೧. ಲಸುಣವಗ್ಗೋ

1. Lasuṇavaggo

೧. ಪಠಮಲಸುಣಾದಿಸಿಕ್ಖಾಪದವಣ್ಣನಾ

1. Paṭhamalasuṇādisikkhāpadavaṇṇanā

೭೯೭. ಪಾಚಿತ್ತಿಯೇಸು ಲಸುಣವಗ್ಗಸ್ಸ ಪಠಮೇ ಬದರಸಾಳವಂ ನಾಮ ಬದರಫಲಾನಿ ಸುಕ್ಖಾಪೇತ್ವಾ ತೇಹಿ ಕತ್ತಬ್ಬಬ್ಯಞ್ಜನವಿಕತಿ। ಆಮಕಮಾಗಧಲಸುಣಞ್ಚೇವ, ಅಜ್ಝೋಹರಣಞ್ಚಾತಿ ದ್ವೇ ಅಙ್ಗಾನಿ।

797. Pācittiyesu lasuṇavaggassa paṭhame badarasāḷavaṃ nāma badaraphalāni sukkhāpetvā tehi kattabbabyañjanavikati. Āmakamāgadhalasuṇañceva, ajjhoharaṇañcāti dve aṅgāni.

೭೯೯-೮೧೨. ದುತಿಯಾದೀನಿ ಉತ್ತಾನತ್ಥಾನಿ।

799-812. Dutiyādīni uttānatthāni.

೮೧೫. ಛಟ್ಠೇ ಪಾಳಿಯಂ ಆಸುಮ್ಭಿತ್ವಾತಿ ಪಾತೇತ್ವಾ।

815. Chaṭṭhe pāḷiyaṃ āsumbhitvāti pātetvā.

೮೧೭. ದಧಿಮತ್ಥೂತಿ ದಧಿಮ್ಹಿ ಪಸನ್ನೋದಕಂ। ರಸಖೀರಾದೀನನ್ತಿ ಮಂಸರಸಖೀರಾದೀನಂ। ಭುಞ್ಜನ್ತಸ್ಸ ಭಿಕ್ಖುನೋ ಹತ್ಥಪಾಸೇ ಠಾನಂ, ಪಾನೀಯಸ್ಸ ವಾ ವಿಧೂಪನಸ್ಸ ವಾ ಗಹಣನ್ತಿ ದ್ವೇ ಅಙ್ಗಾನಿ।

817.Dadhimatthūti dadhimhi pasannodakaṃ. Rasakhīrādīnanti maṃsarasakhīrādīnaṃ. Bhuñjantassa bhikkhuno hatthapāse ṭhānaṃ, pānīyassa vā vidhūpanassa vā gahaṇanti dve aṅgāni.

೮೨೨. ಸತ್ತಮೇ ಅವಿಞ್ಞತ್ತಿಯಾ ಲದ್ಧನ್ತಿ ಅತ್ತನೋ ವಿಞ್ಞತ್ತಿಂ ವಿನಾ ಲದ್ಧಂ। ಪುಬ್ಬಾಪರವಿರುದ್ಧನ್ತಿ ಸಯಂ ಕರಣೇ ಪಾಚಿತ್ತಿಯನ್ತಿ ಇದಂ ಕಾರಾಪನೇ ದುಕ್ಕಟವಚನೇನ ವಿರುಜ್ಝನಂ ಸನ್ಧಾಯ ವುತ್ತಂ। ತೇನಾಹ ‘‘ನ ಹೀ’’ತಿಆದಿ, ‘‘ಅವಿಞ್ಞತ್ತಿಯಾ ಲದ್ಧ’’ನ್ತಿಆದಿವಚನೇನ ವಾ ವಿರುಜ್ಝನಂ ಸನ್ಧಾಯ ವುತ್ತಂ। ಅಞ್ಞಾಯ ವಿಞ್ಞತ್ತಿಪಿ ಹಿ ಇಮಿಸ್ಸಾ ಅವಿಞ್ಞತ್ತಿಯಾ ಲದ್ಧಮೇವಾತಿ। ಆಮಕಧಞ್ಞವಿಞ್ಞಾಪನಾದಿ, ತಂ ಭಜ್ಜನಾದಿನಾ ಅಜ್ಝೋಹರಣನ್ತಿ ದ್ವೇ ಅಙ್ಗಾನಿ।

