| Library / Tipiṭaka / ཏིཔིཊཀ • Tipiṭaka / ཨངྒུཏྟརནིཀཱཡ • Aṅguttaranikāya |
༩. པཋམཀོསལསུཏྟཾ
9. Paṭhamakosalasuttaṃ
༢༩. ‘‘ཡཱཝཏཱ, བྷིཀྑཝེ, ཀཱསིཀོསལཱ, ཡཱཝཏཱ རཉྙོ པསེནདིསྶ ཀོསལསྶ ཝིཛིཏཾ 1, རཱཛཱ ཏཏྠ པསེནདི ཀོསལོ ཨགྒམཀྑཱཡཏི། རཉྙོཔི ཁོ, བྷིཀྑཝེ, པསེནདིསྶ ཀོསལསྶ ཨཏྠེཝ ཨཉྙཐཏྟཾ ཨཏྠི ཝིཔརིཎཱམོ། ཨེཝཾ པསྶཾ, བྷིཀྑཝེ, སུཏཝཱ ཨརིཡསཱཝཀོ ཏསྨིམྤི ནིབྦིནྡཏི། ཏསྨིཾ ནིབྦིནྡནྟོ ཨགྒེ ཝིརཛྫཏི, པགེཝ ཧཱིནསྨིཾ།
29. ‘‘Yāvatā, bhikkhave, kāsikosalā, yāvatā rañño pasenadissa kosalassa vijitaṃ 2, rājā tattha pasenadi kosalo aggamakkhāyati. Raññopi kho, bhikkhave, pasenadissa kosalassa attheva aññathattaṃ atthi vipariṇāmo. Evaṃ passaṃ, bhikkhave, sutavā ariyasāvako tasmimpi nibbindati. Tasmiṃ nibbindanto agge virajjati, pageva hīnasmiṃ.
‘‘ཡཱཝཏཱ, བྷིཀྑཝེ, ཙནྡིམསཱུརིཡཱ པརིཧརནྟི དིསཱ བྷནྟི ཝིརོཙམཱནཱ, ཏཱཝ སཧསྶདྷཱ ལོཀོ། ཏསྨིཾ སཧསྶདྷཱ ལོཀེ སཧསྶཾ ཙནྡཱནཾ སཧསྶཾ སཱུརིཡཱནཾ 3 སཧསྶཾ སིནེརུཔབྦཏརཱཛཱནཾ སཧསྶཾ ཛམྦུདཱིཔཱནཾ སཧསྶཾ ཨཔརགོཡཱནཱནཾ སཧསྶཾ ཨུཏྟརཀུརཱུནཾ སཧསྶཾ པུབྦཝིདེཧཱནཾ ཙཏྟཱརི མཧཱསམུདྡསཧསྶཱནི ཙཏྟཱརི མཧཱརཱཛསཧསྶཱནི སཧསྶཾ ཙཱཏུམཧཱརཱཛིཀཱནཾ སཧསྶཾ ཏཱཝཏིཾསཱནཾ སཧསྶཾ ཡཱམཱནཾ སཧསྶཾ ཏུསིཏཱནཾ སཧསྶཾ ནིམྨཱནརཏཱིནཾ སཧསྶཾ པརནིམྨིཏཝསཝཏྟཱིནཾ སཧསྶཾ བྲཧྨལོཀཱནཾ། ཡཱཝཏཱ, བྷིཀྑཝེ, སཧསྶཱི ལོཀདྷཱཏུ, མཧཱབྲཧྨཱ ཏཏྠ ཨགྒམཀྑཱཡཏི། མཧཱབྲཧྨུནོཔི ཁོ, བྷིཀྑཝེ, ཨཏྠེཝ ཨཉྙཐཏྟཾ ཨཏྠི ཝིཔརིཎཱམོ། ཨེཝཾ པསྶཾ, བྷིཀྑཝེ, སུཏཝཱ ཨརིཡསཱཝཀོ ཏསྨིམྤི ནིབྦིནྡཏི། ཏསྨིཾ ནིབྦིནྡནྟོ ཨགྒེ ཝིརཛྫཏི, པགེཝ ཧཱིནསྨིཾ།
‘‘Yāvatā, bhikkhave, candimasūriyā pariharanti disā bhanti virocamānā, tāva sahassadhā loko. Tasmiṃ sahassadhā loke sahassaṃ candānaṃ sahassaṃ sūriyānaṃ 4 sahassaṃ sinerupabbatarājānaṃ sahassaṃ jambudīpānaṃ sahassaṃ aparagoyānānaṃ sahassaṃ uttarakurūnaṃ sahassaṃ pubbavidehānaṃ cattāri mahāsamuddasahassāni cattāri mahārājasahassāni sahassaṃ cātumahārājikānaṃ sahassaṃ tāvatiṃsānaṃ sahassaṃ yāmānaṃ sahassaṃ tusitānaṃ sahassaṃ nimmānaratīnaṃ sahassaṃ paranimmitavasavattīnaṃ sahassaṃ brahmalokānaṃ. Yāvatā, bhikkhave, sahassī lokadhātu, mahābrahmā tattha aggamakkhāyati. Mahābrahmunopi kho, bhikkhave, attheva aññathattaṃ atthi vipariṇāmo. Evaṃ passaṃ, bhikkhave, sutavā ariyasāvako tasmimpi nibbindati. Tasmiṃ nibbindanto agge virajjati, pageva hīnasmiṃ.
