| Library / Tipiṭaka / তিপিটক • Tipiṭaka / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) |
৫. পঠমলোকধম্মসুত্তৰণ্ণনা
5. Paṭhamalokadhammasuttavaṇṇanā
৫. পঞ্চমে লোকস্স ধম্মাতি লোকধম্মা। এতেহি মুত্তা নাম নত্থি, বুদ্ধানম্পি হোন্তি। তেনেৰাহ – লোকং অনুপরিৰত্তন্তীতি অনুবন্ধন্তি নপ্পজহন্তি , লোকতো ন নিৰত্তন্তীতি অত্থো। লোকো চ অট্ঠ লোকধম্মে অনুপরিৰত্ততীতি অযঞ্চ লোকো এতে অনুবন্ধতি ন পজহতি, তেহি ধম্মেহি ন নিৰত্ততীতি অত্থো।
5. Pañcame lokassa dhammāti lokadhammā. Etehi muttā nāma natthi, buddhānampi honti. Tenevāha – lokaṃ anuparivattantīti anubandhanti nappajahanti , lokato na nivattantīti attho. Loko ca aṭṭha lokadhamme anuparivattatīti ayañca loko ete anubandhati na pajahati, tehi dhammehi na nivattatīti attho.
লাভো অলাভোতি লাভে আগতে অলাভো আগতোযেৰাতি ৰেদিতব্বো। অযসাদীসুপি এসেৰ নযো। অৰেক্খতি ৰিপরিণামধম্মেতি ‘‘ৰিপরিণামধম্মা ইমে’’তি এৰং অৰেক্খতি। ৰিধূপিতাতি ৰিধমিতা ৰিদ্ধংসিতা। পদঞ্চ ঞত্ৰাতি নিব্বানপদং জানিত্ৰা। সম্মপ্পজানাতি ভৰস্স পারগূতি ভৰস্স পারং গতো নিপ্ফত্তিং মত্থকং পত্তো, নিব্বানপদং ঞত্ৰাৰ তং পারং গতভাৰং সম্মপ্পজানাতীতি। ইমস্মিং সুত্তে ৰট্টৰিৰট্টং কথিতং।
Lābho alābhoti lābhe āgate alābho āgatoyevāti veditabbo. Ayasādīsupi eseva nayo. Avekkhati vipariṇāmadhammeti ‘‘vipariṇāmadhammā ime’’ti evaṃ avekkhati. Vidhūpitāti vidhamitā viddhaṃsitā. Padañca ñatvāti nibbānapadaṃ jānitvā. Sammappajānāti bhavassa pāragūti bhavassa pāraṃ gato nipphattiṃ matthakaṃ patto, nibbānapadaṃ ñatvāva taṃ pāraṃ gatabhāvaṃ sammappajānātīti. Imasmiṃ sutte vaṭṭavivaṭṭaṃ kathitaṃ.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / অঙ্গুত্তরনিকায • Aṅguttaranikāya / ৫. পঠমলোকধম্মসুত্তং • 5. Paṭhamalokadhammasuttaṃ
টীকা • Tīkā / সুত্তপিটক (টীকা) • Suttapiṭaka (ṭīkā) / অঙ্গুত্তরনিকায (টীকা) • Aṅguttaranikāya (ṭīkā) / ৫. পঠমলোকধম্মসুত্তৰণ্ণনা • 5. Paṭhamalokadhammasuttavaṇṇanā
