| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
3. பட²மகுலபுத்தஸுத்தங்
3. Paṭhamakulaputtasuttaṃ
1073. ‘‘யே ஹி கேசி, பி⁴க்க²வே, அதீதமத்³தா⁴னங் குலபுத்தா ஸம்மா அகா³ரஸ்மா அனகா³ரியங் பப்³ப³ஜிங்ஸு, ஸப்³பே³ தே சதுன்னங் அரியஸச்சானங் யதா²பூ⁴தங் அபி⁴ஸமயாய. யே ஹி கேசி, பி⁴க்க²வே, அனாக³தமத்³தா⁴னங் குலபுத்தா ஸம்மா அகா³ரஸ்மா அனகா³ரியங் பப்³ப³ஜிஸ்ஸந்தி, ஸப்³பே³ தே சதுன்னங் அரியஸச்சானங் யதா²பூ⁴தங் அபி⁴ஸமயாய. யே ஹி கேசி, பி⁴க்க²வே, ஏதரஹி குலபுத்தா ஸம்மா அகா³ரஸ்மா அனகா³ரியங் பப்³ப³ஜந்தி, ஸப்³பே³ தே சதுன்னங் அரியஸச்சானங் யதா²பூ⁴தங் அபி⁴ஸமயாய.
1073. ‘‘Ye hi keci, bhikkhave, atītamaddhānaṃ kulaputtā sammā agārasmā anagāriyaṃ pabbajiṃsu, sabbe te catunnaṃ ariyasaccānaṃ yathābhūtaṃ abhisamayāya. Ye hi keci, bhikkhave, anāgatamaddhānaṃ kulaputtā sammā agārasmā anagāriyaṃ pabbajissanti, sabbe te catunnaṃ ariyasaccānaṃ yathābhūtaṃ abhisamayāya. Ye hi keci, bhikkhave, etarahi kulaputtā sammā agārasmā anagāriyaṃ pabbajanti, sabbe te catunnaṃ ariyasaccānaṃ yathābhūtaṃ abhisamayāya.
‘‘கதமேஸங் சதுன்னங்? து³க்க²ஸ்ஸ அரியஸச்சஸ்ஸ து³க்க²ஸமுத³யஸ்ஸ அரியஸச்சஸ்ஸ து³க்க²னிரோத⁴ஸ்ஸ அரியஸச்சஸ்ஸ து³க்க²னிரோத⁴கா³மினியா படிபதா³ய அரியஸச்சஸ்ஸ. யே ஹி கேசி, பி⁴க்க²வே, அதீதமத்³தா⁴னங் குலபுத்தா ஸம்மா அகா³ரஸ்மா அனகா³ரியங் பப்³ப³ஜிங்ஸு…பே॰… பப்³ப³ஜிஸ்ஸந்தி…பே॰… பப்³ப³ஜந்தி, ஸப்³பே³ தே இமேஸங்யேவ சதுன்னங் அரியஸச்சானங் யதா²பூ⁴தங் அபி⁴ஸமயாய.
‘‘Katamesaṃ catunnaṃ? Dukkhassa ariyasaccassa dukkhasamudayassa ariyasaccassa dukkhanirodhassa ariyasaccassa dukkhanirodhagāminiyā paṭipadāya ariyasaccassa. Ye hi keci, bhikkhave, atītamaddhānaṃ kulaputtā sammā agārasmā anagāriyaṃ pabbajiṃsu…pe… pabbajissanti…pe… pabbajanti, sabbe te imesaṃyeva catunnaṃ ariyasaccānaṃ yathābhūtaṃ abhisamayāya.
‘‘தஸ்மாதிஹ, பி⁴க்க²வே, ‘இத³ங் து³க்க²’ந்தி யோகோ³ கரணீயோ, ‘அயங் து³க்க²ஸமுத³யோ’தி யோகோ³ கரணீயோ, ‘அயங் து³க்க²னிரோதோ⁴’தி யோகோ³ கரணீயோ, ‘அயங் து³க்க²னிரோத⁴கா³மினீ படிபதா³’தி யோகோ³ கரணீயோ’’தி. ததியங்.
‘‘Tasmātiha, bhikkhave, ‘idaṃ dukkha’nti yogo karaṇīyo, ‘ayaṃ dukkhasamudayo’ti yogo karaṇīyo, ‘ayaṃ dukkhanirodho’ti yogo karaṇīyo, ‘ayaṃ dukkhanirodhagāminī paṭipadā’ti yogo karaṇīyo’’ti. Tatiyaṃ.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 3. பட²மகுலபுத்தஸுத்தாதி³வண்ணனா • 3. Paṭhamakulaputtasuttādivaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 3. பட²மகுலபுத்தஸுத்தாதி³வண்ணனா • 3. Paṭhamakulaputtasuttādivaṇṇanā
