Library / Tipiṭaka / తిపిటక • Tipiṭaka / అఙ్గుత్తరనికాయ • Aṅguttaranikāya

    ౯. పఠమకోసలసుత్తం

    9. Paṭhamakosalasuttaṃ

    ౨౯. ‘‘యావతా, భిక్ఖవే, కాసికోసలా, యావతా రఞ్ఞో పసేనదిస్స కోసలస్స విజితం 1, రాజా తత్థ పసేనది కోసలో అగ్గమక్ఖాయతి. రఞ్ఞోపి ఖో, భిక్ఖవే, పసేనదిస్స కోసలస్స అత్థేవ అఞ్ఞథత్తం అత్థి విపరిణామో. ఏవం పస్సం, భిక్ఖవే, సుతవా అరియసావకో తస్మిమ్పి నిబ్బిన్దతి. తస్మిం నిబ్బిన్దన్తో అగ్గే విరజ్జతి, పగేవ హీనస్మిం.

    29. ‘‘Yāvatā, bhikkhave, kāsikosalā, yāvatā rañño pasenadissa kosalassa vijitaṃ 2, rājā tattha pasenadi kosalo aggamakkhāyati. Raññopi kho, bhikkhave, pasenadissa kosalassa attheva aññathattaṃ atthi vipariṇāmo. Evaṃ passaṃ, bhikkhave, sutavā ariyasāvako tasmimpi nibbindati. Tasmiṃ nibbindanto agge virajjati, pageva hīnasmiṃ.

    ‘‘యావతా, భిక్ఖవే, చన్దిమసూరియా పరిహరన్తి దిసా భన్తి విరోచమానా, తావ సహస్సధా లోకో. తస్మిం సహస్సధా లోకే సహస్సం చన్దానం సహస్సం సూరియానం 3 సహస్సం సినేరుపబ్బతరాజానం సహస్సం జమ్బుదీపానం సహస్సం అపరగోయానానం సహస్సం ఉత్తరకురూనం సహస్సం పుబ్బవిదేహానం చత్తారి మహాసముద్దసహస్సాని చత్తారి మహారాజసహస్సాని సహస్సం చాతుమహారాజికానం సహస్సం తావతింసానం సహస్సం యామానం సహస్సం తుసితానం సహస్సం నిమ్మానరతీనం సహస్సం పరనిమ్మితవసవత్తీనం సహస్సం బ్రహ్మలోకానం. యావతా, భిక్ఖవే, సహస్సీ లోకధాతు, మహాబ్రహ్మా తత్థ అగ్గమక్ఖాయతి. మహాబ్రహ్మునోపి ఖో, భిక్ఖవే, అత్థేవ అఞ్ఞథత్తం అత్థి విపరిణామో. ఏవం పస్సం, భిక్ఖవే, సుతవా అరియసావకో తస్మిమ్పి నిబ్బిన్దతి. తస్మిం నిబ్బిన్దన్తో అగ్గే విరజ్జతి, పగేవ హీనస్మిం.

    ‘‘Yāvatā, bhikkhave, candimasūriyā pariharanti disā bhanti virocamānā, tāva sahassadhā loko. Tasmiṃ sahassadhā loke sahassaṃ candānaṃ sahassaṃ sūriyānaṃ 4 sahassaṃ sinerupabbatarājānaṃ sahassaṃ jambudīpānaṃ sahassaṃ aparagoyānānaṃ sahassaṃ uttarakurūnaṃ sahassaṃ pubbavidehānaṃ cattāri mahāsamuddasahassāni cattāri mahārājasahassāni sahassaṃ cātumahārājikānaṃ sahassaṃ tāvatiṃsānaṃ sahassaṃ yāmānaṃ sahassaṃ tusitānaṃ sahassaṃ nimmānaratīnaṃ sahassaṃ paranimmitavasavattīnaṃ sahassaṃ brahmalokānaṃ. Yāvatā, bhikkhave, sahassī lokadhātu, mahābrahmā tattha aggamakkhāyati. Mahābrahmunopi kho, bhikkhave, attheva aññathattaṃ atthi vipariṇāmo. Evaṃ passaṃ, bhikkhave, sutavā ariyasāvako tasmimpi nibbindati. Tasmiṃ nibbindanto agge virajjati, pageva hīnasmiṃ.

