| Library / Tipiṭaka / திபிடக • Tipiṭaka / த⁴ம்மஸங்க³ணி-அட்ட²கதா² • Dhammasaṅgaṇi-aṭṭhakathā |
பட²மமக்³க³வீஸதிமஹானயோ
Paṭhamamaggavīsatimahānayo
357. இதா³னி யஸ்மா லோகுத்தரகுஸலங் பா⁴வெந்தோ ந கேவலங் உபனிஜ்ஜா²யனட்டே²ன ஜா²னங்யேவ பா⁴வேதி, நிய்யானட்டே²ன பன மக்³க³ம்பி பா⁴வேதி, உபட்டா²னட்டே²ன ஸதிபட்டா²னம்பி, பத³ஹனட்டே²ன ஸம்மப்பதா⁴னம்பி, இஜ்ஜ²னட்டே²ன இத்³தி⁴பாத³ம்பி, அதி⁴பதியட்டே²ன இந்த்³ரியம்பி, அகம்பியட்டே²ன ப³லம்பி, பு³ஜ்ஜ²னட்டே²ன பொ³ஜ்ஜ²ங்க³ம்பி, தத²ட்டே²ன ஸச்சம்பி, அவிக்கே²பட்டே²ன ஸமத²ம்பி, ஸுஞ்ஞதட்டே²ன த⁴ம்மம்பி, ராஸட்டே²ன க²ந்த⁴ம்பி, ஆயதனட்டே²ன ஆயதனம்பி, ஸுஞ்ஞஸபா⁴வனிஸ்ஸத்தட்டே²ன தா⁴தும்பி, பச்சயட்டே²ன ஆஹாரம்பி, பு²ஸனட்டே²ன ப²ஸ்ஸம்பி, வேத³யிதட்டே²ன வேத³னம்பி, ஸஞ்ஜானநட்டே²ன ஸஞ்ஞம்பி, சேதயிதட்டே²ன சேதனம்பி, விஜானநட்டே²ன சித்தம்பி பா⁴வேதி, தஸ்மா ஏதேஸங் ஏகூனவீஸதியா பதா³னங் த³ஸ்ஸனத்த²ங் புன கதமே த⁴ம்மா குஸலாதிஆதி³ வுத்தங். ஏவங் ‘இத³ம்பி பா⁴வேதி, இத³ம்பி பா⁴வேதீ’தி புக்³க³லஜ்ஜா²ஸயேன சேவ தே³ஸனாவிலாஸேன ச வீஸதி நயா தே³ஸிதா ஹொந்தி . த⁴ம்மங் ஸோதுங் நிஸின்னதே³வபரிஸாய ஹி யே உபனிஜ்ஜா²யனட்டே²ன லோகுத்தரங் ‘ஜா²ன’ந்தி கதி²தே பு³ஜ்ஜ²ந்தி, தேஸங் ஸப்பாயவஸேன ஜா²னந்தி கதி²தங்…பே॰… யே விஜானநட்டே²ன ‘சித்த’ந்தி வுத்தே பு³ஜ்ஜ²ந்தி, தேஸங் ஸப்பாயவஸேன சித்தந்தி கதி²தங். அயமெத்த² ‘புக்³க³லஜ்ஜா²ஸயோ’.
357. Idāni yasmā lokuttarakusalaṃ bhāvento na kevalaṃ upanijjhāyanaṭṭhena jhānaṃyeva bhāveti, niyyānaṭṭhena pana maggampi bhāveti, upaṭṭhānaṭṭhena satipaṭṭhānampi, padahanaṭṭhena sammappadhānampi, ijjhanaṭṭhena iddhipādampi, adhipatiyaṭṭhena indriyampi, akampiyaṭṭhena balampi, bujjhanaṭṭhena bojjhaṅgampi, tathaṭṭhena saccampi, avikkhepaṭṭhena samathampi, suññataṭṭhena dhammampi, rāsaṭṭhena khandhampi, āyatanaṭṭhena āyatanampi, suññasabhāvanissattaṭṭhena dhātumpi, paccayaṭṭhena āhārampi, phusanaṭṭhena phassampi, vedayitaṭṭhena vedanampi, sañjānanaṭṭhena saññampi, cetayitaṭṭhena cetanampi, vijānanaṭṭhena cittampi bhāveti, tasmā etesaṃ ekūnavīsatiyā padānaṃ dassanatthaṃ puna katame dhammā kusalātiādi vuttaṃ. Evaṃ ‘idampi bhāveti, idampi bhāvetī’ti puggalajjhāsayena ceva desanāvilāsena ca vīsati nayā desitā honti . Dhammaṃ sotuṃ nisinnadevaparisāya hi ye upanijjhāyanaṭṭhena lokuttaraṃ ‘jhāna’nti kathite bujjhanti, tesaṃ sappāyavasena jhānanti kathitaṃ…pe… ye vijānanaṭṭhena ‘citta’nti vutte bujjhanti, tesaṃ sappāyavasena cittanti kathitaṃ. Ayamettha ‘puggalajjhāsayo’.
ஸம்மாஸம்பு³த்³தோ⁴ பன அத்தனோ பு³த்³த⁴ஸுபோ³தி⁴தாய த³ஸப³லசதுவேஸாரஜ்ஜசதுபடிஸம்பி⁴த³தாய ச²அஸாதா⁴ரணஞாணயோகே³ன ச தே³ஸனங் யதி³ச்ச²கங் நியமெத்வா த³ஸ்ஸேதி. இச்ச²ந்தோ உபனிஜ்ஜா²யனட்டே²ன லோகுத்தரங் ஜா²னந்தி த³ஸ்ஸேதி, இச்ச²ந்தோ நிய்யானட்டே²ன…பே॰… விஜானநட்டே²ன லோகுத்தரங் சித்தந்தி. அயங் ‘தே³ஸனாவிலாஸோ’ நாம. தத்த² யதே²வ லோகுத்தரங் ஜா²னந்தி வுத்தட்டா²னே த³ஸ நயா விப⁴த்தா, ஏவங் மக்³கா³தீ³ஸுபி தேயேவ வேதி³தப்³பா³. இதி வீஸதியா டா²னேஸு த³ஸ த³ஸ கத்வா த்³வே நயஸதானி விப⁴த்தானி ஹொந்தி.
Sammāsambuddho pana attano buddhasubodhitāya dasabalacatuvesārajjacatupaṭisambhidatāya chaasādhāraṇañāṇayogena ca desanaṃ yadicchakaṃ niyametvā dasseti. Icchanto upanijjhāyanaṭṭhena lokuttaraṃ jhānanti dasseti, icchanto niyyānaṭṭhena…pe… vijānanaṭṭhena lokuttaraṃ cittanti. Ayaṃ ‘desanāvilāso’ nāma. Tattha yatheva lokuttaraṃ jhānanti vuttaṭṭhāne dasa nayā vibhattā, evaṃ maggādīsupi teyeva veditabbā. Iti vīsatiyā ṭhānesu dasa dasa katvā dve nayasatāni vibhattāni honti.
358. இதா³னி அதி⁴பதிபே⁴த³ங் த³ஸ்ஸேதுங் புன கதமே த⁴ம்மா குஸலாதிஆதி³ ஆரத்³த⁴ங். தத்த² ச²ந்த³ங் து⁴ரங் ஜெட்ட²கங் புப்³ப³ங்க³மங் கத்வா நிப்³ப³த்திதங் லோகுத்தரங் ஜா²னங் ச²ந்தா³தி⁴பதெய்யங் நாம. ஸேஸேஸுபி ஏஸேவ நயோ. இதி புரிமஸ்மிங் ஸுத்³தி⁴கே த்³வேனயஸதானி ச²ந்தா³தி⁴பதெய்யாதீ³ஸுபி த்³வே த்³வேதி நயஸஹஸ்ஸேன பா⁴ஜெத்வா பட²மமக்³க³ங் த³ஸ்ஸேஸி த⁴ம்மராஜா.
358. Idāni adhipatibhedaṃ dassetuṃ puna katame dhammā kusalātiādi āraddhaṃ. Tattha chandaṃ dhuraṃ jeṭṭhakaṃ pubbaṅgamaṃ katvā nibbattitaṃ lokuttaraṃ jhānaṃ chandādhipateyyaṃ nāma. Sesesupi eseva nayo. Iti purimasmiṃ suddhike dvenayasatāni chandādhipateyyādīsupi dve dveti nayasahassena bhājetvā paṭhamamaggaṃ dassesi dhammarājā.
பட²மமக்³கோ³ நிட்டி²தோ.
Paṭhamamaggo niṭṭhito.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / த⁴ம்மஸங்க³ணீபாளி • Dhammasaṅgaṇīpāḷi / லோகுத்தரகுஸலங் • Lokuttarakusalaṃ
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / த⁴ம்மஸங்க³ணீ-மூலடீகா • Dhammasaṅgaṇī-mūlaṭīkā / பட²மமக்³க³வீஸதிமஹானயவண்ணனா • Paṭhamamaggavīsatimahānayavaṇṇanā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / த⁴ம்மஸங்க³ணீ-அனுடீகா • Dhammasaṅgaṇī-anuṭīkā / பட²மமக்³க³வீஸதிமஹானயவண்ணனா • Paṭhamamaggavīsatimahānayavaṇṇanā
