| Library / Tipiṭaka / ਤਿਪਿਟਕ • Tipiṭaka / ਉਦਾਨ-ਅਟ੍ਠਕਥਾ • Udāna-aṭṭhakathā |
੭. ਚੂਲ਼વਗ੍ਗੋ
7. Cūḷavaggo
੧. ਪਠਮਲਕੁਣ੍ਡਕਭਦ੍ਦਿਯਸੁਤ੍ਤવਣ੍ਣਨਾ
1. Paṭhamalakuṇḍakabhaddiyasuttavaṇṇanā
੬੧. ਚੂਲ਼વਗ੍ਗਸ੍ਸ ਪਠਮੇ ਲਕੁਣ੍ਡਕਭਦ੍ਦਿਯਨ੍ਤਿ ਏਤ੍ਥ ਭਦ੍ਦਿਯੋਤਿ ਤਸ੍ਸ ਆਯਸ੍ਮਤੋ ਨਾਮਂ, ਕਾਯਸ੍ਸ ਪਨ ਰਸ੍ਸਤ੍ਤਾ ‘‘ਲਕੁਣ੍ਡਕਭਦ੍ਦਿਯੋ’’ਤਿ ਨਂ ਸਞ੍ਜਾਨਨ੍ਤਿ। ਸੋ ਕਿਰ ਸਾવਤ੍ਥਿવਾਸੀ ਕੁਲਪੁਤ੍ਤੋ ਮਹਦ੍ਧਨੋ ਮਹਾਭੋਗੋ ਰੂਪੇਨ ਅਪਾਸਾਦਿਕੋ ਦੁਬ੍ਬਣ੍ਣੋ ਦੁਦ੍ਦਸਿਕੋ ਓਕੋਟਿਮਕੋ। ਸੋ ਏਕਦਿવਸਂ ਸਤ੍ਥਰਿ ਜੇਤવਨੇ વਿਹਰਨ੍ਤੇ ਉਪਾਸਕੇਹਿ ਸਦ੍ਧਿਂ વਿਹਾਰਂ ਗਨ੍ਤ੍વਾ ਧਮ੍ਮਦੇਸਨਂ ਸੁਤ੍વਾ ਪਟਿਲਦ੍ਧਸਦ੍ਧੋ ਪਬ੍ਬਜਿਤ੍વਾ ਲਦ੍ਧੂਪਸਮ੍ਪਦੋ ਸਤ੍ਥੁ ਸਨ੍ਤਿਕੇ ਕਮ੍ਮਟ੍ਠਾਨਂ ਗਹੇਤ੍વਾ વਿਪਸ੍ਸਨਾਯ ਕਮ੍ਮਂ ਕਰੋਨ੍ਤੋ ਸੋਤਾਪਤ੍ਤਿਫਲਂ ਪਾਪੁਣਿ। ਤਦਾ ਸੇਕ੍ਖਾ ਭਿਕ੍ਖੂ ਯੇਭੁਯ੍ਯੇਨ ਆਯਸ੍ਮਨ੍ਤਂ ਸਾਰਿਪੁਤ੍ਤਂ ਉਪਸਙ੍ਕਮਿਤ੍વਾ ਉਪਰਿਮਗ੍ਗਤ੍ਥਾਯ ਕਮ੍ਮਟ੍ਠਾਨਂ ਯਾਚਨ੍ਤਿ, ਧਮ੍ਮਦੇਸਨਂ ਯਾਚਨ੍ਤਿ, ਪਞ੍ਹਂ ਪੁਚ੍ਛਨ੍ਤਿ। ਸੋ ਤੇਸਂ ਅਧਿਪ੍ਪਾਯਂ ਪੂਰੇਨ੍ਤੋ ਕਮ੍ਮਟ੍ਠਾਨਂ ਆਚਿਕ੍ਖਤਿ, ਧਮ੍ਮਂ ਦੇਸੇਤਿ, ਪਞ੍ਹਂ વਿਸ੍ਸਜ੍ਜੇਤਿ। ਤੇ ਘਟੇਨ੍ਤਾ વਾਯਮਨ੍ਤਾ ਅਪ੍ਪੇਕਚ੍ਚੇ ਸਕਦਾਗਾਮਿਫਲਂ, ਅਪ੍ਪੇਕਚ੍ਚੇ ਅਨਾਗਾਮਿਫਲਂ, ਅਪ੍ਪੇਕਚ੍ਚੇ ਅਰਹਤ੍ਤਂ, ਅਪ੍ਪੇਕਚ੍ਚੇ ਤਿਸ੍ਸੋ વਿਜ੍ਜਾ, ਅਪ੍ਪੇਕਚ੍ਚੇ ਛਲ਼ਭਿਞ੍ਞਾ, ਅਪ੍ਪੇਕਚ੍ਚੇ ਚਤਸ੍ਸੋ ਪਟਿਸਮ੍ਭਿਦਾ ਅਧਿਗਚ੍ਛਨ੍ਤਿ। ਤੇ ਦਿਸ੍વਾ ਲਕੁਣ੍ਡਕਭਦ੍ਦਿਯੋਪਿ ਸੇਖੋ ਸਮਾਨੋ ਕਾਲਂ ਞਤ੍વਾ ਅਤ੍ਤਨੋ ਚਿਤ੍ਤਕਲ੍ਲਤਞ੍ਚ ਸਲ੍ਲੇਖਞ੍ਚ ਪਚ੍ਚવੇਕ੍ਖਿਤ੍વਾ ਧਮ੍ਮਸੇਨਾਪਤਿਂ ਉਪਸਙ੍ਕਮਿਤ੍વਾ ਕਤਪਟਿਸਨ੍ਥਾਰੋ ਸਮ੍ਮੋਦਮਾਨੋ ਧਮ੍ਮਦੇਸਨਂ ਯਾਚਿ। ਸੋਪਿਸ੍ਸ ਅਜ੍ਝਾਸਯਸ੍ਸ ਅਨੁਰੂਪਂ ਕਥਂ ਕਥੇਸਿ। ਤੇਨ વੁਤ੍ਤਂ – ‘‘ਤੇਨ ਖੋ ਪਨ ਸਮਯੇਨ ਆਯਸ੍ਮਾ ਸਾਰਿਪੁਤ੍ਤੋ ਆਯਸ੍ਮਨ੍ਤਂ ਲਕੁਣ੍ਡਕਭਦ੍ਦਿਯਂ ਅਨੇਕਪਰਿਯਾਯੇਨ ਧਮ੍ਮਿਯਾ ਕਥਾਯ ਸਨ੍ਦਸ੍ਸੇਤੀ’’ਤਿਆਦਿ।