    ‘‘హోతి సో, భిక్ఖవే, సమయో యం అయం లోకో సంవట్టతి. సంవట్టమానే, భిక్ఖవే, లోకే యేభుయ్యేన సత్తా ఆభస్సరసంవత్తనికా 5 భవన్తి. తే తత్థ హోన్తి మనోమయా పీతిభక్ఖా సయంపభా అన్తలిక్ఖేచరా సుభట్ఠాయినో చిరం దీఘమద్ధానం తిట్ఠన్తి. సంవట్టమానే, భిక్ఖవే, లోకే ఆభస్సరా దేవా అగ్గమక్ఖాయన్తి. ఆభస్సరానమ్పి ఖో, భిక్ఖవే, దేవానం అత్థేవ అఞ్ఞథత్తం అత్థి విపరిణామో. ఏవం పస్సం, భిక్ఖవే, సుతవా అరియసావకో తస్మిమ్పి నిబ్బిన్దతి . తస్మిం నిబ్బిన్దన్తో అగ్గే విరజ్జతి, పగేవ హీనస్మిం.

    ‘‘Hoti so, bhikkhave, samayo yaṃ ayaṃ loko saṃvaṭṭati. Saṃvaṭṭamāne, bhikkhave, loke yebhuyyena sattā ābhassarasaṃvattanikā 6 bhavanti. Te tattha honti manomayā pītibhakkhā sayaṃpabhā antalikkhecarā subhaṭṭhāyino ciraṃ dīghamaddhānaṃ tiṭṭhanti. Saṃvaṭṭamāne, bhikkhave, loke ābhassarā devā aggamakkhāyanti. Ābhassarānampi kho, bhikkhave, devānaṃ attheva aññathattaṃ atthi vipariṇāmo. Evaṃ passaṃ, bhikkhave, sutavā ariyasāvako tasmimpi nibbindati . Tasmiṃ nibbindanto agge virajjati, pageva hīnasmiṃ.

    7 ‘‘దసయిమాని, భిక్ఖవే, కసిణాయతనాని. కతమాని దస? పథవీకసిణమేకో సఞ్జానాతి ఉద్ధం అధో తిరియం అద్వయం అప్పమాణం; ఆపోకసిణమేకో సఞ్జానాతి…పే॰… తేజోకసిణమేకో సఞ్జానాతి… వాయోకసిణమేకో సఞ్జానాతి… నీలకసిణమేకో సఞ్జానాతి… పీతకసిణమేకో సఞ్జానాతి… లోహితకసిణమేకో సఞ్జానాతి… ఓదాతకసిణమేకో సఞ్జానాతి… ఆకాసకసిణమేకో సఞ్జానాతి… విఞ్ఞాణకసిణమేకో సఞ్జానాతి ఉద్ధం అధో తిరియం అద్వయం అప్పమాణం. ఇమాని ఖో, భిక్ఖవే, దస కసిణాయతనాని.

    8 ‘‘Dasayimāni, bhikkhave, kasiṇāyatanāni. Katamāni dasa? Pathavīkasiṇameko sañjānāti uddhaṃ adho tiriyaṃ advayaṃ appamāṇaṃ; āpokasiṇameko sañjānāti…pe… tejokasiṇameko sañjānāti… vāyokasiṇameko sañjānāti… nīlakasiṇameko sañjānāti… pītakasiṇameko sañjānāti… lohitakasiṇameko sañjānāti… odātakasiṇameko sañjānāti… ākāsakasiṇameko sañjānāti… viññāṇakasiṇameko sañjānāti uddhaṃ adho tiriyaṃ advayaṃ appamāṇaṃ. Imāni kho, bhikkhave, dasa kasiṇāyatanāni.

    ‘‘ఏతదగ్గం, భిక్ఖవే, ఇమేసం దసన్నం కసిణాయతనానం యదిదం విఞ్ఞాణకసిణం ఏకో సఞ్జానాతి ఉద్ధం అధో తిరియం అద్వయం అప్పమాణం. ఏవంసఞ్ఞినోపి ఖో, భిక్ఖవే, సన్తి సత్తా. ఏవంసఞ్ఞీనమ్పి ఖో, భిక్ఖవే, సత్తానం అత్థేవ అఞ్ఞథత్తం అత్థి విపరిణామో. ఏవం పస్సం , భిక్ఖవే, సుతవా అరియసావకో తస్మిమ్పి నిబ్బిన్దతి. తస్మిం నిబ్బిన్దన్తో అగ్గే విరజ్జతి, పగేవ హీనస్మిం.

