| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
7. பட²மமஹாபஞ்ஹஸுத்தவண்ணனா
7. Paṭhamamahāpañhasuttavaṇṇanā
27. ஸத்தமே அபி⁴ஜானாதா²தி அபி⁴ஜானித்வா பச்சக்க²ங் கத்வா விஹரத². அபி⁴ஞ்ஞாயாதி அபி⁴ஜானித்வா. இதா⁴தி இமாய. த⁴ம்மதே³ஸனாய வா த⁴ம்மதே³ஸனந்தி யதி³த³ங் ஸமணஸ்ஸ கோ³தமஸ்ஸ த⁴ம்மதே³ஸனாய ஸத்³தி⁴ங் அம்ஹாகங் த⁴ம்மதே³ஸனங், அம்ஹாகங் வா த⁴ம்மதே³ஸனாய ஸத்³தி⁴ங் ஸமணஸ்ஸ கோ³தமஸ்ஸ த⁴ம்மதே³ஸனங் ஆரப்³ப⁴ நானாகரணங் வுச்சேத², தங் கிங் நாமாதி வத³ந்தி. து³தியபதே³பி ஏஸேவ நயோ. இதி தே மஜ்ஜே² பி⁴ன்னஸுவண்ணங் விய ஸாஸனேன ஸத்³தி⁴ங் அத்தனோ லத்³தி⁴ங் வசனமத்தேன ஸமது⁴ரங் ட²பயிங்ஸு. நேவ அபி⁴னந்தி³ங்ஸூதி ‘‘ஏவமேத’’ந்தி ந ஸம்படிச்சி²ங்ஸு. நப்படிக்கோஸிங்ஸூதி ‘‘ந இத³ங் ஏவ’’ந்தி நப்படிஸேதே⁴ஸுங். கஸ்மா? தே கிர ‘‘தித்தி²யா நாம அந்த⁴ஸதி³ஸா ஜானித்வா வா அஜானித்வா வா கதெ²ய்யு’’ந்தி நாபி⁴னந்தி³ங்ஸு.
27. Sattame abhijānāthāti abhijānitvā paccakkhaṃ katvā viharatha. Abhiññāyāti abhijānitvā. Idhāti imāya. Dhammadesanāya vā dhammadesananti yadidaṃ samaṇassa gotamassa dhammadesanāya saddhiṃ amhākaṃ dhammadesanaṃ, amhākaṃ vā dhammadesanāya saddhiṃ samaṇassa gotamassa dhammadesanaṃ ārabbha nānākaraṇaṃ vuccetha, taṃ kiṃ nāmāti vadanti. Dutiyapadepi eseva nayo. Iti te majjhe bhinnasuvaṇṇaṃ viya sāsanena saddhiṃ attano laddhiṃ vacanamattena samadhuraṃ ṭhapayiṃsu. Neva abhinandiṃsūti ‘‘evameta’’nti na sampaṭicchiṃsu. Nappaṭikkosiṃsūti ‘‘na idaṃ eva’’nti nappaṭisedhesuṃ. Kasmā? Te kira ‘‘titthiyā nāma andhasadisā jānitvā vā ajānitvā vā katheyyu’’nti nābhinandiṃsu.
ந ஸம்பாயிஸ்ஸந்தீதி ஸம்பாதெ³த்வா கதே²துங் ந ஸக்கி²ஸ்ஸந்தி. உத்தரி ச விகா⁴தந்தி அஸம்பாத³னதோ உத்தரிம்பி து³க்க²ங் ஆபஜ்ஜிஸ்ஸந்தி. ஸம்பாதெ³த்வா கதே²துங் அஸக்கொந்தானஞ்ஹி து³க்க²ங் உப்பஜ்ஜதி. யதா² தங், பி⁴க்க²வே, அவிஸயஸ்மிந்தி எத்த² ச தந்தி நிபாதமத்தங். யதா²தி காரணவசனங், யஸ்மா அவிஸயே பஞ்ஹங் புச்சி²தா ஹொந்தீதி அத்தோ². இதோ வா பன ஸுத்வாதி இதோ வா பன மம ஸாஸனதோ ஸுத்வா. இதோதி ததா²க³ததோபி ததா²க³தஸாவகதோபி. ஆராதெ⁴ய்யாதி பரிதோஸெய்ய, அஞ்ஞதா² ஆராத⁴னங் நாம நத்தீ²தி த³ஸ்ஸேதி.
