| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය • Aṅguttaranikāya |
3. පඨමකොධගරුසුත්‌තං
3. Paṭhamakodhagarusuttaṃ
43. ‘‘චත්‌තාරොමෙ, භික්‌ඛවෙ, පුග්‌ගලා සන්‌තො සංවිජ්‌ජමානා ලොකස්‌මිං. කතමෙ චත්‌තාරො? කොධගරු න සද්‌ධම්‌මගරු, මක්‌ඛගරු න සද්‌ධම්‌මගරු, ලාභගරු න සද්‌ධම්‌මගරු, සක්‌කාරගරු න සද්‌ධම්‌මගරු. ඉමෙ ඛො, භික්‌ඛවෙ, චත්‌තාරො පුග්‌ගලා සන්‌තො සංවිජ්‌ජමානා ලොකස්‌මිං.
43. ‘‘Cattārome, bhikkhave, puggalā santo saṃvijjamānā lokasmiṃ. Katame cattāro? Kodhagaru na saddhammagaru, makkhagaru na saddhammagaru, lābhagaru na saddhammagaru, sakkāragaru na saddhammagaru. Ime kho, bhikkhave, cattāro puggalā santo saṃvijjamānā lokasmiṃ.
‘‘චත්‌තාරොමෙ, භික්‌ඛවෙ, පුග්‌ගලා සන්‌තො සංවිජ්‌ජමානා ලොකස්‌මිං. කතමෙ චත්‌තාරො? සද්‌ධම්‌මගරු න කොධගරු, සද්‌ධම්‌මගරු න මක්‌ඛගරු, සද්‌ධම්‌මගරු න ලාභගරු , සද්‌ධම්‌මගරු න සක්‌කාරගරු. ඉමෙ ඛො, භික්‌ඛවෙ, චත්‌තාරො පුග්‌ගලා සන්‌තො සංවිජ්‌ජමානා ලොකස්‌මි’’න්‌ති.
‘‘Cattārome, bhikkhave, puggalā santo saṃvijjamānā lokasmiṃ. Katame cattāro? Saddhammagaru na kodhagaru, saddhammagaru na makkhagaru, saddhammagaru na lābhagaru , saddhammagaru na sakkāragaru. Ime kho, bhikkhave, cattāro puggalā santo saṃvijjamānā lokasmi’’nti.
‘‘කොධමක්‌ඛගරූ භික්‌ඛූ, ලාභසක්‌කාරගාරවා;
‘‘Kodhamakkhagarū bhikkhū, lābhasakkāragāravā;
න තෙ ධම්‌මෙ විරූහන්‌ති, සම්‌මාසම්‌බුද්‌ධදෙසිතෙ.
Na te dhamme virūhanti, sammāsambuddhadesite.
‘‘යෙ ච සද්‌ධම්‌මගරුනො, විහංසු විහරන්‌ති ච;
‘‘Ye ca saddhammagaruno, vihaṃsu viharanti ca;
තෙ වෙ ධම්‌මෙ විරූහන්‌ති, සම්‌මාසම්‌බුද්‌ධදෙසිතෙ’’ති. තතියං;
Te ve dhamme virūhanti, sammāsambuddhadesite’’ti. tatiyaṃ;
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) / 3-4. කොධගරුසුත්‌තද්‌වයවණ්‌ණනා • 3-4. Kodhagarusuttadvayavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 2-4. පඤ්‌හබ්‍යාකරණසුත්‌තාදිවණ්‌ණනා • 2-4. Pañhabyākaraṇasuttādivaṇṇanā