    ‘‘Etadaggaṃ, bhikkhave, imesaṃ dasannaṃ kasiṇāyatanānaṃ yadidaṃ viññāṇakasiṇaṃ eko sañjānāti uddhaṃ adho tiriyaṃ advayaṃ appamāṇaṃ. Evaṃsaññinopi kho, bhikkhave, santi sattā. Evaṃsaññīnampi kho, bhikkhave, sattānaṃ attheva aññathattaṃ atthi vipariṇāmo. Evaṃ passaṃ , bhikkhave, sutavā ariyasāvako tasmimpi nibbindati. Tasmiṃ nibbindanto agge virajjati, pageva hīnasmiṃ.

    9 ‘‘అట్ఠిమాని, భిక్ఖవే, అభిభాయతనాని. కతమాని అట్ఠ? అజ్ఝత్తం రూపసఞ్ఞీ ఏకో బహిద్ధా రూపాని పస్సతి పరిత్తాని సువణ్ణదుబ్బణ్ణాని; ‘తాని అభిభుయ్య జానామి పస్సామీ’తి, ఏవంసఞ్ఞీ హోతి. ఇదం పఠమం అభిభాయతనం.

    10 ‘‘Aṭṭhimāni, bhikkhave, abhibhāyatanāni. Katamāni aṭṭha? Ajjhattaṃ rūpasaññī eko bahiddhā rūpāni passati parittāni suvaṇṇadubbaṇṇāni; ‘tāni abhibhuyya jānāmi passāmī’ti, evaṃsaññī hoti. Idaṃ paṭhamaṃ abhibhāyatanaṃ.

    ‘‘అజ్ఝత్తం రూపసఞ్ఞీ ఏకో బహిద్ధా రూపాని పస్సతి అప్పమాణాని సువణ్ణదుబ్బణ్ణాని; ‘తాని అభిభుయ్య జానామి పస్సామీ’తి, ఏవంసఞ్ఞీ హోతి. ఇదం దుతియం అభిభాయతనం.

    ‘‘Ajjhattaṃ rūpasaññī eko bahiddhā rūpāni passati appamāṇāni suvaṇṇadubbaṇṇāni; ‘tāni abhibhuyya jānāmi passāmī’ti, evaṃsaññī hoti. Idaṃ dutiyaṃ abhibhāyatanaṃ.

    ‘‘అజ్ఝత్తం అరూపసఞ్ఞీ ఏకో బహిద్ధా రూపాని పస్సతి పరిత్తాని సువణ్ణదుబ్బణ్ణాని; ‘తాని అభిభుయ్య జానామి పస్సామీ’తి, ఏవంసఞ్ఞీ హోతి. ఇదం తతియం అభిభాయతనం.

    ‘‘Ajjhattaṃ arūpasaññī eko bahiddhā rūpāni passati parittāni suvaṇṇadubbaṇṇāni; ‘tāni abhibhuyya jānāmi passāmī’ti, evaṃsaññī hoti. Idaṃ tatiyaṃ abhibhāyatanaṃ.

    ‘‘అజ్ఝత్తం అరూపసఞ్ఞీ ఏకో బహిద్ధా రూపాని పస్సతి అప్పమాణాని సువణ్ణదుబ్బణ్ణాని; ‘తాని అభిభుయ్య జానామి పస్సామీ’తి, ఏవంసఞ్ఞీ హోతి. ఇదం చతుత్థం అభిభాయతనం.

    ‘‘Ajjhattaṃ arūpasaññī eko bahiddhā rūpāni passati appamāṇāni suvaṇṇadubbaṇṇāni; ‘tāni abhibhuyya jānāmi passāmī’ti, evaṃsaññī hoti. Idaṃ catutthaṃ abhibhāyatanaṃ.

    ‘‘అజ్ఝత్తం అరూపసఞ్ఞీ ఏకో బహిద్ధా రూపాని పస్సతి నీలాని నీలవణ్ణాని నీలనిదస్సనాని నీలనిభాసాని. సేయ్యథాపి నామ ఉమాపుప్ఫం నీలం నీలవణ్ణం నీలనిదస్సనం నీలనిభాసం, సేయ్యథా వా పన తం వత్థం బారాణసేయ్యకం ఉభతోభాగవిమట్ఠం నీలం నీలవణ్ణం నీలనిదస్సనం నీలనిభాసం; ఏవమేవం అజ్ఝత్తం అరూపసఞ్ఞీ ఏకో బహిద్ధా రూపాని పస్సతి నీలాని నీలవణ్ణాని నీలనిదస్సనాని నీలనిభాసాని; ‘తాని అభిభుయ్య జానామి పస్సామీ’తి, ఏవంసఞ్ఞీ హోతి. ఇదం పఞ్చమం అభిభాయతనం.

