| Library / Tipiṭaka / තිපිටක • Tipiṭaka / භික්‌ඛුනීවිභඞ්‌ග-අට්‌ඨකථා • Bhikkhunīvibhaṅga-aṭṭhakathā |
4. පාචිත්‌තියකණ්‌ඩං (භික්‌ඛුනීවිභඞ්‌ගවණ්‌ණනා)
4. Pācittiyakaṇḍaṃ (bhikkhunīvibhaṅgavaṇṇanā)
1. ලසුණවග්‌ගො
1. Lasuṇavaggo
1. පඨමලසුණසික්‌ඛාපදවණ්‌ණනා
1. Paṭhamalasuṇasikkhāpadavaṇṇanā
තිංසකානන්‌තරං ධම්‌මා, ඡසට්‌ඨිසතසඞ්‌ගහා;
Tiṃsakānantaraṃ dhammā, chasaṭṭhisatasaṅgahā;
සඞ්‌ගීතා යෙ අයං දානි, හොති තෙසම්‌පි වණ්‌ණනා.
Saṅgītā ye ayaṃ dāni, hoti tesampi vaṇṇanā.
793. තත්‌ථ ලසුණවග්‌ගස්‌ස තාව පඨමසික්‌ඛාපදෙ – ද්‌වෙ තයො භණ්‌ඩිකෙති ද්‌වෙ වා තයො වා පොට්‌ටලිකෙ; සම්‌පුණ්‌ණමිඤ්‌ජානමෙතං අධිවචනං. න මත්‌තං ජානිත්‌වාති පමාණං අජානිත්‌වා ඛෙත්‌තපාලස්‌ස වාරෙන්‌තස්‌ස බහුං ලසුණං හරාපෙසි.
793. Tattha lasuṇavaggassa tāva paṭhamasikkhāpade – dve tayo bhaṇḍiketi dve vā tayo vā poṭṭalike; sampuṇṇamiñjānametaṃ adhivacanaṃ. Na mattaṃ jānitvāti pamāṇaṃ ajānitvā khettapālassa vārentassa bahuṃ lasuṇaṃ harāpesi.
අඤ්‌ඤතරං හංසයොනින්‌ති සුවණ්‌ණහංසයොනිං. සො තාසං එකෙකන්‌ති සො හංසො ජාතිස්‌සරො අහොසි, අථ පුබ්‌බසිනෙහෙන ආගන්‌ත්‌වා තාසං එකෙකං පත්‌තං දෙති, තං තාපනතාලනච්‌ඡෙදනක්‌ඛමං සුවණ්‌ණමෙව හොති.
Aññataraṃ haṃsayoninti suvaṇṇahaṃsayoniṃ. So tāsaṃ ekekanti so haṃso jātissaro ahosi, atha pubbasinehena āgantvā tāsaṃ ekekaṃ pattaṃ deti, taṃ tāpanatālanacchedanakkhamaṃ suvaṇṇameva hoti.
795. මාගධකන්‌ති මගධෙසු ජාතං. මගධරට්‌ඨෙ ජාතලසුණමෙව හි ඉධ ලසුණන්‌ති අධිප්‌පෙතං, තම්‌පි භණ්‌ඩිකලසුණමෙව, න එකද්‌විතිමිඤ්‌ජකං. කුරුන්‌දියං පන ජාතදෙසං අවත්‌වා ‘‘මාගධකං නාම භණ්‌ඩිකලසුණ’’න්‌ති වුත්‌තං. අජ්‌ඣොහාරෙ අජ්‌ඣොහාරෙති එත්‌ථ සචෙ ද්‌වෙ තයො භණ්‌ඩිකෙ එකතොයෙව සඞ්‌ඛාදිත්‌වා අජ්‌ඣොහරති, එකං පාචිත්‌තියං. භින්‌දිත්‌වා එකෙකං මිඤ්‌ජං ඛාදන්‌තියා පන පයොගගණනාය පාචිත්‌තියානීති.
795.Māgadhakanti magadhesu jātaṃ. Magadharaṭṭhe jātalasuṇameva hi idha lasuṇanti adhippetaṃ, tampi bhaṇḍikalasuṇameva, na ekadvitimiñjakaṃ. Kurundiyaṃ pana jātadesaṃ avatvā ‘‘māgadhakaṃ nāma bhaṇḍikalasuṇa’’nti vuttaṃ. Ajjhohāre ajjhohāreti ettha sace dve tayo bhaṇḍike ekatoyeva saṅkhāditvā ajjhoharati, ekaṃ pācittiyaṃ. Bhinditvā ekekaṃ miñjaṃ khādantiyā pana payogagaṇanāya pācittiyānīti.
