| Library / Tipiṭaka / തിപിടക • Tipiṭaka / സംയുത്തനികായ • Saṃyuttanikāya |
൩. പഠമകുലപുത്തസുത്തം
3. Paṭhamakulaputtasuttaṃ
൧൦൭൩. ‘‘യേ ഹി കേചി, ഭിക്ഖവേ, അതീതമദ്ധാനം കുലപുത്താ സമ്മാ അഗാരസ്മാ അനഗാരിയം പബ്ബജിംസു, സബ്ബേ തേ ചതുന്നം അരിയസച്ചാനം യഥാഭൂതം അഭിസമയായ. യേ ഹി കേചി, ഭിക്ഖവേ, അനാഗതമദ്ധാനം കുലപുത്താ സമ്മാ അഗാരസ്മാ അനഗാരിയം പബ്ബജിസ്സന്തി, സബ്ബേ തേ ചതുന്നം അരിയസച്ചാനം യഥാഭൂതം അഭിസമയായ. യേ ഹി കേചി, ഭിക്ഖവേ, ഏതരഹി കുലപുത്താ സമ്മാ അഗാരസ്മാ അനഗാരിയം പബ്ബജന്തി, സബ്ബേ തേ ചതുന്നം അരിയസച്ചാനം യഥാഭൂതം അഭിസമയായ.
1073. ‘‘Ye hi keci, bhikkhave, atītamaddhānaṃ kulaputtā sammā agārasmā anagāriyaṃ pabbajiṃsu, sabbe te catunnaṃ ariyasaccānaṃ yathābhūtaṃ abhisamayāya. Ye hi keci, bhikkhave, anāgatamaddhānaṃ kulaputtā sammā agārasmā anagāriyaṃ pabbajissanti, sabbe te catunnaṃ ariyasaccānaṃ yathābhūtaṃ abhisamayāya. Ye hi keci, bhikkhave, etarahi kulaputtā sammā agārasmā anagāriyaṃ pabbajanti, sabbe te catunnaṃ ariyasaccānaṃ yathābhūtaṃ abhisamayāya.
‘‘കതമേസം ചതുന്നം? ദുക്ഖസ്സ അരിയസച്ചസ്സ ദുക്ഖസമുദയസ്സ അരിയസച്ചസ്സ ദുക്ഖനിരോധസ്സ അരിയസച്ചസ്സ ദുക്ഖനിരോധഗാമിനിയാ പടിപദായ അരിയസച്ചസ്സ. യേ ഹി കേചി, ഭിക്ഖവേ, അതീതമദ്ധാനം കുലപുത്താ സമ്മാ അഗാരസ്മാ അനഗാരിയം പബ്ബജിംസു…പേ॰… പബ്ബജിസ്സന്തി…പേ॰… പബ്ബജന്തി, സബ്ബേ തേ ഇമേസംയേവ ചതുന്നം അരിയസച്ചാനം യഥാഭൂതം അഭിസമയായ.
‘‘Katamesaṃ catunnaṃ? Dukkhassa ariyasaccassa dukkhasamudayassa ariyasaccassa dukkhanirodhassa ariyasaccassa dukkhanirodhagāminiyā paṭipadāya ariyasaccassa. Ye hi keci, bhikkhave, atītamaddhānaṃ kulaputtā sammā agārasmā anagāriyaṃ pabbajiṃsu…pe… pabbajissanti…pe… pabbajanti, sabbe te imesaṃyeva catunnaṃ ariyasaccānaṃ yathābhūtaṃ abhisamayāya.
‘‘തസ്മാതിഹ, ഭിക്ഖവേ, ‘ഇദം ദുക്ഖ’ന്തി യോഗോ കരണീയോ, ‘അയം ദുക്ഖസമുദയോ’തി യോഗോ കരണീയോ, ‘അയം ദുക്ഖനിരോധോ’തി യോഗോ കരണീയോ, ‘അയം ദുക്ഖനിരോധഗാമിനീ പടിപദാ’തി യോഗോ കരണീയോ’’തി. തതിയം.
‘‘Tasmātiha, bhikkhave, ‘idaṃ dukkha’nti yogo karaṇīyo, ‘ayaṃ dukkhasamudayo’ti yogo karaṇīyo, ‘ayaṃ dukkhanirodho’ti yogo karaṇīyo, ‘ayaṃ dukkhanirodhagāminī paṭipadā’ti yogo karaṇīyo’’ti. Tatiyaṃ.
Related texts:
അട്ഠകഥാ • Aṭṭhakathā / സുത്തപിടക (അട്ഠകഥാ) • Suttapiṭaka (aṭṭhakathā) / സംയുത്തനികായ (അട്ഠകഥാ) • Saṃyuttanikāya (aṭṭhakathā) / ൩. പഠമകുലപുത്തസുത്താദിവണ്ണനാ • 3. Paṭhamakulaputtasuttādivaṇṇanā
ടീകാ • Tīkā / സുത്തപിടക (ടീകാ) • Suttapiṭaka (ṭīkā) / സംയുത്തനികായ (ടീകാ) • Saṃyuttanikāya (ṭīkā) / ൩. പഠമകുലപുത്തസുത്താദിവണ്ണനാ • 3. Paṭhamakulaputtasuttādivaṇṇanā