Nasampāyissantīti sampādetvā kathetuṃ na sakkhissanti. Uttari ca vighātanti asampādanato uttarimpi dukkhaṃ āpajjissanti. Sampādetvā kathetuṃ asakkontānañhi dukkhaṃ uppajjati. Yathā taṃ, bhikkhave, avisayasminti ettha ca tanti nipātamattaṃ. Yathāti kāraṇavacanaṃ, yasmā avisaye pañhaṃ pucchitā hontīti attho. Ito vā pana sutvāti ito vā pana mama sāsanato sutvā. Itoti tathāgatatopi tathāgatasāvakatopi. Ārādheyyāti paritoseyya, aññathā ārādhanaṃ nāma natthīti dasseti.
ஏகத⁴ம்மேதி ஏகஸ்மிங் த⁴ம்மே. இமினா உத்³தே³ஸோ த³ஸ்ஸிதோ. பரதோ கதமஸ்மிங் ஏகத⁴ம்மேதி இமினா பஞ்ஹோ த³ஸ்ஸிதோ. ஸப்³பே³ ஸத்தா ஆஹாரட்டி²திகாதி இத³ங் பனெத்த² வெய்யாகரணங். ஸேஸேஸுபி ஏஸேவ நயோ. ஸம்மா நிப்³பி³ந்த³மானோதிஆதீ³ஸு பன ஸம்மா ஹேதுனா நயேன நிப்³பி³தா³னுபஸ்ஸனாய நிப்³பி³ந்த³ந்தோ உக்கண்ட²ந்தோ, விராகா³னுபஸ்ஸனாய விரஜ்ஜந்தோ, படிஸங்கா²னுபஸ்ஸனாய முச்சனஸ்ஸ உபாயங் கத்வா விமுச்சமானோ, அதி⁴மொக்க²வஸேன வா விமுச்சமானோ ஸன்னிட்டா²னங் குருமானோதி அத்தோ². உத³யப்³ப³யேஹி பரிச்சி²ந்தி³த்வா புப்³ப³ந்தாபரந்தத³ஸ்ஸனேன ஸம்மா பரியந்தத³ஸ்ஸாவீ. ஸம்மத³த்த²ங் அபி⁴ஸமேச்சாதி ஸம்மா ஸபா⁴க³த்த²ங் ஞாணேன அபி⁴ஸமாக³ந்த்வா. து³க்க²ஸ்ஸந்தகரோ ஹோதீதி ஸகலவட்டது³க்க²ஸ்ஸ பரியந்தங் பரிவடுமங் கரோ ஹோதி.
Ekadhammeti ekasmiṃ dhamme. Iminā uddeso dassito. Parato katamasmiṃ ekadhammeti iminā pañho dassito. Sabbe sattā āhāraṭṭhitikāti idaṃ panettha veyyākaraṇaṃ. Sesesupi eseva nayo. Sammā nibbindamānotiādīsu pana sammā hetunā nayena nibbidānupassanāya nibbindanto ukkaṇṭhanto, virāgānupassanāya virajjanto, paṭisaṅkhānupassanāya muccanassa upāyaṃ katvā vimuccamāno, adhimokkhavasena vā vimuccamāno sanniṭṭhānaṃ kurumānoti attho. Udayabbayehi paricchinditvā pubbantāparantadassanena sammā pariyantadassāvī. Sammadatthaṃ abhisameccāti sammā sabhāgatthaṃ ñāṇena abhisamāgantvā. Dukkhassantakaro hotīti sakalavaṭṭadukkhassa pariyantaṃ parivaṭumaṃ karo hoti.