‘‘ཧོཏི སོ, བྷིཀྑཝེ, སམཡོ ཡཾ ཨཡཾ ལོཀོ སཾཝཊྚཏི། སཾཝཊྚམཱནེ, བྷིཀྑཝེ, ལོཀེ ཡེབྷུཡྻེན སཏྟཱ ཨཱབྷསྶརསཾཝཏྟནིཀཱ 5 བྷཝནྟི། ཏེ ཏཏྠ ཧོནྟི མནོམཡཱ པཱིཏིབྷཀྑཱ སཡཾཔབྷཱ ཨནྟལིཀྑེཙརཱ སུབྷཊྛཱཡིནོ ཙིརཾ དཱིགྷམདྡྷཱནཾ ཏིཊྛནྟི། སཾཝཊྚམཱནེ, བྷིཀྑཝེ, ལོཀེ ཨཱབྷསྶརཱ དེཝཱ ཨགྒམཀྑཱཡནྟི། ཨཱབྷསྶརཱནམྤི ཁོ, བྷིཀྑཝེ, དེཝཱནཾ ཨཏྠེཝ ཨཉྙཐཏྟཾ ཨཏྠི ཝིཔརིཎཱམོ། ཨེཝཾ པསྶཾ, བྷིཀྑཝེ, སུཏཝཱ ཨརིཡསཱཝཀོ ཏསྨིམྤི ནིབྦིནྡཏི ། ཏསྨིཾ ནིབྦིནྡནྟོ ཨགྒེ ཝིརཛྫཏི, པགེཝ ཧཱིནསྨིཾ།
‘‘Hoti so, bhikkhave, samayo yaṃ ayaṃ loko saṃvaṭṭati. Saṃvaṭṭamāne, bhikkhave, loke yebhuyyena sattā ābhassarasaṃvattanikā 6 bhavanti. Te tattha honti manomayā pītibhakkhā sayaṃpabhā antalikkhecarā subhaṭṭhāyino ciraṃ dīghamaddhānaṃ tiṭṭhanti. Saṃvaṭṭamāne, bhikkhave, loke ābhassarā devā aggamakkhāyanti. Ābhassarānampi kho, bhikkhave, devānaṃ attheva aññathattaṃ atthi vipariṇāmo. Evaṃ passaṃ, bhikkhave, sutavā ariyasāvako tasmimpi nibbindati . Tasmiṃ nibbindanto agge virajjati, pageva hīnasmiṃ.
7 ‘‘དསཡིམཱནི, བྷིཀྑཝེ, ཀསིཎཱཡཏནཱནི། ཀཏམཱནི དས? པཐཝཱིཀསིཎམེཀོ སཉྫཱནཱཏི ཨུདྡྷཾ ཨདྷོ ཏིརིཡཾ ཨདྭཡཾ ཨཔྤམཱཎཾ; ཨཱཔོཀསིཎམེཀོ སཉྫཱནཱཏི…པེ॰… ཏེཛོཀསིཎམེཀོ སཉྫཱནཱཏི… ཝཱཡོཀསིཎམེཀོ སཉྫཱནཱཏི… ནཱིལཀསིཎམེཀོ སཉྫཱནཱཏི… པཱིཏཀསིཎམེཀོ སཉྫཱནཱཏི… ལོཧིཏཀསིཎམེཀོ སཉྫཱནཱཏི… ཨོདཱཏཀསིཎམེཀོ སཉྫཱནཱཏི… ཨཱཀཱསཀསིཎམེཀོ སཉྫཱནཱཏི… ཝིཉྙཱཎཀསིཎམེཀོ སཉྫཱནཱཏི ཨུདྡྷཾ ཨདྷོ ཏིརིཡཾ ཨདྭཡཾ ཨཔྤམཱཎཾ། ཨིམཱནི ཁོ, བྷིཀྑཝེ, དས ཀསིཎཱཡཏནཱནི།
8 ‘‘Dasayimāni, bhikkhave, kasiṇāyatanāni. Katamāni dasa? Pathavīkasiṇameko sañjānāti uddhaṃ adho tiriyaṃ advayaṃ appamāṇaṃ; āpokasiṇameko sañjānāti…pe… tejokasiṇameko sañjānāti… vāyokasiṇameko sañjānāti… nīlakasiṇameko sañjānāti… pītakasiṇameko sañjānāti… lohitakasiṇameko sañjānāti… odātakasiṇameko sañjānāti… ākāsakasiṇameko sañjānāti… viññāṇakasiṇameko sañjānāti uddhaṃ adho tiriyaṃ advayaṃ appamāṇaṃ. Imāni kho, bhikkhave, dasa kasiṇāyatanāni.