797. පලණ්‌ඩුකාදීනං වණ්‌ණෙන වා මිඤ්‌ජාය වා නානත්‌තං වෙදිතබ්‌බං – වණ්‌ණෙන තාව පලණ්‌ඩුකො පණ්‌ඩුවණ්‌ණො හොති. භඤ්‌ජනකො ලොහිතවණ්‌ණො. හරිතකො හරිතපණ්‌ණවණ්‌ණො. මිඤ්‌ජාය පන පලණ්‌ඩුකස්‌ස එකා මිඤ්‌ජා හොති, භඤ්‌ජනකස්‌ස ද්‌වෙ, හරිතකස්‌ස තිස්‌සො. චාපලසුණො අමිඤ්‌ජකො, අඞ්‌කුරමත්‌තමෙව හි තස්‌ස හොති. මහාපච්‌චරියාදීසු පන ‘‘පලණ්‌ඩුකස්‌ස තීණි මිඤ්‌ජානි, භඤ්‌ජනකස්‌ස ද්‌වෙ, හරිතකස්‌ස එක’’න්‌ති වුත්‌තං . එතෙ පලණ්‌ඩුකාදයො සභාවෙනෙව වට්‌ටන්‌ති. සූපසම්‌පාකාදීසු පන මාගධකම්‌පි වට්‌ටති. තඤ්‌හි පච්‌චමානෙසු මුග්‌ගසූපාදීසු වා මච්‌ඡමංසවිකතියා වා තෙලාදීසු වා බදරසාළවාදීසු වා අම්‌බිලසාකාදීසු වා උත්‌තරිභඞ්‌ගෙසු වා යත්‌ථ කත්‌ථචි අන්‌තමසො යාගුභත්‌තෙපි පක්‌ඛිපිතුං වට්‌ටති. සෙසමෙත්‌ථ උත්‌තානමෙව.
797.Palaṇḍukādīnaṃ vaṇṇena vā miñjāya vā nānattaṃ veditabbaṃ – vaṇṇena tāva palaṇḍuko paṇḍuvaṇṇo hoti. Bhañjanako lohitavaṇṇo. Haritako haritapaṇṇavaṇṇo. Miñjāya pana palaṇḍukassa ekā miñjā hoti, bhañjanakassa dve, haritakassa tisso. Cāpalasuṇo amiñjako, aṅkuramattameva hi tassa hoti. Mahāpaccariyādīsu pana ‘‘palaṇḍukassa tīṇi miñjāni, bhañjanakassa dve, haritakassa eka’’nti vuttaṃ . Ete palaṇḍukādayo sabhāveneva vaṭṭanti. Sūpasampākādīsu pana māgadhakampi vaṭṭati. Tañhi paccamānesu muggasūpādīsu vā macchamaṃsavikatiyā vā telādīsu vā badarasāḷavādīsu vā ambilasākādīsu vā uttaribhaṅgesu vā yattha katthaci antamaso yāgubhattepi pakkhipituṃ vaṭṭati. Sesamettha uttānameva.
එළකලොමසමුට්‌ඨානං – කිරියං, නොසඤ්‌ඤාවිමොක්‌ඛං, අචිත්‌තකං, පණ්‌ණත්‌තිවජ්‌ජං, කායකම්‌මං, තිචිත්‌තං, තිවෙදනන්‌ති.
Eḷakalomasamuṭṭhānaṃ – kiriyaṃ, nosaññāvimokkhaṃ, acittakaṃ, paṇṇattivajjaṃ, kāyakammaṃ, ticittaṃ, tivedananti.
ලසුණසික්‌ඛාපදං පඨමං.
Lasuṇasikkhāpadaṃ paṭhamaṃ.
Related texts:
තිපිටක (මූල) • Tipiṭaka (Mūla) / විනයපිටක • Vinayapiṭaka / භික්‌ඛුනීවිභඞ්‌ග • Bhikkhunīvibhaṅga / 1. පඨමසික්‌ඛාපදං • 1. Paṭhamasikkhāpadaṃ
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā / 1. ලසුණවග්‌ගවණ්‌ණනා • 1. Lasuṇavaggavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / 1. පඨමලසුණසික්‌ඛාපදවණ්‌ණනා • 1. Paṭhamalasuṇasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / 1. පඨමලසුණාදිසික්‌ඛාපදවණ්‌ණනා • 1. Paṭhamalasuṇādisikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / 1. පඨමසික්‌ඛාපද-අත්‌ථයොජනා • 1. Paṭhamasikkhāpada-atthayojanā
