| Library / Tipiṭaka / তিপিটক • Tipiṭaka / ভিক্খুনীৰিভঙ্গ-অট্ঠকথা • Bhikkhunīvibhaṅga-aṭṭhakathā |
৪. পাচিত্তিযকণ্ডং (ভিক্খুনীৰিভঙ্গৰণ্ণনা)
4. Pācittiyakaṇḍaṃ (bhikkhunīvibhaṅgavaṇṇanā)
১. লসুণৰগ্গো
1. Lasuṇavaggo
১. পঠমলসুণসিক্খাপদৰণ্ণনা
1. Paṭhamalasuṇasikkhāpadavaṇṇanā
তিংসকানন্তরং ধম্মা, ছসট্ঠিসতসঙ্গহা।
Tiṃsakānantaraṃ dhammā, chasaṭṭhisatasaṅgahā;
সঙ্গীতা যে অযং দানি, হোতি তেসম্পি ৰণ্ণনা॥
Saṅgītā ye ayaṃ dāni, hoti tesampi vaṇṇanā.
৭৯৩. তত্থ লসুণৰগ্গস্স তাৰ পঠমসিক্খাপদে – দ্ৰে তযো ভণ্ডিকেতি দ্ৰে ৰা তযো ৰা পোট্টলিকে; সম্পুণ্ণমিঞ্জানমেতং অধিৰচনং। ন মত্তং জানিত্ৰাতি পমাণং অজানিত্ৰা খেত্তপালস্স ৰারেন্তস্স বহুং লসুণং হরাপেসি।
793. Tattha lasuṇavaggassa tāva paṭhamasikkhāpade – dve tayo bhaṇḍiketi dve vā tayo vā poṭṭalike; sampuṇṇamiñjānametaṃ adhivacanaṃ. Na mattaṃ jānitvāti pamāṇaṃ ajānitvā khettapālassa vārentassa bahuṃ lasuṇaṃ harāpesi.
অঞ্ঞতরং হংসযোনিন্তি সুৰণ্ণহংসযোনিং। সো তাসং একেকন্তি সো হংসো জাতিস্সরো অহোসি, অথ পুব্বসিনেহেন আগন্ত্ৰা তাসং একেকং পত্তং দেতি, তং তাপনতালনচ্ছেদনক্খমং সুৰণ্ণমেৰ হোতি।
Aññataraṃ haṃsayoninti suvaṇṇahaṃsayoniṃ. So tāsaṃ ekekanti so haṃso jātissaro ahosi, atha pubbasinehena āgantvā tāsaṃ ekekaṃ pattaṃ deti, taṃ tāpanatālanacchedanakkhamaṃ suvaṇṇameva hoti.
৭৯৫. মাগধকন্তি মগধেসু জাতং। মগধরট্ঠে জাতলসুণমেৰ হি ইধ লসুণন্তি অধিপ্পেতং, তম্পি ভণ্ডিকলসুণমেৰ, ন একদ্ৰিতিমিঞ্জকং। কুরুন্দিযং পন জাতদেসং অৰত্ৰা ‘‘মাগধকং নাম ভণ্ডিকলসুণ’’ন্তি ৰুত্তং। অজ্ঝোহারে অজ্ঝোহারেতি এত্থ সচে দ্ৰে তযো ভণ্ডিকে একতোযেৰ সঙ্খাদিত্ৰা অজ্ঝোহরতি, একং পাচিত্তিযং। ভিন্দিত্ৰা একেকং মিঞ্জং খাদন্তিযা পন পযোগগণনায পাচিত্তিযানীতি।
795.Māgadhakanti magadhesu jātaṃ. Magadharaṭṭhe jātalasuṇameva hi idha lasuṇanti adhippetaṃ, tampi bhaṇḍikalasuṇameva, na ekadvitimiñjakaṃ. Kurundiyaṃ pana jātadesaṃ avatvā ‘‘māgadhakaṃ nāma bhaṇḍikalasuṇa’’nti vuttaṃ. Ajjhohāre ajjhohāreti ettha sace dve tayo bhaṇḍike ekatoyeva saṅkhāditvā ajjhoharati, ekaṃ pācittiyaṃ. Bhinditvā ekekaṃ miñjaṃ khādantiyā pana payogagaṇanāya pācittiyānīti.
