| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
9. பட²மகோஸலஸுத்தவண்ணனா
9. Paṭhamakosalasuttavaṇṇanā
29. நவமே யாவதாதி யத்தகா. காஸிகோஸலாதி காஸிகோஸலஜனபதா³. அத்தே²வ அஞ்ஞத²த்தந்தி டி²தஸ்ஸ அஞ்ஞத²த்தங் அத்தி²யேவ. அத்தி² விபரிணாமோதி மரணம்பி அத்தி²யேவ. தஸ்மிம்பி நிப்³பி³ந்த³தீதி தஸ்மிம்பி ஸம்பத்திஜாதே உக்கண்ட²தி. அக்³கே³ விரஜ்ஜதீதி ஸம்பத்தியா அக்³கே³ கோஸலராஜபா⁴வே விரஜ்ஜதி. பகே³வ ஹீனஸ்மிந்தி பட²மதரங்யேவ ஹீனே இத்தரமனுஸ்ஸானங் பஞ்ச காமகு³ணஜாதே.
29. Navame yāvatāti yattakā. Kāsikosalāti kāsikosalajanapadā. Attheva aññathattanti ṭhitassa aññathattaṃ atthiyeva. Atthi vipariṇāmoti maraṇampi atthiyeva. Tasmimpi nibbindatīti tasmimpi sampattijāte ukkaṇṭhati. Agge virajjatīti sampattiyā agge kosalarājabhāve virajjati. Pageva hīnasminti paṭhamataraṃyeva hīne ittaramanussānaṃ pañca kāmaguṇajāte.
மனோமயாதி ஜா²னமனேன நிப்³ப³த்தா. பா³ராணஸெய்யகந்தி பா³ராணஸியங் உப்பன்னங். தத்த² கிர கப்பாஸோபி முது³, ஸுத்தகந்திகாயோபி தந்தவாயாபி சே²கா, உத³கம்பி ஸுசி ஸினித்³த⁴ங். உப⁴தோபா⁴க³விமட்ட²ந்தி த்³வீஸுபி பஸ்ஸேஸு மட்ட²ங் முது³ ஸினித்³த⁴ங் கா²யதி. சதஸ்ஸோ படிபதா³ லோகியலோகுத்தரமிஸ்ஸிகா கதி²தா. ஸஞ்ஞாஸு பட²மா காமாவசரஸஞ்ஞா, து³தியா ரூபாவசரஸஞ்ஞா, ததியா லோகுத்தரஸஞ்ஞா, சதுத்தா² ஆகிஞ்சஞ்ஞாயதனஸஞ்ஞா. யஸ்மா பன ஸா ஸஞ்ஞா அக்³கா³தி ஆக³தா, ததோ பரங் ஸஞ்ஞாபஞ்ஞத்தி நாம நத்தி², தஸ்மா அக்³க³ந்தி வுத்தா.
Manomayāti jhānamanena nibbattā. Bārāṇaseyyakanti bārāṇasiyaṃ uppannaṃ. Tattha kira kappāsopi mudu, suttakantikāyopi tantavāyāpi chekā, udakampi suci siniddhaṃ. Ubhatobhāgavimaṭṭhanti dvīsupi passesu maṭṭhaṃ mudu siniddhaṃ khāyati. Catasso paṭipadā lokiyalokuttaramissikā kathitā. Saññāsu paṭhamā kāmāvacarasaññā, dutiyā rūpāvacarasaññā, tatiyā lokuttarasaññā, catutthā ākiñcaññāyatanasaññā. Yasmā pana sā saññā aggāti āgatā, tato paraṃ saññāpaññatti nāma natthi, tasmā agganti vuttā.
பா³ஹிரகானந்தி ஸாஸனதோ ப³ஹித்³தா⁴ பவத்தானங். நோ சஸ்ஸங் நோ ச மே ஸியாதி ஸசே அஹங் அதீதே ந ப⁴விஸ்ஸங், ஏதரஹிபி மே அயங் அத்தபா⁴வோ ந ஸியா. ந ப⁴விஸ்ஸாமி ந மே ப⁴விஸ்ஸதீதி ஸசேபி அனாக³தே ந ப⁴விஸ்ஸாமி, ந ச மே கிஞ்சி பலிபோ³த⁴ஜாதங் ப⁴விஸ்ஸதி. அக்³கே³ விரஜ்ஜதீதி உச்சே²த³தி³ட்டி²யங் விரஜ்ஜதி. உச்சே²த³தி³ட்டி² ஹி இத⁴ நிப்³பா³னஸ்ஸ ஸந்ததாய அக்³க³ந்தி ஜாதா.
