| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) |
5. පඨමලොකධම්‌මසුත්‌තවණ්‌ණනා
5. Paṭhamalokadhammasuttavaṇṇanā
5. පඤ්‌චමෙ ලොකස්‌ස ධම්‌මාති ලොකධම්‌මා. එතෙහි මුත්‌තා නාම නත්‌ථි, බුද්‌ධානම්‌පි හොන්‌ති. තෙනෙවාහ – ලොකං අනුපරිවත්‌තන්‌තීති අනුබන්‌ධන්‌ති නප්‌පජහන්‌ති , ලොකතො න නිවත්‌තන්‌තීති අත්‌ථො. ලොකො ච අට්‌ඨ ලොකධම්‌මෙ අනුපරිවත්‌තතීති අයඤ්‌ච ලොකො එතෙ අනුබන්‌ධති න පජහති, තෙහි ධම්‌මෙහි න නිවත්‌තතීති අත්‌ථො.
5. Pañcame lokassa dhammāti lokadhammā. Etehi muttā nāma natthi, buddhānampi honti. Tenevāha – lokaṃ anuparivattantīti anubandhanti nappajahanti , lokato na nivattantīti attho. Loko ca aṭṭha lokadhamme anuparivattatīti ayañca loko ete anubandhati na pajahati, tehi dhammehi na nivattatīti attho.
ලාභො අලාභොති ලාභෙ ආගතෙ අලාභො ආගතොයෙවාති වෙදිතබ්‌බො. අයසාදීසුපි එසෙව නයො. අවෙක්‌ඛති විපරිණාමධම්‌මෙති ‘‘විපරිණාමධම්‌මා ඉමෙ’’ති එවං අවෙක්‌ඛති. විධූපිතාති විධමිතා විද්‌ධංසිතා. පදඤ්‌ච ඤත්‌වාති නිබ්‌බානපදං ජානිත්‌වා. සම්‌මප්‌පජානාති භවස්‌ස පාරගූති භවස්‌ස පාරං ගතො නිප්‌ඵත්‌තිං මත්‌ථකං පත්‌තො, නිබ්‌බානපදං ඤත්‌වාව තං පාරං ගතභාවං සම්‌මප්‌පජානාතීති. ඉමස්‌මිං සුත්‌තෙ වට්‌ටවිවට්‌ටං කථිතං.
Lābho alābhoti lābhe āgate alābho āgatoyevāti veditabbo. Ayasādīsupi eseva nayo. Avekkhati vipariṇāmadhammeti ‘‘vipariṇāmadhammā ime’’ti evaṃ avekkhati. Vidhūpitāti vidhamitā viddhaṃsitā. Padañca ñatvāti nibbānapadaṃ jānitvā. Sammappajānāti bhavassa pāragūti bhavassa pāraṃ gato nipphattiṃ matthakaṃ patto, nibbānapadaṃ ñatvāva taṃ pāraṃ gatabhāvaṃ sammappajānātīti. Imasmiṃ sutte vaṭṭavivaṭṭaṃ kathitaṃ.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / අඞ්‌ගුත්‌තරනිකාය • Aṅguttaranikāya / 5. පඨමලොකධම්‌මසුත්‌තං • 5. Paṭhamalokadhammasuttaṃ
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 5. පඨමලොකධම්‌මසුත්‌තවණ්‌ණනා • 5. Paṭhamalokadhammasuttavaṇṇanā
