| Library / Tipiṭaka / তিপিটক • Tipiṭaka / অঙ্গুত্তরনিকায • Aṅguttaranikāya |
৩. পঠমকোধগরুসুত্তং
3. Paṭhamakodhagarusuttaṃ
৪৩. ‘‘চত্তারোমে, ভিক্খৰে, পুগ্গলা সন্তো সংৰিজ্জমানা লোকস্মিং। কতমে চত্তারো? কোধগরু ন সদ্ধম্মগরু, মক্খগরু ন সদ্ধম্মগরু, লাভগরু ন সদ্ধম্মগরু, সক্কারগরু ন সদ্ধম্মগরু। ইমে খো, ভিক্খৰে, চত্তারো পুগ্গলা সন্তো সংৰিজ্জমানা লোকস্মিং।
43. ‘‘Cattārome, bhikkhave, puggalā santo saṃvijjamānā lokasmiṃ. Katame cattāro? Kodhagaru na saddhammagaru, makkhagaru na saddhammagaru, lābhagaru na saddhammagaru, sakkāragaru na saddhammagaru. Ime kho, bhikkhave, cattāro puggalā santo saṃvijjamānā lokasmiṃ.
‘‘চত্তারোমে, ভিক্খৰে, পুগ্গলা সন্তো সংৰিজ্জমানা লোকস্মিং। কতমে চত্তারো? সদ্ধম্মগরু ন কোধগরু, সদ্ধম্মগরু ন মক্খগরু, সদ্ধম্মগরু ন লাভগরু , সদ্ধম্মগরু ন সক্কারগরু। ইমে খো, ভিক্খৰে, চত্তারো পুগ্গলা সন্তো সংৰিজ্জমানা লোকস্মি’’ন্তি।
‘‘Cattārome, bhikkhave, puggalā santo saṃvijjamānā lokasmiṃ. Katame cattāro? Saddhammagaru na kodhagaru, saddhammagaru na makkhagaru, saddhammagaru na lābhagaru , saddhammagaru na sakkāragaru. Ime kho, bhikkhave, cattāro puggalā santo saṃvijjamānā lokasmi’’nti.
‘‘কোধমক্খগরূ ভিক্খূ, লাভসক্কারগারৰা।
‘‘Kodhamakkhagarū bhikkhū, lābhasakkāragāravā;
ন তে ধম্মে ৰিরূহন্তি, সম্মাসম্বুদ্ধদেসিতে॥
Na te dhamme virūhanti, sammāsambuddhadesite.
‘‘যে চ সদ্ধম্মগরুনো, ৰিহংসু ৰিহরন্তি চ।
‘‘Ye ca saddhammagaruno, vihaṃsu viharanti ca;
তে ৰে ধম্মে ৰিরূহন্তি, সম্মাসম্বুদ্ধদেসিতে’’তি॥ ততিযং।
Te ve dhamme virūhanti, sammāsambuddhadesite’’ti. tatiyaṃ;
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) / ৩-৪. কোধগরুসুত্তদ্ৰযৰণ্ণনা • 3-4. Kodhagarusuttadvayavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / অঙ্গুত্তরনিকায (টীকা) • Aṅguttaranikāya (ṭīkā) / ২-৪. পঞ্হব্যাকরণসুত্তাদিৰণ্ণনা • 2-4. Pañhabyākaraṇasuttādivaṇṇanā
