| Library / Tipiṭaka / තිපිටක • Tipiṭaka / උදානපාළි • Udānapāḷi |
7. චූළවග්‌ගො
7. Cūḷavaggo
1. පඨමලකුණ්‌ඩකභද්‌දියසුත්‌තං
1. Paṭhamalakuṇḍakabhaddiyasuttaṃ
61. එවං මෙ සුතං – එකං සමයං භගවා සාවත්‌ථියං විහරති ජෙතවනෙ අනාථපිණ්‌ඩිකස්‌ස ආරාමෙ. තෙන ඛො පන සමයෙන ආයස්‌මා සාරිපුත්‌තො ආයස්‌මන්‌තං ලකුණ්‌ඩකභද්‌දියං අනෙකපරියායෙන ධම්‌මියා කථාය සන්‌දස්‌සෙති සමාදපෙති 1 සමුත්‌තෙජෙති සම්‌පහංසෙති.
61. Evaṃ me sutaṃ – ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena āyasmā sāriputto āyasmantaṃ lakuṇḍakabhaddiyaṃ anekapariyāyena dhammiyā kathāya sandasseti samādapeti 2 samuttejeti sampahaṃseti.
අථ ඛො ආයස්‌මතො ලකුණ්‌ඩකභද්‌දියස්‌ස ආයස්‌මතා සාරිපුත්‌තෙන අනෙකපරියායෙන ධම්‌මියා කථාය සන්‌දස්‌සියමානස්‌ස සමාදපියමානස්‌ස සමුත්‌තෙජියමානස්‌ස සම්‌පහංසියමානස්‌ස අනුපාදාය ආසවෙහි චිත්‌තං විමුච්‌චි.
Atha kho āyasmato lakuṇḍakabhaddiyassa āyasmatā sāriputtena anekapariyāyena dhammiyā kathāya sandassiyamānassa samādapiyamānassa samuttejiyamānassa sampahaṃsiyamānassa anupādāya āsavehi cittaṃ vimucci.
අද්‌දසා ඛො භගවා ආයස්‌මන්‌තං ලකුණ්‌ඩකභද්‌දියං ආයස්‌මතා සාරිපුත්‌තෙන අනෙකපරියායෙන ධම්‌මියා කථාය සන්‌දස්‌සියමානං සමාදපියමානං සමුත්‌තෙජියමානං සම්‌පහංසියමානං අනුපාදාය ආසවෙහි චිත්‌තං විමුත්‌තං 3.
Addasā kho bhagavā āyasmantaṃ lakuṇḍakabhaddiyaṃ āyasmatā sāriputtena anekapariyāyena dhammiyā kathāya sandassiyamānaṃ samādapiyamānaṃ samuttejiyamānaṃ sampahaṃsiyamānaṃ anupādāya āsavehi cittaṃ vimuttaṃ 4.
අථ ඛො භගවා එතමත්‌ථං විදිත්‌වා තායං වෙලායං ඉමං උදානං උදානෙසි –
Atha kho bhagavā etamatthaṃ viditvā tāyaṃ velāyaṃ imaṃ udānaṃ udānesi –
‘‘උද්‌ධං අධො සබ්‌බධි විප්‌පමුත්‌තො, අයංහමස්‌මීති 5 අනානුපස්‌සී;
‘‘Uddhaṃ adho sabbadhi vippamutto, ayaṃhamasmīti 6 anānupassī;
එවං විමුත්‌තො උදතාරි ඔඝං, අතිණ්‌ණපුබ්‌බං අපුනබ්‌භවායා’’ති. පඨමං;
Evaṃ vimutto udatāri oghaṃ, atiṇṇapubbaṃ apunabbhavāyā’’ti. paṭhamaṃ;
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / ඛුද්‌දකනිකාය (අට්‌ඨකථා) • Khuddakanikāya (aṭṭhakathā) / උදාන-අට්‌ඨකථා • Udāna-aṭṭhakathā / 1. පඨමලකුණ්‌ඩකභද්‌දියසුත්‌තවණ්‌ණනා • 1. Paṭhamalakuṇḍakabhaddiyasuttavaṇṇanā
