয্হো হোতি, পগেৰ দুপ্পটিপন্নং সুপ্পটিপন্নেন সমং করোন্তোতি। সকেন ধনেনাতি অত্তনো সাপতেয্যেন। অপ্পমত্তকোৰ কলীতি দিট্ঠধম্মিকত্তা সপ্পটিকারত্তা চ অপ্পমত্তকো অপরাধো। অযং…পে॰… মহন্ততরো কলি কতূপচিতত্তা সম্পরাযিকত্তা অপ্পটিকারত্তা চ।
3-4. Tatiye kalinti aparādhaṃ. Vicinātīti ācinoti pasavati. Tena ca kalinā sukhaṃ na paṭilabhatīti tena aparādhena sukhaṃ na vindati. Nindiyappasaṃsāya hi pasaṃsiyanindāya ca samakova vipāko. Pasaṃsiyanindāti ca sampannaguṇaparidhaṃsanavasena pavattiyā mahāsāvajjatāya kaṭukataravipākā. Nindiyappasaṃsā pana kathaṃ tāya samavipākāti ce? Tasmiṃ avijjamānaguṇasamāropanena attano paresañca micchāpaṭipattihetubhāvato pasaṃsiyena tassa sabbhāvakaraṇato ca. Lokepi hi asūraṃ sūrena samaṃ karonto gārayho hoti, pageva duppaṭipannaṃ suppaṭipannena samaṃ karontoti. Sakena dhanenāti attano sāpateyyena. Appamattakova kalīti diṭṭhadhammikattā sappaṭikārattā ca appamattako aparādho. Ayaṃ…pe… mahantataro kali katūpacitattā samparāyikattā appaṭikārattā ca.
নিরব্বুদোতি গণনাৰিসেসো এসোতি আহ ‘‘নিরব্বুদগণনাযা’’তি, সতসহস্সং নিরব্বুদাতি অত্থো। নিরব্বুদপরিমাণং পন ৰস্সগণনায এৰং ৰেদিতব্বং। যথেৰ হি সতং সতসহস্সানং কোটি হোতি, এৰং সতং সতসহস্সানং কোটিযো পকোটি নাম হোতি, সতং সতসহস্সানং পকোটিযো কোটিপকোটি, সতং সতসহস্সকোটিপকোটিযো নহুতং, সতং সতসহস্সনহুতানি নিন্নহুতং, সতং সতসহস্সনিন্নহুতানি একং অব্বুদং, ততো ৰীসতিগুণিতং নিরব্বুদং। যং অরিযে গরহন্তো নিরযং উপপজ্জতীতি অরিযে গরহন্তো যং নিরব্বুদসঙ্খাতং নিরযং উপপজ্জতি, নিরব্বুদোতি চ পাটিযেক্কো নিরযো নত্থি, অৰীচিম্হিযেৰ পন নিরব্বুদগণনায পচ্চিতব্বট্ঠানস্সেতং নামং। চতুত্থং উত্তানমেৰ।
Nirabbudoti gaṇanāviseso esoti āha ‘‘nirabbudagaṇanāyā’’ti, satasahassaṃ nirabbudāti attho. Nirabbudaparimāṇaṃ pana vassagaṇanāya evaṃ veditabbaṃ. Yatheva hi sataṃ satasahassānaṃ koṭi hoti, evaṃ sataṃ satasahassānaṃ koṭiyo pakoṭi nāma hoti, sataṃ satasahassānaṃ pakoṭiyo koṭipakoṭi, sataṃ satasahassakoṭipakoṭiyo nahutaṃ, sataṃ satasahassanahutāni ninnahutaṃ, sataṃ satasahassaninnahutāni ekaṃ abbudaṃ, tato vīsatiguṇitaṃ nirabbudaṃ. Yaṃ ariye garahanto nirayaṃ upapajjatīti ariye garahanto yaṃ nirabbudasaṅkhātaṃ nirayaṃ upapajjati, nirabbudoti ca pāṭiyekko nirayo natthi, avīcimhiyeva pana nirabbudagaṇanāya paccitabbaṭṭhānassetaṃ nāmaṃ. Catutthaṃ uttānameva.
পঠমখতসুত্তাদিৰণ্ণনা নিট্ঠিতা।
Paṭhamakhatasuttādivaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / অঙ্গুত্তরনিকায • Aṅguttaranikāya
৩. পঠমখতসুত্তং • 3. Paṭhamakhatasuttaṃ
৪. দুতিযখতসুত্তং • 4. Dutiyakhatasuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / অঙ্গুত্তরনিকায (অট্ঠকথা) • Aṅguttaranikāya (aṭṭhakathā)
৩. পঠমখতসুত্তৰণ্ণনা • 3. Paṭhamakhatasuttavaṇṇanā
৪. দুতিযখতসুত্তৰণ্ণনা • 4. Dutiyakhatasuttavaṇṇanā