    ‘‘Ajjhattaṃ arūpasaññī eko bahiddhā rūpāni passati nīlāni nīlavaṇṇāni nīlanidassanāni nīlanibhāsāni. Seyyathāpi nāma umāpupphaṃ nīlaṃ nīlavaṇṇaṃ nīlanidassanaṃ nīlanibhāsaṃ, seyyathā vā pana taṃ vatthaṃ bārāṇaseyyakaṃ ubhatobhāgavimaṭṭhaṃ nīlaṃ nīlavaṇṇaṃ nīlanidassanaṃ nīlanibhāsaṃ; evamevaṃ ajjhattaṃ arūpasaññī eko bahiddhā rūpāni passati nīlāni nīlavaṇṇāni nīlanidassanāni nīlanibhāsāni; ‘tāni abhibhuyya jānāmi passāmī’ti, evaṃsaññī hoti. Idaṃ pañcamaṃ abhibhāyatanaṃ.

    ‘‘అజ్ఝత్తం అరూపసఞ్ఞీ ఏకో బహిద్ధా రూపాని పస్సతి పీతాని పీతవణ్ణాని పీతనిదస్సనాని పీతనిభాసాని. సేయ్యథాపి నామ కణికారపుప్ఫం పీతం పీతవణ్ణం పీతనిదస్సనం పీతనిభాసం, సేయ్యథా వా పన తం వత్థం బారాణసేయ్యకం ఉభతోభాగవిమట్ఠం పీతం పీతవణ్ణం పీతనిదస్సనం పీతనిభాసం; ఏవమేవం అజ్ఝత్తం అరూపసఞ్ఞీ ఏకో బహిద్ధా రూపాని పస్సతి పీతాని పీతవణ్ణాని పీతనిదస్సనాని పీతనిభాసాని; ‘తాని అభిభుయ్య జానామి పస్సామీ’తి, ఏవంసఞ్ఞీ హోతి. ఇదం ఛట్ఠం అభిభాయతనం.

    ‘‘Ajjhattaṃ arūpasaññī eko bahiddhā rūpāni passati pītāni pītavaṇṇāni pītanidassanāni pītanibhāsāni. Seyyathāpi nāma kaṇikārapupphaṃ pītaṃ pītavaṇṇaṃ pītanidassanaṃ pītanibhāsaṃ, seyyathā vā pana taṃ vatthaṃ bārāṇaseyyakaṃ ubhatobhāgavimaṭṭhaṃ pītaṃ pītavaṇṇaṃ pītanidassanaṃ pītanibhāsaṃ; evamevaṃ ajjhattaṃ arūpasaññī eko bahiddhā rūpāni passati pītāni pītavaṇṇāni pītanidassanāni pītanibhāsāni; ‘tāni abhibhuyya jānāmi passāmī’ti, evaṃsaññī hoti. Idaṃ chaṭṭhaṃ abhibhāyatanaṃ.

    ‘‘అజ్ఝత్తం అరూపసఞ్ఞీ ఏకో బహిద్ధా రూపాని పస్సతి లోహితకాని లోహితకవణ్ణాని లోహితకనిదస్సనాని లోహితకనిభాసాని. సేయ్యథాపి నామ బన్ధుజీవకపుప్ఫం లోహితకం లోహితకవణ్ణం లోహితకనిదస్సనం లోహితకనిభాసం, సేయ్యథా వా పన తం వత్థం బారాణసేయ్యకం ఉభతోభాగవిమట్ఠం లోహితకం లోహితకవణ్ణం లోహితకనిదస్సనం లోహితకనిభాసం; ఏవమేవం అజ్ఝత్తం అరూపసఞ్ఞీ ఏకో బహిద్ధా రూపాని పస్సతి లోహితకాని లోహితకవణ్ణాని లోహితకనిదస్సనాని లోహితకనిభాసాని; ‘తాని అభిభుయ్య జానామి పస్సామీ’తి, ఏవంసఞ్ఞీ హోతి. ఇదం సత్తమం అభిభాయతనం.

