১. লসুণৰগ্গো

1. Lasuṇavaggo

১. পঠমলসুণাদিসিক্খাপদৰণ্ণনা

1. Paṭhamalasuṇādisikkhāpadavaṇṇanā

৭৯৭. পাচিত্তিযেসু লসুণৰগ্গস্স পঠমে বদরসাল়ৰং নাম বদরফলানি সুক্খাপেত্ৰা তেহি কত্তব্বব্যঞ্জনৰিকতি। আমকমাগধলসুণঞ্চেৰ, অজ্ঝোহরণঞ্চাতি দ্ৰে অঙ্গানি।

797. Pācittiyesu lasuṇavaggassa paṭhame badarasāḷavaṃ nāma badaraphalāni sukkhāpetvā tehi kattabbabyañjanavikati. Āmakamāgadhalasuṇañceva, ajjhoharaṇañcāti dve aṅgāni.

৭৯৯-৮১২. দুতিযাদীনি উত্তানত্থানি।

799-812. Dutiyādīni uttānatthāni.

৮১৫. ছট্ঠে পাল়িযং আসুম্ভিত্ৰাতি পাতেত্ৰা।

815. Chaṭṭhe pāḷiyaṃ āsumbhitvāti pātetvā.

৮১৭. দধিমত্থূতি দধিম্হি পসন্নোদকং। রসখীরাদীনন্তি মংসরসখীরাদীনং। ভুঞ্জন্তস্স ভিক্খুনো হত্থপাসে ঠানং, পানীযস্স ৰা ৰিধূপনস্স ৰা গহণন্তি দ্ৰে অঙ্গানি।

817.Dadhimatthūti dadhimhi pasannodakaṃ. Rasakhīrādīnanti maṃsarasakhīrādīnaṃ. Bhuñjantassa bhikkhuno hatthapāse ṭhānaṃ, pānīyassa vā vidhūpanassa vā gahaṇanti dve aṅgāni.

৮২২. সত্তমে অৰিঞ্ঞত্তিযা লদ্ধন্তি অত্তনো ৰিঞ্ঞত্তিং ৰিনা লদ্ধং। পুব্বাপরৰিরুদ্ধন্তি সযং করণে পাচিত্তিযন্তি ইদং কারাপনে দুক্কটৰচনেন ৰিরুজ্ঝনং সন্ধায ৰুত্তং। তেনাহ ‘‘ন হী’’তিআদি, ‘‘অৰিঞ্ঞত্তিযা লদ্ধ’’ন্তিআদিৰচনেন ৰা ৰিরুজ্ঝনং সন্ধায ৰুত্তং। অঞ্ঞায ৰিঞ্ঞত্তিপি হি ইমিস্সা অৰিঞ্ঞত্তিযা লদ্ধমেৰাতি। আমকধঞ্ঞৰিঞ্ঞাপনাদি, তং ভজ্জনাদিনা অজ্ঝোহরণন্তি দ্ৰে অঙ্গানি।

822. Sattame aviññattiyā laddhanti attano viññattiṃ vinā laddhaṃ. Pubbāparaviruddhanti sayaṃ karaṇe pācittiyanti idaṃ kārāpane dukkaṭavacanena virujjhanaṃ sandhāya vuttaṃ. Tenāha ‘‘na hī’’tiādi, ‘‘aviññattiyā laddha’’ntiādivacanena vā virujjhanaṃ sandhāya vuttaṃ. Aññāya viññattipi hi imissā aviññattiyā laddhamevāti. Āmakadhaññaviññāpanādi, taṃ bhajjanādinā ajjhoharaṇanti dve aṅgāni.

৮২৪. অট্ঠমে নিব্বিট্ঠোতি লদ্ধো। কেণীতি রঞ্ঞো দাতব্বো আযো, আযুপ্পত্তিট্ঠানন্তি অত্থো । তেনাহ ‘‘একং ঠানন্তর’’ন্তিআদি। ঠানন্তরন্তি চ গামজনপদাণাযত্তং। ৰল়ঞ্জিযমানতিরোকুট্টাদিতা, অনপলোকেত্ৰা উচ্চারাদীনং ছড্ডনাদীতি দ্ৰে অঙ্গানি।

824. Aṭṭhame nibbiṭṭhoti laddho. Keṇīti rañño dātabbo āyo, āyuppattiṭṭhānanti attho . Tenāha ‘‘ekaṃ ṭhānantara’’ntiādi. Ṭhānantaranti ca gāmajanapadāṇāyattaṃ. Vaḷañjiyamānatirokuṭṭāditā, anapaloketvā uccārādīnaṃ chaḍḍanādīti dve aṅgāni.