ஸப்³பே³ ஸத்தாதி காமப⁴வாதீ³ஸு ஏகவோகாரப⁴வாதீ³ஸு ச ஸப்³ப³ப⁴வேஸு ஸப்³பே³ ஸத்தா. ஆஹாரட்டி²திகாதி ஆஹாரதோ டி²தி ஏதேஸந்தி ஆஹாரட்டி²திகா. இதி ஸப்³ப³ஸத்தானம்பி டி²திஹேது ஆஹாரோ நாம ஏகோ த⁴ம்மோ, தஸ்மிங் ஏகத⁴ம்மே. நனு ச ஏவங் ஸந்தே யங் வுத்தங் – ‘‘அஸஞ்ஞஸத்தா தே³வா அஹேதுகா அனாஹாரா அப²ஸ்ஸகா’’திஆதி³ (விப⁴॰ 1017), தங் விருஜ்ஜ²தீதி. ந விருஜ்ஜ²தி. தேஸஞ்ஹி ஜா²னங் ஆஹாரோ ஹோதி. ஏவங் ஸந்தேபி ‘‘சத்தாரோமே, பி⁴க்க²வே, ஆஹாரா’’தி (ஸங்॰ நி॰ 2.11) இத³ங் விருஜ்ஜ²தீதி. இத³ம்பி ந விருஜ்ஜ²தி. ஏதஸ்மிஞ்ஹி ஸுத்தே நிப்பரியாயேன ஆஹாரலக்க²ணா த⁴ம்மா ஆஹாராதி வுத்தா, இத⁴ பன பரியாயேன பச்சயோ ஆஹாரோதி வுத்தோ. ஸப்³ப³த⁴ம்மானஞ்ஹி பச்சயோ லத்³து⁴ங் வட்டதி. ஸோ ச யங் யங் ப²லங் ஜனேதி, தங் தங் ஆஹரதி நாம. தஸ்மா ஆஹாரோதி வுச்சதி. தேனேவாஹ – ‘‘அவிஜ்ஜம்பாஹங், பி⁴க்க²வே, ஸாஹாரங் வதா³மி, நோ அனாஹாரங். கோ ச, பி⁴க்க²வே, அவிஜ்ஜாய ஆஹாரோ? பஞ்ச நீவரணாதிஸ்ஸ வசனீய’’ந்தி (அ॰ நி॰ 10.61). அயங் இத⁴ அதி⁴ப்பேதோ. ஏதஸ்மிஞ்ஹி பச்சயாஹாரே க³ஹிதே பரியாயாஹாரோபி நிப்பரியாயாஹாரோபி ஸப்³போ³ க³ஹிதோவ ஹோதி.
Sabbe sattāti kāmabhavādīsu ekavokārabhavādīsu ca sabbabhavesu sabbe sattā. Āhāraṭṭhitikāti āhārato ṭhiti etesanti āhāraṭṭhitikā. Iti sabbasattānampi ṭhitihetu āhāro nāma eko dhammo, tasmiṃ ekadhamme. Nanu ca evaṃ sante yaṃ vuttaṃ – ‘‘asaññasattā devā ahetukā anāhārā aphassakā’’tiādi (vibha. 1017), taṃ virujjhatīti. Na virujjhati. Tesañhi jhānaṃ āhāro hoti. Evaṃ santepi ‘‘cattārome, bhikkhave, āhārā’’ti (saṃ. ni. 2.11) idaṃ virujjhatīti. Idampi na virujjhati. Etasmiñhi sutte nippariyāyena āhāralakkhaṇā dhammā āhārāti vuttā, idha pana pariyāyena paccayo āhāroti vutto. Sabbadhammānañhi paccayo laddhuṃ vaṭṭati. So ca yaṃ yaṃ phalaṃ janeti, taṃ taṃ āharati nāma. Tasmā āhāroti vuccati. Tenevāha – ‘‘avijjampāhaṃ, bhikkhave, sāhāraṃ vadāmi, no anāhāraṃ. Ko ca, bhikkhave, avijjāya āhāro? Pañca nīvaraṇātissa vacanīya’’nti (a. ni. 10.61). Ayaṃ idha adhippeto. Etasmiñhi paccayāhāre gahite pariyāyāhāropi nippariyāyāhāropi sabbo gahitova hoti.