    ‘‘Ajjhattaṃ arūpasaññī eko bahiddhā rūpāni passati lohitakāni lohitakavaṇṇāni lohitakanidassanāni lohitakanibhāsāni. Seyyathāpi nāma bandhujīvakapupphaṃ lohitakaṃ lohitakavaṇṇaṃ lohitakanidassanaṃ lohitakanibhāsaṃ, seyyathā vā pana taṃ vatthaṃ bārāṇaseyyakaṃ ubhatobhāgavimaṭṭhaṃ lohitakaṃ lohitakavaṇṇaṃ lohitakanidassanaṃ lohitakanibhāsaṃ; evamevaṃ ajjhattaṃ arūpasaññī eko bahiddhā rūpāni passati lohitakāni lohitakavaṇṇāni lohitakanidassanāni lohitakanibhāsāni; ‘tāni abhibhuyya jānāmi passāmī’ti, evaṃsaññī hoti. Idaṃ sattamaṃ abhibhāyatanaṃ.

    ‘‘అజ్ఝత్తం అరూపసఞ్ఞీ ఏకో బహిద్ధా రూపాని పస్సతి ఓదాతాని ఓదాతవణ్ణాని ఓదాతనిదస్సనాని ఓదాతనిభాసాని. సేయ్యథాపి నామ ఓసధితారకా ఓదాతా ఓదాతవణ్ణా ఓదాతనిదస్సనా ఓదాతనిభాసా, సేయ్యథా వా పన తం వత్థం బారాణసేయ్యకం ఉభతోభాగవిమట్ఠం ఓదాతం ఓదాతవణ్ణం ఓదాతనిదస్సనం ఓదాతనిభాసం; ఏవమేవం అజ్ఝత్తం అరూపసఞ్ఞీ ఏకో బహిద్ధా రూపాని పస్సతి ఓదాతాని ఓదాతవణ్ణాని ఓదాతనిదస్సనాని ఓదాతనిభాసాని; ‘తాని అభిభుయ్య జానామి పస్సామీ’తి, ఏవంసఞ్ఞీ హోతి. ఇదం అట్ఠమం అభిభాయతనం. ఇమాని ఖో, భిక్ఖవే, అట్ఠ అభిభాయతనాని.

    ‘‘Ajjhattaṃ arūpasaññī eko bahiddhā rūpāni passati odātāni odātavaṇṇāni odātanidassanāni odātanibhāsāni. Seyyathāpi nāma osadhitārakā odātā odātavaṇṇā odātanidassanā odātanibhāsā, seyyathā vā pana taṃ vatthaṃ bārāṇaseyyakaṃ ubhatobhāgavimaṭṭhaṃ odātaṃ odātavaṇṇaṃ odātanidassanaṃ odātanibhāsaṃ; evamevaṃ ajjhattaṃ arūpasaññī eko bahiddhā rūpāni passati odātāni odātavaṇṇāni odātanidassanāni odātanibhāsāni; ‘tāni abhibhuyya jānāmi passāmī’ti, evaṃsaññī hoti. Idaṃ aṭṭhamaṃ abhibhāyatanaṃ. Imāni kho, bhikkhave, aṭṭha abhibhāyatanāni.

    ‘‘ఏతదగ్గం, భిక్ఖవే, ఇమేసం అట్ఠన్నం అభిభాయతనానం యదిదం అజ్ఝత్తం అరూపసఞ్ఞీ ఏకో బహిద్ధా రూపాని పస్సతి ఓదాతాని ఓదాతవణ్ణాని ఓదాతనిదస్సనాని ఓదాతనిభాసాని; ‘తాని అభిభుయ్య జానామి పస్సామీ’తి, ఏవంసఞ్ఞీ హోతి. ఏవంసఞ్ఞినోపి ఖో, భిక్ఖవే, సన్తి సత్తా. ఏవంసఞ్ఞీనమ్పి ఖో, భిక్ఖవే, సత్తానం అత్థేవ అఞ్ఞథత్తం అత్థి విపరిణామో. ఏవం పస్సం, భిక్ఖవే, సుతవా అరియసావకో తస్మిమ్పి నిబ్బిన్దతి. తస్మిం నిబ్బిన్దన్తో అగ్గే విరజ్జతి, పగేవ హీనస్మిం.

    ‘‘Etadaggaṃ, bhikkhave, imesaṃ aṭṭhannaṃ abhibhāyatanānaṃ yadidaṃ ajjhattaṃ arūpasaññī eko bahiddhā rūpāni passati odātāni odātavaṇṇāni odātanidassanāni odātanibhāsāni; ‘tāni abhibhuyya jānāmi passāmī’ti, evaṃsaññī hoti. Evaṃsaññinopi kho, bhikkhave, santi sattā. Evaṃsaññīnampi kho, bhikkhave, sattānaṃ attheva aññathattaṃ atthi vipariṇāmo. Evaṃ passaṃ, bhikkhave, sutavā ariyasāvako tasmimpi nibbindati. Tasmiṃ nibbindanto agge virajjati, pageva hīnasmiṃ.

