| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
3. பட²மக²தஸுத்தவண்ணனா
3. Paṭhamakhatasuttavaṇṇanā
3. ததியங் து³கனிபாதவண்ணனாயங் வுத்தமேவ. கா³தா²ஸு பன நிந்தி³யந்தி நிந்தி³தப்³ப³யுத்தகங். நிந்த³தீதி க³ரஹதி. பஸங்ஸியோதி பஸங்ஸிதப்³ப³யுத்தோ. விசினாதி முகே²ன ஸோ கலிந்தி யோ ஏவங் பவத்தோ , தேன முகே²ன கலிங் விசினாதி நாம. கலினா தேன ஸுக²ங் ந விந்த³தீதி தேன ச கலினா ஸுக²ங் ந படிலப⁴தி. ஸப்³ப³ஸ்ஸாபி ஸஹாபி அத்தனாதி ஸப்³பே³னபி ஸகேன த⁴னேன சேவ அத்தனா ச ஸத்³தி⁴ங் யோ பராஜயோ, ஸோ அப்பமத்தகோவ கலீதி அத்தோ². யோ ஸுக³தேஸூதி யோ பன ஸம்மக்³க³தேஸு புக்³க³லேஸு சித்தங் பது³ஸ்ஸெய்ய, அயங் சித்தபதோ³ஸோவ ததோ கலிதோ மஹந்ததரோ கலி. இதா³னி தஸ்ஸ மஹந்ததரபா⁴வங் த³ஸ்ஸெந்தோ ஸதங் ஸஹஸ்ஸானந்திஆதி³மாஹ. தத்த² ஸதங் ஸஹஸ்ஸானந்தி நிரப்³பு³த³க³ணனாய ஸதஸஹஸ்ஸங். ச²த்திங்ஸதீதி அபரானி ச ச²த்திங்ஸதி நிரப்³பு³தா³னி. பஞ்ச சாதி அப்³பு³த³க³ணனாய ச பஞ்ச அப்³பு³தா³னி. யமரியக³ரஹீதி யங் அரியே க³ரஹந்தோ நிரயங் உபபஜ்ஜதி, தத்த² எத்தகங் ஆயுப்பமாணந்தி.
3. Tatiyaṃ dukanipātavaṇṇanāyaṃ vuttameva. Gāthāsu pana nindiyanti ninditabbayuttakaṃ. Nindatīti garahati. Pasaṃsiyoti pasaṃsitabbayutto. Vicināti mukhena so kalinti yo evaṃ pavatto , tena mukhena kaliṃ vicināti nāma. Kalinā tena sukhaṃ na vindatīti tena ca kalinā sukhaṃ na paṭilabhati. Sabbassāpi sahāpi attanāti sabbenapi sakena dhanena ceva attanā ca saddhiṃ yo parājayo, so appamattakova kalīti attho. Yo sugatesūti yo pana sammaggatesu puggalesu cittaṃ padusseyya, ayaṃ cittapadosova tato kalito mahantataro kali. Idāni tassa mahantatarabhāvaṃ dassento sataṃ sahassānantiādimāha. Tattha sataṃ sahassānanti nirabbudagaṇanāya satasahassaṃ. Chattiṃsatīti aparāni ca chattiṃsati nirabbudāni. Pañca cāti abbudagaṇanāya ca pañca abbudāni. Yamariyagarahīti yaṃ ariye garahanto nirayaṃ upapajjati, tattha ettakaṃ āyuppamāṇanti.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 3. பட²மக²தஸுத்தங் • 3. Paṭhamakhatasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 3-4. பட²மக²தஸுத்தாதி³வண்ணனா • 3-4. Paṭhamakhatasuttādivaṇṇanā