தத்த² அஸஞ்ஞீப⁴வே பச்சயாஹாரோ லப்³ப⁴தி. அனுப்பன்னே ஹி பு³த்³தே⁴ தித்தா²யதனே பப்³ப³ஜிதா வாயோகஸிணே பரிகம்மங் கத்வா சதுத்த²ஜ்ஜா²னங் நிப்³ப³த்தெத்வா ததோ வுட்டா²ய ‘‘தி⁴ சித்தங், தி⁴ வதேதங் சித்தங், சித்தஸ்ஸ நாம அபா⁴வோயேவ ஸாது⁴. சித்தஞ்ஹி நிஸ்ஸாய வத⁴ப³ந்தா⁴தி³பச்சயங் து³க்க²ங் உப்பஜ்ஜதி. சித்தே அஸதி நத்தே²த’’ந்தி க²ந்திங் ருசிங் உப்பாதெ³த்வா அபரிஹீனஜ்ஜா²னா காலங் கத்வா அஸஞ்ஞீப⁴வே நிப்³ப³த்தந்தி. யோ யஸ்ஸ இரியாபதோ² மனுஸ்ஸலோகே பணிஹிதோ அஹோஸி, ஸோ தேன இரியாபதே²ன நிப்³ப³த்தித்வா சித்தரூபஸதி³ஸோ ஹுத்வா பஞ்ச கப்பஸதானி திட்ட²தி. எத்தகங் அத்³தா⁴னங் ஸயிதோ விய ஹோதி. ஏவரூபானம்பி ஸத்தானங் பச்சயாஹாரோ லப்³ப⁴தி. தே ஹி யங் ஜா²னங் பா⁴வெத்வா நிப்³ப³த்தா, ததே³வ நேஸங் பச்சயோ ஹோதி. யதா² ஜியாவேகே³ன கி²த்தஸரோ யாவ ஜியாவேகோ³ அத்தி², தாவ க³ச்ச²தி. ஏவங் யாவ ஜா²னபச்சயோ அத்தி², தாவ திட்ட²ந்தி. தஸ்மிங் நிட்டி²தே கீ²ணவேகோ³ விய ஸரோ பதந்தி. சவனகாலே ச தேஸங் ஸோ ரூபகாயோ அந்தரதா⁴யதி, காமாவசரஸஞ்ஞா உப்பஜ்ஜதி, தேன ஸஞ்ஞுப்பாதே³ன தே தே³வா தம்ஹா காயா சுதாதி பஞ்ஞாயந்தி.
Tattha asaññībhave paccayāhāro labbhati. Anuppanne hi buddhe titthāyatane pabbajitā vāyokasiṇe parikammaṃ katvā catutthajjhānaṃ nibbattetvā tato vuṭṭhāya ‘‘dhi cittaṃ, dhi vatetaṃ cittaṃ, cittassa nāma abhāvoyeva sādhu. Cittañhi nissāya vadhabandhādipaccayaṃ dukkhaṃ uppajjati. Citte asati nattheta’’nti khantiṃ ruciṃ uppādetvā aparihīnajjhānā kālaṃ katvā asaññībhave nibbattanti. Yo yassa iriyāpatho manussaloke paṇihito ahosi, so tena iriyāpathena nibbattitvā cittarūpasadiso hutvā pañca kappasatāni tiṭṭhati. Ettakaṃ addhānaṃ sayito viya hoti. Evarūpānampi sattānaṃ paccayāhāro labbhati. Te hi yaṃ jhānaṃ bhāvetvā nibbattā, tadeva nesaṃ paccayo hoti. Yathā jiyāvegena khittasaro yāva jiyāvego atthi, tāva gacchati. Evaṃ yāva jhānapaccayo atthi, tāva tiṭṭhanti. Tasmiṃ niṭṭhite khīṇavego viya saro patanti. Cavanakāle ca tesaṃ so rūpakāyo antaradhāyati, kāmāvacarasaññā uppajjati, tena saññuppādena te devā tamhā kāyā cutāti paññāyanti.