    ‘‘చతస్సో ఇమా, భిక్ఖవే, పటిపదా. కతమా చతస్సో? దుక్ఖా పటిపదా దన్ధాభిఞ్ఞా, దుక్ఖా పటిపదా ఖిప్పాభిఞ్ఞా, సుఖా పటిపదా దన్ధాభిఞ్ఞా, సుఖా పటిపదా ఖిప్పాభిఞ్ఞా – ఇమా ఖో, భిక్ఖవే, చతస్సో పటిపదా.

    ‘‘Catasso imā, bhikkhave, paṭipadā. Katamā catasso? Dukkhā paṭipadā dandhābhiññā, dukkhā paṭipadā khippābhiññā, sukhā paṭipadā dandhābhiññā, sukhā paṭipadā khippābhiññā – imā kho, bhikkhave, catasso paṭipadā.

    ‘‘ఏతదగ్గం, భిక్ఖవే, ఇమాసం చతున్నం పటిపదానం యదిదం సుఖా పటిపదా ఖిప్పాభిఞ్ఞా. ఏవంపటిపన్నాపి ఖో, భిక్ఖవే, సన్తి సత్తా. ఏవంపటిపన్నానమ్పి ఖో, భిక్ఖవే, సత్తానం అత్థేవ అఞ్ఞథత్తం అత్థి విపరిణామో. ఏవం పస్సం, భిక్ఖవే, సుతవా అరియసావకో తస్మిమ్పి నిబ్బిన్దతి. తస్మిం నిబ్బిన్దన్తో అగ్గే విరజ్జతి, పగేవ హీనస్మిం.

    ‘‘Etadaggaṃ, bhikkhave, imāsaṃ catunnaṃ paṭipadānaṃ yadidaṃ sukhā paṭipadā khippābhiññā. Evaṃpaṭipannāpi kho, bhikkhave, santi sattā. Evaṃpaṭipannānampi kho, bhikkhave, sattānaṃ attheva aññathattaṃ atthi vipariṇāmo. Evaṃ passaṃ, bhikkhave, sutavā ariyasāvako tasmimpi nibbindati. Tasmiṃ nibbindanto agge virajjati, pageva hīnasmiṃ.

    ‘‘చతస్సో ఇమా, భిక్ఖవే, సఞ్ఞా. కతమా చతస్సో? పరిత్తమేకో సఞ్జానాతి, మహగ్గతమేకో సఞ్జానాతి, అప్పమాణమేకో సఞ్జానాతి, ‘నత్థి కిఞ్చీ’తి ఆకిఞ్చఞ్ఞాయతనమేకో సఞ్జానాతి – ఇమా ఖో, భిక్ఖవే, చతస్సో సఞ్ఞా.

    ‘‘Catasso imā, bhikkhave, saññā. Katamā catasso? Parittameko sañjānāti, mahaggatameko sañjānāti, appamāṇameko sañjānāti, ‘natthi kiñcī’ti ākiñcaññāyatanameko sañjānāti – imā kho, bhikkhave, catasso saññā.

    ‘‘ఏతదగ్గం, భిక్ఖవే, ఇమాసం చతున్నం సఞ్ఞానం యదిదం ‘నత్థి కిఞ్చీ’తి ఆకిఞ్చఞ్ఞాయతనమేకో సఞ్జానాతి. ఏవంసఞ్ఞినోపి ఖో, భిక్ఖవే, సన్తి సత్తా. ఏవంసఞ్ఞీనమ్పి ఖో, భిక్ఖవే, సత్తానం అత్థేవ అఞ్ఞథత్తం అత్థి విపరిణామో. ఏవం పస్సం, భిక్ఖవే, సుతవా అరియసావకో తస్మిమ్పి నిబ్బిన్దతి. తస్మిం నిబ్బిన్దన్తో అగ్గే విరజ్జతి, పగేవ హీనస్మిం.

