| Library / Tipiṭaka / တိပိဋက • Tipiṭaka / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) |
၉. ပဌမကောသလသုတ္တဝဏ္ဏနာ
9. Paṭhamakosalasuttavaṇṇanā
၂၉. နဝမေ ယာဝတာတိ ယတ္တကာ။ ကာသိကောသလာတိ ကာသိကောသလဇနပဒာ။ အတ္ထေဝ အညထတ္တန္တိ ဌိတသ္သ အညထတ္တံ အတ္ထိယေဝ။ အတ္ထိ ဝိပရိဏာမောတိ မရဏမ္ပိ အတ္ထိယေဝ။ တသ္မိမ္ပိ နိဗ္ဗိန္ဒတီတိ တသ္မိမ္ပိ သမ္ပတ္တိဇာတေ ဥက္ကဏ္ဌတိ။ အဂ္ဂေ ဝိရဇ္ဇတီတိ သမ္ပတ္တိယာ အဂ္ဂေ ကောသလရာဇဘာဝေ ဝိရဇ္ဇတိ။ ပဂေဝ ဟီနသ္မိန္တိ ပဌမတရံယေဝ ဟီနေ ဣတ္တရမနုသ္သာနံ ပဉ္စ ကာမဂုဏဇာတေ။
29. Navame yāvatāti yattakā. Kāsikosalāti kāsikosalajanapadā. Attheva aññathattanti ṭhitassa aññathattaṃ atthiyeva. Atthi vipariṇāmoti maraṇampi atthiyeva. Tasmimpi nibbindatīti tasmimpi sampattijāte ukkaṇṭhati. Agge virajjatīti sampattiyā agge kosalarājabhāve virajjati. Pageva hīnasminti paṭhamataraṃyeva hīne ittaramanussānaṃ pañca kāmaguṇajāte.
မနောမယာတိ ဈာနမနေန နိဗ္ဗတ္တာ။ ဗာရာဏသေယ္ယကန္တိ ဗာရာဏသိယံ ဥပ္ပန္နံ။ တတ္ထ ကိရ ကပ္ပာသောပိ မုဒု, သုတ္တကန္တိကာယောပိ တန္တဝာယာပိ ဆေကာ, ဥဒကမ္ပိ သုစိ သိနိဒ္ဓံ။ ဥဘတောဘာဂဝိမဋ္ဌန္တိ ဒ္ဝီသုပိ ပသ္သေသု မဋ္ဌံ မုဒု သိနိဒ္ဓံ ခာယတိ။ စတသ္သော ပဋိပဒာ လောကိယလောကုတ္တရမိသ္သိကာ ကထိတာ။ သညာသု ပဌမာ ကာမာဝစရသညာ, ဒုတိယာ ရူပာဝစရသညာ, တတိယာ လောကုတ္တရသညာ, စတုတ္ထာ အာကိဉ္စညာယတနသညာ။ ယသ္မာ ပန သာ သညာ အဂ္ဂာတိ အာဂတာ, တတော ပရံ သညာပညတ္တိ နာမ နတ္ထိ, တသ္မာ အဂ္ဂန္တိ ဝုတ္တာ။
Manomayāti jhānamanena nibbattā. Bārāṇaseyyakanti bārāṇasiyaṃ uppannaṃ. Tattha kira kappāsopi mudu, suttakantikāyopi tantavāyāpi chekā, udakampi suci siniddhaṃ. Ubhatobhāgavimaṭṭhanti dvīsupi passesu maṭṭhaṃ mudu siniddhaṃ khāyati. Catasso paṭipadā lokiyalokuttaramissikā kathitā. Saññāsu paṭhamā kāmāvacarasaññā, dutiyā rūpāvacarasaññā, tatiyā lokuttarasaññā, catutthā ākiñcaññāyatanasaññā. Yasmā pana sā saññā aggāti āgatā, tato paraṃ saññāpaññatti nāma natthi, tasmā agganti vuttā.
ဗာဟိရကာနန္တိ သာသနတော ဗဟိဒ္ဓာ ပဝတ္တာနံ။ နော စသ္သံ နော စ မေ သိယာတိ သစေ အဟံ အတီတေ န ဘဝိသ္သံ, ဧတရဟိပိ မေ အယံ အတ္တဘာဝော န သိယာ။ န ဘဝိသ္သာမိ န မေ ဘဝိသ္သတီတိ သစေပိ အနာဂတေ န ဘဝိသ္သာမိ, န စ မေ ကိဉ္စိ ပလိဗောဓဇာတံ ဘဝိသ္သတိ။ အဂ္ဂေ ဝိရဇ္ဇတီတိ ဥစ္ဆေဒဒိဋ္ဌိယံ ဝိရဇ္ဇတိ။ ဥစ္ဆေဒဒိဋ္ဌိ ဟိ ဣဓ နိဗ္ဗာနသ္သ သန္တတာယ အဂ္ဂန္တိ ဇာတာ။
Bāhirakānanti sāsanato bahiddhā pavattānaṃ. Nocassaṃ no ca me siyāti sace ahaṃ atīte na bhavissaṃ, etarahipi me ayaṃ attabhāvo na siyā. Na bhavissāmi na me bhavissatīti sacepi anāgate na bhavissāmi, na ca me kiñci palibodhajātaṃ bhavissati. Agge virajjatīti ucchedadiṭṭhiyaṃ virajjati. Ucchedadiṭṭhi hi idha nibbānassa santatāya agganti jātā.
