| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
7. පඨමමහාසමුද්‌දසුත්‌තං
7. Paṭhamamahāsamuddasuttaṃ
1127. ‘‘සෙය්‍යථාපි , භික්‌ඛවෙ, පුරිසො මහාසමුද්‌දතො ද්‌වෙ වා තීණි වා උදකඵුසිතානි උද්‌ධරෙය්‍ය. තං කිං මඤ්‌ඤථ, භික්‌ඛවෙ, කතමං නු ඛො බහුතරං – යානි ද්‌වෙ වා තීණි වා උදකඵුසිතානි උබ්‌භතානි, යං වා මහාසමුද්‌දෙ උදක’’න්‌ති? ‘‘එතදෙව, භන්‌තෙ, බහුතරං, යදිදං – මහාසමුද්‌දෙ උදකං; අප්‌පමත්‌තකානි ද්‌වෙ වා තීණි වා උදකඵුසිතානි උබ්‌භතානි. සඞ්‌ඛම්‌පි න උපෙන්‌ති, උපනිධම්‌පි න උපෙන්‌ති, කලභාගම්‌පි න උපෙන්‌ති මහාසමුද්‌දෙ උදකං උපනිධාය ද්‌වෙ වා තීණි වා උදකඵුසිතානි උබ්‌භතානී’’ති. ‘‘එවමෙව ඛො, භික්‌ඛවෙ, අරියසාවකස්‌ස…පෙ.… යොගො කරණීයො’’ති. සත්‌තමං.
1127. ‘‘Seyyathāpi , bhikkhave, puriso mahāsamuddato dve vā tīṇi vā udakaphusitāni uddhareyya. Taṃ kiṃ maññatha, bhikkhave, katamaṃ nu kho bahutaraṃ – yāni dve vā tīṇi vā udakaphusitāni ubbhatāni, yaṃ vā mahāsamudde udaka’’nti? ‘‘Etadeva, bhante, bahutaraṃ, yadidaṃ – mahāsamudde udakaṃ; appamattakāni dve vā tīṇi vā udakaphusitāni ubbhatāni. Saṅkhampi na upenti, upanidhampi na upenti, kalabhāgampi na upenti mahāsamudde udakaṃ upanidhāya dve vā tīṇi vā udakaphusitāni ubbhatānī’’ti. ‘‘Evameva kho, bhikkhave, ariyasāvakassa…pe… yogo karaṇīyo’’ti. Sattamaṃ.