Bāhirakānanti sāsanato bahiddhā pavattānaṃ. Nocassaṃ no ca me siyāti sace ahaṃ atīte na bhavissaṃ, etarahipi me ayaṃ attabhāvo na siyā. Na bhavissāmi na me bhavissatīti sacepi anāgate na bhavissāmi, na ca me kiñci palibodhajātaṃ bhavissati. Agge virajjatīti ucchedadiṭṭhiyaṃ virajjati. Ucchedadiṭṭhi hi idha nibbānassa santatāya agganti jātā.
பரமத்த²விஸுத்³தி⁴ந்தி உத்தமத்த²விஸுத்³தி⁴ங். நேவஸஞ்ஞானாஸஞ்ஞாயதனஸமாபத்தியா ஏதங் அதி⁴வசனங். ஆகிஞ்சஞ்ஞாயதனஞ்ஹி விபஸ்ஸனாபத³ட்டா²னத்தா அக்³க³ங் நாம ஜாதங், நேவஸஞ்ஞானாஸஞ்ஞாயதனங் தீ³கா⁴யுகத்தா. பரமதி³ட்ட²த⁴ம்மனிப்³பா³னந்தி இமஸ்மிஞ்ஞேவ அத்தபா⁴வே பரமனிப்³பா³னங். அனுபாதா³ விமொக்கோ²தி சதூஹி உபாதா³னேஹி அக்³க³ஹெத்வா சித்தஸ்ஸ விமொக்கோ². அரஹத்தஸ்ஸேதங் நாமங். பரிஞ்ஞந்தி ஸமதிக்கமங். தத்த² ப⁴க³வா பட²மஜ்ஜா²னேன காமானங் பரிஞ்ஞங் பஞ்ஞாபேதி, அரூபாவசரேஹி ரூபானங் பரிஞ்ஞங் பஞ்ஞாபேதி, அனுபாதா³னிப்³பா³னேன வேத³னானங் பரிஞ்ஞங் பஞ்ஞாபேதி. நிப்³பா³னஞ்ஹி ஸப்³ப³வேத³யிதப்பஹானத்தா வேத³னானங் பரிஞ்ஞா நாம. அனுபாதா³பரினிப்³பா³னந்தி அபச்சயபரினிப்³பா³னங். இத³ங் பன ஸுத்தங் கதெ²ந்தோ ப⁴க³வா அனபி⁴ரதிபீளிதானி பஞ்ச பி⁴க்கு²ஸதானி தி³ஸ்வா தேஸங் அனபி⁴ரதிவினோத³னத்த²ங் கதே²ஸி. தேபி அனபி⁴ரதிங் வினோதெ³த்வா தே³ஸனானுஸாரேன ஞாணங் பேஸெத்வா ஸோதாபன்னா ஹுத்வா அபரபா⁴கே³ விபஸ்ஸனங் வட்³டெ⁴த்வா அரஹத்தங் பாபுணிங்ஸூதி.
Paramatthavisuddhinti uttamatthavisuddhiṃ. Nevasaññānāsaññāyatanasamāpattiyā etaṃ adhivacanaṃ. Ākiñcaññāyatanañhi vipassanāpadaṭṭhānattā aggaṃ nāma jātaṃ, nevasaññānāsaññāyatanaṃ dīghāyukattā. Paramadiṭṭhadhammanibbānanti imasmiññeva attabhāve paramanibbānaṃ. Anupādā vimokkhoti catūhi upādānehi aggahetvā cittassa vimokkho. Arahattassetaṃ nāmaṃ. Pariññanti samatikkamaṃ. Tattha bhagavā paṭhamajjhānena kāmānaṃ pariññaṃ paññāpeti, arūpāvacarehi rūpānaṃ pariññaṃ paññāpeti, anupādānibbānena vedanānaṃ pariññaṃ paññāpeti. Nibbānañhi sabbavedayitappahānattā vedanānaṃ pariññā nāma. Anupādāparinibbānanti apaccayaparinibbānaṃ. Idaṃ pana suttaṃ kathento bhagavā anabhiratipīḷitāni pañca bhikkhusatāni disvā tesaṃ anabhirativinodanatthaṃ kathesi. Tepi anabhiratiṃ vinodetvā desanānusārena ñāṇaṃ pesetvā sotāpannā hutvā aparabhāge vipassanaṃ vaḍḍhetvā arahattaṃ pāpuṇiṃsūti.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 9. பட²மகோஸலஸுத்தங் • 9. Paṭhamakosalasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 8-9. து³தியமஹாபஞ்ஹஸுத்தாதி³வண்ணனா • 8-9. Dutiyamahāpañhasuttādivaṇṇanā
