| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
৩. সরণানিৰগ্গো
3. Saraṇānivaggo
১. পঠমমহানামসুত্তং
1. Paṭhamamahānāmasuttaṃ
১০১৭. এৰং মে সুতং – একং সমযং ভগৰা সক্কেসু ৰিহরতি কপিলৰত্থুস্মিং নিগ্রোধারামে। অথ খো মহানামো সক্কো যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি। একমন্তং নিসিন্নো খো মহানামো সক্কো ভগৰন্তং এতদৰোচ – ‘‘ইদং, ভন্তে, কপিলৰত্থু ইদ্ধঞ্চেৰ ফীতঞ্চ বাহুজঞ্ঞং আকিণ্ণমনুস্সং সম্বাধব্যূহং। সো খ্ৰাহং, ভন্তে, ভগৰন্তং ৰা পযিরুপাসিত্ৰা মনোভাৰনীযে ৰা ভিক্খূ সাযন্হসমযং কপিলৰত্থুং পৰিসন্তো; ভন্তেনপি 1 হত্থিনা সমাগচ্ছামি ; ভন্তেনপি অস্সেন সমাগচ্ছামি; ভন্তেনপি রথেন সমাগচ্ছামি; ভন্তেনপি সকটেন সমাগচ্ছামি; ভন্তেনপি পুরিসেন সমাগচ্ছামি। তস্স ময্হং, ভন্তে, তস্মিং সমযে মুস্সতেৰ 2 ভগৰন্তং আরব্ভ সতি, মুস্সতি 3 ধম্মং আরব্ভ সতি, মুস্সতি সঙ্ঘং আরব্ভ সতি। তস্স ময্হং, ভন্তে, এৰং হোতি – ‘ইমম্হি চাহং সমযে কালং করেয্যং, কা ময্হং গতি, কো অভিসম্পরাযো’’’তি?
1017. Evaṃ me sutaṃ – ekaṃ samayaṃ bhagavā sakkesu viharati kapilavatthusmiṃ nigrodhārāme. Atha kho mahānāmo sakko yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho mahānāmo sakko bhagavantaṃ etadavoca – ‘‘idaṃ, bhante, kapilavatthu iddhañceva phītañca bāhujaññaṃ ākiṇṇamanussaṃ sambādhabyūhaṃ. So khvāhaṃ, bhante, bhagavantaṃ vā payirupāsitvā manobhāvanīye vā bhikkhū sāyanhasamayaṃ kapilavatthuṃ pavisanto; bhantenapi 4 hatthinā samāgacchāmi ; bhantenapi assena samāgacchāmi; bhantenapi rathena samāgacchāmi; bhantenapi sakaṭena samāgacchāmi; bhantenapi purisena samāgacchāmi. Tassa mayhaṃ, bhante, tasmiṃ samaye mussateva 5 bhagavantaṃ ārabbha sati, mussati 6 dhammaṃ ārabbha sati, mussati saṅghaṃ ārabbha sati. Tassa mayhaṃ, bhante, evaṃ hoti – ‘imamhi cāhaṃ samaye kālaṃ kareyyaṃ, kā mayhaṃ gati, ko abhisamparāyo’’’ti?
‘‘মা ভাযি, মহানাম, মা ভাযি, মহানাম! অপাপকং তে মরণং ভৰিস্সতি অপাপিকা কালংকিরিযা 7। যস্স কস্সচি, মহানাম, দীঘরত্তং সদ্ধাপরিভাৰিতং চিত্তং সীলপরিভাৰিতং চিত্তং সুতপরিভাৰিতং চিত্তং চাগপরিভাৰিতং চিত্তং পঞ্ঞাপরিভাৰিতং চিত্তং, তস্স যো হি খ্ৰাযং কাযো রূপী চাতুমহাভূতিকো 8 মাতাপেত্তিকসম্ভৰো ওদনকুম্মাসূপচযো অনিচ্চুচ্ছাদনপরিমদ্দনভেদনৰিদ্ধংসনধম্মো। তং ইধেৰ কাকা ৰা খাদন্তি গিজ্ঝা ৰা খাদন্তি কুললা ৰা খাদন্তি সুনখা ৰা খাদন্তি সিঙ্গালা 9 ৰা খাদন্তি ৰিৰিধা ৰা পাণকজাতা খাদন্তি; যঞ্চ খ্ৰস্স চিত্তং দীঘরত্তং সদ্ধাপরিভাৰিতং…পে॰… পঞ্ঞাপরিভাৰিতং তং উদ্ধগামি হোতি ৰিসেসগামি।
‘‘Mā bhāyi, mahānāma, mā bhāyi, mahānāma! Apāpakaṃ te maraṇaṃ bhavissati apāpikā kālaṃkiriyā 10. Yassa kassaci, mahānāma, dīgharattaṃ saddhāparibhāvitaṃ cittaṃ sīlaparibhāvitaṃ cittaṃ sutaparibhāvitaṃ cittaṃ cāgaparibhāvitaṃ cittaṃ paññāparibhāvitaṃ cittaṃ, tassa yo hi khvāyaṃ kāyo rūpī cātumahābhūtiko 11 mātāpettikasambhavo odanakummāsūpacayo aniccucchādanaparimaddanabhedanaviddhaṃsanadhammo. Taṃ idheva kākā vā khādanti gijjhā vā khādanti kulalā vā khādanti sunakhā vā khādanti siṅgālā 12 vā khādanti vividhā vā pāṇakajātā khādanti; yañca khvassa cittaṃ dīgharattaṃ saddhāparibhāvitaṃ…pe… paññāparibhāvitaṃ taṃ uddhagāmi hoti visesagāmi.