৭৯৭. পলণ্ডুকাদীনং ৰণ্ণেন ৰা মিঞ্জায ৰা নানত্তং ৰেদিতব্বং – ৰণ্ণেন তাৰ পলণ্ডুকো পণ্ডুৰণ্ণো হোতি। ভঞ্জনকো লোহিতৰণ্ণো। হরিতকো হরিতপণ্ণৰণ্ণো। মিঞ্জায পন পলণ্ডুকস্স একা মিঞ্জা হোতি, ভঞ্জনকস্স দ্ৰে, হরিতকস্স তিস্সো। চাপলসুণো অমিঞ্জকো, অঙ্কুরমত্তমেৰ হি তস্স হোতি। মহাপচ্চরিযাদীসু পন ‘‘পলণ্ডুকস্স তীণি মিঞ্জানি, ভঞ্জনকস্স দ্ৰে, হরিতকস্স এক’’ন্তি ৰুত্তং । এতে পলণ্ডুকাদযো সভাৰেনেৰ ৰট্টন্তি। সূপসম্পাকাদীসু পন মাগধকম্পি ৰট্টতি। তঞ্হি পচ্চমানেসু মুগ্গসূপাদীসু ৰা মচ্ছমংসৰিকতিযা ৰা তেলাদীসু ৰা বদরসাল়ৰাদীসু ৰা অম্বিলসাকাদীসু ৰা উত্তরিভঙ্গেসু ৰা যত্থ কত্থচি অন্তমসো যাগুভত্তেপি পক্খিপিতুং ৰট্টতি। সেসমেত্থ উত্তানমেৰ।
797.Palaṇḍukādīnaṃ vaṇṇena vā miñjāya vā nānattaṃ veditabbaṃ – vaṇṇena tāva palaṇḍuko paṇḍuvaṇṇo hoti. Bhañjanako lohitavaṇṇo. Haritako haritapaṇṇavaṇṇo. Miñjāya pana palaṇḍukassa ekā miñjā hoti, bhañjanakassa dve, haritakassa tisso. Cāpalasuṇo amiñjako, aṅkuramattameva hi tassa hoti. Mahāpaccariyādīsu pana ‘‘palaṇḍukassa tīṇi miñjāni, bhañjanakassa dve, haritakassa eka’’nti vuttaṃ . Ete palaṇḍukādayo sabhāveneva vaṭṭanti. Sūpasampākādīsu pana māgadhakampi vaṭṭati. Tañhi paccamānesu muggasūpādīsu vā macchamaṃsavikatiyā vā telādīsu vā badarasāḷavādīsu vā ambilasākādīsu vā uttaribhaṅgesu vā yattha katthaci antamaso yāgubhattepi pakkhipituṃ vaṭṭati. Sesamettha uttānameva.
এল়কলোমসমুট্ঠানং – কিরিযং, নোসঞ্ঞাৰিমোক্খং, অচিত্তকং, পণ্ণত্তিৰজ্জং, কাযকম্মং, তিচিত্তং, তিৰেদনন্তি।
Eḷakalomasamuṭṭhānaṃ – kiriyaṃ, nosaññāvimokkhaṃ, acittakaṃ, paṇṇattivajjaṃ, kāyakammaṃ, ticittaṃ, tivedananti.
লসুণসিক্খাপদং পঠমং।
Lasuṇasikkhāpadaṃ paṭhamaṃ.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / ভিক্খুনীৰিভঙ্গ • Bhikkhunīvibhaṅga / ১. পঠমসিক্খাপদং • 1. Paṭhamasikkhāpadaṃ
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / ১. লসুণৰগ্গৰণ্ণনা • 1. Lasuṇavaggavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / ১. পঠমলসুণসিক্খাপদৰণ্ণনা • 1. Paṭhamalasuṇasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / ১. পঠমলসুণাদিসিক্খাপদৰণ্ণনা • 1. Paṭhamalasuṇādisikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / ১. পঠমসিক্খাপদ-অত্থযোজনা • 1. Paṭhamasikkhāpada-atthayojanā
