๑. ลสุณวโคฺค

1. Lasuṇavaggo

๑. ปฐมลสุณาทิสิกฺขาปทวณฺณนา

1. Paṭhamalasuṇādisikkhāpadavaṇṇanā

๗๙๗. ปาจิตฺติเยสุ ลสุณวคฺคสฺส ปฐเม พทรสาฬวํ นาม พทรผลานิ สุกฺขาเปตฺวา เตหิ กตฺตพฺพพฺยญฺชนวิกติฯ อามกมาคธลสุณเญฺจว, อโชฺฌหรณญฺจาติ เทฺว องฺคานิฯ

797. Pācittiyesu lasuṇavaggassa paṭhame badarasāḷavaṃ nāma badaraphalāni sukkhāpetvā tehi kattabbabyañjanavikati. Āmakamāgadhalasuṇañceva, ajjhoharaṇañcāti dve aṅgāni.

๗๙๙-๘๑๒. ทุติยาทีนิ อุตฺตานตฺถานิฯ

799-812. Dutiyādīni uttānatthāni.

๘๑๕. ฉเฎฺฐ ปาฬิยํ อาสุมฺภิตฺวาติ ปาเตตฺวาฯ

815. Chaṭṭhe pāḷiyaṃ āsumbhitvāti pātetvā.

๘๑๗. ทธิมตฺถูติ ทธิมฺหิ ปสโนฺนทกํฯ รสขีราทีนนฺติ มํสรสขีราทีนํฯ ภุญฺชนฺตสฺส ภิกฺขุโน หตฺถปาเส ฐานํ, ปานียสฺส วา วิธูปนสฺส วา คหณนฺติ เทฺว องฺคานิฯ

817.Dadhimatthūti dadhimhi pasannodakaṃ. Rasakhīrādīnanti maṃsarasakhīrādīnaṃ. Bhuñjantassa bhikkhuno hatthapāse ṭhānaṃ, pānīyassa vā vidhūpanassa vā gahaṇanti dve aṅgāni.

๘๒๒. สตฺตเม อวิญฺญตฺติยา ลทฺธนฺติ อตฺตโน วิญฺญตฺติํ วินา ลทฺธํฯ ปุพฺพาปรวิรุทฺธนฺติ สยํ กรเณ ปาจิตฺติยนฺติ อิทํ การาปเน ทุกฺกฎวจเนน วิรุชฺฌนํ สนฺธาย วุตฺตํฯ เตนาห ‘‘น หี’’ติอาทิ, ‘‘อวิญฺญตฺติยา ลทฺธ’’นฺติอาทิวจเนน วา วิรุชฺฌนํ สนฺธาย วุตฺตํฯ อญฺญาย วิญฺญตฺติปิ หิ อิมิสฺสา อวิญฺญตฺติยา ลทฺธเมวาติฯ อามกธญฺญวิญฺญาปนาทิ, ตํ ภชฺชนาทินา อโชฺฌหรณนฺติ เทฺว องฺคานิฯ

822. Sattame aviññattiyā laddhanti attano viññattiṃ vinā laddhaṃ. Pubbāparaviruddhanti sayaṃ karaṇe pācittiyanti idaṃ kārāpane dukkaṭavacanena virujjhanaṃ sandhāya vuttaṃ. Tenāha ‘‘na hī’’tiādi, ‘‘aviññattiyā laddha’’ntiādivacanena vā virujjhanaṃ sandhāya vuttaṃ. Aññāya viññattipi hi imissā aviññattiyā laddhamevāti. Āmakadhaññaviññāpanādi, taṃ bhajjanādinā ajjhoharaṇanti dve aṅgāni.

๘๒๔. อฎฺฐเม นิพฺพิโฎฺฐติ ลโทฺธฯ เกณีติ รโญฺญ ทาตโพฺพ อาโย, อายุปฺปตฺติฎฺฐานนฺติ อโตฺถ ฯ เตนาห ‘‘เอกํ ฐานนฺตร’’นฺติอาทิฯ ฐานนฺตรนฺติ จ คามชนปทาณายตฺตํฯ วฬญฺชิยมานติโรกุฎฺฎาทิตา, อนปโลเกตฺวา อุจฺจาราทีนํ ฉฑฺฑนาทีติ เทฺว องฺคานิฯ

824. Aṭṭhame nibbiṭṭhoti laddho. Keṇīti rañño dātabbo āyo, āyuppattiṭṭhānanti attho . Tenāha ‘‘ekaṃ ṭhānantara’’ntiādi. Ṭhānantaranti ca gāmajanapadāṇāyattaṃ. Vaḷañjiyamānatirokuṭṭāditā, anapaloketvā uccārādīnaṃ chaḍḍanādīti dve aṅgāni.