61. Cūḷavaggassa paṭhame lakuṇḍakabhaddiyanti ettha bhaddiyoti tassa āyasmato nāmaṃ, kāyassa pana rassattā ‘‘lakuṇḍakabhaddiyo’’ti naṃ sañjānanti. So kira sāvatthivāsī kulaputto mahaddhano mahābhogo rūpena apāsādiko dubbaṇṇo duddasiko okoṭimako. So ekadivasaṃ satthari jetavane viharante upāsakehi saddhiṃ vihāraṃ gantvā dhammadesanaṃ sutvā paṭiladdhasaddho pabbajitvā laddhūpasampado satthu santike kammaṭṭhānaṃ gahetvā vipassanāya kammaṃ karonto sotāpattiphalaṃ pāpuṇi. Tadā sekkhā bhikkhū yebhuyyena āyasmantaṃ sāriputtaṃ upasaṅkamitvā uparimaggatthāya kammaṭṭhānaṃ yācanti, dhammadesanaṃ yācanti, pañhaṃ pucchanti. So tesaṃ adhippāyaṃ pūrento kammaṭṭhānaṃ ācikkhati, dhammaṃ deseti, pañhaṃ vissajjeti. Te ghaṭentā vāyamantā appekacce sakadāgāmiphalaṃ, appekacce anāgāmiphalaṃ, appekacce arahattaṃ, appekacce tisso vijjā, appekacce chaḷabhiññā, appekacce catasso paṭisambhidā adhigacchanti. Te disvā lakuṇḍakabhaddiyopi sekho samāno kālaṃ ñatvā attano cittakallatañca sallekhañca paccavekkhitvā dhammasenāpatiṃ upasaṅkamitvā katapaṭisanthāro sammodamāno dhammadesanaṃ yāci. Sopissa ajjhāsayassa anurūpaṃ kathaṃ kathesi. Tena vuttaṃ – ‘‘tena kho pana samayena āyasmā sāriputto āyasmantaṃ lakuṇḍakabhaddiyaṃ anekapariyāyena dhammiyā kathāya sandassetī’’tiādi.