‘‘সেয্যথাপি, মহানাম, পুরিসো সপ্পিকুম্ভং ৰা তেলকুম্ভং ৰা গম্ভীরং উদকরহদং ওগাহিত্ৰা ভিন্দেয্য। তত্র যা অস্স সক্খরা ৰা কঠলা 13 ৰা সা অধোগামী অস্স, যঞ্চ খ্ৰস্স তত্র সপ্পি ৰা তেলং ৰা তং উদ্ধগামি অস্স ৰিসেসগামি। এৰমেৰ খো, মহানাম, যস্স কস্সচি দীঘরত্তং সদ্ধাপরিভাৰিতং চিত্তং…পে॰… পঞ্ঞাপরিভাৰিতং চিত্তং তস্স যো হি খ্ৰাযং কাযো রূপী চাতুমহাভূতিকো মাতাপেত্তিকসম্ভৰো ওদনকুম্মাসূপচযো অনিচ্চুচ্ছাদনপরিমদ্দনভেদনৰিদ্ধংসনধম্মো তং ইধেৰ কাকা ৰা খাদন্তি গিজ্ঝা ৰা খাদন্তি কুললা ৰা খাদন্তি সুনখা ৰা খাদন্তি সিঙ্গালা ৰা খাদন্তি ৰিৰিধা ৰা পাণকজাতা খাদন্তি; যঞ্চ খ্ৰস্স চিত্তং দীঘরত্তং সদ্ধাপরিভাৰিতং…পে॰… পঞ্ঞাপরিভাৰিতং তং উদ্ধগামি হোতি ৰিসেসগামি। তুয্হং খো পন, মহানাম, দীঘরত্তং সদ্ধাপরিভাৰিতং চিত্তং…পে॰… পঞ্ঞাপরিভাৰিতং চিত্তং । মা ভাযি, মহানাম , মা ভাযি, মহানাম! অপাপকং তে মরণং ভৰিস্সতি, অপাপিকা কালংকিরিযা’’তি। পঠমং।
‘‘Seyyathāpi, mahānāma, puriso sappikumbhaṃ vā telakumbhaṃ vā gambhīraṃ udakarahadaṃ ogāhitvā bhindeyya. Tatra yā assa sakkharā vā kaṭhalā 14 vā sā adhogāmī assa, yañca khvassa tatra sappi vā telaṃ vā taṃ uddhagāmi assa visesagāmi. Evameva kho, mahānāma, yassa kassaci dīgharattaṃ saddhāparibhāvitaṃ cittaṃ…pe… paññāparibhāvitaṃ cittaṃ tassa yo hi khvāyaṃ kāyo rūpī cātumahābhūtiko mātāpettikasambhavo odanakummāsūpacayo aniccucchādanaparimaddanabhedanaviddhaṃsanadhammo taṃ idheva kākā vā khādanti gijjhā vā khādanti kulalā vā khādanti sunakhā vā khādanti siṅgālā vā khādanti vividhā vā pāṇakajātā khādanti; yañca khvassa cittaṃ dīgharattaṃ saddhāparibhāvitaṃ…pe… paññāparibhāvitaṃ taṃ uddhagāmi hoti visesagāmi. Tuyhaṃ kho pana, mahānāma, dīgharattaṃ saddhāparibhāvitaṃ cittaṃ…pe… paññāparibhāvitaṃ cittaṃ . Mā bhāyi, mahānāma , mā bhāyi, mahānāma! Apāpakaṃ te maraṇaṃ bhavissati, apāpikā kālaṃkiriyā’’ti. Paṭhamaṃ.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ১-২. পঠমমহানামসুত্তাদিৰণ্ণনা • 1-2. Paṭhamamahānāmasuttādivaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ১-২. পঠমমহানামসুত্তাদিৰণ্ণনা • 1-2. Paṭhamamahānāmasuttādivaṇṇanā