    ‘‘Etadaggaṃ, bhikkhave, imāsaṃ catunnaṃ saññānaṃ yadidaṃ ‘natthi kiñcī’ti ākiñcaññāyatanameko sañjānāti. Evaṃsaññinopi kho, bhikkhave, santi sattā. Evaṃsaññīnampi kho, bhikkhave, sattānaṃ attheva aññathattaṃ atthi vipariṇāmo. Evaṃ passaṃ, bhikkhave, sutavā ariyasāvako tasmimpi nibbindati. Tasmiṃ nibbindanto agge virajjati, pageva hīnasmiṃ.

    ‘‘ఏతదగ్గం , భిక్ఖవే, బాహిరకానం దిట్ఠిగతానం యదిదం ‘నో చస్సం, నో చ మే సియా, న భవిస్సామి, న మే భవిస్సతీ’తి. ఏవందిట్ఠినో, భిక్ఖవే , ఏతం పాటికఙ్ఖం – ‘యా చాయం భవే అప్పటికుల్యతా, సా చస్స న భవిస్సతి; యా చాయం భవనిరోధే పాటికుల్యతా, సా చస్స న భవిస్సతీ’తి. ఏవందిట్ఠినోపి ఖో, భిక్ఖవే, సన్తి సత్తా. ఏవందిట్ఠీనమ్పి ఖో, భిక్ఖవే, సత్తానం అత్థేవ అఞ్ఞథత్తం అత్థి విపరిణామో. ఏవం పస్సం, భిక్ఖవే, సుతవా అరియసావకో తస్మిమ్పి నిబ్బిన్దతి. తస్మిం నిబ్బిన్దన్తో అగ్గే విరజ్జతి, పగేవ హీనస్మిం.

    ‘‘Etadaggaṃ , bhikkhave, bāhirakānaṃ diṭṭhigatānaṃ yadidaṃ ‘no cassaṃ, no ca me siyā, na bhavissāmi, na me bhavissatī’ti. Evaṃdiṭṭhino, bhikkhave , etaṃ pāṭikaṅkhaṃ – ‘yā cāyaṃ bhave appaṭikulyatā, sā cassa na bhavissati; yā cāyaṃ bhavanirodhe pāṭikulyatā, sā cassa na bhavissatī’ti. Evaṃdiṭṭhinopi kho, bhikkhave, santi sattā. Evaṃdiṭṭhīnampi kho, bhikkhave, sattānaṃ attheva aññathattaṃ atthi vipariṇāmo. Evaṃ passaṃ, bhikkhave, sutavā ariyasāvako tasmimpi nibbindati. Tasmiṃ nibbindanto agge virajjati, pageva hīnasmiṃ.

    ‘‘సన్తి, భిక్ఖవే, ఏకే సమణబ్రాహ్మణా పరమత్థవిసుద్ధిం పఞ్ఞాపేన్తి. ఏతదగ్గం, భిక్ఖవే, పరమత్థవిసుద్ధిం పఞ్ఞాపేన్తానం యదిదం సబ్బసో ఆకిఞ్చఞ్ఞాయతనం సమతిక్కమ్మ నేవసఞ్ఞానాసఞ్ఞాయతనం ఉపసమ్పజ్జ విహరతి. తే తదభిఞ్ఞాయ తస్స సచ్ఛికిరియాయ ధమ్మం దేసేన్తి. ఏవంవాదినోపి ఖో, భిక్ఖవే, సన్తి సత్తా. ఏవంవాదీనమ్పి ఖో, భిక్ఖవే, సత్తానం అత్థేవ అఞ్ఞథత్తం అత్థి విపరిణామో. ఏవం పస్సం, భిక్ఖవే, సుతవా అరియసావకో తస్మిమ్పి నిబ్బిన్దతి. తస్మిం నిబ్బిన్దన్తో అగ్గే విరజ్జతి, పగేవ హీనస్మిం.

    ‘‘Santi, bhikkhave, eke samaṇabrāhmaṇā paramatthavisuddhiṃ paññāpenti. Etadaggaṃ, bhikkhave, paramatthavisuddhiṃ paññāpentānaṃ yadidaṃ sabbaso ākiñcaññāyatanaṃ samatikkamma nevasaññānāsaññāyatanaṃ upasampajja viharati. Te tadabhiññāya tassa sacchikiriyāya dhammaṃ desenti. Evaṃvādinopi kho, bhikkhave, santi sattā. Evaṃvādīnampi kho, bhikkhave, sattānaṃ attheva aññathattaṃ atthi vipariṇāmo. Evaṃ passaṃ, bhikkhave, sutavā ariyasāvako tasmimpi nibbindati. Tasmiṃ nibbindanto agge virajjati, pageva hīnasmiṃ.