ਤਤ੍ਥ ਅਨੇਕਪਰਿਯਾਯੇਨਾਤਿ ‘‘ਇਤਿਪਿ ਪਞ੍ਚਕ੍ਖਨ੍ਧਾ ਅਨਿਚ੍ਚਾ, ਇਤਿਪਿ ਦੁਕ੍ਖਾ, ਇਤਿਪਿ ਅਨਤ੍ਤਾ’’ਤਿ ਏવਂ ਅਨੇਕੇਹਿ ਕਾਰਣੇਹਿ। ਧਮ੍ਮਿਯਾ ਕਥਾਯਾਤਿ ਪਞ੍ਚਨ੍ਨਂ ਉਪਾਦਾਨਕ੍ਖਨ੍ਧਾਨਂ ਉਦਯਬ੍ਬਯਾਦਿਪਕਾਸਨਿਯਾ ਧਮ੍ਮਿਯਾ ਕਥਾਯ। ਸਨ੍ਦਸ੍ਸੇਤੀਤਿ ਤਾਨਿਯੇવ ਅਨਿਚ੍ਚਾਦਿਲਕ੍ਖਣਾਨਿ ਉਦਯਬ੍ਬਯਾਦਿਕੇ ਚ ਸਮ੍ਮਾ ਦਸ੍ਸੇਤਿ, ਹਤ੍ਥੇਨ ਗਹੇਤ੍વਾ વਿਯ ਪਚ੍ਚਕ੍ਖਤੋ ਦਸ੍ਸੇਤਿ। ਸਮਾਦਪੇਤੀਤਿ ਤਤ੍ਥ ਲਕ੍ਖਣਾਰਮ੍ਮਣਿਕਂ વਿਪਸ੍ਸਨਂ ਸਮ੍ਮਾ ਆਦਪੇਤਿ, ਯਥਾ વੀਥਿਪਟਿਪਨ੍ਨਾ ਹੁਤ੍વਾ ਪવਤ੍ਤਤਿ, ਏવਂ ਗਣ੍ਹਾਪੇਤਿ। ਸਮੁਤ੍ਤੇਜੇਤੀਤਿ વਿਪਸ੍ਸਨਾਯ ਆਰਦ੍ਧਾਯ ਸਙ੍ਖਾਰਾਨਂ ਉਦਯਬ੍ਬਯਾਦੀਸੁ ਉਪਟ੍ਠਹਨ੍ਤੇਸੁ ਯਥਾਕਾਲਂ ਪਗ੍ਗਹਨਿਗ੍ਗਹਸਮੁਪੇਕ੍ਖਣੇਹਿ ਬੋਜ੍ਝਙ੍ਗਾਨਂ ਅਨੁਪવਤ੍ਤਨੇਨ ਭਾવਨਂ ਮਜ੍ਝਿਮਂ વੀਥਿਂ ਓਤਾਰੇਤ੍વਾ ਯਥਾ વਿਪਸ੍ਸਨਾਞਾਣਂ ਸੂਰਂ ਪਸਨ੍ਨਂ ਹੁਤ੍વਾ વਹਤਿ, ਏવਂ ਇਨ੍ਦ੍ਰਿਯਾਨਂ વਿਸਦਭਾવਕਰਣੇਨ વਿਪਸ੍ਸਨਾਚਿਤ੍ਤਂ ਸਮ੍ਮਾ ਉਤ੍ਤੇਜੇਤਿ, વਿਸਦਾਪਨવਸੇਨ વੋਦਪੇਤਿ। ਸਮ੍ਪਹਂਸੇਤੀਤਿ ਤਥਾ ਪવਤ੍ਤਿਯਮਾਨਾਯ વਿਪਸ੍ਸਨਾਯ ਸਮਪ੍ਪવਤ੍ਤਭਾવਨਾવਸੇਨ ਚੇવ ਉਪਰਿਲਦ੍ਧਬ੍ਬਭਾવਨਾਬਲੇਨ ਚ ਚਿਤ੍ਤਂ ਸਮ੍ਮਾ ਪਹਂਸੇਤਿ, ਲਦ੍ਧਸ੍ਸਾਦવਸੇਨ વਾ ਸੁਟ੍ਠੁ ਤੋਸੇਤਿ। ਅਨੁਪਾਦਾਯ ਆਸવੇਹਿ ਚਿਤ੍ਤਂ વਿਮੁਚ੍ਚੀਤਿ ਯਥਾ ਯਥਾ ਧਮ੍ਮਸੇਨਾਪਤਿ ਧਮ੍ਮਂ ਦੇਸੇਤਿ, ਤਥਾ ਤਥਾ ਤਥਲਕ੍ਖਣਂ વਿਪਸ੍ਸਨ੍ਤਸ੍ਸ ਥੇਰਸ੍ਸ ਚ ਦੇਸਨਾਨੁਭਾવੇਨ, ਅਤ੍ਤਨੋ ਚ ਉਪਨਿਸ੍ਸਯਸਮ੍ਪਤ੍ਤਿਯਾ ਞਾਣਸ੍ਸ ਪਰਿਪਾਕਂ ਗਤਤ੍ਤਾ ਦੇਸਨਾਨੁਸਾਰੇਨ ਞਾਣੇ ਅਨੁਪવਤ੍ਤਨ੍ਤੇ ਕਾਮਾਸવਾਦੀਸੁ ਕਞ੍ਚਿ ਆਸવਂ ਅਗ੍ਗਹੇਤ੍વਾ ਮਗ੍ਗਪਟਿਪਾਟਿਯਾવ ਅਨવਸੇਸਤੋ ਚਿਤ੍ਤਂ વਿਮੁਚ੍ਚਿ, ਅਰਹਤ੍ਤਫਲਂ ਸਚ੍ਛਾਕਾਸੀਤਿ ਅਤ੍ਥੋ।