‘‘ཨེཏདགྒཾ, བྷིཀྑཝེ, ཨིམེསཾ དསནྣཾ ཀསིཎཱཡཏནཱནཾ ཡདིདཾ ཝིཉྙཱཎཀསིཎཾ ཨེཀོ སཉྫཱནཱཏི ཨུདྡྷཾ ཨདྷོ ཏིརིཡཾ ཨདྭཡཾ ཨཔྤམཱཎཾ། ཨེཝཾསཉྙིནོཔི ཁོ, བྷིཀྑཝེ, སནྟི སཏྟཱ། ཨེཝཾསཉྙཱིནམྤི ཁོ, བྷིཀྑཝེ, སཏྟཱནཾ ཨཏྠེཝ ཨཉྙཐཏྟཾ ཨཏྠི ཝིཔརིཎཱམོ། ཨེཝཾ པསྶཾ , བྷིཀྑཝེ, སུཏཝཱ ཨརིཡསཱཝཀོ ཏསྨིམྤི ནིབྦིནྡཏི། ཏསྨིཾ ནིབྦིནྡནྟོ ཨགྒེ ཝིརཛྫཏི, པགེཝ ཧཱིནསྨིཾ།
‘‘Etadaggaṃ, bhikkhave, imesaṃ dasannaṃ kasiṇāyatanānaṃ yadidaṃ viññāṇakasiṇaṃ eko sañjānāti uddhaṃ adho tiriyaṃ advayaṃ appamāṇaṃ. Evaṃsaññinopi kho, bhikkhave, santi sattā. Evaṃsaññīnampi kho, bhikkhave, sattānaṃ attheva aññathattaṃ atthi vipariṇāmo. Evaṃ passaṃ , bhikkhave, sutavā ariyasāvako tasmimpi nibbindati. Tasmiṃ nibbindanto agge virajjati, pageva hīnasmiṃ.
9 ‘‘ཨཊྛིམཱནི, བྷིཀྑཝེ, ཨབྷིབྷཱཡཏནཱནི། ཀཏམཱནི ཨཊྛ? ཨཛ྄ཛྷཏྟཾ རཱུཔསཉྙཱི ཨེཀོ བཧིདྡྷཱ རཱུཔཱནི པསྶཏི པརིཏྟཱནི སུཝཎྞདུབྦཎྞཱནི; ‘ཏཱནི ཨབྷིབྷུཡྻ ཛཱནཱམི པསྶཱམཱི’ཏི, ཨེཝཾསཉྙཱི ཧོཏི། ཨིདཾ པཋམཾ ཨབྷིབྷཱཡཏནཾ།
10 ‘‘Aṭṭhimāni, bhikkhave, abhibhāyatanāni. Katamāni aṭṭha? Ajjhattaṃ rūpasaññī eko bahiddhā rūpāni passati parittāni suvaṇṇadubbaṇṇāni; ‘tāni abhibhuyya jānāmi passāmī’ti, evaṃsaññī hoti. Idaṃ paṭhamaṃ abhibhāyatanaṃ.
‘‘ཨཛ྄ཛྷཏྟཾ རཱུཔསཉྙཱི ཨེཀོ བཧིདྡྷཱ རཱུཔཱནི པསྶཏི ཨཔྤམཱཎཱནི སུཝཎྞདུབྦཎྞཱནི; ‘ཏཱནི ཨབྷིབྷུཡྻ ཛཱནཱམི པསྶཱམཱི’ཏི, ཨེཝཾསཉྙཱི ཧོཏི། ཨིདཾ དུཏིཡཾ ཨབྷིབྷཱཡཏནཾ།
‘‘Ajjhattaṃ rūpasaññī eko bahiddhā rūpāni passati appamāṇāni suvaṇṇadubbaṇṇāni; ‘tāni abhibhuyya jānāmi passāmī’ti, evaṃsaññī hoti. Idaṃ dutiyaṃ abhibhāyatanaṃ.
‘‘ཨཛ྄ཛྷཏྟཾ ཨརཱུཔསཉྙཱི ཨེཀོ བཧིདྡྷཱ རཱུཔཱནི པསྶཏི པརིཏྟཱནི སུཝཎྞདུབྦཎྞཱནི; ‘ཏཱནི ཨབྷིབྷུཡྻ ཛཱནཱམི པསྶཱམཱི’ཏི, ཨེཝཾསཉྙཱི ཧོཏི། ཨིདཾ ཏཏིཡཾ ཨབྷིབྷཱཡཏནཾ།
‘‘Ajjhattaṃ arūpasaññī eko bahiddhā rūpāni passati parittāni suvaṇṇadubbaṇṇāni; ‘tāni abhibhuyya jānāmi passāmī’ti, evaṃsaññī hoti. Idaṃ tatiyaṃ abhibhāyatanaṃ.
‘‘ཨཛ྄ཛྷཏྟཾ ཨརཱུཔསཉྙཱི ཨེཀོ བཧིདྡྷཱ རཱུཔཱནི པསྶཏི ཨཔྤམཱཎཱནི སུཝཎྞདུབྦཎྞཱནི; ‘ཏཱནི ཨབྷིབྷུཡྻ ཛཱནཱམི པསྶཱམཱི’ཏི, ཨེཝཾསཉྙཱི ཧོཏི། ཨིདཾ ཙཏུཏྠཾ ཨབྷིབྷཱཡཏནཾ།
‘‘Ajjhattaṃ arūpasaññī eko bahiddhā rūpāni passati appamāṇāni suvaṇṇadubbaṇṇāni; ‘tāni abhibhuyya jānāmi passāmī’ti, evaṃsaññī hoti. Idaṃ catutthaṃ abhibhāyatanaṃ.
