| Library / Tipiṭaka / তিপিটক • Tipiṭaka / ৰিমানৰত্থুপাল়ি • Vimānavatthupāḷi |
৮. পঠমকুণ্ডলীৰিমানৰত্থু
8. Paṭhamakuṇḍalīvimānavatthu
১০৯৪.
1094.
‘‘অলঙ্কতো মল্যধরো সুৰত্থো, সুকুণ্ডলী কপ্পিতকেসমস্সু।
‘‘Alaṅkato malyadharo suvattho, sukuṇḍalī kappitakesamassu;
আমুত্তহত্থাভরণো যসস্সী, দিব্বে ৰিমানম্হি যথাপি চন্দিমা॥
Āmuttahatthābharaṇo yasassī, dibbe vimānamhi yathāpi candimā.
১০৯৫.
1095.
‘‘দিব্বা চ ৰীণা পৰদন্তি ৰগ্গুং, অট্ঠট্ঠকা সিক্খিতা সাধুরূপা।
‘‘Dibbā ca vīṇā pavadanti vagguṃ, aṭṭhaṭṭhakā sikkhitā sādhurūpā;
দিব্বা চ কঞ্ঞা তিদসচরা উল়ারা, নচ্চন্তি গাযন্তি পমোদযন্তি॥
Dibbā ca kaññā tidasacarā uḷārā, naccanti gāyanti pamodayanti.
১০৯৬.
1096.
‘‘দেৰিদ্ধিপত্তোসি মহানুভাৰো, মনুস্সভূতো কিমকাসি পুঞ্ঞং।
‘‘Deviddhipattosi mahānubhāvo, manussabhūto kimakāsi puññaṃ;
কেনাসি এৰং জলিতানুভাৰো, ৰণ্ণো চ তে সব্বদিসা পভাসতী’’তি॥
Kenāsi evaṃ jalitānubhāvo, vaṇṇo ca te sabbadisā pabhāsatī’’ti.
১০৯৭.
1097.
সো দেৰপুত্তো অত্তমনো…পে॰… যস্স কম্মস্সিদং ফলং॥
So devaputto attamano…pe… yassa kammassidaṃ phalaṃ.
১০৯৮.
1098.
‘‘অহং মনুস্সেসু মনুস্সভূতো, দিস্ৰান সমণে সীলৰন্তে।
‘‘Ahaṃ manussesu manussabhūto, disvāna samaṇe sīlavante;
সম্পন্নৰিজ্জাচরণে যসস্সী, বহুস্সুতে তণ্হক্খযূপপন্নে।
Sampannavijjācaraṇe yasassī, bahussute taṇhakkhayūpapanne;
অন্নঞ্চ পানঞ্চ পসন্নচিত্তো, সক্কচ্চ দানং ৰিপুলং অদাসিং॥
Annañca pānañca pasannacitto, sakkacca dānaṃ vipulaṃ adāsiṃ.
১০৯৯.
1099.
‘‘তেন মেতাদিসো ৰণ্ণো…পে॰…ৰণ্ণো চ মে সব্বদিসা পভাসতী’’তি॥
‘‘Tena metādiso vaṇṇo…pe…vaṇṇo ca me sabbadisā pabhāsatī’’ti.
পঠমকুণ্ডলীৰিমানং অট্ঠমং।
Paṭhamakuṇḍalīvimānaṃ aṭṭhamaṃ.
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / খুদ্দকনিকায (অট্ঠকথা) • Khuddakanikāya (aṭṭhakathā) / ৰিমানৰত্থু-অট্ঠকথা • Vimānavatthu-aṭṭhakathā / ৮. পঠমকুণ্ডলীৰিমানৰণ্ণনা • 8. Paṭhamakuṇḍalīvimānavaṇṇanā