822. Sattame aviññattiyā laddhanti attano viññattiṃ vinā laddhaṃ. Pubbāparaviruddhanti sayaṃ karaṇe pācittiyanti idaṃ kārāpane dukkaṭavacanena virujjhanaṃ sandhāya vuttaṃ. Tenāha ‘‘na hī’’tiādi, ‘‘aviññattiyā laddha’’ntiādivacanena vā virujjhanaṃ sandhāya vuttaṃ. Aññāya viññattipi hi imissā aviññattiyā laddhamevāti. Āmakadhaññaviññāpanādi, taṃ bhajjanādinā ajjhoharaṇanti dve aṅgāni.

೮೨೪. ಅಟ್ಠಮೇ ನಿಬ್ಬಿಟ್ಠೋತಿ ಲದ್ಧೋ। ಕೇಣೀತಿ ರಞ್ಞೋ ದಾತಬ್ಬೋ ಆಯೋ, ಆಯುಪ್ಪತ್ತಿಟ್ಠಾನನ್ತಿ ಅತ್ಥೋ । ತೇನಾಹ ‘‘ಏಕಂ ಠಾನನ್ತರ’’ನ್ತಿಆದಿ। ಠಾನನ್ತರನ್ತಿ ಚ ಗಾಮಜನಪದಾಣಾಯತ್ತಂ। ವಳಞ್ಜಿಯಮಾನತಿರೋಕುಟ್ಟಾದಿತಾ, ಅನಪಲೋಕೇತ್ವಾ ಉಚ್ಚಾರಾದೀನಂ ಛಡ್ಡನಾದೀತಿ ದ್ವೇ ಅಙ್ಗಾನಿ।

824. Aṭṭhame nibbiṭṭhoti laddho. Keṇīti rañño dātabbo āyo, āyuppattiṭṭhānanti attho . Tenāha ‘‘ekaṃ ṭhānantara’’ntiādi. Ṭhānantaranti ca gāmajanapadāṇāyattaṃ. Vaḷañjiyamānatirokuṭṭāditā, anapaloketvā uccārādīnaṃ chaḍḍanādīti dve aṅgāni.

೮೩೦. ನವಮೇ ‘‘ಮತ್ಥಕಚ್ಛಿನ್ನನಾಳಿಕೇರಮ್ಪೀ’’ತಿ ವುತ್ತತ್ತಾ ಹರಿತೂಪರಿ ಛಡ್ಡನಮೇವ ಪಟಿಕ್ಖಿತ್ತಂ। ತೇನಾಹ ‘‘ಅನಿಕ್ಖಿತ್ತಬೀಜೇಸೂ’’ತಿಆದಿ। ಯತ್ಥ ಚ ಛಡ್ಡೇತುಂ ವಟ್ಟತಿ, ತತ್ಥ ಹರಿತೇ ವಚ್ಚಾದಿಂ ಕಾತುಮ್ಪಿ ವಟ್ಟತಿ ಏವ। ಸಬ್ಬೇಸನ್ತಿ ಭಿಕ್ಖುಭಿಕ್ಖುನೀನಂ।

830. Navame ‘‘matthakacchinnanāḷikerampī’’ti vuttattā haritūpari chaḍḍanameva paṭikkhittaṃ. Tenāha ‘‘anikkhittabījesū’’tiādi. Yattha ca chaḍḍetuṃ vaṭṭati, tattha harite vaccādiṃ kātumpi vaṭṭati eva. Sabbesanti bhikkhubhikkhunīnaṃ.