‘‘ཨཛ྄ཛྷཏྟཾ ཨརཱུཔསཉྙཱི ཨེཀོ བཧིདྡྷཱ རཱུཔཱནི པསྶཏི ནཱིལཱནི ནཱིལཝཎྞཱནི ནཱིལནིདསྶནཱནི ནཱིལནིབྷཱསཱནི། སེཡྻཐཱཔི ནཱམ ཨུམཱཔུཔྥཾ ནཱིལཾ ནཱིལཝཎྞཾ ནཱིལནིདསྶནཾ ནཱིལནིབྷཱསཾ, སེཡྻཐཱ ཝཱ པན ཏཾ ཝཏྠཾ བཱརཱཎསེཡྻཀཾ ཨུབྷཏོབྷཱགཝིམཊྛཾ ནཱིལཾ ནཱིལཝཎྞཾ ནཱིལནིདསྶནཾ ནཱིལནིབྷཱསཾ; ཨེཝམེཝཾ ཨཛ྄ཛྷཏྟཾ ཨརཱུཔསཉྙཱི ཨེཀོ བཧིདྡྷཱ རཱུཔཱནི པསྶཏི ནཱིལཱནི ནཱིལཝཎྞཱནི ནཱིལནིདསྶནཱནི ནཱིལནིབྷཱསཱནི; ‘ཏཱནི ཨབྷིབྷུཡྻ ཛཱནཱམི པསྶཱམཱི’ཏི, ཨེཝཾསཉྙཱི ཧོཏི། ཨིདཾ པཉྩམཾ ཨབྷིབྷཱཡཏནཾ།
‘‘Ajjhattaṃ arūpasaññī eko bahiddhā rūpāni passati nīlāni nīlavaṇṇāni nīlanidassanāni nīlanibhāsāni. Seyyathāpi nāma umāpupphaṃ nīlaṃ nīlavaṇṇaṃ nīlanidassanaṃ nīlanibhāsaṃ, seyyathā vā pana taṃ vatthaṃ bārāṇaseyyakaṃ ubhatobhāgavimaṭṭhaṃ nīlaṃ nīlavaṇṇaṃ nīlanidassanaṃ nīlanibhāsaṃ; evamevaṃ ajjhattaṃ arūpasaññī eko bahiddhā rūpāni passati nīlāni nīlavaṇṇāni nīlanidassanāni nīlanibhāsāni; ‘tāni abhibhuyya jānāmi passāmī’ti, evaṃsaññī hoti. Idaṃ pañcamaṃ abhibhāyatanaṃ.
‘‘ཨཛ྄ཛྷཏྟཾ ཨརཱུཔསཉྙཱི ཨེཀོ བཧིདྡྷཱ རཱུཔཱནི པསྶཏི པཱིཏཱནི པཱིཏཝཎྞཱནི པཱིཏནིདསྶནཱནི པཱིཏནིབྷཱསཱནི། སེཡྻཐཱཔི ནཱམ ཀཎིཀཱརཔུཔྥཾ པཱིཏཾ པཱིཏཝཎྞཾ པཱིཏནིདསྶནཾ པཱིཏནིབྷཱསཾ, སེཡྻཐཱ ཝཱ པན ཏཾ ཝཏྠཾ བཱརཱཎསེཡྻཀཾ ཨུབྷཏོབྷཱགཝིམཊྛཾ པཱིཏཾ པཱིཏཝཎྞཾ པཱིཏནིདསྶནཾ པཱིཏནིབྷཱསཾ; ཨེཝམེཝཾ ཨཛ྄ཛྷཏྟཾ ཨརཱུཔསཉྙཱི ཨེཀོ བཧིདྡྷཱ རཱུཔཱནི པསྶཏི པཱིཏཱནི པཱིཏཝཎྞཱནི པཱིཏནིདསྶནཱནི པཱིཏནིབྷཱསཱནི; ‘ཏཱནི ཨབྷིབྷུཡྻ ཛཱནཱམི པསྶཱམཱི’ཏི, ཨེཝཾསཉྙཱི ཧོཏི། ཨིདཾ ཚཊྛཾ ཨབྷིབྷཱཡཏནཾ།
‘‘Ajjhattaṃ arūpasaññī eko bahiddhā rūpāni passati pītāni pītavaṇṇāni pītanidassanāni pītanibhāsāni. Seyyathāpi nāma kaṇikārapupphaṃ pītaṃ pītavaṇṇaṃ pītanidassanaṃ pītanibhāsaṃ, seyyathā vā pana taṃ vatthaṃ bārāṇaseyyakaṃ ubhatobhāgavimaṭṭhaṃ pītaṃ pītavaṇṇaṃ pītanidassanaṃ pītanibhāsaṃ; evamevaṃ ajjhattaṃ arūpasaññī eko bahiddhā rūpāni passati pītāni pītavaṇṇāni pītanidassanāni pītanibhāsāni; ‘tāni abhibhuyya jānāmi passāmī’ti, evaṃsaññī hoti. Idaṃ chaṭṭhaṃ abhibhāyatanaṃ.