யே பன தே நேரயிகா நேவ வுட்டா²னப²லூபஜீவீ, ந புஞ்ஞப²லூபஜீவீதி வுத்தா, தேஸங் கோ ஆஹாரோதி? தேஸங் கம்மமேவ ஆஹாரோ . கிங் பஞ்ச ஆஹாரா அத்தீ²தி? பஞ்ச, ந பஞ்சாதி இத³ங் ந வத்தப்³ப³ங், நனு ‘‘பச்சயோ ஆஹாரோ’’தி வுத்தமேதங். தஸ்மா யேன கம்மேன நிரயே நிப்³ப³த்தந்தி, ததே³வ தேஸங் டி²திபச்சயத்தா ஆஹாரோ ஹோதி. யங் ஸந்தா⁴ய இத³ங் வுத்தங் – ‘‘ந ச தாவ காலங் கரோதி, யாவ ந தங் பாபகம்மங் ப்³யந்தீ ஹோதீ’’தி (ம॰ நி॰ 3.250, 268; அ॰ நி॰ 3.36).
Ye pana te nerayikā neva vuṭṭhānaphalūpajīvī, na puññaphalūpajīvīti vuttā, tesaṃ ko āhāroti? Tesaṃ kammameva āhāro . Kiṃ pañca āhārā atthīti? Pañca, na pañcāti idaṃ na vattabbaṃ, nanu ‘‘paccayo āhāro’’ti vuttametaṃ. Tasmā yena kammena niraye nibbattanti, tadeva tesaṃ ṭhitipaccayattā āhāro hoti. Yaṃ sandhāya idaṃ vuttaṃ – ‘‘na ca tāva kālaṃ karoti, yāva na taṃ pāpakammaṃ byantī hotī’’ti (ma. ni. 3.250, 268; a. ni. 3.36).
கப³ளீகாராஹாரங் ஆரப்³பா⁴பி செத்த² விவாதோ³ ந காதப்³போ³. முகே² உப்பஜ்ஜனகே²ளோபி ஹி தேஸங் ஆஹாரகிச்சங் ஸாதே⁴தி. கே²ளோ ஹி நிரயே து³க்க²வேத³னீயோ ஹுத்வா பச்சயோ ஹோதி, ஸக்³கே³ ஸுக²வேத³னியோ. இதி காமப⁴வே நிப்பரியாயேன சத்தாரோ ஆஹாரா, ரூபாரூபப⁴வேஸு ட²பெத்வா அஸஞ்ஞே ஸேஸானங் தயோ, அஸஞ்ஞானஞ்சேவ அவஸேஸானஞ்ச பச்சயாஹாரோதி இமினா ஆகாரேன ஸப்³பே³ ஸத்தா ஆஹாரட்டி²திகாதி வேதி³தப்³பா³. தத்த² சத்தாரோ ஆஹாரோ யோ வா பன கோசி பச்சயாஹாரோ து³க்க²ஸச்சங், ஆஹாரஸமுட்டா²பிகா புரிமதண்ஹா ஸமுத³யஸச்சங், உபி⁴ன்னங் அப்பவத்தி நிரோத⁴ஸச்சங், நிரோத⁴ப்பஜானநா பஞ்ஞா மக்³க³ஸச்சந்தி ஏவங் சதுஸச்சவஸேன ஸப்³ப³வாரேஸு யோஜனா காதப்³பா³.
Kabaḷīkārāhāraṃ ārabbhāpi cettha vivādo na kātabbo. Mukhe uppajjanakheḷopi hi tesaṃ āhārakiccaṃ sādheti. Kheḷo hi niraye dukkhavedanīyo hutvā paccayo hoti, sagge sukhavedaniyo. Iti kāmabhave nippariyāyena cattāro āhārā, rūpārūpabhavesu ṭhapetvā asaññe sesānaṃ tayo, asaññānañceva avasesānañca paccayāhāroti iminā ākārena sabbe sattā āhāraṭṭhitikāti veditabbā. Tattha cattāro āhāro yo vā pana koci paccayāhāro dukkhasaccaṃ, āhārasamuṭṭhāpikā purimataṇhā samudayasaccaṃ, ubhinnaṃ appavatti nirodhasaccaṃ, nirodhappajānanā paññā maggasaccanti evaṃ catusaccavasena sabbavāresu yojanā kātabbā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 7. பட²மமஹாபஞ்ஹாஸுத்தங் • 7. Paṭhamamahāpañhāsuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 7. பட²மமஹாபஞ்ஹஸுத்தவண்ணனா • 7. Paṭhamamahāpañhasuttavaṇṇanā