Tattha anekapariyāyenāti ‘‘itipi pañcakkhandhā aniccā, itipi dukkhā, itipi anattā’’ti evaṃ anekehi kāraṇehi. Dhammiyā kathāyāti pañcannaṃ upādānakkhandhānaṃ udayabbayādipakāsaniyā dhammiyā kathāya. Sandassetīti tāniyeva aniccādilakkhaṇāni udayabbayādike ca sammā dasseti, hatthena gahetvā viya paccakkhato dasseti. Samādapetīti tattha lakkhaṇārammaṇikaṃ vipassanaṃ sammā ādapeti, yathā vīthipaṭipannā hutvā pavattati, evaṃ gaṇhāpeti. Samuttejetīti vipassanāya āraddhāya saṅkhārānaṃ udayabbayādīsu upaṭṭhahantesu yathākālaṃ paggahaniggahasamupekkhaṇehi bojjhaṅgānaṃ anupavattanena bhāvanaṃ majjhimaṃ vīthiṃ otāretvā yathā vipassanāñāṇaṃ sūraṃ pasannaṃ hutvā vahati, evaṃ indriyānaṃ visadabhāvakaraṇena vipassanācittaṃ sammā uttejeti, visadāpanavasena vodapeti. Sampahaṃsetīti tathā pavattiyamānāya vipassanāya samappavattabhāvanāvasena ceva upariladdhabbabhāvanābalena ca cittaṃ sammā pahaṃseti, laddhassādavasena vā suṭṭhu toseti. Anupādāya āsavehi cittaṃ vimuccīti yathā yathā dhammasenāpati dhammaṃ deseti, tathā tathā tathalakkhaṇaṃ vipassantassa therassa ca desanānubhāvena, attano ca upanissayasampattiyā ñāṇassa paripākaṃ gatattā desanānusārena ñāṇe anupavattante kāmāsavādīsu kañci āsavaṃ aggahetvā maggapaṭipāṭiyāva anavasesato cittaṃ vimucci, arahattaphalaṃ sacchākāsīti attho.