‘‘ཨཛ྄ཛྷཏྟཾ ཨརཱུཔསཉྙཱི ཨེཀོ བཧིདྡྷཱ རཱུཔཱནི པསྶཏི ལོཧིཏཀཱནི ལོཧིཏཀཝཎྞཱནི ལོཧིཏཀནིདསྶནཱནི ལོཧིཏཀནིབྷཱསཱནི། སེཡྻཐཱཔི ནཱམ བནྡྷུཛཱིཝཀཔུཔྥཾ ལོཧིཏཀཾ ལོཧིཏཀཝཎྞཾ ལོཧིཏཀནིདསྶནཾ ལོཧིཏཀནིབྷཱསཾ, སེཡྻཐཱ ཝཱ པན ཏཾ ཝཏྠཾ བཱརཱཎསེཡྻཀཾ ཨུབྷཏོབྷཱགཝིམཊྛཾ ལོཧིཏཀཾ ལོཧིཏཀཝཎྞཾ ལོཧིཏཀནིདསྶནཾ ལོཧིཏཀནིབྷཱསཾ; ཨེཝམེཝཾ ཨཛ྄ཛྷཏྟཾ ཨརཱུཔསཉྙཱི ཨེཀོ བཧིདྡྷཱ རཱུཔཱནི པསྶཏི ལོཧིཏཀཱནི ལོཧིཏཀཝཎྞཱནི ལོཧིཏཀནིདསྶནཱནི ལོཧིཏཀནིབྷཱསཱནི; ‘ཏཱནི ཨབྷིབྷུཡྻ ཛཱནཱམི པསྶཱམཱི’ཏི, ཨེཝཾསཉྙཱི ཧོཏི། ཨིདཾ སཏྟམཾ ཨབྷིབྷཱཡཏནཾ།
‘‘Ajjhattaṃ arūpasaññī eko bahiddhā rūpāni passati lohitakāni lohitakavaṇṇāni lohitakanidassanāni lohitakanibhāsāni. Seyyathāpi nāma bandhujīvakapupphaṃ lohitakaṃ lohitakavaṇṇaṃ lohitakanidassanaṃ lohitakanibhāsaṃ, seyyathā vā pana taṃ vatthaṃ bārāṇaseyyakaṃ ubhatobhāgavimaṭṭhaṃ lohitakaṃ lohitakavaṇṇaṃ lohitakanidassanaṃ lohitakanibhāsaṃ; evamevaṃ ajjhattaṃ arūpasaññī eko bahiddhā rūpāni passati lohitakāni lohitakavaṇṇāni lohitakanidassanāni lohitakanibhāsāni; ‘tāni abhibhuyya jānāmi passāmī’ti, evaṃsaññī hoti. Idaṃ sattamaṃ abhibhāyatanaṃ.
‘‘ཨཛ྄ཛྷཏྟཾ ཨརཱུཔསཉྙཱི ཨེཀོ བཧིདྡྷཱ རཱུཔཱནི པསྶཏི ཨོདཱཏཱནི ཨོདཱཏཝཎྞཱནི ཨོདཱཏནིདསྶནཱནི ཨོདཱཏནིབྷཱསཱནི། སེཡྻཐཱཔི ནཱམ ཨོསདྷིཏཱརཀཱ ཨོདཱཏཱ ཨོདཱཏཝཎྞཱ ཨོདཱཏནིདསྶནཱ ཨོདཱཏནིབྷཱསཱ, སེཡྻཐཱ ཝཱ པན ཏཾ ཝཏྠཾ བཱརཱཎསེཡྻཀཾ ཨུབྷཏོབྷཱགཝིམཊྛཾ ཨོདཱཏཾ ཨོདཱཏཝཎྞཾ ཨོདཱཏནིདསྶནཾ ཨོདཱཏནིབྷཱསཾ; ཨེཝམེཝཾ ཨཛ྄ཛྷཏྟཾ ཨརཱུཔསཉྙཱི ཨེཀོ བཧིདྡྷཱ རཱུཔཱནི པསྶཏི ཨོདཱཏཱནི ཨོདཱཏཝཎྞཱནི ཨོདཱཏནིདསྶནཱནི ཨོདཱཏནིབྷཱསཱནི; ‘ཏཱནི ཨབྷིབྷུཡྻ ཛཱནཱམི པསྶཱམཱི’ཏི, ཨེཝཾསཉྙཱི ཧོཏི། ཨིདཾ ཨཊྛམཾ ཨབྷིབྷཱཡཏནཾ། ཨིམཱནི ཁོ, བྷིཀྑཝེ, ཨཊྛ ཨབྷིབྷཱཡཏནཱནི།
‘‘Ajjhattaṃ arūpasaññī eko bahiddhā rūpāni passati odātāni odātavaṇṇāni odātanidassanāni odātanibhāsāni. Seyyathāpi nāma osadhitārakā odātā odātavaṇṇā odātanidassanā odātanibhāsā, seyyathā vā pana taṃ vatthaṃ bārāṇaseyyakaṃ ubhatobhāgavimaṭṭhaṃ odātaṃ odātavaṇṇaṃ odātanidassanaṃ odātanibhāsaṃ; evamevaṃ ajjhattaṃ arūpasaññī eko bahiddhā rūpāni passati odātāni odātavaṇṇāni odātanidassanāni odātanibhāsāni; ‘tāni abhibhuyya jānāmi passāmī’ti, evaṃsaññī hoti. Idaṃ aṭṭhamaṃ abhibhāyatanaṃ. Imāni kho, bhikkhave, aṭṭha abhibhāyatanāni.