৮৩০. নৰমে ‘‘মত্থকচ্ছিন্ননাল়িকেরম্পী’’তি ৰুত্তত্তা হরিতূপরি ছড্ডনমেৰ পটিক্খিত্তং। তেনাহ ‘‘অনিক্খিত্তবীজেসূ’’তিআদি। যত্থ চ ছড্ডেতুং ৰট্টতি, তত্থ হরিতে ৰচ্চাদিং কাতুম্পি ৰট্টতি এৰ। সব্বেসন্তি ভিক্খুভিক্খুনীনং।

830. Navame ‘‘matthakacchinnanāḷikerampī’’ti vuttattā haritūpari chaḍḍanameva paṭikkhittaṃ. Tenāha ‘‘anikkhittabījesū’’tiādi. Yattha ca chaḍḍetuṃ vaṭṭati, tattha harite vaccādiṃ kātumpi vaṭṭati eva. Sabbesanti bhikkhubhikkhunīnaṃ.

৮৩৬-৭. দসমে তেসংযেৰাতি যেসং নিচ্চং পস্সতি। আরামে ঠত্ৰাতি ঠিতনিসন্নট্ঠানে এৰ ঠত্ৰা সমন্ততো গীৰং পরিৰত্তেত্ৰাপি পস্সতি, অনাপত্তি। ঠিতট্ঠানতো গন্ত্ৰা পস্সিতুং ন ৰট্টতি। কেচি পন ‘‘ৰট্টতী’’তি ৰদন্তি। তং পন ‘‘দস্সনায গচ্ছেয্য, পাচিত্তিয’’ন্তি সামঞ্ঞতো গমনস্স পটিক্খিত্তত্তা, অনাপত্তিযম্পি গমনায অৰুত্তত্তা চ ন গহেতব্বং। নচ্চাদিতা, অননুঞ্ঞাতকারণা গমনং, দস্সনাদি চাতি তীণি অঙ্গানি।

836-7. Dasame tesaṃyevāti yesaṃ niccaṃ passati. Ārāme ṭhatvāti ṭhitanisannaṭṭhāne eva ṭhatvā samantato gīvaṃ parivattetvāpi passati, anāpatti. Ṭhitaṭṭhānato gantvā passituṃ na vaṭṭati. Keci pana ‘‘vaṭṭatī’’ti vadanti. Taṃ pana ‘‘dassanāya gaccheyya, pācittiya’’nti sāmaññato gamanassa paṭikkhittattā, anāpattiyampi gamanāya avuttattā ca na gahetabbaṃ. Naccāditā, ananuññātakāraṇā gamanaṃ, dassanādi cāti tīṇi aṅgāni.

নিট্ঠিতো লসুণৰগ্গো পঠমো।

Niṭṭhito lasuṇavaggo paṭhamo.

Next: ২. অন্ধকারৰগ্গো • 2. Andhakāravaggo

টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / ১. লসুণৰগ্গৰণ্ণনা • 1. Lasuṇavaggavaṇṇanā

টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā
১. পঠমলসুণসিক্খাপদৰণ্ণনা • 1. Paṭhamalasuṇasikkhāpadavaṇṇanā
২. দুতিযসিক্খাপদৰণ্ণনা • 2. Dutiyasikkhāpadavaṇṇanā
৫. পঞ্চমসিক্খাপদৰণ্ণনা • 5. Pañcamasikkhāpadavaṇṇanā
৭. সত্তমসিক্খাপদৰণ্ণনা • 7. Sattamasikkhāpadavaṇṇanā
৮. অট্ঠমসিক্খাপদৰণ্ণনা • 8. Aṭṭhamasikkhāpadavaṇṇanā
১০. দসমসিক্খাপদৰণ্ণনা • 10. Dasamasikkhāpadavaṇṇanā

© 1991-2023 The Titi Tudorancea Bulletin | Titi Tudorancea^® is a Registered Trademark | Terms of use and privacy policy
Contact