| Library / Tipiṭaka / তিপিটক • Tipiṭaka / ৰিমানৰত্থু-অট্ঠকথা • Vimānavatthu-aṭṭhakathā |
৮. পঠমকুণ্ডলীৰিমানৰণ্ণনা
8. Paṭhamakuṇḍalīvimānavaṇṇanā
অলঙ্কতো মল্যধরো সুৰত্থোতি কুণ্ডলীৰিমানং। তস্স কা উপত্তি? ভগৰা সাৰত্থিযং ৰিহরতি জেতৰনে। তেন সমযেন দ্ৰে অগ্গসাৰকা সপরিৰারা কাসীসু চারিকং চরন্তা সূরিযত্থঙ্গমনৰেলাযং অঞ্ঞতরং ৰিহারং পাপুণিংসু। তং পৰত্তিং সুত্ৰা তস্স ৰিহারস্স গোচরগামে অঞ্ঞতরো উপাসকো থেরে উপসঙ্কমিত্ৰা ৰন্দিত্ৰা পাদধোৰনং পাদব্ভঞ্জনতেলং মঞ্চপীঠং পচ্চত্থরণং পদীপিযঞ্চ উপনেত্ৰা স্ৰাতনায চ নিমন্তেত্ৰা দুতিযদিৰসে মহাদানং পৰত্তেসি, থেরা তস্স অনুমোদনং ৰত্ৰা পক্কমিংসু। সো অপরেন সমযেন কালং কত্ৰা তাৰতিংসেসু দ্ৰাদসযোজনিকে কনকৰিমানে নিব্বত্তি। তং আযস্মা মহামোগ্গল্লানত্থেরো ইমাহি গাথাহি পটিপুচ্ছি –
Alaṅkatomalyadharo suvatthoti kuṇḍalīvimānaṃ. Tassa kā upatti? Bhagavā sāvatthiyaṃ viharati jetavane. Tena samayena dve aggasāvakā saparivārā kāsīsu cārikaṃ carantā sūriyatthaṅgamanavelāyaṃ aññataraṃ vihāraṃ pāpuṇiṃsu. Taṃ pavattiṃ sutvā tassa vihārassa gocaragāme aññataro upāsako there upasaṅkamitvā vanditvā pādadhovanaṃ pādabbhañjanatelaṃ mañcapīṭhaṃ paccattharaṇaṃ padīpiyañca upanetvā svātanāya ca nimantetvā dutiyadivase mahādānaṃ pavattesi, therā tassa anumodanaṃ vatvā pakkamiṃsu. So aparena samayena kālaṃ katvā tāvatiṃsesu dvādasayojanike kanakavimāne nibbatti. Taṃ āyasmā mahāmoggallānatthero imāhi gāthāhi paṭipucchi –
১০৯৪.
1094.
‘‘অলঙ্কতো মল্যধরো সুৰত্থো, সুকুণ্ডলী কপ্পিতকেসমস্সু।
‘‘Alaṅkato malyadharo suvattho, sukuṇḍalī kappitakesamassu;
আমুত্তহত্থাভরণো যসস্সী, দিব্বে ৰিমানম্হি যথাপি চন্দিমা॥
Āmuttahatthābharaṇo yasassī, dibbe vimānamhi yathāpi candimā.
১০৯৫.
1095.
‘‘দিব্বা চ ৰীণা পৰদন্তি ৰগ্গুং, অট্ঠট্ঠকা সিক্খিতা সাধুরূপা।
‘‘Dibbā ca vīṇā pavadanti vagguṃ, aṭṭhaṭṭhakā sikkhitā sādhurūpā;
দিব্বা চ কঞ্ঞা তিদসচরা উল়ারা, নচ্চন্তি গাযন্তি পমোদযন্তি॥
Dibbā ca kaññā tidasacarā uḷārā, naccanti gāyanti pamodayanti.
১০৯৬.
1096.