‘‘ཨེཏདགྒཾ, བྷིཀྑཝེ, ཨིམེསཾ ཨཊྛནྣཾ ཨབྷིབྷཱཡཏནཱནཾ ཡདིདཾ ཨཛ྄ཛྷཏྟཾ ཨརཱུཔསཉྙཱི ཨེཀོ བཧིདྡྷཱ རཱུཔཱནི པསྶཏི ཨོདཱཏཱནི ཨོདཱཏཝཎྞཱནི ཨོདཱཏནིདསྶནཱནི ཨོདཱཏནིབྷཱསཱནི; ‘ཏཱནི ཨབྷིབྷུཡྻ ཛཱནཱམི པསྶཱམཱི’ཏི, ཨེཝཾསཉྙཱི ཧོཏི། ཨེཝཾསཉྙིནོཔི ཁོ, བྷིཀྑཝེ, སནྟི སཏྟཱ། ཨེཝཾསཉྙཱིནམྤི ཁོ, བྷིཀྑཝེ, སཏྟཱནཾ ཨཏྠེཝ ཨཉྙཐཏྟཾ ཨཏྠི ཝིཔརིཎཱམོ། ཨེཝཾ པསྶཾ, བྷིཀྑཝེ, སུཏཝཱ ཨརིཡསཱཝཀོ ཏསྨིམྤི ནིབྦིནྡཏི། ཏསྨིཾ ནིབྦིནྡནྟོ ཨགྒེ ཝིརཛྫཏི, པགེཝ ཧཱིནསྨིཾ།
‘‘Etadaggaṃ, bhikkhave, imesaṃ aṭṭhannaṃ abhibhāyatanānaṃ yadidaṃ ajjhattaṃ arūpasaññī eko bahiddhā rūpāni passati odātāni odātavaṇṇāni odātanidassanāni odātanibhāsāni; ‘tāni abhibhuyya jānāmi passāmī’ti, evaṃsaññī hoti. Evaṃsaññinopi kho, bhikkhave, santi sattā. Evaṃsaññīnampi kho, bhikkhave, sattānaṃ attheva aññathattaṃ atthi vipariṇāmo. Evaṃ passaṃ, bhikkhave, sutavā ariyasāvako tasmimpi nibbindati. Tasmiṃ nibbindanto agge virajjati, pageva hīnasmiṃ.
‘‘ཙཏསྶོ ཨིམཱ, བྷིཀྑཝེ, པཊིཔདཱ། ཀཏམཱ ཙཏསྶོ? དུཀྑཱ པཊིཔདཱ དནྡྷཱབྷིཉྙཱ, དུཀྑཱ པཊིཔདཱ ཁིཔྤཱབྷིཉྙཱ, སུཁཱ པཊིཔདཱ དནྡྷཱབྷིཉྙཱ, སུཁཱ པཊིཔདཱ ཁིཔྤཱབྷིཉྙཱ – ཨིམཱ ཁོ, བྷིཀྑཝེ, ཙཏསྶོ པཊིཔདཱ།
‘‘Catasso imā, bhikkhave, paṭipadā. Katamā catasso? Dukkhā paṭipadā dandhābhiññā, dukkhā paṭipadā khippābhiññā, sukhā paṭipadā dandhābhiññā, sukhā paṭipadā khippābhiññā – imā kho, bhikkhave, catasso paṭipadā.
‘‘ཨེཏདགྒཾ, བྷིཀྑཝེ, ཨིམཱསཾ ཙཏུནྣཾ པཊིཔདཱནཾ ཡདིདཾ སུཁཱ པཊིཔདཱ ཁིཔྤཱབྷིཉྙཱ། ཨེཝཾཔཊིཔནྣཱཔི ཁོ, བྷིཀྑཝེ, སནྟི སཏྟཱ། ཨེཝཾཔཊིཔནྣཱནམྤི ཁོ, བྷིཀྑཝེ, སཏྟཱནཾ ཨཏྠེཝ ཨཉྙཐཏྟཾ ཨཏྠི ཝིཔརིཎཱམོ། ཨེཝཾ པསྶཾ, བྷིཀྑཝེ, སུཏཝཱ ཨརིཡསཱཝཀོ ཏསྨིམྤི ནིབྦིནྡཏི། ཏསྨིཾ ནིབྦིནྡནྟོ ཨགྒེ ཝིརཛྫཏི, པགེཝ ཧཱིནསྨིཾ།
‘‘Etadaggaṃ, bhikkhave, imāsaṃ catunnaṃ paṭipadānaṃ yadidaṃ sukhā paṭipadā khippābhiññā. Evaṃpaṭipannāpi kho, bhikkhave, santi sattā. Evaṃpaṭipannānampi kho, bhikkhave, sattānaṃ attheva aññathattaṃ atthi vipariṇāmo. Evaṃ passaṃ, bhikkhave, sutavā ariyasāvako tasmimpi nibbindati. Tasmiṃ nibbindanto agge virajjati, pageva hīnasmiṃ.
‘‘ཙཏསྶོ ཨིམཱ, བྷིཀྑཝེ, སཉྙཱ། ཀཏམཱ ཙཏསྶོ? པརིཏྟམེཀོ སཉྫཱནཱཏི, མཧགྒཏམེཀོ སཉྫཱནཱཏི, ཨཔྤམཱཎམེཀོ སཉྫཱནཱཏི, ‘ནཏྠི ཀིཉྩཱི’ཏི ཨཱཀིཉྩཉྙཱཡཏནམེཀོ སཉྫཱནཱཏི – ཨིམཱ ཁོ, བྷིཀྑཝེ, ཙཏསྶོ སཉྙཱ།
‘‘Catasso imā, bhikkhave, saññā. Katamā catasso? Parittameko sañjānāti, mahaggatameko sañjānāti, appamāṇameko sañjānāti, ‘natthi kiñcī’ti ākiñcaññāyatanameko sañjānāti – imā kho, bhikkhave, catasso saññā.