೮೩೬-೭. ದಸಮೇ ತೇಸಂಯೇವಾತಿ ಯೇಸಂ ನಿಚ್ಚಂ ಪಸ್ಸತಿ। ಆರಾಮೇ ಠತ್ವಾತಿ ಠಿತನಿಸನ್ನಟ್ಠಾನೇ ಏವ ಠತ್ವಾ ಸಮನ್ತತೋ ಗೀವಂ ಪರಿವತ್ತೇತ್ವಾಪಿ ಪಸ್ಸತಿ, ಅನಾಪತ್ತಿ। ಠಿತಟ್ಠಾನತೋ ಗನ್ತ್ವಾ ಪಸ್ಸಿತುಂ ನ ವಟ್ಟತಿ। ಕೇಚಿ ಪನ ‘‘ವಟ್ಟತೀ’’ತಿ ವದನ್ತಿ। ತಂ ಪನ ‘‘ದಸ್ಸನಾಯ ಗಚ್ಛೇಯ್ಯ, ಪಾಚಿತ್ತಿಯ’’ನ್ತಿ ಸಾಮಞ್ಞತೋ ಗಮನಸ್ಸ ಪಟಿಕ್ಖಿತ್ತತ್ತಾ, ಅನಾಪತ್ತಿಯಮ್ಪಿ ಗಮನಾಯ ಅವುತ್ತತ್ತಾ ಚ ನ ಗಹೇತಬ್ಬಂ। ನಚ್ಚಾದಿತಾ, ಅನನುಞ್ಞಾತಕಾರಣಾ ಗಮನಂ, ದಸ್ಸನಾದಿ ಚಾತಿ ತೀಣಿ ಅಙ್ಗಾನಿ।

836-7. Dasame tesaṃyevāti yesaṃ niccaṃ passati. Ārāme ṭhatvāti ṭhitanisannaṭṭhāne eva ṭhatvā samantato gīvaṃ parivattetvāpi passati, anāpatti. Ṭhitaṭṭhānato gantvā passituṃ na vaṭṭati. Keci pana ‘‘vaṭṭatī’’ti vadanti. Taṃ pana ‘‘dassanāya gaccheyya, pācittiya’’nti sāmaññato gamanassa paṭikkhittattā, anāpattiyampi gamanāya avuttattā ca na gahetabbaṃ. Naccāditā, ananuññātakāraṇā gamanaṃ, dassanādi cāti tīṇi aṅgāni.

ನಿಟ್ಠಿತೋ ಲಸುಣವಗ್ಗೋ ಪಠಮೋ।

Niṭṭhito lasuṇavaggo paṭhamo.

Next: ೨. ಅನ್ಧಕಾರವಗ್ಗೋ • 2. Andhakāravaggo

ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಸಾರತ್ಥದೀಪನೀ-ಟೀಕಾ • Sāratthadīpanī-ṭīkā / ೧. ಲಸುಣವಗ್ಗವಣ್ಣನಾ • 1. Lasuṇavaggavaṇṇanā

ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಜಿರಬುದ್ಧಿ-ಟೀಕಾ • Vajirabuddhi-ṭīkā
೧. ಪಠಮಲಸುಣಸಿಕ್ಖಾಪದವಣ್ಣನಾ • 1. Paṭhamalasuṇasikkhāpadavaṇṇanā
೨. ದುತಿಯಸಿಕ್ಖಾಪದವಣ್ಣನಾ • 2. Dutiyasikkhāpadavaṇṇanā
೫. ಪಞ್ಚಮಸಿಕ್ಖಾಪದವಣ್ಣನಾ • 5. Pañcamasikkhāpadavaṇṇanā
೭. ಸತ್ತಮಸಿಕ್ಖಾಪದವಣ್ಣನಾ • 7. Sattamasikkhāpadavaṇṇanā
೮. ಅಟ್ಠಮಸಿಕ್ಖಾಪದವಣ್ಣನಾ • 8. Aṭṭhamasikkhāpadavaṇṇanā
೧೦. ದಸಮಸಿಕ್ಖಾಪದವಣ್ಣನಾ • 10. Dasamasikkhāpadavaṇṇanā

© 1991-2023 The Titi Tudorancea Bulletin | Titi Tudorancea^® is a Registered Trademark | Terms of use and privacy policy
Contact