ਏਤਮਤ੍ਥਂ વਿਦਿਤ੍વਾਤਿ ਏਤਂ ਆਯਸ੍ਮਤੋ ਲਕੁਣ੍ਡਕਭਦ੍ਦਿਯਸ੍ਸ ਅਞ੍ਞਾਰਾਧਨਸਙ੍ਖਾਤਂ ਅਤ੍ਥਂ ਸਬ੍ਬਾਕਾਰਤੋ વਿਦਿਤ੍વਾ ਤਦਤ੍ਥਦੀਪਨਂ ਇਮਂ ਉਦਾਨਂ ਉਦਾਨੇਸਿ।
Etamatthaṃ viditvāti etaṃ āyasmato lakuṇḍakabhaddiyassa aññārādhanasaṅkhātaṃ atthaṃ sabbākārato viditvā tadatthadīpanaṃ imaṃ udānaṃ udānesi.
ਤਤ੍ਥ ਉਦ੍ਧਨ੍ਤਿ ਰੂਪਧਾਤੁਯਾ ਅਰੂਪਧਾਤੁਯਾ ਚ। ਅਧੋਤਿ ਕਾਮਧਾਤੁਯਾ। ਸਬ੍ਬਧੀਤਿ ਸਬ੍ਬਸ੍ਮਿਮ੍ਪਿ ਸਙ੍ਖਾਰਗਤੇ। વਿਪ੍ਪਮੁਤ੍ਤੋਤਿ ਪੁਬ੍ਬਭਾਗੇ વਿਕ੍ਖਮ੍ਭਨવਿਮੁਤ੍ਤਿਯਾ ਅਪਰਭਾਗੇ ਸਮੁਚ੍ਛੇਦਪਟਿਪਸ੍ਸਦ੍ਧਿવਿਮੁਤ੍ਤੀਹਿ ਸਬ੍ਬਪ੍ਪਕਾਰੇਨ વਿਮੁਤ੍ਤੋ। ਏਤ੍ਥ ਚ ਉਦ੍ਧਂ વਿਪ੍ਪਮੁਤ੍ਤੋਤਿ ਏਤੇਨ ਪਞ੍ਚੁਦ੍ਧਮ੍ਭਾਗਿਯਸਂਯੋਜਨਪਹਾਨਂ ਦਸ੍ਸੇਤਿ। ਅਧੋ વਿਪ੍ਪਮੁਤ੍ਤੋਤਿ ਏਤੇਨ ਪਞ੍ਚੋਰਮ੍ਭਾਗਿਯਸਂਯੋਜਨਪਹਾਨਂ। ਸਬ੍ਬਧਿ વਿਪ੍ਪਮੁਤ੍ਤੋਤਿ ਏਤੇਨ ਅવਸਿਟ੍ਠਸਬ੍ਬਾਕੁਸਲਪਹਾਨਂ ਦਸ੍ਸੇਤਿ। ਅਥ વਾ ਉਦ੍ਧਨ੍ਤਿ ਅਨਾਗਤਕਾਲਗ੍ਗਹਣਂ। ਅਧੋਤਿ ਅਤੀਤਕਾਲਗ੍ਗਹਣਂ। ਉਭਯਗ੍ਗਹਣੇਨੇવ ਤਦੁਭਯਪਟਿਸਂਯੁਤ੍ਤਤ੍ਤਾ ਪਚ੍ਚੁਪ੍ਪਨ੍ਨੋ ਅਦ੍ਧਾ ਗਹਿਤੋ ਹੋਤਿ, ਤਤ੍ਥ ਅਨਾਗਤਕਾਲਗ੍ਗਹਣੇਨ ਅਨਾਗਤਕ੍ਖਨ੍ਧਾਯਤਨਧਾਤੁਯੋ ਗਹਿਤਾ। ਸੇਸਪਦੇਸੁਪਿ ਏਸੇવ ਨਯੋ। ਸਬ੍ਬਧੀਤਿ ਕਾਮਭੇਦਾਦਿਕੇ ਸਬ੍ਬਸ੍ਮਿਂ ਭવੇ। ਇਦਂ વੁਤ੍ਤਂ ਹੋਤਿ – ਅਨਾਗਤੋ ਅਤੀਤੋ ਪਚ੍ਚੁਪ੍ਪਨ੍ਨੋਤਿ ਏવਂ ਤਿਯਦ੍ਧਸਙ੍ਗਹਿਤੇ ਸਬ੍ਬਸ੍ਮਿਂ ਭવੇ વਿਪ੍ਪਮੁਤ੍ਤੋਤਿ।
Tattha uddhanti rūpadhātuyā arūpadhātuyā ca. Adhoti kāmadhātuyā. Sabbadhīti sabbasmimpi saṅkhāragate. Vippamuttoti pubbabhāge vikkhambhanavimuttiyā aparabhāge samucchedapaṭipassaddhivimuttīhi sabbappakārena vimutto. Ettha ca uddhaṃ vippamuttoti etena