‘‘ཨེཏདགྒཾ, བྷིཀྑཝེ, ཨིམཱསཾ ཙཏུནྣཾ སཉྙཱནཾ ཡདིདཾ ‘ནཏྠི ཀིཉྩཱི’ཏི ཨཱཀིཉྩཉྙཱཡཏནམེཀོ སཉྫཱནཱཏི། ཨེཝཾསཉྙིནོཔི ཁོ, བྷིཀྑཝེ, སནྟི སཏྟཱ། ཨེཝཾསཉྙཱིནམྤི ཁོ, བྷིཀྑཝེ, སཏྟཱནཾ ཨཏྠེཝ ཨཉྙཐཏྟཾ ཨཏྠི ཝིཔརིཎཱམོ། ཨེཝཾ པསྶཾ, བྷིཀྑཝེ, སུཏཝཱ ཨརིཡསཱཝཀོ ཏསྨིམྤི ནིབྦིནྡཏི། ཏསྨིཾ ནིབྦིནྡནྟོ ཨགྒེ ཝིརཛྫཏི, པགེཝ ཧཱིནསྨིཾ།
‘‘Etadaggaṃ, bhikkhave, imāsaṃ catunnaṃ saññānaṃ yadidaṃ ‘natthi kiñcī’ti ākiñcaññāyatanameko sañjānāti. Evaṃsaññinopi kho, bhikkhave, santi sattā. Evaṃsaññīnampi kho, bhikkhave, sattānaṃ attheva aññathattaṃ atthi vipariṇāmo. Evaṃ passaṃ, bhikkhave, sutavā ariyasāvako tasmimpi nibbindati. Tasmiṃ nibbindanto agge virajjati, pageva hīnasmiṃ.
‘‘ཨེཏདགྒཾ , བྷིཀྑཝེ, བཱཧིརཀཱནཾ དིཊྛིགཏཱནཾ ཡདིདཾ ‘ནོ ཙསྶཾ, ནོ ཙ མེ སིཡཱ, ན བྷཝིསྶཱམི, ན མེ བྷཝིསྶཏཱི’ཏི། ཨེཝཾདིཊྛིནོ, བྷིཀྑཝེ , ཨེཏཾ པཱཊིཀངྑཾ – ‘ཡཱ ཙཱཡཾ བྷཝེ ཨཔྤཊིཀུལྱཏཱ, སཱ ཙསྶ ན བྷཝིསྶཏི; ཡཱ ཙཱཡཾ བྷཝནིརོདྷེ པཱཊིཀུལྱཏཱ, སཱ ཙསྶ ན བྷཝིསྶཏཱི’ཏི། ཨེཝཾདིཊྛིནོཔི ཁོ, བྷིཀྑཝེ, སནྟི སཏྟཱ། ཨེཝཾདིཊྛཱིནམྤི ཁོ, བྷིཀྑཝེ, སཏྟཱནཾ ཨཏྠེཝ ཨཉྙཐཏྟཾ ཨཏྠི ཝིཔརིཎཱམོ། ཨེཝཾ པསྶཾ, བྷིཀྑཝེ, སུཏཝཱ ཨརིཡསཱཝཀོ ཏསྨིམྤི ནིབྦིནྡཏི། ཏསྨིཾ ནིབྦིནྡནྟོ ཨགྒེ ཝིརཛྫཏི, པགེཝ ཧཱིནསྨིཾ།
‘‘Etadaggaṃ , bhikkhave, bāhirakānaṃ diṭṭhigatānaṃ yadidaṃ ‘no cassaṃ, no ca me siyā, na bhavissāmi, na me bhavissatī’ti. Evaṃdiṭṭhino, bhikkhave , etaṃ pāṭikaṅkhaṃ – ‘yā cāyaṃ bhave appaṭikulyatā, sā cassa na bhavissati; yā cāyaṃ bhavanirodhe pāṭikulyatā, sā cassa na bhavissatī’ti. Evaṃdiṭṭhinopi kho, bhikkhave, santi sattā. Evaṃdiṭṭhīnampi kho, bhikkhave, sattānaṃ attheva aññathattaṃ atthi vipariṇāmo. Evaṃ passaṃ, bhikkhave, sutavā ariyasāvako tasmimpi nibbindati. Tasmiṃ nibbindanto agge virajjati, pageva hīnasmiṃ.