    ‘‘సన్తి, భిక్ఖవే, ఏకే సమణబ్రాహ్మణా పరమదిట్ఠధమ్మనిబ్బానం పఞ్ఞాపేన్తి. ఏతదగ్గం, భిక్ఖవే, పరమదిట్ఠధమ్మనిబ్బానం పఞ్ఞాపేన్తానం యదిదం ఛన్నం ఫస్సాయతనానం సముదయఞ్చ అత్థఙ్గమఞ్చ అస్సాదఞ్చ ఆదీనవఞ్చ నిస్సరణఞ్చ యథాభూతం విదిత్వా అనుపాదా విమోక్ఖో. ఏవంవాదిం ఖో మం, భిక్ఖవే, ఏవమక్ఖాయిం ఏకే సమణబ్రాహ్మణా అసతా తుచ్ఛా ముసా అభూతేన అబ్భాచిక్ఖన్తి – ‘సమణో గోతమో న కామానం పరిఞ్ఞం పఞ్ఞాపేతి, న రూపానం పరిఞ్ఞం పఞ్ఞాపేతి, న వేదనానం పరిఞ్ఞం పఞ్ఞాపేతీ’తి. కామానఞ్చాహం , భిక్ఖవే, పరిఞ్ఞం పఞ్ఞాపేమి, రూపానఞ్చ పరిఞ్ఞం పఞ్ఞాపేమి, వేదనానఞ్చ పరిఞ్ఞం పఞ్ఞాపేమి, దిట్ఠేవ ధమ్మే నిచ్ఛాతో నిబ్బుతో సీతిభూతో అనుపాదా పరినిబ్బానం పఞ్ఞాపేమీ’’తి. నవమం.

    ‘‘Santi, bhikkhave, eke samaṇabrāhmaṇā paramadiṭṭhadhammanibbānaṃ paññāpenti. Etadaggaṃ, bhikkhave, paramadiṭṭhadhammanibbānaṃ paññāpentānaṃ yadidaṃ channaṃ phassāyatanānaṃ samudayañca atthaṅgamañca assādañca ādīnavañca nissaraṇañca yathābhūtaṃ viditvā anupādā vimokkho. Evaṃvādiṃ kho maṃ, bhikkhave, evamakkhāyiṃ eke samaṇabrāhmaṇā asatā tucchā musā abhūtena abbhācikkhanti – ‘samaṇo gotamo na kāmānaṃ pariññaṃ paññāpeti, na rūpānaṃ pariññaṃ paññāpeti, na vedanānaṃ pariññaṃ paññāpetī’ti. Kāmānañcāhaṃ , bhikkhave, pariññaṃ paññāpemi, rūpānañca pariññaṃ paññāpemi, vedanānañca pariññaṃ paññāpemi, diṭṭheva dhamme nicchāto nibbuto sītibhūto anupādā parinibbānaṃ paññāpemī’’ti. Navamaṃ.







    Footnotes:
    1. విజితే (సీ॰ క॰)
    2. vijite (sī. ka.)
    3. సురియానం (సీ॰ స్యా॰ కం॰ పీ॰)
    4. suriyānaṃ (sī. syā. kaṃ. pī.)
    5. ఆభస్సరవత్తనికా (సీ॰ స్యా॰)
    6. ābhassaravattanikā (sī. syā.)
    7. అ॰ ని॰ ౧౦.౨౫
    8. a. ni. 10.25
    9. దీ॰ ని॰ ౩.౩౩౮, ౩౫౮; అ॰ ని॰ ౮.౬౪
    10. dī. ni. 3.338, 358; a. ni. 8.64



    Related texts:



    అట్ఠకథా • Aṭṭhakathā / సుత్తపిటక (అట్ఠకథా) • Suttapiṭaka (aṭṭhakathā) / అఙ్గుత్తరనికాయ (అట్ఠకథా) • Aṅguttaranikāya (aṭṭhakathā) / ౯. పఠమకోసలసుత్తవణ్ణనా • 9. Paṭhamakosalasuttavaṇṇanā

    టీకా • Tīkā / సుత్తపిటక (టీకా) • Suttapiṭaka (ṭīkā) / అఙ్గుత్తరనికాయ (టీకా) • Aṅguttaranikāya (ṭīkā) / ౮-౯. దుతియమహాపఞ్హసుత్తాదివణ్ణనా • 8-9. Dutiyamahāpañhasuttādivaṇṇanā


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact