| Library / Tipiṭaka / ติปิฎก • Tipiṭaka / องฺคุตฺตรนิกาย (ฎีกา) • Aṅguttaranikāya (ṭīkā) |
๒. อนุสฺสติวโคฺค
2. Anussativaggo
๑-๔. ปฐมมหานามสุตฺตาทิวณฺณนา
1-4. Paṭhamamahānāmasuttādivaṇṇanā
๑๑-๑๔. ทุติยสฺส ปฐมาทีนิ อุตฺตานตฺถานิฯ ตติเย กพฬีการาหารภกฺขานนฺติ กพฬีการาหารูปชีวีนํฯ โก ปน เทวานํ อาหาโร, กา อาหารเวลาติ? สเพฺพสมฺปิ กามาวจรเทวานํ สุธา อาหาโรฯ สา เหฎฺฐิเมหิ เหฎฺฐิเมหิ อุปริมานํ อุปริมานํ ปณีตตมา โหติ, ตํ ยถาสกํ ทิวสวเสเนว ทิวเส ทิวเส ภุญฺชนฺติฯ เกจิ ปน ‘‘พิฬารปทปฺปมาณํ สุธาหารํ ภุญฺชนฺติ, โส ชิวฺหาย ฐปิตมโตฺต ยาว เกสคฺคนขคฺคา กายํ ผรติ, เตสํเยว ทิวสวเสน สตฺต ทิวเส ยาปนสมโตฺถ โหตี’’ติ วทนฺติฯ อสมยวิมุตฺติยา วิมุโตฺตติ มคฺควิโมเกฺขน วิมุโตฺตฯ อฎฺฐนฺนญฺหิ สมาปตฺตีนํ สมาปชฺชนสฺส สมโยปิ อตฺถิ ตสฺส อสมโยปิ, มคฺควิโมเกฺขน ปน วิมุจฺจนสฺส สมโย วา อสมโย วา นตฺถิฯ ยสฺส สทฺธา พลวตี, วิปสฺสนา จ อารทฺธา, ตสฺส คจฺฉนฺตสฺส ติฎฺฐนฺตสฺส นิสีทนฺตสฺส นิปชฺชนฺตสฺส ขาทนฺตสฺส ภุญฺชนฺตสฺส จ มคฺคผลปฺปฎิเวโธ นาม น โหตีติ น วตฺตพฺพํฯ อิติ มคฺควิโมเกฺขน วิมุจฺจนฺตสฺส สมโย วา อสมโย วา นตฺถีติ มคฺควิโมโกฺข อสมยวิมุตฺติ นามฯ จตุเตฺถ นตฺถิ วตฺตพฺพํฯ
11-14. Dutiyassa paṭhamādīni uttānatthāni. Tatiye kabaḷīkārāhārabhakkhānanti kabaḷīkārāhārūpajīvīnaṃ. Ko pana devānaṃ āhāro, kā āhāravelāti? Sabbesampi kāmāvacaradevānaṃ sudhā āhāro. Sā heṭṭhimehi heṭṭhimehi uparimānaṃ uparimānaṃ paṇītatamā hoti, taṃ yathāsakaṃ divasavaseneva divase divase bhuñjanti. Keci pana ‘‘biḷārapadappamāṇaṃ sudhāhāraṃ bhuñjanti, so jivhāya ṭhapitamatto yāva kesagganakhaggā kāyaṃ pharati, tesaṃyeva divasavasena satta divase yāpanasamattho hotī’’ti vadanti. Asamayavimuttiyā vimuttoti maggavimokkhena vimutto. Aṭṭhannañhi samāpattīnaṃ samāpajjanassa samayopi atthi tassa asamayopi, maggavimokkhena pana vimuccanassa samayo vā asamayo vā natthi. Yassa saddhā balavatī, vipassanā ca āraddhā, tassa gacchantassa tiṭṭhantassa nisīdantassa nipajjantassa khādantassa bhuñjantassa ca maggaphalappaṭivedho nāma na hotīti na vattabbaṃ. Iti maggavimokkhena vimuccantassa samayo vā asamayo vā natthīti maggavimokkho asamayavimutti nāma. Catutthe natthi vattabbaṃ.
ปฐมมหานามสุตฺตาทิวณฺณนา นิฎฺฐิตาฯ
Paṭhamamahānāmasuttādivaṇṇanā niṭṭhitā.
Related texts:
ติปิฎก (มูล) • Tipiṭaka (Mūla) / สุตฺตปิฎก • Suttapiṭaka / องฺคุตฺตรนิกาย • Aṅguttaranikāya
๑. ปฐมมหานามสุตฺตํ • 1. Paṭhamamahānāmasuttaṃ
๒. ทุติยมหานามสุตฺตํ • 2. Dutiyamahānāmasuttaṃ
๓. นนฺทิยสุตฺตํ • 3. Nandiyasuttaṃ
๔. สุภูติสุตฺตํ • 4. Subhūtisuttaṃ
อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / องฺคุตฺตรนิกาย (อฎฺฐกถา) • Aṅguttaranikāya (aṭṭhakathā)
๑-๒. มหานามสุตฺตทฺวยวณฺณนา • 1-2. Mahānāmasuttadvayavaṇṇanā
๓. นนฺทิยสุตฺตวณฺณนา • 3. Nandiyasuttavaṇṇanā
๔. สุภูติสุตฺตวณฺณนา • 4. Subhūtisuttavaṇṇanā