‘‘སནྟི, བྷིཀྑཝེ, ཨེཀེ སམཎབྲཱཧྨཎཱ པརམཏྠཝིསུདྡྷིཾ པཉྙཱཔེནྟི། ཨེཏདགྒཾ, བྷིཀྑཝེ, པརམཏྠཝིསུདྡྷིཾ པཉྙཱཔེནྟཱནཾ ཡདིདཾ སབྦསོ ཨཱཀིཉྩཉྙཱཡཏནཾ སམཏིཀྐམྨ ནེཝསཉྙཱནཱསཉྙཱཡཏནཾ ཨུཔསམྤཛྫ ཝིཧརཏི། ཏེ ཏདབྷིཉྙཱཡ ཏསྶ སཙྪིཀིརིཡཱཡ དྷམྨཾ དེསེནྟི། ཨེཝཾཝཱདིནོཔི ཁོ, བྷིཀྑཝེ, སནྟི སཏྟཱ། ཨེཝཾཝཱདཱིནམྤི ཁོ, བྷིཀྑཝེ, སཏྟཱནཾ ཨཏྠེཝ ཨཉྙཐཏྟཾ ཨཏྠི ཝིཔརིཎཱམོ། ཨེཝཾ པསྶཾ, བྷིཀྑཝེ, སུཏཝཱ ཨརིཡསཱཝཀོ ཏསྨིམྤི ནིབྦིནྡཏི། ཏསྨིཾ ནིབྦིནྡནྟོ ཨགྒེ ཝིརཛྫཏི, པགེཝ ཧཱིནསྨིཾ།
‘‘Santi, bhikkhave, eke samaṇabrāhmaṇā paramatthavisuddhiṃ paññāpenti. Etadaggaṃ, bhikkhave, paramatthavisuddhiṃ paññāpentānaṃ yadidaṃ sabbaso ākiñcaññāyatanaṃ samatikkamma nevasaññānāsaññāyatanaṃ upasampajja viharati. Te tadabhiññāya tassa sacchikiriyāya dhammaṃ desenti. Evaṃvādinopi kho, bhikkhave, santi sattā. Evaṃvādīnampi kho, bhikkhave, sattānaṃ attheva aññathattaṃ atthi vipariṇāmo. Evaṃ passaṃ, bhikkhave, sutavā ariyasāvako tasmimpi nibbindati. Tasmiṃ nibbindanto agge virajjati, pageva hīnasmiṃ.
‘‘སནྟི, བྷིཀྑཝེ, ཨེཀེ སམཎབྲཱཧྨཎཱ པརམདིཊྛདྷམྨནིབྦཱནཾ པཉྙཱཔེནྟི། ཨེཏདགྒཾ, བྷིཀྑཝེ, པརམདིཊྛདྷམྨནིབྦཱནཾ པཉྙཱཔེནྟཱནཾ ཡདིདཾ ཚནྣཾ ཕསྶཱཡཏནཱནཾ སམུདཡཉྩ ཨཏྠངྒམཉྩ ཨསྶཱདཉྩ ཨཱདཱིནཝཉྩ ནིསྶརཎཉྩ ཡཐཱབྷཱུཏཾ ཝིདིཏྭཱ ཨནུཔཱདཱ ཝིམོཀྑོ། ཨེཝཾཝཱདིཾ ཁོ མཾ, བྷིཀྑཝེ, ཨེཝམཀྑཱཡིཾ ཨེཀེ སམཎབྲཱཧྨཎཱ ཨསཏཱ ཏུཙྪཱ མུསཱ ཨབྷཱུཏེན ཨབྦྷཱཙིཀྑནྟི – ‘སམཎོ གོཏམོ ན ཀཱམཱནཾ པརིཉྙཾ པཉྙཱཔེཏི, ན རཱུཔཱནཾ པརིཉྙཾ པཉྙཱཔེཏི, ན ཝེདནཱནཾ པརིཉྙཾ པཉྙཱཔེཏཱི’ཏི། ཀཱམཱནཉྩཱཧཾ , བྷིཀྑཝེ, པརིཉྙཾ པཉྙཱཔེམི, རཱུཔཱནཉྩ པརིཉྙཾ པཉྙཱཔེམི, ཝེདནཱནཉྩ པརིཉྙཾ པཉྙཱཔེམི, དིཊྛེཝ དྷམྨེ ནིཙྪཱཏོ ནིབྦུཏོ སཱིཏིབྷཱུཏོ ཨནུཔཱདཱ པརིནིབྦཱནཾ པཉྙཱཔེམཱི’’ཏི། ནཝམཾ།
‘‘Santi, bhikkhave, eke samaṇabrāhmaṇā paramadiṭṭhadhammanibbānaṃ paññāpenti. Etadaggaṃ, bhikkhave, paramadiṭṭhadhammanibbānaṃ paññāpentānaṃ yadidaṃ channaṃ phassāyatanānaṃ samudayañca atthaṅgamañca assādañca ādīnavañca nissaraṇañca yathābhūtaṃ viditvā anupādā vimokkho. Evaṃvādiṃ kho maṃ, bhikkhave, evamakkhāyiṃ eke samaṇabrāhmaṇā asatā tucchā musā abhūtena abbhācikkhanti – ‘samaṇo gotamo na kāmānaṃ pariññaṃ paññāpeti, na rūpānaṃ pariññaṃ paññāpeti, na vedanānaṃ pariññaṃ paññāpetī’ti. Kāmānañcāhaṃ , bhikkhave, pariññaṃ paññāpemi, rūpānañca pariññaṃ paññāpemi, vedanānañca pariññaṃ paññāpemi, diṭṭheva dhamme nicchāto nibbuto sītibhūto anupādā parinibbānaṃ paññāpemī’’ti. Navamaṃ.
Footnotes:
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཨངྒུཏྟརནིཀཱཡ (ཨཊྛཀཐཱ) • Aṅguttaranikāya (aṭṭhakathā) / ༩. པཋམཀོསལསུཏྟཝཎྞནཱ • 9. Paṭhamakosalasuttavaṇṇanā
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / ཨངྒུཏྟརནིཀཱཡ (ཊཱིཀཱ) • Aṅguttaranikāya (ṭīkā) / ༨-༩. དུཏིཡམཧཱཔཉྷསུཏྟཱདིཝཎྞནཱ • 8-9. Dutiyamahāpañhasuttādivaṇṇanā