‘‘দেৰিদ্ধিপত্তোসি মহানুভাৰো…পে॰…
‘‘Deviddhipattosi mahānubhāvo…pe…
ৰণ্ণো চ তে সব্বদিসা পভাসতী’’তি॥
Vaṇṇo ca te sabbadisā pabhāsatī’’ti.
সোপি তস্স ইমাহি গাথাহি ব্যাকাসি –
Sopi tassa imāhi gāthāhi byākāsi –
১০৯৭. ‘‘সো দেৰপুত্তো অত্তমনো…পে॰… যস্স কম্মস্সিদং ফলং’’॥
1097. ‘‘So devaputto attamano…pe… yassa kammassidaṃ phalaṃ’’.
১০৯৮.
1098.
‘‘অহং মনুস্সেসু মনুস্সভূতো, দিস্ৰান সমণে সীলৰন্তে।
‘‘Ahaṃ manussesu manussabhūto, disvāna samaṇe sīlavante;
সম্পন্নৰিজ্জাচরণে যসস্সী, বহুস্সুতে তণ্হক্খযূপপন্নে।
Sampannavijjācaraṇe yasassī, bahussute taṇhakkhayūpapanne;
অন্নঞ্চ পানঞ্চ পসন্নচিত্তো, সক্কচ্চ দানং ৰিপুলং অদাসিং॥
Annañca pānañca pasannacitto, sakkacca dānaṃ vipulaṃ adāsiṃ.
১০৯৯.
1099.
‘‘তেন মেতাদিসো ৰণ্ণো…পে॰…
‘‘Tena metādiso vaṇṇo…pe…
ৰণ্ণো চ মে সব্বদিসা পভাসতী’’তি॥
Vaṇṇo ca me sabbadisā pabhāsatī’’ti.
১০৯৪. তত্থ সুকুণ্ডলীতি সুন্দরেহি কুণ্ডলেহি অলঙ্কতকণ্ণো। ‘‘সকুণ্ডলী’’তিপি পাঠো, সদিসং কুণ্ডলং সকুণ্ডলং, তং অস্স অত্থীতি সকুণ্ডলী, যুত্তকুণ্ডলী অঞ্ঞমঞ্ঞঞ্চ তুয্হঞ্চ অনুচ্ছৰিককুণ্ডলীতি অত্থো। কপ্পিতকেসমস্সূতি সম্মাকপ্পিতকেসমস্সু। আমুত্তহত্থাভরণোতি পটিমুক্কঅঙ্গুলিযাদিহত্থাভরণো।
1094. Tattha sukuṇḍalīti sundarehi kuṇḍalehi alaṅkatakaṇṇo. ‘‘Sakuṇḍalī’’tipi pāṭho, sadisaṃ kuṇḍalaṃ sakuṇḍalaṃ, taṃ assa atthīti sakuṇḍalī, yuttakuṇḍalī aññamaññañca tuyhañca anucchavikakuṇḍalīti attho. Kappitakesamassūti sammākappitakesamassu. Āmuttahatthābharaṇoti paṭimukkaaṅguliyādihatthābharaṇo.
১০৯৮. তণ্হক্খযূপপন্নেতি তণ্হক্খযং অরহত্তং, নিব্বানমেৰ ৰা উপগতে, অধিগতৰন্তেতি অত্থো। সেসং ৰুত্তনযমেৰ।
1098.Taṇhakkhayūpapanneti taṇhakkhayaṃ arahattaṃ, nibbānameva vā upagate, adhigatavanteti attho. Sesaṃ vuttanayameva.
পঠমকুণ্ডলীৰিমানৰণ্ণনা নিট্ঠিতা।
Paṭhamakuṇḍalīvimānavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / ৰিমানৰত্থুপাল়ি • Vimānavatthupāḷi / ৮. পঠমকুণ্ডলীৰিমানৰত্থু • 8. Paṭhamakuṇḍalīvimānavatthu