pañcuddhambhāgiyasaṃyojanapahānaṃ dasseti. Adho vippamuttoti etena pañcorambhāgiyasaṃyojanapahānaṃ. Sabbadhivippamuttoti etena avasiṭṭhasabbākusalapahānaṃ dasseti. Atha vā uddhanti anāgatakālaggahaṇaṃ. Adhoti atītakālaggahaṇaṃ. Ubhayaggahaṇeneva tadubhayapaṭisaṃyuttattā paccuppanno addhā gahito hoti, tattha anāgatakālaggahaṇena anāgatakkhandhāyatanadhātuyo gahitā. Sesapadesupi eseva nayo. Sabbadhīti kāmabhedādike sabbasmiṃ bhave. Idaṃ vuttaṃ hoti – anāgato atīto paccuppannoti evaṃ tiyaddhasaṅgahite sabbasmiṃ bhave vippamuttoti.
ਅਯਂਹਮਸ੍ਮੀਤਿ ਅਨਾਨੁਪਸ੍ਸੀਤਿ ਯੋ ਏવਂ વਿਪ੍ਪਮੁਤ੍ਤੋ, ਸੋ ਰੂਪવੇਦਨਾਦੀਸੁ ‘‘ਅਯਂ ਨਾਮ ਧਮ੍ਮੋ ਅਹਮਸ੍ਮੀ’’ਤਿ ਦਿਟ੍ਠਿਮਾਨਮਞ੍ਞਨਾવਸੇਨ ਏવਂ ਨਾਨੁਪਸ੍ਸਤਿ। ਤਸ੍ਸ ਤਥਾ ਦਸ੍ਸਨੇ ਕਾਰਣਂ ਨਤ੍ਥੀਤਿ ਅਧਿਪ੍ਪਾਯੋ। ਅਥ વਾ ਅਯਂਹਮਸ੍ਮੀਤਿ ਅਨਾਨੁਪਸ੍ਸੀਤਿ ਇਦਂ ਯਥਾવੁਤ੍ਤਾਯ વਿਮੁਤ੍ਤਿਯਾ ਅਧਿਗਮੁਪਾਯਦੀਪਨਂ। ਤਿਯਦ੍ਧਸਙ੍ਗਹਿਤੇ ਤੇਭੂਮਕੇ ਸਙ੍ਖਾਰੇ ‘‘ਏਤਂ ਮਮ, ਏਸੋਹਮਸ੍ਮਿ, ਏਸੋ ਮੇ ਅਤ੍ਤਾ’’ਤਿ ਪવਤ੍ਤਨਸਭਾવਾਯ ਮਞ੍ਞਨਾਯ ਅਨਧਿਟ੍ਠਾਨਂ ਕਤ੍વਾ ‘‘ਨੇਤਂ ਮਮ, ਨੇਸੋਹਮਸ੍ਮਿ, ਨ ਮੇ ਸੋ ਅਤ੍ਤਾ’’ਤਿ ਏવਂ ਉਪ੍ਪਜ੍ਜਮਾਨਾ ਯਾ ਪੁਬ੍ਬਭਾਗવੁਟ੍ਠਾਨਗਾਮਿਨੀ વਿਪਸ੍ਸਨਾ, ਸਾ વਿਮੁਤ੍ਤਿਯਾ ਪਦਟ੍ਠਾਨਂ। ਏવਂ વਿਮੁਤ੍ਤੋ ਉਦਤਾਰਿ ਓਘਂ, ਅਤਿਣ੍ਣਪੁਬ੍ਬਂ ਅਪੁਨਬ੍ਭવਾਯਾਤਿ ਏવਂ ਦਸਹਿ ਸਂਯੋਜਨੇਹਿ ਸਬ੍ਬਾਕੁਸਲੇਹਿ ਚ ਸਬ੍ਬਥਾ વਿਮੁਤ੍ਤੋ ਅਰਹਾ ਅਰਿਯਮਗ੍ਗਾਧਿਗਮਨਤੋ ਪੁਬ੍ਬੇ ਸੁਪਿਨਨ੍ਤੇਪਿ ਅਤਿਣ੍ਣਪੁਬ੍ਬਂ ਕਾਮੋਘੋ ਭવੋਘੋ ਦਿਟ੍ਠੋਘੋ ਅવਿਜ੍ਜੋਘੋਤਿ ਇਮਂ ਚਤੁਬ੍ਬਿਧਂ ਓਘਂ, ਸਂਸਾਰਮਹੋਘਮੇવ વਾ ਅਪੁਨਬ੍ਭવਾਯ ਅਨੁਪਾਦਿਸੇਸਾਯ ਨਿਬ੍ਬਾਨਾਯ ਉਦਤਾਰਿ ਉਤ੍ਤਿਣ੍ਣੋ, ਉਤ੍ਤਰਿਤ੍વਾ ਪਾਰੇ ਠਿਤੋਤਿ ਅਤ੍ਥੋ।
