| Library / Tipiṭaka / तिपिटक • Tipiṭaka / अङ्गुत्तरनिकाय (अट्ठकथा) • Aṅguttaranikāya (aṭṭhakathā) |
५. पठमलोकधम्मसुत्तवण्णना
5. Paṭhamalokadhammasuttavaṇṇanā
५. पञ्चमे लोकस्स धम्माति लोकधम्मा। एतेहि मुत्ता नाम नत्थि, बुद्धानम्पि होन्ति। तेनेवाह – लोकं अनुपरिवत्तन्तीति अनुबन्धन्ति नप्पजहन्ति , लोकतो न निवत्तन्तीति अत्थो। लोको च अट्ठ लोकधम्मे अनुपरिवत्ततीति अयञ्च लोको एते अनुबन्धति न पजहति, तेहि धम्मेहि न निवत्ततीति अत्थो।
5. Pañcame lokassa dhammāti lokadhammā. Etehi muttā nāma natthi, buddhānampi honti. Tenevāha – lokaṃ anuparivattantīti anubandhanti nappajahanti , lokato na nivattantīti attho. Loko ca aṭṭha lokadhamme anuparivattatīti ayañca loko ete anubandhati na pajahati, tehi dhammehi na nivattatīti attho.
लाभो अलाभोति लाभे आगते अलाभो आगतोयेवाति वेदितब्बो। अयसादीसुपि एसेव नयो। अवेक्खति विपरिणामधम्मेति ‘‘विपरिणामधम्मा इमे’’ति एवं अवेक्खति। विधूपिताति विधमिता विद्धंसिता। पदञ्च ञत्वाति निब्बानपदं जानित्वा। सम्मप्पजानाति भवस्स पारगूति भवस्स पारं गतो निप्फत्तिं मत्थकं पत्तो, निब्बानपदं ञत्वाव तं पारं गतभावं सम्मप्पजानातीति। इमस्मिं सुत्ते वट्टविवट्टं कथितं।
Lābho alābhoti lābhe āgate alābho āgatoyevāti veditabbo. Ayasādīsupi eseva nayo. Avekkhati vipariṇāmadhammeti ‘‘vipariṇāmadhammā ime’’ti evaṃ avekkhati. Vidhūpitāti vidhamitā viddhaṃsitā. Padañca ñatvāti nibbānapadaṃ jānitvā. Sammappajānāti bhavassa pāragūti bhavassa pāraṃ gato nipphattiṃ matthakaṃ patto, nibbānapadaṃ ñatvāva taṃ pāraṃ gatabhāvaṃ sammappajānātīti. Imasmiṃ sutte vaṭṭavivaṭṭaṃ kathitaṃ.
Related texts:
तिपिटक (मूल) • Tipiṭaka (Mūla) / सुत्तपिटक • Suttapiṭaka / अङ्गुत्तरनिकाय • Aṅguttaranikāya / ५. पठमलोकधम्मसुत्तं • 5. Paṭhamalokadhammasuttaṃ
टीका • Tīkā / सुत्तपिटक (टीका) • Suttapiṭaka (ṭīkā) / अङ्गुत्तरनिकाय (टीका) • Aṅguttaranikāya (ṭīkā) / ५. पठमलोकधम्मसुत्तवण्णना • 5. Paṭhamalokadhammasuttavaṇṇanā