๘๓๐. นวเม ‘‘มตฺถกจฺฉินฺนนาฬิเกรมฺปี’’ติ วุตฺตตฺตา หริตูปริ ฉฑฺฑนเมว ปฎิกฺขิตฺตํฯ เตนาห ‘‘อนิกฺขิตฺตพีเชสู’’ติอาทิฯ ยตฺถ จ ฉเฑฺฑตุํ วฎฺฎติ, ตตฺถ หริเต วจฺจาทิํ กาตุมฺปิ วฎฺฎติ เอวฯ สเพฺพสนฺติ ภิกฺขุภิกฺขุนีนํฯ

830. Navame ‘‘matthakacchinnanāḷikerampī’’ti vuttattā haritūpari chaḍḍanameva paṭikkhittaṃ. Tenāha ‘‘anikkhittabījesū’’tiādi. Yattha ca chaḍḍetuṃ vaṭṭati, tattha harite vaccādiṃ kātumpi vaṭṭati eva. Sabbesanti bhikkhubhikkhunīnaṃ.

๘๓๖-๗. ทสเม เตสํเยวาติ เยสํ นิจฺจํ ปสฺสติฯ อาราเม ฐตฺวาติ ฐิตนิสนฺนฎฺฐาเน เอว ฐตฺวา สมนฺตโต คีวํ ปริวเตฺตตฺวาปิ ปสฺสติ, อนาปตฺติฯ ฐิตฎฺฐานโต คนฺตฺวา ปสฺสิตุํ น วฎฺฎติฯ เกจิ ปน ‘‘วฎฺฎตี’’ติ วทนฺติฯ ตํ ปน ‘‘ทสฺสนาย คเจฺฉยฺย, ปาจิตฺติย’’นฺติ สามญฺญโต คมนสฺส ปฎิกฺขิตฺตตฺตา, อนาปตฺติยมฺปิ คมนาย อวุตฺตตฺตา จ น คเหตพฺพํฯ นจฺจาทิตา, อนนุญฺญาตการณา คมนํ, ทสฺสนาทิ จาติ ตีณิ องฺคานิฯ

836-7. Dasame tesaṃyevāti yesaṃ niccaṃ passati. Ārāme ṭhatvāti ṭhitanisannaṭṭhāne eva ṭhatvā samantato gīvaṃ parivattetvāpi passati, anāpatti. Ṭhitaṭṭhānato gantvā passituṃ na vaṭṭati. Keci pana ‘‘vaṭṭatī’’ti vadanti. Taṃ pana ‘‘dassanāya gaccheyya, pācittiya’’nti sāmaññato gamanassa paṭikkhittattā, anāpattiyampi gamanāya avuttattā ca na gahetabbaṃ. Naccāditā, ananuññātakāraṇā gamanaṃ, dassanādi cāti tīṇi aṅgāni.

นิฎฺฐิโต ลสุณวโคฺค ปฐโมฯ

Niṭṭhito lasuṇavaggo paṭhamo.

Next: ๒. อนฺธการวโคฺค • 2. Andhakāravaggo

ฎีกา • Tīkā / วินยปิฎก (ฎีกา) • Vinayapiṭaka (ṭīkā) / สารตฺถทีปนี-ฎีกา • Sāratthadīpanī-ṭīkā / ๑. ลสุณวคฺควณฺณนา • 1. Lasuṇavaggavaṇṇanā

ฎีกา • Tīkā / วินยปิฎก (ฎีกา) • Vinayapiṭaka (ṭīkā) / วชิรพุทฺธิ-ฎีกา • Vajirabuddhi-ṭīkā
๑. ปฐมลสุณสิกฺขาปทวณฺณนา • 1. Paṭhamalasuṇasikkhāpadavaṇṇanā
๒. ทุติยสิกฺขาปทวณฺณนา • 2. Dutiyasikkhāpadavaṇṇanā
๕. ปญฺจมสิกฺขาปทวณฺณนา • 5. Pañcamasikkhāpadavaṇṇanā
๗. สตฺตมสิกฺขาปทวณฺณนา • 7. Sattamasikkhāpadavaṇṇanā
๘. อฎฺฐมสิกฺขาปทวณฺณนา • 8. Aṭṭhamasikkhāpadavaṇṇanā
๑๐. ทสมสิกฺขาปทวณฺณนา • 10. Dasamasikkhāpadavaṇṇanā

© 1991-2023 The Titi Tudorancea Bulletin | Titi Tudorancea^® is a Registered Trademark | Terms of use and privacy policy
Contact