ပရမတ္ထဝိသုဒ္ဓိန္တိ ဥတ္တမတ္ထဝိသုဒ္ဓိံ။ နေဝသညာနာသညာယတနသမာပတ္တိယာ ဧတံ အဓိဝစနံ။ အာကိဉ္စညာယတနဉ္ဟိ ဝိပသ္သနာပဒဋ္ဌာနတ္တာ အဂ္ဂံ နာမ ဇာတံ, နေဝသညာနာသညာယတနံ ဒီဃာယုကတ္တာ။ ပရမဒိဋ္ဌဓမ္မနိဗ္ဗာနန္တိ ဣမသ္မိညေဝ အတ္တဘာဝေ ပရမနိဗ္ဗာနံ။ အနုပာဒာ ဝိမောက္ခောတိ စတူဟိ ဥပာဒာနေဟိ အဂ္ဂဟေတ္ဝာ စိတ္တသ္သ ဝိမောက္ခော။ အရဟတ္တသ္သေတံ နာမံ။ ပရိညန္တိ သမတိက္ကမံ။ တတ္ထ ဘဂဝာ ပဌမဇ္ဈာနေန ကာမာနံ ပရိညံ ပညာပေတိ, အရူပာဝစရေဟိ ရူပာနံ ပရိညံ ပညာပေတိ, အနုပာဒာနိဗ္ဗာနေန ဝေဒနာနံ ပရိညံ ပညာပေတိ။ နိဗ္ဗာနဉ္ဟိ သဗ္ဗဝေဒယိတပ္ပဟာနတ္တာ ဝေဒနာနံ ပရိညာ နာမ။ အနုပာဒာပရိနိဗ္ဗာနန္တိ အပစ္စယပရိနိဗ္ဗာနံ။ ဣဒံ ပန သုတ္တံ ကထေန္တော ဘဂဝာ အနဘိရတိပီဠိတာနိ ပဉ္စ ဘိက္ခုသတာနိ ဒိသ္ဝာ တေသံ အနဘိရတိဝိနောဒနတ္ထံ ကထေသိ။ တေပိ အနဘိရတိံ ဝိနောဒေတ္ဝာ ဒေသနာနုသာရေန ဉာဏံ ပေသေတ္ဝာ သောတာပန္နာ ဟုတ္ဝာ အပရဘာဂေ ဝိပသ္သနံ ဝဍ္ဎေတ္ဝာ အရဟတ္တံ ပာပုဏိံသူတိ။
Paramatthavisuddhinti uttamatthavisuddhiṃ. Nevasaññānāsaññāyatanasamāpattiyā etaṃ adhivacanaṃ. Ākiñcaññāyatanañhi vipassanāpadaṭṭhānattā aggaṃ nāma jātaṃ, nevasaññānāsaññāyatanaṃ dīghāyukattā. Paramadiṭṭhadhammanibbānanti imasmiññeva attabhāve paramanibbānaṃ. Anupādā vimokkhoti catūhi upādānehi aggahetvā cittassa vimokkho. Arahattassetaṃ nāmaṃ. Pariññanti samatikkamaṃ. Tattha bhagavā paṭhamajjhānena kāmānaṃ pariññaṃ paññāpeti, arūpāvacarehi rūpānaṃ pariññaṃ paññāpeti, anupādānibbānena vedanānaṃ pariññaṃ paññāpeti. Nibbānañhi sabbavedayitappahānattā vedanānaṃ pariññā nāma. Anupādāparinibbānanti apaccayaparinibbānaṃ. Idaṃ pana suttaṃ kathento bhagavā anabhiratipīḷitāni pañca bhikkhusatāni disvā tesaṃ anabhirativinodanatthaṃ kathesi. Tepi anabhiratiṃ vinodetvā desanānusārena ñāṇaṃ pesetvā sotāpannā hutvā aparabhāge vipassanaṃ vaḍḍhetvā arahattaṃ pāpuṇiṃsūti.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / အင္ဂုတ္တရနိကာယ • Aṅguttaranikāya / ၉. ပဌမကောသလသုတ္တံ • 9. Paṭhamakosalasuttaṃ
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / အင္ဂုတ္တရနိကာယ (ဋီကာ) • Aṅguttaranikāya (ṭīkā) / ၈-၉. ဒုတိယမဟာပဉ္ဟသုတ္တာဒိဝဏ္ဏနာ • 8-9. Dutiyamahāpañhasuttādivaṇṇanā