Ayaṃhamasmītianānupassīti yo evaṃ vippamutto, so rūpavedanādīsu ‘‘ayaṃ nāma dhammo ahamasmī’’ti diṭṭhimānamaññanāvasena evaṃ nānupassati. Tassa tathā dassane kāraṇaṃ natthīti adhippāyo. Atha vā ayaṃhamasmīti anānupassīti idaṃ yathāvuttāya vimuttiyā adhigamupāyadīpanaṃ. Tiyaddhasaṅgahite tebhūmake saṅkhāre ‘‘etaṃ mama, esohamasmi, eso me attā’’ti pavattanasabhāvāya maññanāya anadhiṭṭhānaṃ katvā ‘‘netaṃ mama, nesohamasmi, na me so attā’’ti evaṃ uppajjamānā yā pubbabhāgavuṭṭhānagāminī vipassanā, sā vimuttiyā padaṭṭhānaṃ. Evaṃ vimutto udatāri oghaṃ, atiṇṇapubbaṃ apunabbhavāyāti evaṃ dasahi saṃyojanehi sabbākusalehi ca sabbathā vimutto arahā ariyamaggādhigamanato pubbe supinantepi atiṇṇapubbaṃ kāmogho bhavogho diṭṭhogho avijjoghoti imaṃ catubbidhaṃ oghaṃ, saṃsāramahoghameva vā apunabbhavāya anupādisesāya nibbānāya udatāri uttiṇṇo, uttaritvā pāre ṭhitoti attho.
ਪਠਮਸੁਤ੍ਤવਣ੍ਣਨਾ ਨਿਟ੍ਠਿਤਾ।
Paṭhamasuttavaṇṇanā niṭṭhitā.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਸੁਤ੍ਤਪਿਟਕ • Suttapiṭaka / ਖੁਦ੍ਦਕਨਿਕਾਯ • Khuddakanikāya / ਉਦਾਨਪਾਲ਼ਿ • Udānapāḷi / ੧. ਪਠਮਲਕੁਣ੍ਡਕਭਦ੍ਦਿਯਸੁਤ੍ਤਂ • 1. Paṭhamalakuṇḍakabhaddiyasuttaṃ
